1. Uzye Yeova akauvwa uli pa yantu aicefya? Londololini.

YEOVA watemwa antu aicefya. Antu sile aicefya aangaya ya cuza yakwe. Lelo, ‘avilumba nayo yatange yafisame kunoli.’ (Masa. 138:6) Swensi kwene tukalonda ukuzanzya Yeova pakuti atutemwe, fwandi kwaya imilandu iyuvwike iikalenga twalondesya ukusambilila ukuya aicefye.

2. I vyani vino tumasambilila umu cipande cii?

² Umu cipande cii, tumazana masuko uku mauzyo yatatu: (1) Uzye ukuicefya ali cani? (2) U mulandu ci uno tulinzile ukuyela aicefye? (3) A lilaci lino cingatala ukuya aicefye? Wakwe vino tumalola, ndi twaya aicefye, tukazanzya Yeova nupya ivintu vikatuzipila.—Mapi. 27:11; Eza. 48:17.

3. Uzye ukuicefya ali cani?

³ Umuntu uwaicefya asiilola ukuti wacindama ukuluta yauze nupya ataaya ni cilumba. Baibo ikalangilila ukuti umuntu uwaicefya wamanya ukuti Yeova wakulisya ukumuluta nupya wamanya vino antu yauze yaya. Umuntu uwaicefya akalola ukuti umuntu aliwensi wamulutako muli vimwi.—Filipi 2:3, 4.

4-5. U mulandu ci uno tungalandila ukuti ukuicefya kwa cumi kusilolekela muli vino twaya ukunzi?

⁴ Antu yamwi yakaloleka sile kwati yaicefya nomba asi vino yaya. Limwi yangaloleka ansonyi. Nanti limwi yangaya nu mucinzi kuli yauze pa mulandu wa kuti avino avyazi yao  yayasambilizye. Nomba umu mwenzo, limwi yangaya sana ni cilumba. Umukuya kwa nsita yakaiza iyamanyikwa vino yaya umu cumi cumi.—Luka 6:45.

⁵ Antu yauze yene yakaloleka kwati yaitaila nupya yakalanda vino yakwelenganya, nomba cico cisisenula ukuti yaya ni cilumba. (Yoa. 1:46, 47) Nomba antu atakwata insonyi yalinzile ukucenjela pakuti yataika sile mano pali vino yangakwanisya ukucita. Fwandi asi mulandu twakwata insonyi nanti foo, swensi kwene tulinzile ukuombesya ukuya sana aicefye.

6. Ukulingana na amazwi aya pali 1 Kolinto 15:10, i vyani vino tungasambilila ku mutumwa Paulo?

⁶ Lekini tulande pa mutumwa Paulo. Yeova wamuomvizye ku kupanga ivilongano mu misumba iingi. Nupya afwile waomvile imilimo iingi sana ukuluta atumwa yakwe Yesu Klistu yonsi. Nomba nanti ciye vivyo, Paulo atatazile aelenganyapo ukuti wali umucindame ukuluta atumwa yauze. Waicefizye nu kulanda ati: “Nene munono kuluta pa atumwa yonsi nupya citandinzile kwamwa mutumwa pano nazunyizye iuvi lyakwe Leza.” (1 Kol. 15:9) Lyene Paulo walanzile ukuti wali acuza wakwe Yeova pa mulandu sile wakuti Yeova wamuvwilile uluse asi pa mulandu wakuti wali mucindame nanti ukuti waomvile imilimo ingi sana. (Welengini 1 Kolinto 15:10.) Paulo walangilile ningo sana vino umuntu umuicefye waya. Lino walembelanga aina Kolinto kalata, ataitutumwile nanti sile lino yamwi mu cilongano yalandanga ivipe pali aliwe.—2 Kol. 10:10.

7. Uzye umwina umwi uwamanyikwe sana walangilile uli ukuti waicefizye?

⁷ Antu yakwe Yeova aingi yakomeleziwa pa mulandu ni lyasi pa umi wakwe ya Karl F. Klein, aomvile umwi Umba Ilikatungulula.  Umwi lyasi pa umi wao, ya Klein yalanzile pali vimwi vino yaluvyanyanga ni intazi zino yaapisilemo umu umi. Muli ya 1920, cayatalile sana ukuomba umulimo wa kusimikila uwa ku ng’anda ni ng’anda. Pa cisila ca kuombako umuku wa kutandikilako yatazile yata ukusimikila uku ng’anda ni ng’anda pa myaka iili. Lino papisile insita, ala yakaombela pa Betele, umwina umwi wayalungike nupya yatwalilile ukusokela umwina wiyo pa nsita imwi. Nupya izile iyalwalapo nu ulwale wa kusakamikwa sana, lelo izile iyapola. Nomba yaomvilepo imilimo na yuze icindame sana. Icumi kwene ya Klein yaicefizye sana pakuti yalande vino yaluvyanyanga nanti icakuti yamanyikwe sana! Aina na ya nkazi aingi yakaiusya ya Klein na ucisinka wao muli vino yalemvile umwi lyasi pa umi wao. *

8. Uzye amazwi aaya pali 1 Petulo 5:6 yakatwazwa uli ukulola vino ukuicefya kukazanzya Yeova?

⁸ Tukalondesya ukuya aicefye pano ukucita vivyo kukalenga twazanzya Yeova. Umutumwa Petulo walondolwile vii ningo sana. (Welengini 1 Petulo 5:6.) Ibuku lyakuti “Izini Muye Alondezi Yane” likalanda pali vino Petulo walanzile ukuti icilumba caya wakwe sumu. Ivikafuma umu cilumba vitaazipa. Imiyele ii ingalenga umuntu ukuya uwa sile sile kuli Leza. Ukuicefya kwene kungalenga nu muntu umusuulwe ukuya umucindame sana kuli Yeova. Yeova alamulambula ndi cakuti mwatwalilila ukuya aicefye. * Icintu icisuma sana cino tungacita u kuzanzya Yeova!—Mapi. 23:15.

9. U mulandu ci uno antu yakalonda ukutupalama ndi twaicefya?

⁹ Tukazanzya Yeova nupya ivintu vikatuzipila ndi twaya aicefye. Ukuicefya kukalenga antu yauze yalondesya ukutupalama. U mulandu ci uno cayela vivyo? Elenganyini pa yantu yano mukaipakizya ukuya pamwi nayo. (Mate. 7:12) Tusitemwa ukuya nu muntu wino lyonsi akalonda yauze yacita vino akulonda nupya asikutika kuli vino yauze yakumupanda mano. Nomba cikaleta uluzango ukuya na ina na ya nkazi ndi ‘yakutuvwila ulanda, ukutulanga ukutemwa wa ina ataila, ukutuvwila uluse nu [kuicefya].’ (1 Pet. 3:8) Vikwene avino tukayuvwa pa yantu aicefya nupya nayo yakauvwa ningo ukuya pamwi naswe ndi twaicefya.

10. Uzye ukuicefya kukalenga uli umi witu ukwangupala?

 ¹⁰ Nupya ukuicefya kukaangupazya umi witu. Insita zimwi tungalola ivintu ivikucitika ukuti visi ningo nanti i vya lufyengo. Umonsi uwali sana na mano Umwene Solomoni walanzile ukuti: “Nemo nalola azya yakukwela pa mfwalasi lino acindami yakupita pansi wa azya.” (Kasa. 10:7) Insita zimwi antu amanyikisya imilimo imwi yasiyataizya. Nupya antu aatamanyikisya imilimo ali yano yakacindikwa. Nanti cingaya vivyo, Solomoni wilwike ukuti tulinzile ukuzumila vivyo kwene ivikutucitikila nupya tutalinzile ukusoka pali vino vikacitika umu umi. (Kasa. 6:9) Ndi twaicefya, citalatutalila ukuzumila ivikacitika umu umi vino tutatemilwe.

11. Uzye tulinzile ukucita uli ndi twalungikwa?

¹¹ Cila wanda, kukaya ivikacitika ivingalondekwa ukuti tulange ukuti twaicefya. Lekini tulande pali vimwi ivikacitika. Ndi yatulungika. Tulinzile ukwiusya ukuti pakuti umwi atulungike ala ituluvyanya sana ukucila na vino tukwelenganya. Ndi umwi watulungika, limwi tutanga tuzumile. Tungatandika ukupeela umuntu uwatulungika imilandu. Nomba ndi cakuti twaicefya, tukaezya na maka ukuya na melenganyo asuma.

12. Ukulingana na mazwi aaya pa Mapinda 27:5, 6, u mulandu ci uno tulinzile ukutaizizya umuntu uwatulungika? Langililini.

¹² Umuntu uwaicefya akauvwa ningo ndi yamulungika. Katulangilile: Elenganyini ukuti muli umu kulongana. Pa cisila ca kulanzyanya na ina na ya nkazi, umwi wamwama pa mbali nu kumunena ukuti ivya kulya ivifyantama pa kasi ka mino. Kwene munguvwa insonyi. Nomba uzye mungataizya ukuti wacita ningo pa kumunena? Limwi mungelenganya ukuti canga cizipe umwi amunena zuwa! Umu nzila iliyonga kwene, tulinzile ukuicefya nu kutaizya umwina nanti nkazi uwasipa nu kutulungika lino calondekwa. Tukalola umuntu wa musango uwo ukuti a cuza witu, asi umulwani foo.—Welengini Mapinda 27:5, 6; Gala. 4:16.

13. Tungalanga uli ukuti twaicefya ndi yamwi yapeelwa imilimo umwi uvi?

¹³ Ndi yamwi yapokelela imilimo imwi umwi uvi. Eluda uwi zina lyakuti Jason wazumiile ukuti: “Ndi nalola yauze yakupeelwa imilimo, cikanzungusya sana umulandu uno nemo yatansoolwela.” Uzye namwe insita zimwi avino mukayuvwa? Citaipa ukulondesya ukuomba imilimo iingi umwi uvi lyakwe Yeova.  (1 Tim. 3:1) Nomba tulinzile ukucenjela ni vintu vino tukaelenganyapo. Ndi tutacenjile, tungatandika ukuya ni cilumba umu mwenzo. Umwina Klistu umonsi angatandika ukwelenganya ukuti aliwe wafikapo sana ukuomba umulimo umwi. Nanti nkazi Umwina Klistu uwatwalwa angatandika ukwelenganya ukuti, ‘ya wane yangaomba ningo umulimo uu ukucila aina yauze!’ Nomba ndi twaicefya, tutalaelenganya vivyo.

14. I vyani vino tungasambilila kuli vino Mose wacisile lino antu yauze yapeezilwe imilimo?

¹⁴ Tungasambililako vimwi kuli vino Mose wacisile lino yauze yapeezilwe imilimo. Mose watemilwe umulimo wakwe uwa kutungulula uluko lwa ina Izlaeli. Uzye Mose uvwile uli lino Yeova wazumilizye yauze ukutandika ukuombela pamwi nawe imilimo imwi ino waombanga? Atuvwile uzuwa. (Mpe. 11:24-29) Mose waicefizye nu kuleka yauze ukumwazwako umulimo wa kupingula antu. (Kufu. 18:13-24) Lyene aina Izlaeli yakweti aonsi aingi akuyaombela pakuti yataaloleela sana lino yatwala imilandu ukuti yapingulwe. Cii cikatulanga ukuti Mose wisile sana mano uku kwazwa antu yauze ukucila ukwika mano uku cifulo cino wakweti umu luko lwa ina Izlaeli. Waomvile ningo sana nupya tungamukolanya! Tukaiusya ukuti ndi tukulonda ukuti Yeova atuomvya sana, tulinzile ukuicefya ukucila ukucenjela umu miombele ya milimo imwi. Nanti icakuti ‘Yeova wacindama, akalolekesya pali yao aicefya.’—Masa. 138:6.

15. Uzye ivintu vyasenuka uli uku ina yamwi na ya nkazi?

¹⁵ Lino ivintu vyasenuka. Umu myaka ya ndakai, aina na ya nkazi aingi aombela Yeova pa myaka iingi yapeelwa imilimo yuze. Umu 2014, angalizi ya vitungu na ya mama yao yayapeezile imilimo yuze iyakuomba. Ukutandika umu mwaka kwene uuwa, angalizi ya viputulwa yasitwalilila ukuomba umulimo  wao ndi yafisya imyaka 70 iya kuvyalwa. Nupya aina yano yafisya imyaka 80 nu kucilapo yasitwalilila ukuomba umulimo wakwe ukalemanya umu maumba yakwe ya eluda. Nupya umu myaka iyapita, aingi aombelanga pa Betele yayatuma umu mulimo wakwe upainiya. Yauze yene yatiile ukuomba umulimo wa nsita yonsi uiyele pa mulandu nu kulwalilila, ukusakamala ulupwa nanti pa mulandu ni vintu vyuze sile.

16. Uzye aina itu na ya nkazi yalangilile uli ukuti yaicefya lino yazumiile imilimo yuze ino yapeezilwe lino ivintu vyasenwike?

¹⁶ Lino ivintu vyasenwike ina aingi na ya nkazi cayataliile sana. Yafwile yatemilwe sana imilimo ino yaombanga pa myaka iingi. Yamwi yuvwanga sana uyi pano yatiile ukuomba imilimo ino yatemilwe sana. Umu kuya kwa nsita, iizile iyaelezya. U mulandu ci? Icayazwilizye sana u kutemwa Yeova. Yamanyile ukuti yaipeezile kuli Leza asi u ku mulimo uno yaombanga nanti vino yamanyikwe. (Kolo. 3:23) Yakauvwa ningo ukutwalilila ukuombela Yeova ukuli konsi sile. ‘Yakaika masakamiko yao pali Leza,’ pano yamanya ukuti akayasakamala.—1 Pet. 5:6, 7.

17. U mulandu ci uno tukataizizya sana ukuti Izwi Lyakwe Leza likatukomelezya ukuya aicefye?

¹⁷ Uzye tusitaizya ukuti Izwi Lyakwe Leza likatukomelezya ukuya aicefye? Ndi twaya ni miyele kwene ii isuma cuze, antu yauze yakatemwa ukuya naswe nupya naswe ivintu vikatuzipila. Cikatwazwa ukuzizimizya intazi zya mu umi. Ni cacindama sana i cakuti, tukapalama sana kuli tata witu uwa kwiyulu. Twaya sana nu luzango ukumanya ukuti nanti icakuti Leza u wa ‘Papelapela,’ watemwa sana aomvi yakwe aicefya!—Eza. 57:15.