CIPANDE CA KUSAMBILILAMO 4
Vino Icakulya Icangupale Cikatusambilizya pa Mwene Uwa Kwi Yulu
“Uu uli mwili wane. . . Uu u ‘wazi wane uwa cipangano.’” —MATE. 26:26-28.
ULWIMBO 16 Lumbanyini Jah pa Mwanakwe Umupakwe
VINO TUMASAMBILILAPO *
1-2. (a) U mulandu ci uno tungatailila ukuti Yesu watulangilile inzila iyangupale iya kuzevezyamo imfwa yakwe? (b) I miyele ci ino tumasambililapo ino Yesu wakwata?
UZYE mungalondolola ivikacitika pa Ciusyo ca mfwa yakwe Klistu icikayako cila mwaka? Ukwaula nu kutwisika sweingi tukaiusya ivikacitika pa Cakulya ca Manguzi Ica Mwene. U mulandu ci? A pa mulandu wakuti icakulya cii cangupala. Nomba, ukuzevya kwaiyela sana. Fwandi tungayuzya sweineco tuti: ‘U mulandu ci uno icakulya cii cangupalila?’
2 Lino Yesu wali pano nsi, wamanyikiilwe uku mulimo wa kusambilizya icumi icicindamisye umu nzila iyangupale nupya iyuvwike. (Mate. 7:28, 29) Umu nzila ili imwi kwene watulangilile ivya kuzevya * imfwa yakwe umu nzila iyangupale nomba icindame. Lekini tulande sana pa Ciusyo na pa vintu vino Yesu wacisile nu kulanda. Ndi twacita vivyo cimatwazwa sana ukumanya vino Yesu waicefya, ukusipa na vino waya nu kutemwa, nupya tumasambilila na vino tungamukolanya.
YESU WAICEFYA
Ivinkolanya vya pa Ciusyo kuli kuti umukate na waini vikatwiusyako ukuti Yesu wapeezile umi wakwe pa mulandu witu nu kuti ndakai a Kateeka witu uwa kwi yulu (Lolini mapalagalafu 3-5)
3. Wakwe vino calandwa pali Mateo 26:26-28, uzye Iciusyo cino Yesu watandike cangupiile uli, nupya ivintu viili vino waomvizye vikaimililako cani?
3 Yesu wali na atumwa yakwe acumi 11 lino watandike Iciusyo ca mfwa yakwe. Watoozile sile ivyasyazilepo pa kuzevya Ucilo nu kupanga ukuzevya ukwangupale. (Welengini Mateo 26:26-28.) Waomvizye sile umukate uwaula icitutumusi na waini ivyapanzilwe mpiti. Yesu wanenyile atumwa yakwe ukuti ivintu vivyo viili vimililangako umwili wakwe umalilike nu wazi vino wali nu kupeela mu manda anono pa mulandu wao. Limwi atumwa yatazungwike pali vino icakulya ciici cicindamisye cino Yesu watandike cangupiile. U mulandu ci uno yatazungukiile?
4. Uzye ukupanda mano kuno Yesu wapeezile Malita kukatwazwa uli ukumanya umulandu uno Yesu wangupazizye icakulya ca pa Ciusyo?
4 Elenganyini pali vino vyacitike ukucisila umu mwaka wakwe citatu uno Yesu wali pano nsi lino watandalile yacuza yakwe, Lazalo, Malita na Maliya. Lino Yesu wafisile, watandike ukusambilizya. Malita apano wali nomba wapumvyanyiziwe pa mulandu nu kupekanya ivya kulya ivingi ivya mwenyi wao. Lino Yesu waweni vivyo, walungike Malita cikuuku cikuuku nu kumwazwa ukulola ukuti ivyakulya ivingi vitalondekwanga. (Luka 10:40-42) Lino papisile insita ala kwasyala sile amaawazi anono kuti afwe, Yesu nawe kwene waomvizye ivyeo vino wasundiileko Malita. Wangupiizye icakulya ca pa Ciusyo. Uzye vivyo vikutusambilizya cani pali Yesu?
5. Uzye icakulya icangupale cikatulangilila ukuti Yesu waya uli, nupya cii cikauvwana uli na mazwi aaya pali Filipi 2:5-8?
5 Yesu waicefizye muli vyonsi vino walandanga nu kucita. Fwandi citange cituzungusye vino walangilile ukuicefya pa wanda wa kusyalikizyako usiku uwakuya pano nsi. (Mate. 11:29) Wamanyile ukuti wali nu kupeela impolelwa icindamisye ino kutatala kwaya umuntu nanti wenga uwapeelapo nu kuti Yeova wali nu kumutuutulula pakuti aye umwene ukwi yulu. Nanti cakuti wamanyile vivyo atisile amano ku mwineco nu kupanga ukuzevya kwa mfwa yakwe ukwali nu kutala ukwiusya. Lelo wanenyile asambi yakwe ukuti umuku onga cila mwaka yalinzile ukumwiusya ukuomvya icakulya icangupale. (Yoa. 13:15; 1 Kol. 11:23-25) Icakulya icangupale nomba icisuma, cikalangilila vino Yesu wali umuntu umuicefye. Fwandi cikatuzanzya ukumanya ukuti Umwene witu uwa kwi yulu waya ni miyele isuma sana iya kuicefya.—Welengini Filipi 2:5-8.
6. Tungakolanya uli ukuicefya kwakwe Yesu lino tuli ni ntazi?
6 Tungakolanya uli ukuicefya kwakwe Yesu? Tungacita vivyo ndi cakuti tukukolezya vino yauze yakulonda ukucila ukukolezya vino tukulonda. (Filipi 2:3, 4) Elenganyini pali vino cali pa wanda uno Yesu wasyalikizyeko ukuya pano nsi. Yesu wamanyile ukuti pataali nu kulengela wali nu kufwa imfwa iipisye nomba wisile sana amano uku atumwa yakwe acisinka yano yali nu kusyala yakulosya pa mulandu wa mfwa yakwe. Fwandi uwanda uuwa usiku onsi wayanenanga sile vino yalinzile ukucita, ukuyakomelezya nu kuyapeela usininkizyo wakuti yatali nu kuya yonga. (Yoa. 14:25-31) Yesu walangilile ukuti waicefya lino wisile sana amano uku umi wa yantu yauze ukuluta uwakwe. Cali icilangililo icisuma sana cino watulangilile.
YESU WASIPA
7. Uzye Yesu walangilile uli ukuti wali umusipe pa cisila sile ca kutandika Cakulya ca Manguzi Ica Mwene?
7 Pa cisila sile ca kutandika Icakulya Ca Manguzi Ica Mwene, Yesu walangilile kusipa ukuiyele. Wacisile uli vivyo? Yesu wazumilizye ukuti ukulonda kwakwe Isi kucitike pali aliwe, nanti icakuti wamanyile ukuti ukucita vivyo kwali nu kulenga akomelwe pa mulandu uwa muzewanya uwa kusaalula Leza. (Mate. 26:65, 66; Luka 22:41, 42) Yesu watwalilile ukuya na ucisinka umalilike pakuti acindike izina lyakwe Yeova, ukucindika ukateeka wa papelapela, nu kulenga antu yonsi alapila ukuya nu umi wa pe. Nupya Yesu wapekanyizizye alondezi yakwe kuli vino vyali nu kuyacitikila.
8. (a) I vyani vino Yesu wanenyile atumwa yakwe acisinka? (b) Uzye alondezi yakwe Yesu yakolanyanga uli ukusipa kwakwe lino papisile imyaka iingi pa cisila ca mfwa yakwe?
8 Yesu nupya walangilile ukuti wasifile pa kukanaika mano pali vino vyamusakamikanga nu kwika mano kuli vino atumwa yakwe acisinka yalondekwanga. Icakulya icangupale cino watandike lino wazinzile Yuda cali nu kwiusyako yonsi ali nu kuya alondezi yakwe apakwe pa visuma ivyali nu kucitika pa mulandu wa wazi uno Yesu wazwisizye na vino yali nu kuya umu upangano upya. (1 Kol. 10:16, 17) Yesu wanenyile alondezi yakwe vino wene na Isi yalondekwanga ukucita pa kuyazwa ukutwalilila ukuya acisinka nu kwizaya na Yesu ukwi yulu. (Yoa. 15:12-15) Yesu nupya wanenyile alondezi yakwe pa ntazi zino yali nu kupitamo. Lyene wayakomelizye ukulondela vino wacitanga nu kuyanena ukuti “posyini.” (Yoa. 16:1-4a, 33) Lino papisile imyaka, alondezi yakwe Yesu yatwalilile ukukolanya ukuipelesya kwakwe Yesu nu kulanga ukusipa. Yatwalilile ukutungililana umu ntazi izipusanepusane nanti icakuti yali nu kucula.—Ayeb. 10:33, 34.
9. Tungakolanya uli ukusipa kwakwe Yesu?
9 Naswe kwene ndakai tukakolanya ukusipa kwakwe Yesu. Cikalondekwa sana ukusipa pakuti tutungilile aina itu akweziwa pa mulandu nu utailo wao. Insita zimwi aina itu yanganyepwa pa mulandu nu lufyengo. Ndi cakuti ica musango uwo cacitika, tulinzile ukwezya na maka ukuyazwa ukwikako sile nu kuyavwangila. (Filipi 1:14; Ayeb. 13:19) Inzila na yuze ino tukalangilamo ukusipa u kutwalilila ukuya ‘aapame’ pa kusimikila. (Mili. 14:3) Wakwe Yesu, tukalondesya ukusimikila pa Wene nanti icakuti antu yangatukaanya nu kutuzunya. Nomba insita zimwi tungavilwa ukusipa. Tungacita uli ndi caya vivyo?
10. I vyani vino tungacita umu milungu inono sile lino Iciusyo icapalama, nupya umulandu ci?
10 Ndi cakuti tukwelenganya pa upaalilo uno impolelwa yakwe Klistu ikatulenga ukukwata tulaya asipe sana. (Yoa. 3:16; Efes. 1:7) Twakwata isyuko lya kulanga ukuti tukataizya sana pa mpolelwa umu milungu inono sile lino Iciusyo icapalama. Umu milungu ii, mwawelenga Malembelo ya mu manda ya Ciusyo nu kwelenganya sana pali vino vyacitikanga ala Yesu ali umu kufwa. Lyene lino twakolongana uku Cakulya ca Manguzi Ica Mwene tulamanya ningo vino vinkolanya vya pa Ciusyo vyacindama na vino vikaimililako alino na vino impolelwa yaiyela. Ndi twamanya vino Yesu na Yeova yatucitila nu kumanya vino vingatwazwa pamwi na atemwikwa itu, upaalilo witu pa vya ku nkoleelo ukakomelako nupya cikatwazwa ukuzizimizya nu kusipa ukufika nu ku mpela.—Ayeb. 12:3.
11-12. I vyani vino itusambilila ukufika paa?
11 Ukufika paa twasambilila ukuti Icakulya Ca Manguzi Ica Mwene cikatwiusyako pa mpolelwa icindamisye nu kuti Yesu wakweti imiyele isuma sana iya kuicefya nu kusipa. Cikatuletela sana uluzango ukumanya ukuti Yesu watwalilila ukulanga imiyele ii nanti icakuti a Simapepo witu umukalamba uwa kwi yulu wino akatupaapatilako. (Ayeb. 7:24, 25) Pakuti tulange ukuti tukataizya nu mwenzo onsi, tulinzile ukwiusya imfwa yakwe Yesu ni cisinka wakwe vino watunenyile ukucita. (Luka 22:19, 20) Tukacita vivyo pa wanda wa pa Nisani 14 uwanda uwacindamisya sana umu mwaka.
12 Tungamanya imiyele na yuze ino Yesu wakwata iyalenzile atufwile ndi twalola vino Icakulya Ca Manguzi Ica Mwene cangupiile. Lino wali pano nsi wamanyikilwe ku miyele ii. I miyele ci iyo?
YESU WAYA NU KUTEMWA
13. Uzye amazwi aaya pali Yoane 15:9 na pali 1 Yoane 4:8-10 yakalondolola uli vino Yeova na Yesu yalaanga ukutemwa, nupya aaweni yano ivintu vikazipila pa mulandu nu kutemwa kwene kuu?
13 Yesu walangilile imiyele ino Yeova wakwata iya kutemwa muli vyonsi vino wacisile. (Welengini Yoane 15:9; 1 Yoane 4:8-10.) Ni cicindamisye icakuti Yesu waipeelisye nu mwenzo onsi ukupeela umi wakwe pa mulandu witu. Nanti cakuti sweswe apakwe nanti “amfwele na zyuze” ukutemwa kuno Yeova nu mwanakwe yatulanga ukupitila umu mpolelwa kungatwazwa. (Yoa. 10:16; 1 Yoa. 2:2) Elenganyini nupya pa vintu ivikaomviwa pa Ciusyo, vikalanga vino Yesu watutemwa na vino akalangulukilako alondezi yakwe. Wacisile uli vivyo?
Yesu watandike ukuzevya Iciusyo ukwangupale ukungazeviwa pa myaka iingi na lino ivintu ivitala (Lolini mapalagalafu 14-16) *
14. Uzye Yesu walanzile uli alondezi yakwe ukuti wayatemwa?
14 Yesu walangilile ukutemwa ku alondezi yakwe apakwe pa kutandika icakulya icangupale. Lino papisile insita alondezi yakwe apakwe yalondekwanga ukutandika ukuzevya Iciusyo cila mwaka, na lino ivintu vyatazile ukwikako sile na lino yali umu cifungo. (Umbw. 2:10) Uzye yaali nu kuvwila Yesu? Ee yali nu kumuvwila!
15-16. Uzye yamwi yacisile uli pakuti yazevye Icakulya ca Manguzi Ica Mwene lino ivintu vyatazile?
15 Ukufuma umu nsita ya Ina Klistu ya kutandikilako ukufika na ndakai Aina Klistu yakaezya na maka ukwiusya imfwa yakwe Yesu. Yakaezya na maka ukulondela ukucita vivi kwene vino Icakulya Ca Manguzi Ica Mwene cilinzile ukuya na lino sile ivintu ivitala. Elenganyini pali vino vyacitikile yamwi. Lino Umwina Harold King wali umu cifungo wenga uku China wezyanga na maka ukuzevya Iciusyo. Wapekanyanga ivinkolanya umu umfisoolo ukuomvya ivintu vino wakweti. Nupya wapendanga amanda ya Ciusyo ningo ningo. Lino insita ya Ciusyo yafika wimbanga wenga umu cifungo apepa nu kupeela ilyasi lya mu Malembelo.
16 Kwali na vyuze ivyacitike. Iumba lyakwe ya nkazi aanyefilwe umu nkambi yakucuziwilwamo lino kwali Nkondo ya Nsi Yonsi yakwe ciili isile umi wao umu uzanzo pakuti sile yazevye Icakulya ca Manguzi Ica Mwene. Lelo pa mulandu wakuti vyakuomvya pa kuzevya kuu vyali ivyangupale, yakwanisye ukuzevya Iciusyo umu umfisoolo. Yalanzile ukuti: “Twazingulwike ala itupalamana, ala apakasi pali kalimba pano twisile ivinkolanya ala itwanzikapo ni nsalu itiswe. Twakozizye sile kandulo pano ndi cakuti mwali malaiti limwi nga yatuweni . . . . Twaswilizyangapo imilapo ino twalavile kuli Tata witu iya kuomvya amaka itu yonsi pakuti tulenge izina Lyakwe ukuya ilya muzilo.” Wali utailo ukome uno yalangizye! Nupya Yesu nawe walangizye ukuti wali nu kutemwa lino watupangiile Iciusyo icangupale cino tungazevya na lino ivintu ivitala!
17. A mauzyo ci yano tungayuzya?
17 Lino Iciusyo cikuya cikupalama, cingazipa ndi cakuti twayuzya ivyuzyo vii: ‘Ningacita uli pakuti inje nu kutemwa kuno Yesu wakweti? Uzye nkaika mano kuli vino ya kapepa yanji yakulonda ukucila vino nkulonda? Uzye nkalonda aina na ya nkazi ukucita vino yatange yakwanisye nanti uzye namanya vino yangakwanisya?’ Lekini lyonsi twakolanya Yesu nu ‘kulangulukilana.’—1 Pet. 3:8.
MUTAILILA MASAMBILILO YAA
18-19. (a) I vyani vino tungasininkizya? (b) I vyani vino mukulondesya ukucita?
18 Ukuzevya Iciusyo ca mfwa yakwe Klistu kutalatwalilila. Lino Yesu “aliza” umu ucuzi ukulu cuze, alalonganika “asoololwe” yakwe asyalapo ukuya ukwi yulu, nupya ukufuma lilyo tulata ukuzevya Iciusyo.—1 Kol. 11:26; Mate. 24:31.
19 Twasininkizya ukuti na lino tulata ukuzevya Iciusyo antu yakwe Yeova yalaiusya Icakulya cii icangupale ukuti cikalangilila ukuicefya ukukalamba, ukusipa alino nu kutemwa kuno umuntu na muze ataatala walanga. Pa nsita iya, yonsi akaiusya icakulya cii ciiyele yalanenako yayo alayako vino kuzevya kuu kwalenga ukuti ivintu vizipile antu yonsi. Nomba pakuti citwazwe naswe ndakai, tulinzile ukukolanya sana vino Yesu waicefya, ukusipa alino na vino waya nu kutemwa. Ndi twacita vivyo tungasininkizya ukuti tulapokelela icilambu ukufuma kuli Yeova.—2 Pet. 1:10, 11.
ULWIMBO 13 Lyonsi Twakolanya Klistu
^ pala. 5 Likwene sile twasya tukakwate Icakulya ca Manguzi Ica Mwene ica kwiusya imfwa yakwe Yesu Klistu. Icakulya cii icangupale cikatusambilizya sana ivingi pali vino Yesu waicefizye, ukusipa na vino wali nu kutemwa. Umu cipande cii, tumasambilila vino tungakolanya imiyele icindame sana ino walangizye.
^ pala. 2 MAZWI AATIYALONDOLOLWA: Ukuzevya kukapiliula ukucita cimwi iciiyele sana pakuti twiusye nu kucindika icintu cimwi icicindamisye nanti umuntu mucindame sana.
^ pala. 56 ULONDOLOZI WA VIKOPE: Ivikope ivikulangilila vino Aina Klistu yakutandikilako yazevyanga Iciusyo; uku kusila kwakwe ya 1800; umu nkambi ya ya Nazi; nu mu manda ya ndakai vino ukuzevya kukaya umu Ng’anda ya Wene iyakwata ipaala litupu umu mpanga ya South America ukwakaya sana.
