1. Aaweni azwilizye ukupanga icilongano umu Filipi?

LINO umutumwa Paulo, Sailasi, Luka, na Timoti yafisile umu musumba wa Filipi uwateekwanga ni mpanga ya Loma, yazanyile antu aingi sana alondanga ukuvwa ukwi landwe lya Wene. Aina kwene yaa 4 aali acincile sana, yazwilizye ukupanga icilongano nupya asambi yonsi yatandike ukulonganila pamwi limwi umu ng’anda ya musambi uwapokelelanga sana aenyi uwi zina lyakuti Lidya.—Mili. 16:40.

2. Iintazi ci ino icilongano cizile cikwata?

² Pataalengiile, icilongano icipya cizile icikwata intazi. Satana walenzile antu apasile icumi ukutandika ukulwisya Paulo na Ina Klistu yauze yano waombanga nayo. Paulo na Sailasi yayalemile, iyayuma, nu kuyayalila umu cifungo. Lino yayafumizye umu cifungo, yaatandalile asambi apya nu kuyakomelezya. Lyene Paulo, Sailasi, na Timoti yafumile umu musumba nomba cikaloleka kwati Luka wene wasiile. I vyani vino aina na ya nkazi apya yali nu kucita? Yeova wayazwilizye ukuomvya umupasi wakwe, fwandi yatwalilile ukuya acincile umu mulimo wakwe. (Filipi 2:12) Paulo watemilwe sana ukulola vino aina na ya nkazi yasifile!

3. Ukulingana na mazwi aaya pali Filipi 1:9-11, i vyani vino Paulo wapepilepo?

³ Lino papisile apiipi ni myaka 10, Paulo walemvile kalata uku cilongano ca mu Filipi. Lino mukuwelenga kalata wiyo, mungalola vino Paulo watemilwe aina. Walemvile  ukuti: “Nkalondesya kumulola. Natemwa mwensi nu kutemwa kwakwe Klistu Yesu.” (Filipi 1:8) Wayalembiile ukuti wayapepelangako. Walenzile kuli Yeova ukuti ayazwe pakuti yalanga sana ukutemwa, ukwika mano uku vintu ivicindamisye, ukukanaya nu mulandu ku muntu wensi, ukukanasosya yauze, nu kutwalilila ukuseeka ivizao vya wololoke. Naswe kwene ndakai tungasambilila ivingi uku mazwi yakwe Paulo aufumacumi. Fwandi lekini tuwelenge vino Paulo walembiile aina Filipi. (Welengini Filipi 1:9-11.) Lyene tumasambilila pa vintu vino walumbwile nu kulola vino tungaomvya ivintu vivyo conga na conga.

4. (a) Ukulingana na mazwi aaya pali 1 Yoane 4:9, 10, uzye Leza watulanga uli ukutemwa? (b) Uzye tulinzile ukutemwa Leza ukufika pi?

⁴ Yeova walangizye sana ukutemwa kuli sweswe lino watumile Umwanakwe pano nsi pakuti aize atufwile pa mulandu na maifyo itu. (Welengini 1 Yoane 4:9, 10.) Ukutemwa kwakwe Leza ukwaulamo ukaitemwe kukalenga naswe tumutemwe sana. (Loma 5:8) Uzye tulinzile ukutemwa Leza ukufika pi? Yesu waswike icuzyo cii lino wanenyile Umufaliseo ukuti: “Uwatemwa Mwene Leza wako nu mwenzo wako onsi, nu umi wako onsi, na mano yako yonsi.” (Mate. 22:36, 37) Tukalonda ukutemwa Leza nu mwenzo onsi. Tukalonda twamutemelwako sile cila wanda. Paulo wanenyile aina Filipi ukuti ukutemwa kwao kwalinzile ukutwalilila ‘ukukulilako lyonsi.’ Uzye tungacita uli pakuti twatemelwako Leza cila wanda?

5. Uzye ukutemwa kwitu kungakula uli?

⁵ Tulinzile ukumanya Leza pakuti tumutemwe. Baibo ikati: “Muntu asyatemwa auze wene atamanya Leza, pano Leza ukutemwa.” (1 Yoa. 4:8) Umutumwa Paulo walanzile ukuti tukatwalilila ukutemelwako Leza ndi tukukwatilako “mano akumanya nu kupingula ningo.” (Filipi 1:9) Lino twatandike sile ukusambilila Baibo, twatandike ukutemwa Leza nanti icakuti tutamanyile ivingi pali aliwe. Lyene lino twamanyilangako ivingi pali Yeova, twatandike ukumutemelwako. Fwandi acino tukalolela ukuisambilizya Baibo nu kwelenganya sana pali vino tukusambilila ukuti navyo i vintu ivicindamisye umu umi witu!—Filipi 2:16.

6. Ukulingana na mazwi aaya pali 1 Yoane 4:11, 20, 21, uzye tungacita uli pakuti twalanga sana ukutemwa?

⁶ Ukutemwa kuno Leza watutemwa kukatulenga twatemwa aina itu. (Welengini 1 Yoane 4:11, 20, 21.) Limwi tungaelenganya ukuti ukutemwa ina itu na ya nkazi kukaiza sile wa mino ya mu kanwa. Tungaelenganya vivyo pano swensi tukapepa Yeova nupya tukaezya na maka ukukolanya imiyele yakwe. Tukakolanya Yesu uwatutemilwe sana nu kupeela umi wakwe pa mulandu witu. Lelo insita zimwi cingatutalila ukuvwila isunde ilikatunena ukutemwana. Elenganyini pali vino vyacitiike umu cilongano ca ku Filipi.

7. I vyani vino tukusambilila ku mazwi ya kusunda yano Paulo wapeezile kuli Yuodia na Sintike?

⁷ Yuodia na Sintike yaali aankazi acincile sana aombelanga pamwi nu mutumwa Paulo. Nomba limwi kwali vimwi ivyacitiike ivyalenzile yate ukuvwana nu kuta ukuya ivyuza. Muli kalata wino Paulo walembiile icilongano icalimo ya nkazi yaaya, walumbwilemo Yuodia na Sintike nu kuyanena ukuti ‘yauvwana.’ (Filipi 4:2, 3) Nupya Paulo waweni ukuti cali ningo ukunena yonsi amu cilongano ukuti: “Mwacita vyonsi kwaula kuilizyanya nanti vikanza.” (Filipi 2:14) I cumi cumi  ukusunda kwakwe Paulo kwazwilizye yonsi umu cilongano ukutwalilila ukulanga sana ukutemwa.

8. Uzye iintazi ci iingalenga twafilwa ukulanga ukutemwa uku ina, nupya tungacita uli pakuti tucimvye intazi iiyo?

⁸ Wakwe Yuodia na Sintike, naswe limwi cingaatutalila ukulanga ukutemwa kuli yauze umu cilongano nupya tungatandika ukwika sile mano ku tuntu tuno yakaluvyanya. Swensi kwene tukaluvyanya cila wanda. Ndi twatwalilila sile ukwika mano pali vino yauze yakaluvyanya, tukaata ukuyatemwa. Tuti limwi umwina wilila ukutwazwa ukuzifya umu Ng’anda ya Wene, limwi tungasoka. Lyene ndi twatandika ukwiusya na vyuze vino umwina waluvyanya, tungasoka sana nupya tungamupata. Ndi cakuti ica musango uwo camucitikila, cingazipa ukwelenganya pali cii: Yeova akalola vino swensi kwene tukaluvyanya pa mulandu nu kukana malilika. Nomba asi mulandu nu kukana malilika, watemwa aina itu nupya naswe kwene watutemwa. Fwandi tulinzile ukukolanya vino Yeova akalanga ukutemwa nu kwika sana mano apa miyele isuma ino aina yakalanga. Ndi tukwezya na maka ukutemwa aina itu, tukalemana sana.—Filipi 2:1, 2.

9. I vyani ivyaya pa vintu ivicindamisye vino Paulo walumbwile muli kalata wino walembiile Aina Klistu aku Filipi?

⁹ Yeova walenzile Paulo ukunena Aina Klistu amu Filipi ukwika mano uku vintu ivicindamisye. Naswe avino tulinzile ukucita ndakai. (Filipi 1:10) Pa vintu ivicindame paya ukulenga izina lyakwe Yeova ukuya ilya muzilo, ukufikiliziwa kwa kulonda kwakwe, alino nu mutende nu kulemana umu cilongano. (Mate. 6:9, 10; Yoa. 13:35) Ndi cakuti ivintu vii vyaya ali vicindame sana umu umi witu, tukalanga ukuti twatemwa Yeova.

10. I vyani vino tulinzile ukucita pakuti tuye antu aula umulandu?

¹⁰ Nupya Paulo walanzile ukuti tulinzile ukuya “aula umulandu.” Cii cisipiliula ukuti tulinzile ukuya amalilike. Tutanga tuye amalilike wakwe vino Leza waya. Nomba Yeova alaatulola ukuya aula umulandu ndi tukwezya na maka ukulanga sana ukutemwa nu kwika mano uku vintu ivicindamisye. Inzila yonga ino tukalangilamo ukutemwa u kuombesya pakuti tutasosya yauze.

11. U mulandu ci uno tutalinzile ukusosya yauze?

¹¹ Ukusunda kwakuti tutalinzile ukusosya yauze kwacindama sana. Uzye tungasosya uli antu yauze? Limwi tungacita vivyo mu vya kulezezyamo icitendwe vino tukasoolola, umu mizwalile, nanti incito ino tungasoolola. Limwi vino tungaacita vitanga viye iviipe. Nomba ndi cakuti vino twasoolola vyasosya umwi, lyene cico cingiipa sana. Yesu walanzile ukuti ndi twalenga umwina umwi ukuta ukupepa Yeova, cingiipa sana ukucila na pa kutunyepelela iciliwe umu nsingo nu kutusumbila pali yemba!—Mate. 18:6.

12. I vyani vino tukusambilila kuli vino ya painiya atwalane yacisile?

¹² Uzye atwalane yamwi aali ya painiya yaomvizye uli amazwi yano Yesu walanzile? Yaombelanga umu cilongano umwali umwina na mamakwe ala alino yaciwatiziwe aakulile umu ndupwa zino yayalesyanga ukucita ivintu iviingi. Atwalane kwene yayo yazumiile ukuti Aina Klistu yatalinzile ukuya umu kutamba amafilimu nanti cakuti yangaya asuma umutaaya iviipe. Yasosile sana lino yamanyile ukuti ya painiya kwene yayo atwalane yaile iyatamba filimu. Lino ya painiya yaya yamanyile vivyo, yatiile ukuya umu kutamba mafilimu ukufikila lino asambi kwene yaya apya yasambilizye ya kampingu yao nu kumanya  ningo ivisuma ni viipe. (Ayeb. 5:14) Pa mulandu nu kukanaya na ukaitemwe, ya painiya yaya atwalane yalangilile ukuti yatemilwe sana umwina na nkazi asi sile umu mazwi lelo yacisile vivyo na muli vino yacitanga.—Loma 14:19-21; 1 Yoa. 3:18.

13. Uzye tungalenga uli umwi ukwifya?

¹³ Inzila yuze ino tungasosezyamo umwi u kumulenga ukwifya. Uzye ica musango uwo cingacitika uli? Elenganyini pali vimwi ivingacitika. Pa cisila ca kuombesya, umusambi wa Baibo wata ukuteekwa uzya uku wengwa. Wiluka ukuti alinzile ukuta ukumwa uwengwa. Walunduluka zuwa nu kuwatiziwa. Lino papita insita, umwina umwi wakomelezya umwina wiyo umupya ukumwako uwengwa lino yakwizizya pamwi na yauze amu cilongano, wamunena wati: “Lyene paa wewe Mwina Klistu, watukwata umupasi wakwe Yeova. Imiyele imwi ino umupasi wa muzilo ukatulenga ukukwata u kuikaanya. Ndi cakuti ukuikanya, ungaamwako sile panono uwengwa.” Cingipa sana ndi cakuti umwina umupya uvwilile ukupanda mano ukwipe nu kutandika ukutekwa uzya uku wengwa nupya!

14. Uzye ukulongana kukatwazwa uli ukuomvya ukusunda ukwaya pali Filipi 1:10?

¹⁴ Ukulongana kwitu ukwa Ina Klistu kukatwazwa ukuomvya ivyeo vya kusunda ivyaya pali Filipi 1:10 umu nzila izingi. Ica kutandikilako, vino tukasambilila vikatwiusyako pa vintu vino Yeova akalola ukuti ali vino vyacindamisya. Cakwe ciili, tukasambilila ivya  kuomvya vino tukasambilila pakuti tuye antu aula umulandu. Na cakwe citatu i cakuti, tukacincizyanya uku “kucita ivisuma.” (Ayeb. 10:24, 25) Ndi aina itu yakutukomelezya, tulatemwa sana Leza na ina itu.

15. Uzye calola mwi ukuya ni “vizao vya wololoke”?

¹⁵ Paulo wapefile ukufuma pansi ya mwenzo ukuti Yeova azwe aina Filipi ‘ukuvulilwa ivizao vya wololoke.’ (Filipi 1:11) I cumi cumi, “ivizao vya wololoke” vyalimo ukutemwa kuno yatemilwe Yeova na antu yakwe. Nupya mwali nu kunenako yauze pa utailo uno yakweti muli Yesu alino na pa upaalilo usuma cuze uno yakweti. Pali Filipi 2:15 paya icilangililo na cuze icikalanda pa “kuyengesa munoyali wa ntanda zino zikupeela luswepo.” Amazwi yaa yakatwiusyako umulandu uno Yesu wamiile asambi yakwe ukuti “luswepo lwa nsi yonsi.” (Mate. 5:14-16) Nupya wapeezile isunde uku yalondezi yakwe ilya ‘kupanga asambi,’ nupya walanzile ukuti yaali nu kuya “yakambone . . . kufika na kuno insi yapela.” (Mate. 28:18-20; Mili. 1:8) Tukaseeka “vizao vya wololoke” ndi tukuombesya umu mulimo uu ucindamisye.

16. Uzye ilembelo lyakwe Filipi 1:12-14 likalanga uli ukuti tungaengesa wa luswepo na lino ivintu ivitala? (Lolini icikope icili pa nkupo.)

¹⁶ Asi mulandu na vino tukupitamo, tungaengesa wa luswepo. Insita zimwi, ivintu ivikaloleka kwati vingatulesya ukusimikila vingalenga ukuti tusimikile. Umutumwa Paulo yamunyepiile umu ng’anda uku Loma lino walembiile Aina Klistu aku Filipi kalata wii. Nomba icifungo citaalenzile aafilwa ukusimikila ku yalinzi ya mu cifungo nu ku yenyi. Paulo wali umucincile umu mulimo wa kusimikila nanti icakuti vintu vyatazile, cii calenzile ukuti aina yasipe  nupya ‘yakosoolanga ilandwe insita zyonsi kwaula intete.’—Welengini Filipi 1:12-14; 4:22.

17. Uzye aina yamwi na ya nkazi yakacita uli pakuti yatwalilile ukusimikila na lino ivintu ivitala?

¹⁷ Aina aingi na ya nkazi yakalanga ukuti yasipa wakwe Paulo. Yakaikala umu mpanga zino yatanga yasimikile uku cintu wingi nanti uku ng’anda ni ng’anda, fwandi yakaomvya inzila zyuze pa kusimikila ilandwe lisuma. (Mate. 10:16-20) Umu mpanga imwi, umwangalizi walanzile ukuti cila kasimikila alinzile ukusimikila kuli ya lupwa yakwe, aina mupalamano, yano yakasambilila nayo, na antu yano yamanyana. Lino papisile imyaka iili, ivilongano umu ciputulwa ciici vyavuzile sana. Limwi kuno twikala twakwata untungwa wa kusimikila. Ndi mukwezya na maka ukusimikila antu, Yeova alamupeela maka akusimikila na lino ivintu vyatala.—Filipi 2:13.

18. I vyani vino tulinzile ukwezya sana na maka ukucita?

¹⁸ Ndakai alino tulinzile ukwezya sana na maka ukulondela ukusunda ukwaya muli kalata wino Paulo walembiile aina Filipi. Tulinzile ukwika sana mano uku vintu ivicindamisye, ukuya antu aula umulandu, ukukanasosya yauze, nu kuseeka ivizao vya wololoke. Lyene tulaalanga sana ukutemwa nu kucindika Tata witu uwaya nu kutemwa Yeova.