1. Uzye Davidi uvwanga uli pali Yeova, nupya i cani calenzile auvwa vivyo?

UMWENE DAVIDI walemvile ukuti: ‘Yeova wene umukulu nupya uwakulumbanya wakwe cimwi.’ (Masa. 145:3) Watemilwe sana Yeova, nupya ukutemwa kuno wamutemilwe kwalenzile amulumbanya ‘umu cilongano.’ (Masa. 22:22; 40:5) Ukwaula ukutwisika mwatemwa Yeova nupya mukazumilizya amazwi yano Davidi walanzile aakuti: ‘We Yeova Leza wakwe Izlaeli icikolwe citu, si antu yakulumbanye umuyayaya.’—1 Mila. 29:10-13.

2. (a) Tungacita uli pakuti twalumbanya Yeova? (b) Iintazi ci zino yamwi yakakwata nupya ivyani vino tumalandapo?

² Ndakai, inzila yonga ino tungalumbanyizizyamo Yeova u kwasukapo pa kulongana. Nomba aina na ya nkazi aingi yakakwata intazi. Yakalonda ukwasuka nomba yakavilwa pa mulandu ni ntete. Yangacita uli? Nupya i vyani vingatwazwa swensi ukwasuka ivyasuko ivyakukomelezya? Lino tutatala twasuka mauzyo yayo, lekini tulande pa vintu vitatu ivikalenga twaasukapo pa kulongana.

3-5. (a) Wakwe vino calondololwa pa Ayebulai 13:15, u mulandu ci uno tukaasukilapo pa kulongana? (b) Uzye swensi tulinzile ukupeela ivyasuko ivili vimwi? Londololini.

³ Yeova wapeela swensi isyuko lya kulumumbanya. (Masa. 119:108) Ivyasuko vitu pa kulongana vyaya pa ‘mpolelwa ya pa milomo’ itu ino tukapeela kuli Leza nupya pasi angatupeelelako impolelwa iyo. (Welengini Ayebulai 13:15.) Uzye Yeova akalonda twapeela impolelwa ili imwi na yauze, nanti  ukwasukapo wakwe vino yauze yakaasuka? Awe foo, asi vino akalonda.

⁴ Yeova wamanya ukuti twapusanapusana muli vino tungakwanisya ukuomba ni vikatucitikila vyapusana, nupya akataizya sana pa mpolelwa ino swensi cila muntu tukakwanisya ukumupeela. Elenganyini pa misango ipusanepusane iya mpolelwa ino wapokeelelanga ukufuma uku ina Izlaeli. Yamwi yakwanisyanga ukupeela imfwele nanti imbuzi. Nomba aina Izlaeli aali apiina yene yavilwanga fwandi yapeelanga sile “ivipeele viili nanti utwana twa nkunda twili.” Nupya ndi cakuti umwina Izlaeli atange akwanisye ukupeela ivyunyi viili, Yeova wapokeelelanga “usu utonyoleke kulingana ni cipimo cakwe kilogalamu wenga.” (Levi 5:7, 11) Usu waali utonte umutengo, nomba nanti ciye vivyo Yeova wataizyanga impolelwa iyo, cikulu sile ndi cakuti “utonyoleke.”

⁵ Leza witu uwa cikuuku ataasenuka. Ndi cakuti tukwasuka, asitupatikizya ukuti swensi tuye acenjele umu kuvwanga wakwe Apolo nanti ukuya wakwe Paulo uwapindululanga antu mu melenganyo. (Mili. 18:24; 26:28) Cino Yeova akalonda sile i cakuti twapeela ivyasuko ivisuma ukulingana na pano tungapezya. Iusyini mukamfwilwa uwapeezile utumakowili twili utunono. Wacindime sana kuli Yeova pa mulandu wakuti wapeezile ukulingana na pano angapezya.—Luka 21:1-4.

6. (a) Wakwe vino pa Ayebulai 10:24, 25 pakalanda, uzye vino yauze yakaasuka pa kulongana vingatwazwa uli? (b) Uzye tukalanga uli ukuti tukataizya pa vyasuko vya kukomelezya?

⁶ Tukakomelezya yauze ndi cakuti tukwasukapo. (Welengini Ayebulai 10:24, 25.) Swensi kwene tukaipakizya ukuvwa kuli vino yauze yakwasukapo. Tukaipakizya ivyasuko iviipi vino acance yakaasuuka ukufuma pansi ya mwenzo. Nupya tukakomeleziwa ndi tuvwa umwi akwasuka pa cumi cino wacisambilile likwene. Nupya tukataizya yonsi aakasipa lino yakwasukapo nanti icakuti yakwata insonyi nanti alino yakusambilila ululimi. (1 Tesa. 2:2) Uzye tungayataizya uli pali vino yakaombesya? Tungayataizya pa vyasuko vyao ivisuma ndi twamala ukulongana. Inzila yuze ino tungalangilamo ukuti tukataizya u kwasukapo naswe kwene. Tusikomeleziwa sile ndi tukulongana lelo naswe kwene tukakomelezya yauze.—Loma 1:11, 12.

7. Uzye ukwasukapo kukatwazwa uli?

 ⁷ Ivintu vikatuzipila sweineco kwene ndi tukwasukapo. (Eza. 48:17) Tukacita uli vivyo? Ica kutandikilako, ndi cakuti tukulonda ukuya asukapo, cilalenga tupekanyizizye limwi ukulongana. Ndi cakuti twapekanya ningo, tukauvwikisya Baibo. Nupya ndi tuvwikisya vino Baibo ikalanda cilatwazwa ukuomvya ivintu vino tukusambilila. Cakwe ciili, tulaipakizya sana ukulongana pa mulandu wakuti tukwasukapo. Cakwe citatu, pa mulandu wakuti cikalondekwa ukuombesya pakuti twasuke, ilingi tukaiusya vino itwasukapo ala itwinuka mpiti uku kulongana.

8-9. (a) Wakwe vino pali Malaki 3:16 pakalanda, mukwelenganya ukuti Yeova akauvwa uli ndi tukwasukapo? (b) Iintazi ci zino yamwi yakakwata?

⁸ Tukazanzya Yeova lino tukulanda pa utailo witu. Tungasininkizya ukuti Yeova akauvwa lino tukulanda nupya akataizya sana pali vino tukaezya na maka ukwasukapo pa kulongana. (Welengini Malaki 3:16.) Akalanga ukuti akataizya lino akutupaala ndi cakuti tukwezya na maka ukumuzanzya.—Malaki 3:10.

⁹ Fwandi twakwata imilandu iingi yakwasukilapo pa kulongana. Nomba nanti ciye vivyo yamwi yangauvwa intete ukukatusya ikasa. Nga vino namwe mukauvwa mutalinzile ukutoovoka. Lekini tulande pa visinte vimwi vya muli Baibo, ivyacitikile yamwi, alino na vimwi vino tungacita ivingatwazwa swensi ukwezya na maka ukwasukapo pa kulongana.

10. (a) Iintete zyakwe cani zino sweingi twakwata? (b) Ndi cakuti mukauvwa intete zya kwasukapo ala i miyele ci ino mukweti?

¹⁰ Uzye amaka yakasila cila nsita lino mukulonda ukukatusya ikasa pakuti mwasukepo? Nga vino caya, mutaya mwenga. Icisinka i cakuti sweingi tukauvwa intete zya kwasuka. Pakuti mucimvye intete zizyo izikalenga mutaasukapo, mulinzile ukumanya ningo icikalenga mwauvwa intete. Uzye mukatiina ukuti mumailila vino imukulonda ukulanda nanti ukuti mutamaasuka icasuko icikulondekwa? Uzye mukasakamala ukuti icasuko cinu citamaya ningo wakwe vino yauze yakaasuka?  Intete zizyo zingamulangilila ukuti mukweti miyele imwi isuma. Cikulangilila ukuti mwaicefya nupya mukalola yauze ukuti yacindama ukumuluta. Yeova watemwa ukuicefya. (Masa. 138:6; Filipi 2:3) Nomba Yeova akalonda ukuti mwamulumbanya nu kukomelezya aina na ya nkazi pa kulongana. (1 Tesa. 5:11) Wamutemwa nupya alamulenga musipe.

11. I vyani vino Baibo yalandapo ivingatwazwa?

¹¹ Elenganyini pali vimwi vino Baibo ikatwiusyako. Baibo ikati swensi kwene tukaluvyanya muli vino tukalanda ni nzila ino tukavilandilamo. (Yako. 3:2) Yeova asienekela ukuti tuye amalilike, na ina na ya nkazi kwene yasienekela vivyo. (Masa. 103:12-14) Aalupwa itu nupya yatutemwa. (Mako 10:29, 30; Yoa. 13:35) Yamanya ukuti ivyasuko vitu insita zimwi vitanga viye wakwe vino itukulonda ukulanda.

12-13. I vyani vino tungasambilila kuli Neemiya na Yona?

¹² Elenganyini pali vimwi vino Baibo yalanda ivyacitikile yamwi ivingatwazwa ukuta ukuya ni ntete. Iusyini Neemiya. Waombelanga umwisano lya mwene wa maka. Neemiya wali sana nu ulanda pa mulandu wakuti uvwile ukuti iviumba ni mpongolo zya Yelusalemu vyononiike. (Neem. 1:1-4) Elenganyini pali vino uvwile intete lino umwene wamuzizye ukuti alande icalenzile aaloleka uwa ulanda. Neemiya wapefile zuwa zuwa nupya waswike vino yamuzizye. Lyene umwene wazwilizye antu yakwe Leza. (Neem. 2:1-8) Elenganyini pali Yona. Lino Yeova wanenyile Yona ukuya landa na ina Ninive, uvwile sana intete icakuti utwike aya uku ntunga yuze. (Yona 1:1-3) Nomba pa mulandu wakuti Yeova wamwazwilizye, Yona waile nu kuya simikila aina Ninive. Na mazwi yano walanzile yazwilizye sana aina Ninive. (Yona 3:5-10) Twasambilila kuli Neemiya ukuti cacindama ukupepa lino tutatala twasuka. Kuli Yona nako twasambilila ukuti Yeova angatwazwa ukumuombela asi mulandu ni ntete zino tukweti. Uzye ukwasuka pa kulongana kungatala wa kusimikila pa upinguzi uku ina Ninive?

¹³ I vyani vino tukacita ivingatwazwa ukwasuka ivyasuko ivyakukomelezya? Lekini tulandeko pali vimwi.

14. U mulandu ci uno tulinzile ukupekanyizizya limwi ukulongana, nupya alilaci lino tungacita vivyo?

¹⁴ Mwapekanya ukulongana konsi. Ndi cakuti mwapanga ukuti mulaasukapo pa kulongana mwapekanya ningo, cico cilalenga mukaye asipe lino mukwasukapo. (Mapi. 21:5) Swensi kwene twakwata insita ino twatantika iyakupekanyizizyapo ukulongana. Ya Eloise, ya mukamfwilwa aali ni myaka kuma 80, yakatandika ukupekanya Isambililo Lya Lupungu Lwa Mulinzi ku kutandika kwa mulungu. Yalanzile yati: “Nkaipakizya sana ukulongana ndi napekanyizizya limwi.” Nkazi Joy aakaomba incito ya mu uteeko, akaapatulako insita imwi pakuti apekanye Ulupungu. Watiile: “Cikangangukila ukwiusya ndi napekanya lino ukulongana kutatala kwafika.” Mwina  Ike, eluda uwapamviwa sana nupya painiya, watiile: “Cikangangukila ukupatulako akasita kanono ukupekanya umu mulungu onsi ukuluta ukupekanya pa wanda onga insita ikulu.”

15. I vyani vino mulinzile ukucita lino mukupekanya ukulongana?

¹⁵ I vyani vino mungacita lino mukupekanya ukulongana? Lyonsi lino mukutandika ukupekanya mwatandika ni pepo, ukulenga Yeova ukuti amupeele umupasi wa muzilo. (Luka 11:13; 1 Yoa. 5:14) Lyene mwapitulukamo. Mwalola vino umutwe ukulandapo, utumitwe utunono utulimo, ivikope ivilimo, nu tumbokosi twakupitulukamo. Lyene lino mwatandika ukupekanya, mwaezya ukuwelenga malembelo aingi ali mu mapalagalafu. Mwaelenganya pali vino vikulandwapo nu kwika sana amano uku visinka vino mukulonda ukuya asukapo. Ndi mwapekanya ningo, cilamwazwa sana nupya cilaamwangukila ukwasukapo.—2 Kol. 9:6.

16. I viombelo ci vino mwakwata, nupya mukaviomvya uli?

¹⁶ Ndi cakuti imukwata tabuleti nanti foni aakaya pa intaneti, mwaomvya JW Library ndi cakuti amuno yaya umu lulimi lwinu. Yeova watupeela ivombelo vya pa intaneti ivingatwazwa ukupekanya ukulongana ukupitila umwi uvi lyakwe. JW Library^® ikatwazwa ukukopa impapulo zya kusambililamo pali foni witu nanti tabuleti. Lyene tungasambilila ukupitila umu kuwelenga nanti ukuvwa uku mpapulo izipusanepusane pa nsita ili yonsi konsi kuno tuli. Yamwi yakaomvya JW Library ukuisambilizya pa nsita ya kupuza lino yali uku ncito nanti uku sukulu nanti lino yali pa lwendo. Iviombelo ivili wakwe Watchtower Library na Watchtower LAIBULALE WA PA INTANETI^™ vikatwazwa ukuti citwangukile ukulondelezya ivyeo vino tukulonda ukumanya ningo sana.

17. (a) U mulandu ci uno cazipila ukupekanya ivyasuko ivingi? (b) I vyani vino mwasambilile muli vidyo yakuti Uye Cuza Wako Yeova—Uwapekanya Ivyasuko?

¹⁷ Mwapekanya ivyasuko ivingi mwi sambililo lyonga na lyonga. U mulandu ci? A pa mulandu wakuti asi lyonsi lino yangamusonta lino mwimika ikasa. Yamwi ilingi yakakatusizya pamwi makasa, nupya katungulula angasoololapo wenga. Pakuti ukulongana kusile mu nsita, katungulula alinzile ukulinga antu akwasukapo pa visinka vimwi. Fwandi mutalinzile ukusoka nanti ukutoovoka ndi cakuti yatamusonsilepo zuwa pi sambililo. Ndi cakuti imupekanya ivyasuko ivingi, mulakwata masyuko aingi akwasukapo pi sambililo. Icasuko conga cino mungapekanya u kuwelenga ilembelo. Nomba ndi cakuti mungakwanisya mwapekanya icasuko umu mazwi inu. *

18. U mulandu ci uno tulinzile ukwasukila ivyasuko iviipi?

¹⁸ Mwaasuka ivyasuko iviipi. Ilingi  ivyasuko ivikakomelezya vikaya iviipi nupya ivyanguke. Fwandi mwaimika uyo wa kwasuka ivyasuko iviipi. Mwaezya ukuvipimpazya pakuti mwaasuka umu masekodi 30. (Mapi. 10:19; 15:23) Ndi cakuti ampiti lino mwatandike ukwasuka, iicicindama ukuti mwaleka yauze yasambililako kuli mwemwe ukwasuka ivyasuko iviipi. Ndi cakuti mukaasuka ivyasuko ivitali, yauze yangauvwa intete yatandika ukwelenganya ukuti limwi yatange yasuke wakwe vino mukaasuka. Nupya, ivyasuko iviipi vikalenga yauze ukwasukapo. Sana sana ndi cakuti yatandikilapo ukumusonta, mwaasuka ivyasuko iviipi nupya ukulingana ni cuzyo cino iyuzya. Mutaalonda ukwasuka vyonsi ivili muli palagalafu. Lino icisinka icikulandwapo muli palagalafu calandwapo, mungalandako pa visinka vyuze.—Lolini kambokosi kakuti: “ I Vyani Vino Ningasukapo?”

19. Uzye katungulula angamwazwa uli, nomba i vyani vino mulinzile ukucita?

¹⁹ Mwanena katungululula palagalafu ino mukulonda ukwiza asukapo. Ndi cakuti mukulonda ukucita vivyo, mulinzile ukunenela limwi katungulula lino ukulongana kutatala kwatandika. Ndi insita yakwasuka muli palagalafu wiyo yafika, mwaimika zuwa ikasa nupya mwakatusya sana pakuti katungulula amulole.

20. Uzye ukulongana kwakolana uli ni vya kulya vino tungaliila pamwi na ya cuza itu?

²⁰ Mwalola ukulongana wa vyakulya vino mungaliila pamwi na ya cuza inu. Elenganyini ukuti ya cuza inu yamwi umu cilongano cino mwayamo yapekanya ukuti mukaliile pamwi ivya kulya nupya yamulenga ukuti mukapekanyeko utwa kulya tumwi utwangupale, uzye mungacita uli? Limwi mungasakamala, nomba mungezya na maka ukupekanya vino yonsi yangaipakizya. Yeova wino akatwama uku kulongana watupekanyizizya ivintu visuma pa kulongana. (Masa. 23:5; Mate. 24:45) Nupya akatemwa sana ndi cakuti tukwezya na maka ukwasuka ivyasuko iviipi. Fwandi mwapekanya ningo nu kwasukapo ukufika pano mungapezya. Fwandi mutalaalya sile ivya kulya vino Yeova wapekanya lelo mulaalonda nu kuleta mawila aakwankanyako yauze umu cilongano.