CIPANDE CA KUSAMBILILAMO 5
Imiyele Iikalenga Twalondesya Ukuya Umu Kulongana
‘Twalililini ukukosoola imfwa ya mwene ukufika lino aliza.’—1 KOL. 11:26.
ULWIMBO 18 Tukataizya Pali Vino Twakululwa
VINO TUMASAMBILILAPO *
1-2. (a) I vyani vino Yeova akalola lino antu mamilyoni yakongana pamwi uku Cakulya ca Manguzi Ica Mwene? (Lolini icikope icili pa nkupo.) (b) I vyani vino tumasambilila umu cipande cii?
ELENGANYINI pali vino Yeova akalola lino antu mamilyoni yakongana pamwi uku Cakulya ca Manguzi Ica Mwene. Asilola sile ukuvula kwa yantu, lelo akamanya wensi uwatazanwako. Akalola yonsi akazanwako cila mwaka. Pali yayo paaya na yano yakaezya na maka ukuzanwako asi mulandu ni ntazi zino yakupitamo. Yauze yene yasizanwa lyonsi uku kulongana kuze, nomba yakalola ukuti ukuya uku Ciusyo i cintu icicindame cino yalinzile ukucita. Nupya Yeova akalola yonsi atiiza uku Ciusyo pa muku wakutandikilako pakuti yalole sile vino ukulongana kuko kukaya.
2 Ukuya kwene Yeova akatemwa sana ukulola antu aingi yazanwa uku Ciusyo. (Luka 22:19) Nomba Yeova asiika sile amano uku mpendwa ya antu atiiza. Lelo akaika sana amano uku mulandu ukalenga antu yazanwa uku kulongana. Umu cipande cii tumalanda pi uzyo ilicindame sana ilyakuti: U mulandu ci uno tusiila sile uku Ciusyo lelo tukaya nu ku kulongana kuze ukukayako umu mulungu kuno Yeova wapekanyizizya yonsi amutemwa?
Antu aingi cuze umu nsi yonsi yakupokeelelwa uku Cakulya ca Manguzi Ica Mwene (Lolini mapalagalafu 1-2)
UKUICEFYA KUKALENGA TWAYA UMU KULONGANA
3-4. (a) U mulandu ci uno tukaila umu kulongana? (b) Ndi cakuti twaya umu kulongana tukalanga ukuti twaya uli? (c) Ukulingana ni vyalembwa pali 1 Kolinto 11:23-26, u mulandu ci uno tulinzile ukuzanilwa lyonsi uku Ciusyo?
3 Icintu icicindame sana cino tukaila umu kulongana u kupepa Yeova. Nupya a pa mulandu wakuti ali kuno tukasambiliziwa na Yeova. Antu acilumba yakakana ukuti yatanga yasambiliziwe icili consi. (3 Yoa. 9) Nomba swemo, tukalondesya ukusambiliziwa na Yeova ni uvi lyakwe lino akaomvya.—Eza. 30:20; Yoa. 6:45.
4 Ndi cakuti twaya uku kulongana tukalanga ukuti twaicefya nupya tukaitemelwa ukusambiliziwa. Pa wanda wa Ciusyo ca mfwa yakwe Yesu usiku, tukaya uku kulongana kuu ukucindame sana asi pa mulandu wakuti tufwile sile ukuyako lelo a pa mulandu wakuti twaicefya nupya tukauvwila isunde lyakwe Yesu ilyakuti: “Mwacita cii pa kunjiusya.” (Welengini 1 Kolinto 11:23-26.) Ukulongana kuu kukatwazwa ukukomya upaalilo witu pa vya ku nkoleelo nu kutwiusyako vino Yeova watutemwa. Nomba Yeova wamanya ukuti tukalonda ukukomeleziwa ukucila pa muku onga umu mwaka. Fwandi akatupekanyizizya ukulongana kuu cila mulungu nu kutunena ukuti twayako lyonsi. Ukuicefya kukalenga twamuvwila. Tukasumba maawazi aingi cila mulungu ukupekanyizizya ukulongana nu kuzanwako.
5. U mulandu ci uno antu aicefye yakazumilila ndi Yeova wayama ukuti ayasambilizye?
5 Cila mwaka, antu aingi aicefya yakazumila ulwamo lwa kusambiliziwa na Yeova. (Eza. 50:4) Yakaipakizya ukuzanwa uku Ciusyo nu kutandika ukuya uku kulongana. (Zaka. 8:20-23) Swensi swemuno twaya umu cumi na akutandika likwene, tukatemwa ukusambiliziwa nu kutungululwa na Yeova ‘kazwa witu nupya katuula witu.’ (Masa. 40:17) Uzye kuli cino tungaipakizya nanti icacindama ukuluta ukuzumila ulwamo lwa kusambiliziwa na Yeova na Yesu umwanakwe wino watemwisya?—Mate. 17:5; 18:20; 28:20.
6. Uzye ukuicefya kwazwilizye uli umonsi umwi ukuzanwa uku Ciusyo?
6 Cila mwaka, tukaezya na maka ukwama antu aingi ukwizazanwa uku Ciusyo ca mfwa yakwe Yesu. Antu aingi aicefya yakazumila ulwamo lulo. Elenganyini pali cimwi icacitike. Pa myaka iingi umonsi umwi wapokelelanga utupepala twakwamilapo antu uku ciusyo, nomba wanenyile umwina uwamupeezile kapepala ukuti atalazanwako. Nomba umwina wazungwike ukulola umonsi wiya wingila umu Ng’anda ya Wene pa wanda wa Ciusyo amanguzi. Umonsi wii, watemilwe sana vino yamupokeliile icakuti watandike nu kuzanwa uku kulongana ukukayako cila mulungu. Nupya umwaka onsi uwalondeliilepo ataiile sile umu kulongana imiku itatu. I cani calenzile apingulepo ukutandika ukuya umu kulongana? Ukuicefya ukwalenzile asenule amano. Umwina uwamwamile walanzile ukuti: “Waicefya sana.” Yeova u wamile umonsi wii ukutandika ukumupepa nupya ndakai u mwina umuwatiziwe.—2 Sam. 22:28; Yoa. 6:44.
7. Uzye vino tukasambilila pa kulongana na vino tukawelenga muli Baibo vikatwazwa uli ukuya aicefye?
7 Vino tukasambilila pa kulongana na vino tukawelenga muli Baibo vikatwazwa ukuya aicefye. Umu kulongana kwa cila mulungu ukwa mu milungu iipalamile uku Ciusyo, ilingi tukasambilila sana pali vino Yesu wacitanga na vino waicefizye pa kupeela umi wakwe impolelwa. Nupya umu manda ya Ciusyo, cingazipa ndi cakuti tukuwelenga malyasi amuli Baibo aakalanda pali vino vyacitike lino Yesu atatala wafwa na pa kutuutuluka. Vino tukasambilila pa kulongana na vino tukawelenga pa malyasi yayo vikalenga twataizya sana pali vino Yesu waipeelisye pa mulandu witu. Tukamukolanya ukuya aicefye nu kucita ukulonda kwakwe Yeova na lino ivintu ivitutalila.—Luka 22:41, 42.
UKUSIPA KUKATWAZWA UKUYA UMU KULONGANA
8. Uzye Yesu walangizye uli ukuti wali umusipe?
8 Nupya tukaezya ukukolanya ukusipa kwakwe Yesu. Elenganyini pali vino walangiilile ukusipa ala kwasyala amanda anono ukuti afwe. Wamanyile ningo sana ukuti alwani yakwe yasya yakamuzewanye, ukumuuma nu kumukoma. (Mate. 20:17-19) Nomba nanti ciye vivyo waipeelisye ukufwa. Lino insita yafisile wanenyile alondezi yakwe acisinka yano wali nayo umu Getesemani ukuti: “Katukini, tuini twapita. Lolini! Umuntu amankoopa wapalama.” (Mate. 26:36, 46) Nupya lino akaliumba ka yantu asenzile ivyanzo kizile umu kumulema waile apa nkoleelo ailondolola, nupya anena asilika ukuti yaleke atumwa yapita. (Yoa. 18:3-8) Ala kuu kwali ukusipa ukukalamba sana kuno Yesu walanzile! Ndakai Aina Klistu apakwe na amu mfwele na zyuze yakaezya na maka ukuya asipe wakwe vino Yesu wali. Yakacita uli vivyo?
Ndi cakuti mwazanwa umu kulongana yauze yalalola vino mwasipa nupya yalakomeleziwa (Lolini mapalagalafu 9) *
9. (a) U mulandu ci uno tulinzile ukuyela asipe pakuti twaya lyonsi umu kulongana? (b) Uzye aina anyepwa pa mulandu nu utailo wao yakauvwa uli ndi yuvwa vino tukutwalilila ukuombela Yeova?
9 Pakuti tuzanwe uku kulongana lino ivintu ivitutalila tulinzile ukuya asipe. Aina yamwi na ya nkazi yakaya umu kulongana nanti icakuti yali nu ulanda, iyatoovolwa nanti yakulwalilila. Yauze yakazanwa umu kulongana nanti icakuti yakayakanya kuli ya lupwa nanti sile amu uteeko. Tale elenganyini panono pali vino aina anyepwa pa mulandu nu utailo wao yakakomeleziwa pa mulandu witu. (Ayeb. 13:3) Ndi cakuti yuvwa ukuti tukutwalilila ukuombela Yeova asi mulandu na mezyo yano tukupitamo, yakakomeleziwa sana ukutwalilila ukuya nu utailo ukome, ukuya asipe nu kutwalilila ukuya na ucisinka. Vivyo ivyacitikile nu mutumwa Paulo. Lino wali umu cifungo mu Loma wayanga sana nu luzango ndi uvwa ukuti aina yakuombela Leza ni cisinka. (Filipi 1:3-5, 12-14) Lino kwasile sile amanda anono ukuti Paulo afume umu cifungo nanti pa cisila sile ca kufuma, walembiile Ayebulai kalata. Muli kalata wiyo wakomelizye Aina Klistu yayo acisinka kutwalilila “kutemwana wa Ina Klistu.”—Ayeb. 10:24, 25; 13:1.
10-11. (a) Aaweni yano tulinzile ukwama uku Ciusyo? (b) U mulandu ci uwaya pali Efeso 1:7 uukatulenga ukuyama lyonsi?
10 Tukalanga ukusipa ndi twama ya lupwa, yano tukaomba nayo na ina mupalamano uku Ciusyo. U mulandu ci uno tukayamila? Tukataizya sana pali vino Yeova na Yesu yatucitila i cikalenga twalondesya nu kwama yauze ukuzanwa uku Ciusyo. Tukalonda ukuti nayo yasambilile vino yangacita pakuti “cikuuku” cakwe Yeova cino watulanga ukupitila umu mpolelwa ciyazwe.—Welengini Efeso 1:7; Umbw. 22:17.
11 Ndi cakuti tukulanga ukusipa lino tukuya umu kulongana, tukalanga imiyele na yuze icindame sana ino Leza na Yesu yakalanga umu nzila iziiyele.
UKUTEMWA KUKALENGA TWAYA UMU KULONGANA
12. (a) Uzye ukulongana kukatwazwa uli ukutemwa sana Yeova na Yesu? (b) Uzye ilembelo lyakwe 2 Kolinto 5:14, 15 likatukomelezya ukucita cani pakuti twakolanya Yesu?
12 Ukutemwa kuno twatemwa Yeova na Yesu u kukalenga twazanwa uku kulongana. Lyene vino tukasambilila pa kulongana vikalenga tutemelweko sana Yeova nu Mwanakwe. Pa kulongana lyonsi yakatwiusyako pali vino yatucitila. (Loma 5:8) Iciusyo cikatwiusyako ukutemwa kuno yatutemwa, na vino yatemwa yonsi aatatala yamanya vino impolelwa yacindama. Pa mulandu wakuti tukauvwa ningo sana tukaezya na maka ukukolanya Yesu muli vino tukacita cila wanda. (Welengini 2 Kolinto 5:14, 15.) Nupya tukalondesya ukulumbanya Yeova pa kutupeela impolelwa. Inzila yonga ino tukamulumbanyizizyamo u kwasukapo pa kulongana.
13. Uzye tungacita uli pa kulanga ukuti twatemwa Yeova nu mwanakwe? Londololini.
13 Tungalanga vino twatemwa Yeova nu mwanakwe ndi cakuti tukuitemelwa ukuipeelesya ukuta ivintu ivili vyonsi ivitacindime. Tulinzile ukuta ukucita ivintu vyonsi ivitacindime pakuti sile tuye uku kulongana. Umu vilongano ivingi yakakwata ukulongana konga umukasi ka mulungu lino aingi yakaya ala iyatonta sana. Lyene ukulongana kuze kukayako pa mpela ya mulungu lino antu yauze yakupuza. Uzye Yeova akalola ndi twaya umu kulongana nanti icakuti itutonta? Ee akalola sana. Nupya ndi cakuti tukucuula sana ali lino akataizya sana ukutemwa kuno tukalanga.—Mako 12:41-44.
14. Uzye Yesu watulangilile uli ivya kucita pa kulanga ukutemwa?
14 Yesu watulangilile ivya kucita pa kulanga ukutemwa. Wacisile vivyo lino waipeelisye ukufwila alondezi yakwe nu kucita ivintu vino yauze yakulonda ukucila vino akulonda umwineco. Wayanga na alondezi yakwe nanti icakuti watatonta. (Luka 22:39-46) Nupya wisile sana amano kuli vino angapeela yauze asi kuli vino yauze yangamupeela. (Mate. 20:28) Ndi cakuti twatemwa sana Yeova na ina tulaezya na maka yonsi ukuya uku Cakulya ca Manguzi Ica Mwene nu ku kulongana kuze ukwa pa cilongano.
15. Aaweni yano twikako sana amano ukwazwa?
15 Twaya umwi uvi lya Ina Klistu ya cumi sile atupu nupya tukaipakizya sana ukusumba insita ikulu ukwama apya ukwiza umu kulongana naswe. Nomba nanti ciye vivyo twika sana amano ukwazwa “alondezi yakwe Klistu” nomba yano yata ukusimikila nanti ukulongana. (Gala. 6:10) Tukalanga ukuti twayatemwa ndi cakuti tukuyakomelezya ukuzanwa uku kulongana sana sana uku Ciusyo. Wakwe Yeova na Yesu, tukauvwa ningo sana ndi cakuti twalola wino watiile ukusimikila nanti ukulongana wawela kuli Yeova Tata witu uwa kutemwa nupya Kacema witu.—Mate. 18:14.
16. (a) Tungacita uli pakuti twakomelezyanya, nupya vino tukasambilila pa kulongana vilatwazwa uli? (b) U mulandu ci uno caziipila ukwiusya amazwi yakwe Yesu aaya pali Yoane 3:16 pa nsita ii umu mwaka?
16 Umu milungu ikwiza, mukaame antu aingi sana ukwizazanwa uku Ciusyo pali Cisano manguzi pa 19 Epulelo 2019. (Lolini kambokosi kakuti “ Uzye Mulayama?”) Umu mwaka onsi ukwiza, lekini swensi tukezye na maka ukukomelezyanya lino tukuzanwa uku kulongana konsi kuno Yeova akatupekanyizizya. Lino impela ikuya ikupalama, vino tukasambilila umu kulongana vilaatwazwa ukuya aicefye, asipe nu kuya nu kutemwa. (1 Tesa. 5:8-11) Lekini lyonsi twalanga nu mwenzo onsi vino tukauvwa pali Yeova nu mwanakwe pali vino yatutemwa.—Welengini Yoane 3:16.
ULWIMBO 126 Pempukini, Imililini Ndi, Komelekini
^ pala. 5 Ukulongana ukulaya ukucindame sana umu mwaka, i Ciusyo ca mfwa yakwe Klistu icilayako pa 19 Epulelo 2019. I cani cikalenga ukuti twaya uku kulongana kuko? Ukwaula nu kutwisika, a pa mulandu wakuti tukalonda ukuzanzya Yeova. Umu cipande cii tumasambilila pali vino ukuzanwa uku Ciusyo nu ku kulongana konsi ukwa mu mulungu kukalanga vino twaya.
^ pala. 52 ICIKOPE ICILI PA NKUPO: Antu aingi cuze umu nsi yonsi yakupokeelelwa uku Cakulya ca Manguzi Ica Mwene
ULONDOLOZI WA VIKOPE: Umwina aali umu cifungo pa mulandu nu utailo wakwe wakomeleziwa na kalata wino watapokeelela ukufuma uku ng’anda. Waya sana nu luzango pa mulandu wakuti wamanya ukuti yakamwiusya uku ng’anda nupya wapokeelela ilyasi lyakuti ulupwa lwakwe nalo lukutwalilila ukuya ulwa cisinka kuli Yeova asi mulandu ni vikanza vya mu uteeko ivili umu ncende yao.
