LINO Yesu ataatala waswilila ukwiyulu, wanenyile asambi yakwe ati: “Mulaya yakambone yane . . . ukufika na kuno insi yapela.” (Milimo 1:8) Uzye yaali nu kucita uli pakuti yasimikile antu umu nsi yonsi?

Umuntu umwi uwasambilila sana (Martin Goodman, professor wa pa Oxford University), walanzile ukuti “ukulondesya ukuombela Leza nu mwenzo onsi kwalenzile Aina Klistu ukuya apusaneko ni mipepele yuze, umu uteeko wa ina Loma, ukwikako sile ni mipepele ya Ayuda.” Yesu wayanga umu kusimikila uku vifulo ivipusane pusane. Aina Klistu ya cumi yakolanyanga Yesu nupya ya simikilanga “ilandwe lya Wene Wakwe Leza” konsi ukwazanwanga antu. Yezyanga na maka ukuzana antu aalondanga ukumanya icumi. (Luka 4:43) Ali mulandu uno umu nsita ya Ina Klistu akutandikilako kwayeliile “atumwa,” izwi ilikalozya uku yantu aatumwa ukuya uku kuomba umulimo umwi. (Mako 3:14) Yesu wapeezile alondezi yakwe isunde lyakuti: “Yangini konsi umu nsi mucite antu amu nko zyonsi ukuya alondezi yane.”—Mateo 28:18-20.

Atumwa yakwe Yesu 12 yataayapo ndakai, nomba kwaya aomvi yakwe Yeova aingi cuze aakaombesya umu mulimo wa kusimikila wakwe vino atumwa yaombanga. Ndi yuvwa ulwamo lwa kuti kumwi kukulondekwa sana ya kasimikila, yakalanda ukuti: “Mukwai namayako! Ntumini nene!” (Ezaya 6:8) Yamwi yaaya uku mpanga izyayela ukutali nu kumwao, wakwe vino aingi aakafuma ukwi Sukulu lya Gilyadi yakacita. Yamwi yakaaya uku vifulo vyuze umu mpanga yao kwene. Yamwi yasambilila indimi zyuze ukuti yazwe  icilongano cimwi nanti iumba. Citaangupile uku ina aingi na ya nkazi ukuti yacite vivyo, nomba yaitemiilwe ukuyaombela uku vifulo vivyo pa mulandu wa kuti yalondanga yalange ukuti yatemwa Yeova na antu yauze. Fwandi yaipekanyizye ningo nu kuomvya insita yao, amaka, alino ni mpiya zyao pakuti yaye umu kusimikila ukukalondekwa sana ya kasimikila. (Luka 14:28-30) Umulimo uno aina yaa na ya nkazi yakaomba wacindama sana.

Asi swensi swe muno tungaya ukukalondekwa sana ya kasimikila nanti ukusambilila ululimi luze. Nomba swensi kwene tungaomba wakwe ya misyonali umu vilongano vino twayamo.

Umu nsita ya atumwa, Aina Klistu aingi yali ancincile umu mulimo wa kusimikila nanti icakuti yataali ya misyonali. Paulo wanenyile Timoti ati: “Omba mulimo wa kukosola ilandwe lisuma nga nu kuomba ncito yako yonsi wa muomvi wakwe Leza.” (2 Timoti 4:5) Amazwi yaa yaomvile ku Ina Klistu aaliko umu nsita ya atumwa nupya yakaomba na kuli sweswe ndakai. Aina Klistu yonsi yalinzile ukuvwila isunde lya kuya umu kusimikila ilandwe lya Wene nu kupanga asambi. Nu mu vilongano kwene vino twayamo, kwaya inzila izingi zino tungaombelamo wakwe ya misyonali.

Ndi ya misyonali yayatwala uku mpanga yuze, vintu vikasenuka sana, nupya yakaezya na maka ukuti yaelezye uwikalo wa ku mpanga yuze. Nanti icakuti limwi tutanga tukwanisye ukuya ukukalondekwa sana ya kasimikila, tungaomvya inzila zyuze izya kusimikililamo antu. Umu 1940, aina itu yayakomelizye ukuombako umulimo wa kusimikila umu miseo. Uzye mwatala mwezyako ukusimikila umu museo? Uzye mwezyako ukuomvya utu masitandi twa kutantikapo impapulo? Icikulandwapo icakuti, Uzye mukaitemelwa ukuomvya inzila izipya izyakusimikililamo ilandwe lisuma?

Ndi cakuti mukalondesya ukuombako umulimo wa kusimikila, mulaya acincile sana. Aakaya ukukalondekwa sana ya kasimikila nanti ukusambilila ululimi luze, ilingi yakaaya aakasimikila aakaomba ningo nupya yangaazwa sana ivilongano. Yakaombesya sana umu mulimo wa kusimikila. Ya misyonali nayo ilingi yakatungulula umu vilongano ukufikila lino aina yalinga ukuti  yangatandika ukutungulula. Ndi cakuti mwemwe ina awatiziwa, uzye ‘mukalondesya,’ ukuya umuomvi nanti eluda pakuti mwaombela aina na ya nkazi umu cilongano cino mwayamo?—1 Timoti 3:1.

Tungazwa ivilongano vino twayamo umu nzila na zyuze. Swensi kwene ance na aikolo tungaakomelezya aina itu aakalondekwa uwazwilizyo.—Kolose 4:11.

Ndi tukulonda kuti twaazwa aina na ya nkazi, tulinzile ukuyamanya ningo. Baibo ikatukomelezya ukuti tulinzile “twasakamalana,” nanti ukwelenganya pali vino aina na ya nkazi yakulondekwa, lyonsi lino twakomaana. (Ayebulai 10:24) Cii citalozile umu kuti tulinzile ukumanya tonsi sile pa ina na ya nkazi. Cikupiliula ukuti tulinzile ukumanya ina na ya nkazi nu kumanya ivikulondekwa kuli aliyo. Limwi yangalondekwa uwazwilizyo, ukuyateekezya, nanti ukuyakomelezya ukuomvya Baibo. I cacumi ukuti limwi limwi aangazwa ina na ya nkazi umu cilongano aa eluda na aomvi sile. (Galatiya 6:1) Nomba swensi kwene limwi tungaazwilizyako aina na yankazi akoloci, nanti amu ndupwa zimwi, aali ni ntazi.

Ya Salvatore yapokeelile uwazwilizyo wa musango uwo. Pa mulandu wa kuulizya sana impiya, ya Salvatore yakazizye vino yaomvyanga umu uculuzi wao, ing’anda, ni vintu ivingi ivya lupwa. Yatandike ukusakamala sana pali vino yali nu kusunga ulupwa. Ulupwa luuze umu cilongano lwaweni ukuti ya Salvatore nu lupwa lwao yalondekwanga uwazwilizyo. Ulupwa luulo lwapeezile ya Salvatore impiya nu kwazwilizya ya Salvatore na ya mama yao ukuzana incito. Nupya ulupwa luulo lwayanga umu kwizizya pamwi nu lupwa lwakwe ya Salvatore nu kulanda amazwi ya kukomelezya. Yatandike ukuvwana sana. Ndakai amu ndupwa zii zyoili yakauvwa ningo sana ndi iusya vino izizyanga capamwi pa nsita kwene iiya itale.

Aina Klistu ya cumi yakanenako antu yauze pa vizumilo vyao. Tulinzile ukukolanya Yesu nu kwazwa antu yonsi ukumanya ivintu ivisuma vino Leza walaya ukuti alacitila antunze. Ngi cakuti tungakwanisya ukuya ukukulondekwa sana ya kasimikila nanti foo, swensi kwene tungezya na maka ukwazwa aina aaya umu vilongano vino twayamo. (Galatiya 6:10) Ndi tukupeela yauze, tulaya sana ni nsansa nupya lyonsi tulaacita ivintu “vikazanzya Mwene.”—Kolose 1:10; Milimo 20:35.