1. Iintazi ci ino swe ingi tukakwata?

 UZYE mwimika uyo uno cikamutalila ukufikilizya? b Nga avino cili, ale mutaaya mwenga. Wakwe, Philip walondanga ukuzifya mapepo yakwe nu kulapepa cila nsita, nomba camutalilanga ukuzana insita iya kupepa. Erika nawe walondanga ukulafika zuwa pa kukomaana ukwa kuya umu mulimo wa kusimikila, nomba insita izingi wacelwanga. Tomáš wezizye ukumala ukubelenga Baibo yonsi pa miku iingi. Watiile: “Ntaipakizyanga ukubelenga Baibo. Nezizye pa miku itatu, nomba napelelanga sile umwi buku lya Ina Levi inta nu kuta.”

2. U mulandu ci uno tutalinzile ukutoovokela ndi cakuti tutatala twafikilizya uyo uno twimika?

² Ndi cakuti mwimika uyo uno mutatala mwafikilizya, mutalinzile ukutoovoka. Nanti sile uuyo unono nao kwene ukalondekwa insita na maka pa kuufikilizya. Cisinka icakuti vino mukalondesya ukufikilizya uyo uwo, cikalangilila sile ukuti mwacindika ucuza winu na Yeova nupya mukalondesya ukumuombela apapezile amaka inu. Yeova wacindika sana vino mukaombesya. Ukuya kwene, asilonda twamuombela ukucila vino tutanga tukwanisye. (Masa. 103:14; Mika 6:8) Fwandi lino mukwimika uyo, mwasininkizya ukuti mungaufikilizya. Ndi cakuti mwimika uyo, i vyani vino mulinzile ukucita pakuti muufikilizye? Katulande pali vimwi ivingatwazwa.

3. U mulandu ci uno ukulondesya ukufikilizya uyo kwacindamila?

³ Cacindama sana ukuti mwalondesya ukufikizya uyo uno mwimika. Umuntu umwi aakalondesya ukufikilizya uyo, akacita vimwi ivingamwazwa ukuufikilizya. Ukulondesya ukufikizya, tungakukolanya uku muza uukaasunka uwato mpaka kuno ukuya. Ndi cakuti umuza watwalilila ukupuunga, kapisya wawato angafika kuno akuya. Nupya ndi cakuti umuza iukoma sana, angafika zuwa. Vikwe avino caya, ndi cakuti tukulonda ukufikilizya vino twapanga, ala tulafikilizya. David aakaikala uku El Salvador, walanzile ukuti: “Nga mukulondesya ukufikilizya uyo, cingalenga mwaombesya pakuti mukaufikilizye. Mutaleka ukuti icili consi cimulesye ukufikilizya uyo uno mwimika.” Nomba, i vyani vino mungacita pakuti mwalondesya ukufikilizya uyo?

4. I vyani vino tungapepelapo? (Filipi 2:13) (Loliniko ni cikope.)

⁴ Mwapepa pakuti mwalondesya ukufikilizya vino mwimika. Yeova akaomvya umupasi wakwe uwa muzilo pakuti alenge mwalondesya ukufikilizya vino mwimika. (Belengini Filipi 2:13.) Insita zimwi tukaimika uyo pano ala itumanya ukuti avino tulinzile sile ukucita, nupya citaipa ukucita vivyo. Nomba nga caya vii tutanga twalondesya nu kufikilizya uyo uwo. Vikwene i vyacitikiile nkazi Norina uwa ku Uganda. Wimike uyo uwa kutandika ukutungulula isambililo lya Baibo nanti cakuti atalondanga ukwimika uyo uu pano wayuvwanga ukuti atafisilepo ukuya kasambilizya. I cani icamwazwile? Watiile: “Natandike ukupepa kuli Yeova cila wanda ukuti angazwe ukulalondesya ukutungulula isambililo lya Baibo. Nupya lino napepanga ukuti Yeova angazwe, nayanga nkuzifizyako umu misambilizye yane. Lino papisile imyezi inono, natandike ukulondesya ukulatungulula isambililo lya Baibo. Mu mwaka kwene uwa, natandike ukutungulula masambililo ya Baibo yaili.”

5. I vyani vino tungacita pakuti twalondesya ukufikilizya uyo uno twimika?

⁵ Mwaelenganya pali vino Yeova wamucitila. (Masa. 143:5) Mutumwa Paulo welenganyanga pa cikuuku cikulu cino Yeova wamulangizye, na ci calenzile alondesya sana ukumuombela. (1 Kol. 15:9, 10; 1 Tim. 1:12-14) Namwe kwene ndi cakuti mukwelenganya pali vino Yeova wamucitila, mulalondesya ukufikilizya uyo uno mwimika. (Masa. 116:12) Uvwini ivyazwilizye nkazi uwa ku Honduras ukufikizya uyo uwa kutandika upainiya. Watiile: “Nelenginye pali vino Yeova wantemwa sana. Wangazwile ukuya pa yantu yakwe. Akansakamala nu kuncingilila. Lino nelenginye pali vino Yeova wancitila, ucuza wane na aliwe wakomiileko nupya calenzile nalondesya ukutandika upainiya.”

6. I vyani na vyuze ivingalenga twalondesya ukufikilizya uyo witu?

⁶ Mwaelenganya pa visuma ivingafumamo nga mwafikilizya uyo. Uvwini ivyazwile Erika wino itulandapo ukufikilizya uyo uwa kufika zuwa umu kukomaana kwa kuya umu mulimo  uwa kusimikila. Watiile: “Nizile iniluka ukuti ndi cakuti ntafisile umu nsita, napuswanga ivintu ivingi. Nomba nga nafika zuwa, nakwatanga isyuko ilya kuya pamwi na ina na ya nkazi nu kwizizya pamwi nayo. Nupya nuvwangako ivyeo ivingangazwa ukulaipakizya ukuomba umulimo wa kusimikila alino nu kuzifya imisambilizizye yane.” Erika wisile sana mano uku visuma ivingacitika ndi cakuti akufika zuwa, na ci calenzile afikilizye uyo uno wimiike. I visuma ci vino mulinzile ukwikisyako sana mano? Ndi cakuti uyo winu u kutandika ukubelenga Baibo nu kuzifya mapepo inu, mwaelenganya pali vino ukucita vivyo kulalenga ucuza winu na Yeova ukukomelako. (Masa. 145:18, 19) Ndi cakuti uyo winu u kukwata imiyele iya wina Klistu, mwaelenganya pali vino imiyele iyo ilalenga mwauvwana sana na antu yauze. (Kolo. 3:14) Cingazipa nga mwalemvileko pamwi imilandu ilinzile ukumulenga ukufikilizya uyo uno mwimika. Mwapitulukamo cila nsita pali vino mwalemba. Tomáš wino itulandapo, watiile: “Ndi cakuti nkweti imilandu iingi ilinzile ukulenga mfikilizye uyo uno nimika, cikalenga naombesya pakuti nkaufikilizye.”

7. I vyani ivyazwile ya Julio na ya mama yao ukufikilizya uyo wao?

⁷ Mwakwata insita iya kuya pamwi na antu aangamukomelezya. (Mapi. 13:20) Uvwini ivyavwile ya Julio na ya mama yao ukufikilizya uyo wao uwa kuombesya mu mulimo wa kusimikila. Yatiile: “Twasoolwile ya cuza ali nu kutwazwa ukufikilizya uyo witu nupya twalanzyanyanga nayo pa uyo uno twimike. Aingi pali yaa yafikilizyepo mauyo yamwi akolineko, fwandi yatunenangako ivyali nu kutwazwa. Nupya ya cuza itu yatuzyanga pali vino ivintu vyapitikanga, nupya nga tukulondekwa uwazwilizyo yatukomelezyanga.”

8. I vyani vingacitika ndi cakuti tukuombesya sile ukufikilizya uyo lino tukulondesya? (Loliniko ni cikope.)

⁸ Kulanda sile icisinka, swensi kwene insita zimwi tukatoovoka. Nomba, uzye ale cii cikupiliula ukuti tutanga tuombesye nu kufikilizya uyo witu? Awe foo. Katulangilile: Umuza ungalenga uwato ukufika zuwa kuno ukuya. Lelo asi lyonsi lino umuza ungakwata sana amaka, nupya insita zimwi kutanga kuye nu muza. Uzye cii cikupiliula ukuti kapisya wa wato atalinzile ukupisya? Atanga acite vivyo. Mawato yamwi yakakwata injini; yauze nayo yakakwata sile inkafi. Kapisya wa wato angaomvya inzila yonga pali zii pakuti atwalilile ukupita mpaka akafike kuno akuya. Ukulondesya kuomba kwaya wa muza; insita zimwi tungalondesya kuomba alino insita zyuze nazyo tungatoovoka. Nupya insita zimwi tungalondesya sana ukuomba pakuti tufikilizye uyo witu. Fwandi ndi cakuti tukuombela pa kufikilizya uyo lino sile twakomeleziwa, tungafilwa. Nomba wakwe vino kapisya wa wato akazana inzila zyuze mpaka afika kuno akuya, naswe kwene tungezya apapezile ama itu pakuti tufikilizye uyo witu nanti cakuti twaleka ukulondesya.  Nanti cakuti citanguka, nomba mungaya ni nsansa nga mwafikilizya uyo winu. Lino tutatala twalanda pali vino tungacita, lekini tulandeko api uzyo limwi.

9. Uzye caipa ukutwalilila ukuombesya pakuti tufikilizye uyo nanti cakuti tutautemilwe? Londololini.

⁹ Yeova akalonda twaya ni nsansa lino tukumuombela alino nu kuitemelwa. (Masa. 100:2; 2 Kol. 9:7) Uzye fwandi, tulinzile ukutwalilila ukuombesya ukufikilizya uyo nanti cakuti tatautemilwe? Uvwini vino Paulo walanzile. Watiile: “Nkacuzya umwili wane nu kuuteeka uuzya.” (1 Kol. 9:25-27) Paulo wezyanga apapezile amaka yakwe ukucita ivisuma nanti cakuti umwili wakwe walondanga ukucita iviipe. Uzye Yeova wazangilanga muli vino Paulo wacitanga? Ee. Nupya Yeova wamupaazile pa kuombesya kwakwe.—2 Tim. 4:7, 8.

10. I visuma ci ivikacitika ndi cakuti tukuombesya ukufikilizya uyo nanti cakuti tusikulonda?

¹⁰ Vikwene avino caya, Yeova akauvwa ningo sana nga walola tukulonda ukufikilizya uyo nanti cakuti tusikulondesya. Akaya ni nsansa pa mulandu wakuti tusilonda ukufikilizya uyo pa mulandu wakuti ituutemwa, lelo a pa mulandu na vino twamutemwa. Wakwe vino Yeova wapaazile Paulo, naswe kwene alatupaala pa kuombesya kwitu. (Masa. 126:5) Nupya nga twalola vino Yeova akutupaala, tungatandika ukulondesya ukuomba. Nkazi Lucyna aakaikala uku Poland watiile: “Insita zimwi, sana sana ngi ntoonta nsilonda ukuya umu mulimo wa kusimikila. Lelo, insansa zino nkaya nazyo lino nawela umu mulimo wa kusimikila, u wila usuma sana ukufuma kuli Yeova.” Lekini lyene tulande pali vino tungacita ndi cakuti twatoovoka.

11. Uzye Yeova angatwazwa uli ukuya ni miyele iya kuikaanya?

¹¹ Mwapepa pakuti muye ni miyele iya kuikaanya. Izwi lyakuti ukuikaanya likalozya mukuti umuntu umwi alinzile ukuombesya pakuti atacita icipe. Naswe kwene tukalondekwa ukuikaanya nanti cakuti umulimo uno tukuomba iutala nanti tusikulonda ukuuomba. Mwaiusya ukuti kuikaanya i miyele iikafuma uku mupasi wa muzilo, fwandi mwalenga Yeova ukumupeela umupasi wa muzilo pakuti mungaya ni miyele kwene ii icindame. (Luka 11:13; Gala. 5:22, 23) Ya David yalondolwile vino ipepo lyayazwile. Yalondanga ukuti insita izingi yaisambilizya Baibo. Yatiile: “Napepanga ukuti Yeova angazwe pakuti naikaanya. Nupya pa mulandu na vino wangazwile, calenzile ntantike insita iya kuisambilizya alino nu kulalondela vino intantika.”

12. Uzye ilembo lyakwe Kasambilizya 11:4, lingatwazwa uli ukufikilizya mauyo?

¹² Mutaalolela ukuti ivintu viye ningo. Umu nsi ii, tutalinzile ukulaelenganya ukuti ivintu vilaya ningo. Ndi cakuti tukulolela ukuti ivintu vikazipe, tutanga tufikilizye uyo. (Belengini Kasambilizya 11:4.) Umwina uwizina lyakuti Dayniel walanzile ati: “Ivintu visitala iviya ningo. Ivintu vikaya ningo ndi cakuti twatandika ukuomba.” Umwina Paul uwa ku Uganda walanzile umulandu na uze uno tutalinzile ukulasitokela, watiile: “Ndi cakuti twatandika ukuomba nanti cakuti vintu ivitala, Yeova akatupaala.”—Malaki 3:10.

13. Uusuma ci uwaya umu kutandika ukufikilizya panono panono uyo uno twimika?

¹³ Mwatandika panono panono. Tungatandika ukuvwa ukasu ndi cakuti uyo ukuloleka kwati uutale. Ndi cakuti avino cili kuli mwemwe, uzye mutanga mutandike ukufikilizya uyo uwo panono panono? Ndi cakuti uyo winu u kukwata imiyele imwi, uzye citanga cizipe ndi cakuti mwatandika ukulanga imiyele iyo umutuntu utunono? Ndi cakuti uyo winu u wa kumala ukubelenga Baibo yonsi, uzye citanga cizipe ndi cakuti mwatandika ukubelenga  nanti sile a pa nsita inono? Tomáš wino itulanda pa kutandika, camutaliile ukumala ukubelenga Baibo umu mwaka sile onga. Watiile: “Nizile iniluka ukuti ivipande vino nasoolwile ukuti nabelenga vyavulisye. Nizile impingula nupya ukutandika ukubelenga, nomba umuku uu wene natandike sile ukubelenga ivipande ivinono cila wanda nu kwelenganyapo. Na cii, calenzile ntandike ukuipakizya ukubelenga.” Lino Tomáš wizile atandika ukuipakizya ukubelenga, walunzilepo ivipande ivya kubelenga. Nupya wizile amala ukubelenga Baibo yonsi. c

14. I vyani ivingacitika ivingalenga cimutalile ukufikilizya uyo?

¹⁴ Kwene insita izingi nanti cakuti tukulondesya ukufikilizya uyo, kungaya vimwi ivingalenga tufiilwe ukufikilizya. Wakwe, ivintu ivikacita ukwaula ukwenekela vingalenga tufilwe ukufikilizya uyo uno twimika. (Kasa. 9:11) Tungakwata intazi izingalenga tutoovoke nu kuulilwa amaka. (Mapi. 24:10) Ukukanamalilika nako kungalenga tucite vimwi ivingalenga tufilwe ukufikilizya uyo. (Loma 7:23) Nanti sile limwi ukutoonta. (Mate. 26:43) I vyani ivingatwazwa ukucimvya ivingalenga tufilwe ukufikilizya uyo uno twimika?

15. Ndi cakuti kwaya vimwi ivyatupumvyanya, uzye ala twafilwa ukufikilizya uyo? Londololini. (Masamu 145:14)

¹⁵ Mwaiusya ukuti nga kwaya vimwi ivyalenga cimutalile ukufikilizya uyo ale cisikupiliula ukuti imufilwa. Baibo ikalanda ukuti tungakwata intazi pa nsita izingi. Lelo ikatunena nu kuti tungezya na maka ukufikilizya uyo witu ndi cakuti Yeova watwazwa. (Belengini Masamu 145:14.) Umwina Philip wino itulandapo, watiile: “Nsielenganya pa miku ino nafilwa ukukwanisya ukufikilizya uyo. Lelo nkaika sana mano pakuti ningatandika nupya ukufikilizya uyo.” David wino itulandapo watiile: “Nsilola amanda nanti ivyalenzile imfilwe ukufikilizya uyo ngi vya kumpumvyanya,  lelo nkavilola nga masyuko aakulangilamo vino natemwa Yeova.” Ndi cakuti mukutwalilila ukuombesya asi mulandu ni vya kupumvyanya, mulalangilila ukuti mukalondesya ukuzanzya Yeova. Yeova akauvwa ningo sana nga walola vino mukwezya na maka pakuti mufikilizye uyo uno mwimika.

16. I vyani vino tungasambilila kuli vino vyalenzile tufilwe ukufikilizya uyo?

¹⁶ Mwasambilila kuli vino vyalenzile mufilwe ukufikilizya uyo. Mwaelenganya pali cino calenzile, nu kuyuzya mweineco imuti, ‘I vyani vino ningacita pakuti vitakancitikile nupya?’ (Mapi. 27:12) Insita zimwi nga mwafilwa ukufikilizya uyo, ala cikulangilila sile ukuti uyo uwo mutanga mukwanisye ukufikilizya. Ndi cakuti avino cili kuli mwemwe, mulinzile ukupitulukamo pakuti mulole ndi cakuti uyo uno mwimika ucili wamulinga. d Yeova atalalola ukuti mwafilwa ukufikilizya pa mulandu wakuti uyo uno mwimike utamulinzile.—2 Kol. 8:12.

17. U mulandu ci uno tulinzile ukulaelenganyizizya pa mauyo yano twafikilizya?

¹⁷ Mwaelenganya pali vino mwakwanisya ukufikilizya. Baibo ikati “Leza asi wa lufyengo uwakuti ailile umulimo winu.” (Aeb. 6:10) Fwandi namwe kwene mutalinzile ukwilila. Mwaelenganya pali vino mwakwanisya ukufikilizya, cingaya u kupanga ucuza usuma na Yeova, kutandika ukulanzyanya na yauze pali aliwe, nanti sile ukubatiziwa. Wakwe vino mwafikilizye mauyo yano mwimike uku cisila, mwatwalilila ukuombesya pakuti mukafikilizye uyo uno mwimika.—Filipi 3:16.

18. I vyani vino tulinzile ukulaiusya lino tukuombesya ukufikilizya uyo uno twimika? (Loliniko ni cikope.)

¹⁸ Ndi cakuti Yeova wamwazwa, mungafikilizya uyo uno mwimika, wakwe vino kapisya wa wato aakafika kuno akuya. Nupya mwaiusya ukuti aingi aakapisya mawato, yakaipakizya ulendo. Fwandi namwe kwene, lyonsi mwaezya ukulola vino Yeova akamwazwa nu kuti alatwalilila ukumwazwa lino mukuombesya pakuti mukafikilizye uyo uno mwimika. (2 Kol. 4:7) Ndi cakuti mutatoovwike, mulaipakizya mapaalo aingi sana.—Gala. 6:9.