1. I cintu ci cicindame cino antu yalinzile ukusoololapo ukucita?

 NDAKAI antu yakwata icintu icicindame sana cino yalinzile kusoololapo ukucita. Yalinzile ukusoololapo ukulatungilila Yeova Leza Kateeka wa cumi umu uumbo onsi, nanti ukulatungilila kateeka uwaya nu unkalwe nupya umulwani, Satana Ciwa. Nupya vino umwi wasoololapo vingalenga ukuti akaye nu umi wa pe nanti foo. (Mate. 25:31-33, 46) “Umu ucuzi ukalamba,” yalapeelwa icimanyililo ca kupusuka nanti ukononwa.—Kuso. 7:14; 14:9-11; Ezek. 9:4, 6.

2. (a) Uzye ilembo lya Aebele 10:35-39 likatukomelezya ukucita cani? (b) Uzye ibuku lya Kusokolola lingatwazwa uli?

² Belengini Aebele 10:35-39. Ndi cakuti mwasoololapo ukutungilila ukateeka wakwe Yeova, ale mwasoololapo icintu icicindamisye. Lyene mukulondesya ukwazwa yauze ukusoolola ningo. Pakuti mucite vivyo mulinzile ukuomvya ivyeo ivyaya umwi buku lya Kusokolola. Ibuku lii lyasokolola ivilacitikila antu aakakanya Yeova, nupya lyalanda na pa mapaalo yano yonsi akatwalilila ukutungilila ukateeka wakwe Yeova na ucisinka yalapokelela. Tulinzile ukusambilila icumi cii cicindamisye. Ukucita vivyo kulalenga tukalondesya ukuombela Yeova. Nupya cilalenga ukuti tukaomvya vino tukusambilila uku kwazwa yauze ukusoololapo ukutandika ukuombela Yeova nu kutwalilila ukucita vivyo kwene.

3. I vyani vino tumasambilila umu cipande cii?

³ Umu cipande cii, tumaasuka amauzyo yaa: I vyani ivilacitikila antu aakatungilila ukateeka wakwe Yeova? Nupya i vyani ivilacitika yaayo aakatungilila icilyanyi ciyenzu icalondololwa umwi buku lya Kusokolola?

4. I umba ci lino umutumwa Yoani waweni lili na Yesu umwi iyulu?

⁴ Umu cilolwa, Yoani waweni maumba yaili yakutungilila ukateeka wakwe Yeova nupya yapokeliile nu umi wa pe. Iumba lya kutandikilako aa 144,000. (Kuso. 7:4) Yasenzilwe ukufuma pano nsi nu kuya ukwi yulu ukuyapanga uteeko, nanti Uwene pamwi na Yesu. Yatandike ukuteeka insi pamwi na Yesu. (Kuso. 5:9, 10; 14:3, 4) Umu cilolwa, Yoani waweni yaimi pamwi na Yesu apa Mwamba wa Zioni uwa kwi yulu.—Kuso. 14:1.

5. I vyani vyasya vicitikile ya 144,000 aacili pano nsi?

⁵ UKufuma umu manda ya atumwa, antu aingi yasoololwa ukuya muli ya 144,000. (Luka 12:32; Loma 8:17) Nomba, Yoani yamunenyile ukuti antu anono sile pali ya 144,000, aliyo yalaya pano nsi umu manda akusyalikizya. “Asyalapo” yalapokelela ‘icimanyililo’ ica kulanga ukuti Yeova watayapokelela, lino ucuzi ukalamba utatala watandika. (Kuso. 7:2, 3; 12:17) Lyene, umu ucuzi ukalamba, asyalapo yalasendwa ukwi yulu nu kuyaya pamwi na ya 144,000 afwile mpiti ala yali na ucisinka. Lyene yalaya ya kateeka pamwi na Yesu umu Wene Wakwe Leza.—Mate. 24:31; Kuso. 5:9, 10.

6-7. (a) I umba ci na lyuze lino Yoani waweni, nupya i vyani vino tungasambililako? (b) U mulandu ci uno ivyaya umu Kusokolola icipande 7 vyakumila asoololwe na aya “umwi iumba ilikalamba”?

⁶ Pa cisila ca kulola iumba ililaya ukwi yulu, Yoani wizile alola “iumba ilikalamba.” Baibo italanda impendwa iya yantu aaya umwi iumba lilyo. (Kuso. 7:9, 10) I vyani vino tungasambilila ukwi iumba lii? Yoani walanzile ati: “Yaa yafuma umu ucuzi ukalamba, nupya yafula imingila yao nu kuilenga ukuya itiswe umu wazi wa Mwana wa Mfwele.” (Kuso. 7:14) Antu aaya umwi iumba ilikalamba nga yapusuka, yalikala pano nsi nu kuipakizya amapaalo.—Masa. 37:9-11, 27-29; Mapi. 2:21, 22; Kuso. 7:16, 17.

⁷ Nampo nga twasoololwa ukuya ikala ukwi yulu nanti tulikala pano nsi, ivyalembwa umwi buku lya Kusokolola icipande 7 vyatukuma. Lino ivyalembwa umu cipande 7 ica Kusokolola vilafikiliziwa, ivintu vilazipila sana aomvi yakwe Leza aaya umu maumba yonsi yoili. Ndi cakuti twasoololapo ukulatungilila ukateeka wakwe Yeova, ivintu vilatuzipila sana. I vyani vyuze vino ibuku lya Kusokolola lyalanda apa ucuzi ukalamba?—Mate. 24:21.

8. Uzye ucuzi ukalamba ulatandika uli, nupya i vyani vino antu aingi yalacita?

⁸ Wakwe vino twasambilile umu cipande icafumako, likwene sile amauteeko aa mu nsi yali nu kuzanza Babiloni Mukalamba, kuli kuti kupepa konsi ukwa ufi. (Kuso. 17:16, 17) Nupya vikwene aali vino ucuzi ukalamba ulatandika. Uzye ii ilaya insita iyakuti antu yatandike ukulondesya ukulapepa Yeova? Awe foo. Lelo icipande 6 ica Kusokolola cikalangilila ukuti insita iiya ilatala sana, antu asiombela Yeova yalaya kuli vino yakolanya uku myamba, kuli kuti utuungwe twa miteekele na akacita mabizinesi ukuti yayacingilile. Pa mulandu wakuti antu yaayo yatalazumiliziwa ukutandika ukutungilila Uwene Wakwe Leza, Yeova alayalola ukuti aakakanya.—Luka 11:23; Kuso. 6:15-17.

9. Uzye antu yalalola uli upusano pa antu aakaombela Yeova na asimuombela umu ucuzi ukalamba, nupya i vyani ivilacitikila antu yakwe?

 ⁹ Umu cumi, aomvi yakwe Yeova aacisinka, yalamanyikwa umu nsita iya itale iya ucuzi ukalamba. Antu yaa yalaya aali umba sile ilya antu pano nsi ilikaombela Yeova nupya ilisitungilila “icilyanyi ca mu mpanga.” (Kuso. 13:14-17) Pa mulandu wakuti yatwalilila ukuya acumi kuli Yeova, antu aakakanya Yeova yalayasokela sana. Ivilacitika ivyakuti inko zilazanza antu yakwe Leza yonsi pano nsi. Ukuzanza kuu kwalondololwa umu usesemo ukuti u kuzanza kwakwe Gogi wa ku Magogi.—Ezek. 38:14-16.

10. Ukulingana na Kusokolola 19:19-21, uzye Yeova alacita uli lino antu yakwe yalazanzwa?

¹⁰ Uzye Yeova alacita uli lino antu yakwe yalazanzwa? Walanda ukuti: “Icipyu cane cilalunkuma wa moto.” (Ezek. 38:18, 21-23) Lyene umu Kusokolola cipande 19 mukalondolola icilacitika. Yeova alatuma Umwanakwe uku kucingilila antu yakwe nu kucimvya alwani yao. Yesu alaombela pamwi na “asilika amwi yulu” kuli kuti ya malaika na 144,000 ku kulwisya alwani yaayo. (Kuso. 17:14; 19:11-15) I vyani lyene ivilacitika umu nkondo ii? Utuungwe na antu asiuvwila Yeova yalononwa!—Belengini Kusokolola 19:19-21.

11. U kuzevya ci ukucindame sana ukwalandwa umwi buku lya Kusokolola?

¹¹ Elenganyini vino cilaya uku yantu akatwalilila ukuya acumi alikala pano nsi lino alwani yakwe Leza yalononwa! Nanti cakuti ukwi yulu kulaya sana uluzango lino Babiloni Mukalamba alononwa, kwaya na cuze icilalenga ukuti ukwi yulu kukaye sana uluzango. (Kuso. 19:1-3) I cintu icicindamisye icalandwa umwi buku lya Kusokolola, kuli kuti “uwinga wa mwana wa mfwele.”—Kuso. 19:6-9.

12. Ukulingana na Kusokolola 21:1, 2, a lilaci lino kulaya uwinga wa Mwana wa Mfwele?

¹² A lilaci lino kulaya uwinga wa Mwana wa Mfwele? Ya 144,000 yalaya ukwi yulu lino inkondo ya Amagedoni itali itandike. Nomba iyo, italaya aali insita iyakuti kuye uwinga wa Mwana wa Mfwele. (Belengini Kusokolola 21:1, 2.) Uwinga wa Mwana wa Mfwele ulayako pa cisila ca nkondo ya Amagedoni nupya lino alwani yakwe Leza yonsi yononwa.—Masa. 45:3, 4, 13-17.

13. I cani cino kulayeela uwinga wa Mwana wa Mfwele?

¹³ I cani cino kulayeela uwinga wa Mwana wa Mfwele? Wakwe vivi kwene vino cikaya uku monsi na mama akutwalana, nu winga kwene uu uwa mampalanya ulalenga ukuti Umwene, Yesu Klistu na “nawinga” wakwe kuli kuti ya 144,000, yakaye pamwi. Ukuzevya kuu ukucindame kulalenga ukuti yakapange uteeko upya ulateeka insi pa myaka 1,000.—Kuso. 20:6.

14-15. Ukulingana na Kusokolola icipande 21, uzye ya 144,000 yayakolanya kuli cani? (Lolini cikope icili pa nkupo.)

¹⁴ Lyene, umu Kusokolola cipande 21 yakolanya ya 144,000 uku musumba uyembe sana uukaamwa ukuti “Yelusalemu Mupya.” (Kuso. 21:2, 9) Umusumba uwo wakwata imifula ya mawe 12 nupya palembwa na “mazina 12 ayatumwa 12 a Mwana wa Mfwele.” U mulandu ci uno Yoani wikileko sana mano uku cilolwa cii? A pa mulandu wakuti waweni izina lyakwe ililembwa  api iwe lyonga. Lii lyali isyuko sana!—Kuso. 21:10-14; Efes. 2:20.

¹⁵ Umusumba uu wa mampalanya wapusana sana ni misumba yuze. Musumba uu wene wakwata umuseo ukalamba uwapangilwa na goldi, impongolo 12 izya mawe ya mutengo, imifula nayo ni ciumba vyapangilwa na mawe ya mutengo nupya musumba uu wapimwa ningo. (Kuso. 21:15-21) Nomba, kwali cimwi iculile! Lolini vino Yoani walemvile, watiile: “Ntawenimo itempele, pano Yeova Leza wa Maka Yonsi ali tempele lya musumba, nu Mwana wa Mfwele nawe kwene i tempele lya musumba.” (Kuso. 21:22, 23) Antu aya muli Yelusalemu Mupya yalaya pamwi na Yeova. (Ayeb. 7:27; Kuso. 22:3, 4) Fwandi, Yeova na Yesu aali tempele lya mu musumba uwa.

16. Cilaya uli uku antu lino Uwene Wakwe Leza ulateeka pa myaka 1,000?

¹⁶ Aapakwe yakaaya sana nu luzango nga yelenganya pa musumba uu. Nomba na yonsi kwene akwata upaalilo wa kwikala pano nsi, kwaya icalenga yaaya nu luzango nga yelenganya pa musumba uu. Lino Uwene Wakwe Leza ulateeka pa myaka 1,000, Yelusalemu Mupya alaleeta mapaalo aingi sana pano nsi. Yoani waweni amapaalo akonkolokanga wa “luzi ulwakweti amanzi ya umi.” Nupya umumbali zyonsi zya luzi mwali “imiti ya umi” iyakweti amafwa aomviwanga “ukupozya antu amu nko.” (Kuso. 22:1, 2) Antu yonsi alaya nu umi pa nsita iya yalaipakizya ivintu ivisuma. Nupya panono panono antu yonsi aya ni cuvwila yalaaya amalilike. Kutalaya ukulwala, kuvwa ukuwaika, nu kuloosya.—Kuso. 21:3-5.

17. Ukulingana na vino Kusokolola 20:11-13 ikalanda, aaweni alaipakizya amapaalo umu myaka 1,000 iya kuteeka?

¹⁷ Aaweni alaipakizya amapaalo umu myaka 1,000 iya kuteeka? Inkoleelo, iiumba ilikalamba ililapusuka pa Amagedoni kumwi na ana alavyalwa umu nsi ipya. Nomba umu cipande 20 ica Kusokolola mwaya usoowelo wakuti afwe yalatuutululwa. (Belengini Kusokolola 20:11-13.) Antu “alungame” aafwa na ucisinka, alino na “asi alungame” aatakweti isyuko lya kumanya ivili vyonsi pali Yeova yalatuutululwa nu  kuya nu umi pano nsi. (Mili. 24:15; Yoa. 5:28, 29) Uzye cii cikusenula ukuti yonsi kwene afwa yalatuutululwa nu kuya nu umi umu myaka 1,000 ino Uwene ulateeka? Awe foo. Antu yonsi aakanyile ukutandika ukuombela Yeova lino yacili nu umi, yatalatuutululwa. Yakweti isyuko lya kucita vivyo nomba yalangilile sile ukuti yatakulonda ukwizaya nu umi usuma umu Paladaise pano nsi.—Mate. 25:46; 2 Tesa. 1:9; Kuso. 17:8; 20:15.

18. Uzye ivintu vilaya uli pano nsi apa cisila ca myaka 1,000?

¹⁸ Uku kusila kwa myaka 1,000, antu yonsi yalaya amalilike. Kutalaya nanti awenga alaya nu luyembu luno twapyana ukufuma kuli Adamu. (Loma 5:12) Citiipu ca luyemba lwakwe Adamu cilafumiziwapo. Cii cikupiliula ukuti antu yonsi yalaya nu “umi” umalilike pa cisila ca myaka 1,000.—Kuso. 20:5.

19. U mulandu ci uno kulayeela uwezyo wa kusyalikizya?

¹⁹ Twamanya ukuti Yesu wacimvizye amezyo yakwe Satana nu kutwalilila ukuya uwa cumi. Nomba, uzye antu yonsi yalakolanya Yesu nu kutwalilila ukuya acumi lino Satana alaezya? Swensi kwene wenga na wenga tulalondekwa ukulanga ucisinka witu lino Satana alasapulwa umu ciwina icaula impela apa cisila ca myaka 1,000. (Kuso. 20:7) Yonsi aalatwalilila ukuya acumi lino yaleziwa uwezyo wa kusyalikizya yalapokelela umi wa pe nupya yalaipakizya untungwa uwa cumi cumi. (Loma 8:21) Lelo yonsi aalapondokela Yeova, yalononwa amanda pe pamwi na Ciwa ni viwa vyakwe.—Kuso. 20:8-10.

20. Uzye masesemo aaya umwi buku lya Kusokolola yamulenga ukuvwa uli?

²⁰ Uzye muvwa uli pali vino twapituluka umwi buku lya Kusokolola? Uzye ukwelenganya ukuti akuno muli lino masesemo yaa yakufikiliziwa kwamulenga ukuya nu luzango? Uzye masesemo yaa yamulenga ukuti mwalondesya ukunenako yauze pakuti nayo iize umu kupepa ukusanguluke? (Kuso. 22:17) Tuli sana nu luzango pa kusambilila pa vintu vii ivilacitika uku nkoleelo. Fwandi tukulondesya sana ukulalanda amazwi yano umutumwa Yoani walanzile, aakuti: “Ameni! Iza Mwene Yesu.”—Kuso. 22:20.