1. U mulandu ci uno tutange tutwisikile ukuti Baibo ikaomba? (Lolini cikope cakutandikilako.)

SWE yantu yakwe Yeova, tusitwisika ukuti Izwi Lyakwe Leza lino walembela antu, ‘ilya umi nupya likaomba.’ (Ayeb. 4:12) Sweingi twasininkizya ukuti mu cumi Baibo ikasenula umi. Aina itu yamwi na ya nkazi mpiti yali apupu, yatesilwe uzya uku milembo ikavulunganya uwongo, nanti ulalelale. Yauze nayo yikalanga ningo nu kuomba incito isuma umu nsi ii yakwe Satana lelo yataali ni nsansa izimalilike. (Kasa. 2:3-11) Ilingi, aingi aalolekanga ukuti yatange yatunguluke ndakai yakwata upaalilo pa mulandu na vino Baibo yasenula umi wao. Mufwile mukawelenga nu kuipakizya amalyasi pali vino vyacitikila ina na ya nkazi umu cipande icikaya umu Lupungu Lwa Mulinzi icakuti “Baibo ika-avwa antu ukusenuka.” Nupya mwalola nu kuti na pacisila ca kumanya icumi, Baibo ikatwalilila ukwaazwa Aina Klistu ukulunduluka muli ukapepa.

2. Uzye Izwi lyakwe Leza lyaombanga uli mpiti?

² Uzye tungazunguka ukuti icalenga aingi ndakai ukusenuka u kuwelenga Izwi Lyakwe Leza? Awe foo! Malyasi pa yantu yayo yakatwiusyako pa ina na ya nkazi aliko mpiti, akweti upaalilo wa kuya ukwi yulu. (Welengini 1 Kolinto 6:9-11.) Pacisila lino  umutumwa Paulo walanzile pali vino antu atalapyana Uwene Wakwe Leza yaaya, walunzilepo amazwi yakuti: “Yamwi munomuli mwali wakwe yaa.” Nomba antu yaa yasenwike pa mulandu wakuti Baibo alino nu mupasi wakwe Leza vyayazwile. Na pacisila cakusambilila icumi, yamwi pali yaa yalwisyanyanga ni ntazi zimwi izyalenganga yatalunduluka muli ukapepa. Baibo ikalanda pa muntu umwi uwa mpiti uwali umupakwe uwizile azingwa umu cilongano, lelo wizile alapila nu kuswilila kuli Yeova. (1 Kol. 5:1-5; 2 Kol. 2:5-8) Uzye tukakomeleziwa ndi tuvwa intazi uwingi zino aina itu na ya nkazi yakakwata nomba yazicimvya pa mulandu ni Izwi Lyakwe Leza?

3. I vyani vino tumasambilila umu cipande cii?

³ Pa mulandu wakuti Izwi Lyakwe Leza lyakwata sana amaka nupya Yeova watupeela, tukalondesya sana ukulaliomvya insita yonsi. (2 Tim. 2:15) Fwandi umu cipande cii, tumasambilila pali vino tungaleka Izwi Lyakwe Leza ukuomba sana (1) umu umi witu, (2) lino tuli umu mulimo wa kusimikila, na (3) lino tukusambilizya umu cilongano. Ivintu vii vimatwazwa ukutwalilila ukulanga ukuti twatemwa Tata witu uwa kwi yulu akatusambilizya ivyakuti vituzipile nupya tukamutaizya sana.—Eza. 48:17.

4. (a) I vyani vino tulinzile ukucita pakuti Izwi Lyakwe Leza lyatwazwa? (b) Mukacita uli pakuti mukwate insita ya kuwelenga Baibo?

⁴ Ndi cakuti Izwi Lyakwe Leza likatwazwa, tulinzile ukuliwelenga lyonsi cingazipisya ndi cakuti tukucita vivyo cilawanda. (Yoswa 1:8) Icacumi ukuti sweingi tusikwata insita ya kupuza. Nomba, tutalinzile ukuleka ukuti icili consi nanti imilimo ino tukaomba vyatulesya ukulawelenga Baibo lyonsi. (Welengini Efeso 5:15, 16.) Antu yakwe Yeova aingi yatantika insita izipusane pusane lino yangawelenga Baibo, yamwi yakawelenga katondo lino yazyuka sile, yamwi manguzi, yauze nayo insita iliyonsi umu wanda. Yakauvwa wakwe vino kalemba wa masamu walemvile, ukuti: “Iye mwe, silola vino natemwa amasunde yako wakwe cimwi! Nkayelenganya uwanda onsi.”—Masa. 119:97.

5, 6. (a) U mulandu ci uno ukwelenganya pali vino tukuwelenga kwacindamila? (b) Tungacita uli pakuti twaelenganya ningo pali vino tukuwelenga? (c) Uzye ukuwelenga Izwi Lyakwe Leza nu kwelenganyapo kwamwazwa uli?

⁵ Nupya tutalinzile ukulawelenga sile lelo tulinzile nu kwelenganya sana pali vino tukuwelenga. (Masa. 1:1-3) Ndi tukucita vivyo ali lino tulaomvya ningo amano asuma aaya muli Baibo. Ndi cakuti tukawelengela Izwi Lyakwe Leza muli Baibo umupulintwe, pali foni nanti pa kompyuta, cino tukalondesya i cakuti vyeo vino tukuwelenga vitufike pa mwenzo.

⁶ Tungacita uli pakuti twaelenganya ningo pali vino tukuwelenga? Aingi yazana ukuti cikaazwa ndi yatala imililako panono  lino yawelengako iciputulwa cimwi ca vipande vino yakuwelenga nu kwelenganya pa mauzyo wakwe yaa: ‘Uzye ivyeo vii vikunsambilizya cani pali Yeova? Uzye amuli vyani muno nkaomvya ivyeo vii ivili umwi Zwi Lyakwe Leza? A muli vyani muno ndinzile ukuzifya?’ Lino tukwelenganya pi Zwi Lyakwe Leza nu kupepelapo, tukalondesya ukuomvya ivyeo vivyo vino twawelenga. Ndi twacita vivyo tulalenga ukuti Izwi Lyakwe Leza lyaomba umu umi witu.—2 Kol. 10:4, 5.

7. Uzye tungaomvya uli ningo Izwi Lyakwe Leza umu mulimo wa kusimikila?

⁷ I cani cingatwazwa pakuti twaomvya ningo Izwi Lyakwe Leza lino tuli umu mulimo wa kusimikila? Icakutandikilapo cino tulinzile ukucita u kuliomvya lino tukusimikila nu kusambilizya. Umwina umwi walanzile ukuti, “Ndi cakuti mwali na Yeova mukusimikila uku ng’anda ni ng’anda, uzye mwemwe mungavwanga sile nanti mungaleka ukuti Yeova nawe avwangako?” Cino walandangapo icakuti: Ndi cakuti tukuwelenga Izwi Lyakwe Leza lino tukusimikila, tukaleka ukuti Yeova aliwe avwanga nu mwineco wa ng’anda. Ukusoolola ningo ilembelo kungalenga Izwi Lyakwe Leza lyazwe sana wino tukusimikila ukucila na vino tungalanda. (1 Tesa. 2:13) Mwayuzya mweineco muti, ‘Uzye nkawelenga Izwi Lyakwe Leza lyonsi lino nkusimikila ilandwe lisuma?’

8. U mulandu ci uno tutalinzile sile ukuwelengela Baibo umuntu wino twazana?

⁸ Nomba lino tuli umu mulimo wa kusimikila tukulanzyanya na antu, tutalinzile sile ukuwelengela umuntu amazwi ya muli Baibo. U mulandu ci? Pano antu aingi yatamanya sana Baibo. Vikwene vino caya ndakai avino caali nu ku Ina Klistu ya mpiti. (Loma 10:2) Fwandi tutalinzile ukwelenganya ukuti umuntu wino tukusimikila amauvwikisya cino tukulandapo pano itumuwelengela. Lino twawelenga tulinzile ukusoololamo amazwi asuma, limwi  tuyawelenga nupya lyene alino tulondolola vino ilembelo lilyo likulandapo. Ukucita vivyo kungalenga Izwi Lyakwe Leza ukwazwa sana antu yano tukusambilizya nu kuyafika pa mwenzo.—Welengini Luka 24:32.

9. A mazwi ci yano tungalanda angalenga antu ukucindika Baibo? Langililini.

⁹ Vino tukalanda lino tutatala twawelenga ilembelo vingalenga umuntu wino tukusimikila acindike Baibo. Limwi tungati, “Lekini tuvwe vino Kaumba walanda pi lyasi lii.” Ndi cakuti tukulanzyanya nu muntu umwi asi Umwina Klistu, tungalanda tuti, “Uvwini vino Malembelo ya Muzilo yakalanda.” Ndi cakuti tukusimikila uku muntu umwi uwasambilila, tungamuzya ukuti, “Uzye mwatala muvwapo ipinda lii ilya mpiti?” Tulinzile ukumanya ukuti antu yapusana nupya vino yazumilamo vyapusana fwandi tulinzile ukuomvya inzila iingazwa umuntu ukulingana na vino waya.—1 Kol. 9:22, 23.

10. (a) Landini vimwi vyacitikile umwina umwi. (b) Uzye mwasininkizya uli ukuti Izwi Lyakwe Leza likaomba umu mulimo wa kusimikila?

¹⁰ Aingi yazana ukuti ukuomvya Izwi Lyakwe Leza mu mulimo wa kusimikila kungazwa sana yano tukusimikila. Uvwini vii vyacitike. Umwina umwi waswilile ku mukoloci umwi uwawelenganga sana ya magazini itu pa myaka iingi. Umwina wapingwilepo ukuwelenga ilembelo ilyali umu Lupungu Lwa Mulinzi ulwa mu mwezi kwene uwa ukucila ukumutwalila sile magazini. Wawelenzile 2 Kolinto 1:3, 4, apakati: “Tata wa luse, Leza ali ntulo ya kutekeziwa konsi. . . akatwazwa mu ntazi zitu zyonsi.” Umonsi wiya uvwile ningo sana amazwi yayo, calenzile anene umwina ukuti awelenge ilembelo lili nupya. Umonsi wiya walondolwile vino aliwe nu muci yalondekwanga ukuteekeziwa, nupya ukufuma lilikwene walondanga ukumanya ivingi pali Baibo. Uzye musikuzumila ukuti Izwi Lyakwe Leza likaomba umu mulimo wa kusimikila?—Mili. 19:20.

11. U mulimo ci uno aina akasambilizya umu vilongano yakwata?

¹¹ Tukaipakizya sana ndi twaya umu kulongana kwa pa cilongano, maukongano anono na akalamba. Icikalamba cino tukaila umu kulongana u mu kupepa Yeova. Nupya tukaipakizya sana vino tukasambilila. Aina akatusambilizya umu vilongano yakalola umulimo uu ukuti ucindame sana. Nupya yalinzile ukumanya ukuti yalinzile ukwikako sana amano uku mulimo uu. (Yako. 3:1) Yalinzile ukusininkizya ukuti vino yakusambilizya vikufuma umwi Zwi Lyakwe Leza. Ndi cakuti mwapeelwa umulimo wa kusambilizya umu cilongano, mungalanga uli ukuti mukulenga Baibo ukuomba muli vino mukusambilizya?

12. Uzye akulanda ilyasi angasininkizya uli ukuti amalembelo yati yacindama sana umwi lyasi?

¹² Mulinzile ukusininkizya ukuti Amalembelo iyacindama umwi lyasi linu. (Yoa. 7:16) I vyani vino mulinzile ukucita? Mulinzile ukucenjela ukuti ukusimika ivyacitike, kupeela ivilangililo alino ni mipelele iilyasi vitalenzile ukuti antu yatika sana amano kuli Baibo. Nupya, mwaiusya ukuti ukuwelenga amalembelo aingi sana cisipiliula ukuti mukusambilizya ukuomvya Baibo. Pano ukuwelenga amalembelo aingi kungalenga antu yataiusya amalembelo yayo. Fwandi mwasoolola amalembelo acindame sana umwi lyasi linu, imuyawelenga, lyene mulondolola, ukupeela ivilangililo, alino nu kulondolola vino malembelo kwene yayo yangaomviwa. (Neem. 8:8) Ndi cakuti ilyasi linu lifumile muli autulaini iyapangwa ni uvi, mulinzile ukuwelengamo sana pamwi na malembelo alimo. Mwaezya ukuvwikisya vino ivisinka ivyativilondololwa muli autulaini ivilemenkana na malembelo atiyakopololwa. Lyene mwaomvya amalembelo atiyasoololwa pa kusambilizya ivisinka ivili  muli autulaini. (Mungazana ivyeo ivingamwazwa vino mungaomvya umwi buku lyakuti Benefit From Theocratic Ministry School Education pa mafwa 21 ukufika uku 23.) Nupya icicindamisye cino mulinzile ukucita u kupepa kuli Yeova ukuti amwazwe ukulondolola ningo ivisinka ivili umwi Zwi Lyakwe Leza.—Welengini Ezila 7:10; Mapinda 3:13, 14.

13. (a) Uzye vino amalembelo yaomviwe pa kulongana vyazwile uli nkazi umwi? (b) Uzye vino malembelo yakaomviwa umu kulongana vyamwazwa uli?

¹³ Lino nkazi umwi uwa ku Australia wali umwance, ivintu ivingi ivipe vyamucitikile. Nupya na lino wizile amanya Yeova atazumile ukuti Yeova wamutemilwe. Patalengile wizile asininkizya ukuti Leza wamutemwa. Lino yali umu kulongana wizile auvwa ilembelo limwi ilyamufisile sana pa mwenzo. I cani calenzile asininkizye ukuti Leza wamutemwa? Wizile asenuka lino welenginye sana pi lembelo lii ilyawelenzilwe pa kulongana lyene walilinganyizye uku malembelo yauze. * Uzye namwe Amalembelo akawelengwa pa kulongana kwa pa cilongano, pa muputule, alino na pa citungu yakamwazwa?—Neem. 8:12.

14. Tungacita uli pa kutaizya Izwi Lyakwe Leza?

¹⁴ Uzye musitaizya Yeova pali vino watupeela Izwi Lyakwe? Atatupeela sile Baibo lelo wafikilizya nu ulayo wakwe uno walavile ukuti Izwi Lyakwe Leza lilatwalilila ukuyako amanda pe. (1 Pet. 1:24, 25) Fwandi tulinzile ukulawelenga Izwi Lyakwe Leza lyonsi, ukulaomvya lyonsi vino tukuwelenga, nu kulaomvya vino tukusambilila ukwazwa yauze. Ndi tukucita vivyo, tulalanga ukuti twatemwa Baibo nupya tukataizya sana pa kuikwata, ni cicindamisye i cakuti tulataizya sana Yeova Leza witu Kalemba wakwe Baibo.