1-3. I vyani ivingalenga aomvi aaya umu mulimo wa nsita yonsi yapeelwe imilimo iipya?

YA Robert na ya Mary Jo yalanzile ukuti: “Lino twaomvile imyaka 21 umu mulimo wa umisyonali, avyazi itu yonsi 4 yatandike ukulwalilila. Twaitemiilwe ukutandika ukuyasakamala. Nomba twali nu ulanda ukufuma uku cifulo cino twatemilwe sana.”

² Ya William na ya Terrie yalanzile yati: “Lino twamanyile ukuti tutalaswilila uku mulimo uno twaombanga pa mulandu nu kulwalilila, twalizile. Twalondanga ukutwalilila ukuombela Yeova uku mpanga yuze, nomba lyene tutaali nu kutwalilila.”

³ Ya Aleksey yalanzile yati: “Twamanyile ukuti antu atupata yalondanga ukuyala iofesi litu lya musambo kuno naombelanga. Nomba lino yayazile Betele nupya itufumapo, twasosile sana.”

4. A mauzyo ci yano tumazana masuko umu cipande cii?

⁴ Kwaya na yauze aali umu mulimo wa nsita yonsi uiyele ukwikako na aombelanga pa Betele, yano yapokelile imilimo ipya. * Cingatalila sana aina yaa na ya nkazi acisinka ukuta ukuomba umulimo uno yatemilwe sana. I cani icingayazwa ukuzizimizya lino ivintu vyasenuka? Uzye mungayazwilizyako uli? Amasuko uku mauzyo yayo yangazwa swensi kwene ukuzizimizya lino ivintu vyasenuka umu umi.

5. Uzye ivintu vingaya uli ndi cakuti yatupeela umulimo uuze?

⁵ Asi mulandu tukaombela pa Betele nanti mu mulimo uuze uwa nsita yonsi, tungasambilila ukutemwa aina ni cifulo kwene kuno tukaombela. Fwandi tukauvwa sana uyi ndi kwaya ivyalenga tute umulimo uno twapeelwa. Tukatandika ukuluuka aina na ya nkazi yano twasya, nupya tukasakamikwa sana pali aliyo, sana sana ndi cakuti twafumako pa mulandu wa kuzunyiwa. (Mate. 10:23; 2 Kol. 11:28, 29) Ya Robert na ya Mary Jo yalanzile ukuti: “Twilile intambi zya ku mwitu alino nu kusimikila umu lulimi lwitu. Vino twaombiile uku mpanga yuze pa myaka iingi, twatandike ukuyuvwa kwati sweswe ya ku mpanga yuze nanti icakuti twali umu mpanga itu.” Yamwi aakapeelwa umulimo uze limwi yangazana ukuti catandika ukuyatalila ukuzana impiya. Yangatandika ukusakamikwa, ukuyuvwa kwati yatacingililwa, nupya yangatoovoka. I cani icingayazwa?

6. Uzye tungacita uli pakuti tutwalilile ukupalama kuli Yeova?

⁶ Mwapalama kuli Yeova. (Yako. 4:8) Uzye tungacita uli vivyo? Tulinzile kutaila Yeova vino aliwe ‘akauvwa mapepo.’ (Masa. 65:2) Pa Masamu 62:8 pakati: “Mwamutula amacuzi inu lyonsi.” Yeova angatucitila “vintu vilusile vino tungalenga nanti vino tungelenganya.” (Efes. 3:20) Asitupeela sile vino twamuleenga umu mapepo. Angatusisizyapo ni intazi umu nzila ino tusikwenekela.

7. (a) I cani icilatwazwa ukutwalilila ukupalama kuli Yeova? (b) Ukulingana na mazwi aaya pa Ayebulai 6:10-12, i cani icilacitika ndi twatwalilila ukuya acisinka lino tukuombela Yeova?

⁷ Pakuti mutwalilile ukupalama kuli Yeova, mwawelenga Malembelo cila wanda nu kwelenganyapo sana. Umwina umwi uwaomvilepo umisyonali walanzile ukuti: “Mulinzile ukutwalilila ukukwata ukupepa kwa lupwa nu kupekanya ukulongana, wakwe vino mwacitanga umu mulimo uno mwaombanga.” Nupya mulinzile ukuombesya umu mulimo wa kusimikila ilandwe lisuma umu cilongano cinu icipya. Yeova akaiusya yonsi aakatwalilila ukumuombela na ucisinka, nanti icakuti yatanga yakwanisye ukuomba wakwe vino yaombanga mpiti.—Welengini Ayebulai 6:10-12.

8. Uzye amazwi aaya pali 1 Yoane 2:15-17 yangamwazwa uli ukwangupazya umi?

 ⁸ Mwaangupazya umi. Mutaaleka masakamika aaya umu nsi yakwe Satana yaamulesya ukuombela Yeova. (Mate. 13:22) Mutauvwila antu asiombela Yeova, ivyuza nanti ya lupwa aangaelenganya ukuti yakumwazwa lino yakumunena ukuti mulinzile ukukwata impiya izingi pakuti ivintu vimuzipile umu nsi yakwe Satana. (Welengini 1 Yoane 2:15-17.) Mwataila Yeova uwalaya ukuti alatupeela vino tukalondekwa pa nsita iliinge. Alatwazwa pakuti tungatwalilila ukuya nu utailo ukome, ukuya ateekele, nupya alatupeela vino tukalondekwa umu umi.—Ayeb. 4:16; 13:5, 6

9. Ukulingana na mwazwi aaya pa Mapinda 22:3, 7, u mulandu ci uno cacindamila ukukana kongola icikongolekongole, nupya i cani icingatwazwa ukupingula ningo pa vintu?

⁹ Mutaakongola na patalinzile. (Welengini Mapinda 22:3, 7.) Kukaaya ukusumba impiya izingi pa kukuukila uku ncende yuze, nupya cingaleenga mutandike ukukongola impiya. Pa kucefyako inkongole, mutaakongola impiya nu kukala ivintu ivitacindime sana. Ndi cakuti itukwata masakamika, wakwe lino tukusakamala atemwikwa itu alwale, cingatutalila ukupingulapo impiya zino tukulondekwa ukukongola. Ndi vya musango uwo vyacitika, mwaiusya ukuti ‘ipepo’ lingamwazwa ukupingula ningo pa vintu. Yeova angasuka mapepo nu kumwazwa ukuti muye ateekele pakuti mungapingula ningo ivya kucita.—Filipi 4:6, 7; 1 Pet. 5:7.

10. Uzye tungazana uli ya cuza apya?

¹⁰ Mwasoolola ya cuza asuma. Mwalanzyanya na ya cuza inu pali vino mukuyuvwa ni ntazi zino mukupitamo, sana sana aapita umu vintu ivikoline na vino mukupitamo. Ukucita vivyo kungalenga mwaelenganya pa visuma. (Kasa. 4:9, 10) Mulatwalilila ukuya ivyuza na yano mwali nayo kuno mwaombelanga. Lyene mulinzile ukuzana ya cuza apya uku cifulo cino mwakukilako. Mwaiusya ukuti pakuti muzane cuza, mulinzile ukuya ni cikuuku. Uzye mungacita uli pakuti muzane ivyuza ivipya? Mwanena yauze ivisuma ivyamucitikila umu kuombela Yeova pakuti yangailolela vino mwaya ni nsansa. Yamwi umu cilongano yatanga yamanye umulandu uno mwatemelwa umulimo wa nsita yonsi, lelo yauze yangalonda ukumanya ivingi nupya yangaya ya cuza inu asuma. Nomba mutalanda sana pa milimo isuma ino mwaomba umwi uvi lyakwe Yeova na pali vimwi ivyalenga mwauvwa sana uyi.

11. Uzye mungacita uli pakuti mutwalilile ukuya ni nsansa umu cupo?

¹¹ Ndi cakuti mwata ukuomba umulimo uno mwapeezilwe umwi uvi pa mulandu wa kulwalilila kwakwe ya winu, mutalinzile ukutandika ukuyapeela imilandu. Nanti ndi cakuti mwemwe mwatandike ukulwalilila, mutaipeela imilandu, imutandika nu kwelenganya ukuti mwemwe  imulenga ya winu yate ukuomba umulimo uiyele. Mwaiusya ukuti mwaya “umwili onga” nupya mwalavile Yeova ukuti mulaasakamalana muli vyonsi ivingamucitikila. (Mate. 19:5, 6) Ndi cakuti mwata ukuomba umulimo uno mwapeelwa pa mulandu wa kukwata umwana, mwasininkizya ukuti umwana winu wamanya ukuti wacindama ukucila umulimo uno mwaombanga. Mwanena umwaninu ukuti mukamulola ukuti i “cilambu” ukufuma kuli Leza. (Masa. 127:3-5) Nupya mwamunena ivintu ivisuma ivyamucitikilanga umu mulimo uno mwaombanga umwi uvi. Ukucita vivyo kungalenga umwaninu ace aombeko umulimo wa nsita yonsi wakwe vino mwacisile.

12. (a) Uzye tungazwilizya uli yano yaya umu mulimo wa nsita yonsi ukutwalilila umu milimo yao? (b) Uzye tungayazwa uli ukuyelela zuwa umu mulimo upya uno yapeelwa?

¹² Umu vilongano ivingi aina na ya nkazi yakaazwilizya aaya umu mulimo wa nsita yonsi ukutwalilila nu mulimo wao. Yakayakomelezya, ukuyapeelako ulupiya nanti vyuze ivikalondekwa, nanti u kuyazwako ukusakamala ya lupwa aakaikala ukutali. (Gala. 6:2) Ndi cakuti aaya umu mulimo wa nsita yonsi yayatuma umu cilongano cinu pa mulandu wakuti iyapeelwa umulimo uze, mutaalola kwati yafilwanga ukuomba ningo kuno yaali nanti ukulola kwati yaluvyanya vimwi. * Mwayazwa ukuyelela zuwa. Mwayapokelela ningo nu kuyataizya pa milimo ino yaomba, nanti icakuti ukulwalilila kukulenga ukuti yataombesya. Mwayamanya ningo. Mwasambililako kuli vino yamanya, vino yasambilila, na vino yapitamo.

13. Uzye tungazwilizya uli atiyapeelwa umulimo upya?

¹³ Pa kutandika, aapeelwa umulimo upya  yangalondekwa uwazwilizyo pakuti yazane ing’anda, imipitile, incito, ni vintu vyuze ivikalondekwa cila wanda. Limwi yangalondekwa nu kumanya ivyeo ivipya pa kulipila imisonko ni vintu vyuze. Ni cacindama sana icakuti mulinzile ukuyuvwikisya pa mulandu nu kusenuka kwa vintu. Limwi yangalwalilila nanti ukukwata umwi umu lupwa akulwalilila. Limwi yangaya nu ulanda pa mulandu wa kufwilwa. * Nupya yangaaya sana nu ulanda na lino yali yonga pa mulandu wa kuluuka ya cuza yao yano yaasya kuno yaombelanga. Cikasenda insita pakuti umwi ate ukuvwa uyi.

14. Uzye ya kakosoola amu cilongano cimwi yazwilizye uli nkazi ukuyelela zuwa umu cifulo icipya?

¹⁴ Ndi mukuomba nayo umu mulimo wa kusimikila nu kuyakomelezya muli vino mukacita, mungayazwa ukuyelela zuwa. Nkazi umwi uwaombiile uku mpanga yuze pa myaka iingi walanzile ukuti: “Kuno naombelanga mpiti, natungululanga masambililo ya Baibo aingi cila wanda. Nomba kuno twakukiile catazile sana nanti sile ukuwelengela sile umuntu ilembelo nanti ukumutambisya vidyo umu mulimo wa kusimikila. Nomba aina na ya nkazi amu cilongano icipya yansendanga pa kuswilila kuli yano yasimikiile nu ku masambililo ya Baibo. Ukulola aina na ya nkazi acisinka nupya aaombesyanga yakutungulula masambililo ya Baibo kwalenzile ntandike ukutemwa icifulo cino twaombelangamo. Nasambilile ivya kutandika ukulanzyanya nu muntu mu cifulo icipya. Vyonsi vii vyangazwilizye ukuya ni nsansa nupya.”

15. Uzye mungacita uli pakuti mwaomba ningo umu mulimo upya?

¹⁵ Mungatwalilila ukuomba ningo lino mwapeelwa umulimo upya. Mutaelenganya ukuti mutaombanga ningo umu mulimo uno mwaombanga mpiti nanti ukuti lyene mwasuulwa. Mwaelenganya pali vino Yeova akumwazwa ndakai nupya mwatwalilila ukusimikila. Mwakolanya Aina Klistu acisinka aaliko umu nsita ya atumwa. Konsi kuno yaile ‘yakosoolanga ilandwe lisuma.’ (Mili. 8:1, 4) Ndi mwatwalilila  ukusimikila, kungacitika ivintu ivisuma. Ya painiya yano yazinzile ukufuma umu mpanga zimwi yaile umu mpanga iziina mupalamano kuno kwalondekwanga ya kakosoola aingi umu lulimi lwao. Umu myezi sile inono, antu aingi yatandike ukulongana umu maumba alundulukanga umu lulimi luno ya painiya yaomvyanga pa kusimikila.

16. Uzye mungaya uli ni nsansa umu mulimo upya?

¹⁶ ‘Uluzango luno Yeova akapeela lukamukomelezya.’ (Neem. 8:10) Tulinzile ukuya sana nu luzango pa mulandu wakuti Yeova acuza witu asi pa mulandu nu mulimo uno tukuomba, nanti icakuti twatemwa umulimo uwo. Fwandi ndi cakuti tukulonda ukuya ni nsansa, tulinzile ukutwalilila ukupalama kuli Yeova nu kutwalilila ukumutaila. Mwaiusya ukuti mwatandike ukutemwa umulimo uno mwaombanga pa mulandu wakuti mwaombesyanga pakuti mungazwa antu aali kuno mwaombelanga. Mwaika sana umwenzo winu pa mulimo upya uno mukuomba nupya mulailolela vino Yeova alamwazwa ukutemwa umulimo uwo.—Kasa. 7:10.

17. I vyani vino tulinzile ukwiusya pa mulimo uno tukaomba ndakai?

¹⁷ Tulinzile ukwiusya ukuti tulatwalilila ukuombela Yeova amanda pe, nomba umulimo uno tukaomba ndakai u wa pa kasita sile. Umu nsi ipya, limwi swensi tulapeelwa imilimo ipya. Ya Aleksey, atiyalumbulwa mpiti, yalanzile ukuti ukusenuka kwa mulimo uno yaombanga kukayazwa ukuipekanyizizya pa kusenuka kwa vintu ukulacitika uku nkoleelo. Yalanzile yati: “Lyonsi namanyile ukuti Yeova akuno waya ni nsi ipya nayo ilayako, lelo calolekanga kwati Yeova waya sana ukutali nupya palapita insita pakuti insi ipya ikayeko. Lyene ndakai nkalola ukuti Yeova waya apiipi sana nupya insi ipya yatipalama sana.” (Mili. 2:25) Asi mulandu nu mulimo uno twapeelwa, lekini tutwalilile ukupalama kuli Yeova. Atalatala atusye, lelo alatwazwa ukuya ni nsansa lino tukuomba umulimo wakwe ukuli konsi kuno umulimo uwo ungayela.—Eza. 41:13.