1. I vyani vino Yeova akanena ya kapepa yakwe ukuti a vino yalinzile ukulacita? (Loliniko ni cikope.)

 A KULI weni kuno tungazana ukuteekeziwa nu utunguluzi? Swensi itumanya icasuko ukwi iuzyo lii. Tungapepa kuli Yeova Leza. Vikwene avino Yeova akatunena ukuti twacita. Akalonda twapepa kuli aliwe imiku iingi, kuli kuti “insita zyonsi.” (1 Tesa. 5:17) Tungapepa kuli aliwe nu kulenga utunguluzi ungatwazwa muli vyonsi. (Mapi. 3:5, 6) Pa mulandu wakuti Yeova waya na ukapekape, watunena ukuti tungapepa kuli aliwe imiku ino sweineco tukulonda.

2. I vyani vino tumasambilila umu cipande cii?

² Tukataizya sana Yeova pa kutupeela isyuko lya kupepa kuli aliwe. Lelo pa mulandu wa kuti tukakwata ivya kucita ivingi cikatutalila ukuzana insita iya kupepa. Insita zimwi tungalondekwa ukuzifyako amapepo itu. Ni cazipisya i cakuti, tukazana ukukomelezya nu kwazwa ukufuma umu malembo. Umu cipande cii, tumasambilila kuli vino Yesu wacitanga pa kuti twakwata insita ya kupepa. Nupya tumalanda na pa visinka ivicindame 5 ivingatwazwa ukuzifyako amapepo itu.

3. I vyani vino Yesu wamanyile api pepo?

³ Yesu wamanyile ningo vino Yeova wacindika mapepo. Lino atatala wiza pano nsi walolanga vino Isi wasukanga mapepo ya onsi na anaci ali nu utailo. Wakwe, waweni vino Isi waswike amapepo yakwe Hana, Devedi, Eliya alino na aonsi na anaci yauze ali nu utailo. (1 Sam. 1:10, 11, 20; 1 Yamw. 19:4-6; Masa. 32:5) Ali mulandu kwene uno Yesu  waneniile asambi yakwe ukulapepa lyonsi nu kutaila ukuti amapepo yao yamaasukwa!—Mate. 7:7-11.

4. I vyani vino tukusambilila uku mapepo yano Yesu wapepanga?

⁴ Yesu walangilile asambi yakwe ivya kupepa ukupitila umu mapepo yano wapepanga kuli Yeova. Lyonsi lino waombanga umulimo wakwe, wapapenga insita izingi. Pa mulandu wakuti Yesu wazanwanga sana na antu aingi nupya wayanga umupamviwe, wapatulangako insita iya kupepa. (Mako 6:31, 45, 46) Wazyukanga katondotondo pakuti apepe. (Mako 1:35) Pa nsita imwi, wapefile usiku onsi lino atatala wapingula pa cintu cimwi icicindame cino walondanga ukucita. (Luka 6:12, 13) Nupya Yesu wapefile imiku iingi usiku lino atatala wafwa, pano wisile sana mano pa kumalila umulimo uwali ucindame nupya ukome.—Mate. 26:39, 42, 44.

5. Uzye tungakolanya uli Yesu lino tukupepa?

⁵ Vino Yesu wacitanga vikatusambilizya ukuti tulinzile ukulapatulako insita iya kupepa nanti cakuti itupamviwa. Tungalanga ukuti tukakolanya vino wacitanga ndi cakuti tukupatulako insita iya kupepa, wakwe tungapepa akatondo, kasanya nanti limwi manguzi. Ukucita vii kulalangilila ukuti tukataizya pa wila uiyele uwa kupepa uno Yeova watupeela. Nkazi Lynne akaiusya vino uvwile ningo lino wasambilile pa muku wa kutandikilapo cino ipepo lyacindamila. Watiile, “Lino nasambilile ukuti ningalanda na Yeova insita ili yonsi, calenzile ntandike ukumulola ukuti a cuza wane umusuma nupya natandike ukulondesya ukulazifyako mapepo yane.” Ukwaula nu kutwisika swe ingi avino tukayuvwa. Lekini lyene tulande pa vintu 5 vino tungapepelapo.

6. Ukulingana na Kusokolola 4:10, 11, i vyani vino Yeova walinga ukupokelela?

⁶ Mwalumbanya Yeova. Umutumwa Yoani waweni aikolo 24 yakufukama pa nkoleelo yakwe Yeova. Yalumbanyanga Yeova nu kupunda yati, “Walinga we Yeova Leza witu ukupokelela ululumbi nu mucinzi na maka.” (Belengini Kusokolola 4:10, 11.)  Kwaya ivyalenga ya malaika ya cumi nayo kwene yalumbanya Yeova. Iikala nawe pa myaka ingi na ci calenga yamumanye ningo. Yakalola imiyele ino wakwata ikalolekela muli vino akacita. Nga yalola vino Yeova akacita cikalenga yatwalilila ukumulumbanya.—Yobo 38:4-7.

7. I vyani vino tungalumbanyizizyapo Yeova?

⁷ Naswe kwene tukalonda ukulalumbanya Yeova umu mapepo itu, nu kutaizya pali vino twatemwa pali aliwe. Lino mukubelenga nu kuisambilizya Baibo, mwalola imiyele isuma ino Yeova wakwata. (Yobo 37:23; Loma 11:33) Lyene mwamunena pali vino mukayuvwa pa miyele iyo. Nupya tukalumbanya Yeova pali vino akatwazwa na pali vino akaazwa aina na ya nkazi aya umu cilongano citu. Watwalilila ukutusakamala nu kutucingilila.—1 Sam. 1:27; 2:1, 2.

8. I vintu ci vimwi vino tulinzile ukutaizizyapo Yeova? (1 Tesalonika 5:18)

⁸ Mwataizya Yeova. Kwaya ivintu ivingi ivikalenga twataizya Yeova umu mapepo itu. (Belengini 1 Tesalonika 5:18.) Tukataizya Yeova pa visuma vyonsi vino twakwata, pano ica upe consi icisuma nupya icimalilike cikafuma kuli aliwe. (Yako. 1:17) Wakwe, limwi tungataizya Yeova pali vino wapanga ningo insi na vino wapanga ivintu umu nzila iya kuzungusya. Tungataizya Yeova pali vino watupeela umi, ulupwa, ivyuza alino nu upaalilo. Nupya tukalondesya ukulataizya Yeova pali vino tukaipakizya ucuza usuma nawe.

9. U mulandu ci uno tulinzile ukulataizizya Yeova?

⁹ Tulinzile ukuombesya pakuti twaelenganya pa vintu vino tungataizizyapo Yeova. Antu aingi umu nsi yasitaizya. Ilingi antu yakaika sile amano kuli vino yakulonda ukucila ukulanga ukuti yakataizya pali vino yakwata. Nga tukukolanya antu yaa, lyonsi tungapepa sile mapepo aakulenga. Pakuti ivya musango uwo vitatucitikila, tulinzile ukutwalilila ukulataizya pali vino Yeova akatucitila.—Luka 6:45.

10. Uzye ukulanga ukutaizya kwazwile uli nkazi umwi ukuzizimizya? (Loliniko ni cikope.)

¹⁰ Ukulanga ukutaizya kungatwazwa ukuzizimizya intazi. Elenganyini pali vino vyacitikiile nkazi Kyung-sook ivyaya umu Lupungu Lwa Mulinzi lwakwe Januwale 15, 2015. Yamuzanyile nu ulwale wakwe kansa uwa kwi tima. Ya Kyung-sook yatiile: “Ulwale uu walenzile ntoovoke. Nayuvwanga ukuti naponzizye vyonsi nupya nasakamiile sana.” I vyani ivyazwile nkazi wi ukuzizimizya? Walanzile ukuti cila wanda lino atatala waya umu kulala akaya pa muputule wa papela nu kutaizya Yeova pa vintu 5 vino watamucitila pa wanda uwo. Cii calenzile auvwako ningo nu kulanga vino watemilwe Yeova. Wizile amanya  ukuti Yeova akasakamala aomvi yakwe acisinka lino yali ni ntanzi nupya wizile ailuka ukuti antu yaa yakakwata amapaalo aingi ukucila intazi zino yakakwata. Wakwe vino cali kuli ya Kyung-sook, naswe kwene twakwata ivintu ivingi vino tungataizizyapo Yeova na lino tuli ni ntazi. Ukutaizya Yeova umu mapepo kulatwazwa ukutwalilila ukuzizimizya nu ukuya ateekele.

11. U mulandu ci uno asambi yakwe Yesu yalondekelwanga ukuya asipe pa cisila cakuti waswilila ukwi yulu?

¹¹ Mwalenga Yeova amukomya lino mukuomba umulimo wa kusimikila. Lino Yesu atatala waswilila ukwi yulu, wiwisyeko asambi yakwe pa mulimo uno yapeezilwe uwa kusimikila “mu Yelusalemu, mu Yudeya na monsi mu Samaliya, nga nu kufika na kuno insi yapela.” (Mili. 1:8; Luka 24:46-48) Lino papisile insita inono pano ivintu vii vyacitikile, intunguluzi zya Ayuda zyalemile umutumwa Petulo na Yoani nu kuyatwala uku cilye ca Sanihedilini nu kuyatiinya ukuti yataalanda icili consi nanti ukusambilizya umwi zina lyakwe Yesu. (Mili. 4:18, 21) Uzye Petulo na Yoani yacisile uli?

12. Ukulingana na Milimo 4:29, 31, i vyani vino asambi yacisile?

¹² Apa kwasuka kuli vino intunguluzi zya Ayuda zyalanzile, Petulo na Yoani yatiile, “Ndi cakuti cili ningo mu manso yakwe Leza ukuvwila mwemwe ukucila ukuvwila Leza, pingulini mweineco. Nomba swemo tutanga tute ukulanda pa vintu vino twalola nu kuvwa.” (Mili. 4:19, 20) Lino umutumwa Petulo na Yoani yayalesile ukuti yapita, yataizye sana Yeova pali vino wacisile. Yapefile iyati, “we Yeova, lolekesya pa vintiinya vyao, nupya leka aomvi yako yatwalilile ukulanda api zwi lyako nu kusipa.” Yeova waswike ipepo lya yatumwa ilya kufuma pansi ya mwenzo.—Belengini Milimo 4:29, 31.

13. I vyani vino tungasambilila kuli vino vyacitikiile ya Jin-hyuk?

¹³ Tungakolanya asambi ndi cakuti tukutwalilila ukusimikila nanti cakuti aa mu uteeko yatunena ukuti tute. Uvwini ivyacitikiile umwina Jin-hyuk wino yanyefile pa mulandu uwa kukanaya umu vya mu nsi. Lino wali umu cifungo, yamupeezile umulimo uwa kusakamala afungwa yamwi, lelo yatamuzumilizye ukulalanda na afungwa amalyasi atakumile umulimo uno yamupeezile, nupya yatamuzumilizye nanti sile ukulanda nayo pa vya muli Baibo. Wapefile pakuti aye umusipe nu kuya umucenjele lino akulanda pa cumi ica muli Baibo lyonsi lino wasyukila kasita. (Mili. 5:29) Watiile: “Yeova waswike mapepo yane lino walenzile ukuti inje umusipe na lino wampeezile mano pakuti ntandike ukulatungulula masambililo ya Baibo aingi nanti sile a pa mamineti 5 cila sambililo. Lyene usiku, nalembanga makalata yano napeelanga afungwa yanji nga kwaca katondo.” Naswe kwene tungalenga Yeova ukutwazwa ukuomba umulimo witu uwa kusimikila. Wakwe vino cali uku mwina Jin-hyuk, tungapepa ukuti tuye asipe alino nu kuya na mano.

14. I vyani ivingatwazwa lino tuli ni ntazi? (Masamu 37:3, 5)

¹⁴ Mwalenga Yeova amwazwa ukuzizimizya intazi. Swe ingi tukakwata intazi wakwe ukulwalilila, kusakamikwa, kufwilwa aatemwikwa, intazi izya mu lupwa, kucuziwa nanti sile intazi zyuze. Nupya ivintu na vyuze wakwe ivikuko ni zya nkondo alino ni vintu vyuze, vyalenga ivintu  ukutalilako sana. Mwanena Yeova vyonsi vino mukuyuvwa. Mwamunena vyonsi ivikumucitikila wakwe vino munganena cuza winu. Mwataila ukuti Yeova alamwazwa.—Belengini Masamu 37:3, 5.

15. Uzye ipepo lingatwazwa uli ukuzizimizya lino tuli ni ntazi? Langililini.

¹⁵ Ukupepa lyonsi kulatwazwa ‘ukuzizimizya lino tuli na macuzi.’ (Loma 12:12) Yeova wamanya intazi zino yakapepa yakwe yakakwata nupya “akauvwa ukukuuta kwao.” (Masa. 145:18, 19) Nkazi Kristie painiya ali ni myaka 29 wazumiile ukuti vii i vya cumi. Ukwaula nu kwenekela wizile alwala ulwale uwipisye. Na cii calenzile atandike ukusakamikwa sana. Lino papisile insita wizile amanya ukuti ya nyina yalwile ulwale uwipisye uwali nu kulenga ukuti limwi yafwe. Nkazi watiile, “Napepanga sana kuli Yeova pakuti ampeele amaka yano nalondekwanga cila wanda pakuti nzizimizye. Lyonsi nezyanga ukukanapuswa umu kulongana nu kulaisambilizya Baibo.” Nupya watiile, “Ipepo lyangazwile ukuzizimizya. Namanyile ukuti Yeova wangazwanga lyonsi nupya cii calenzile ukuti ntekeziwe. Nanti cakuti intazi zino nakweti zitasizile papo kwene, Yeova wangazwile ukuya nu mutende uwa mu melenganyo alino nu kuteeka umwenzo.” Tutalinzile ukulailila ukuti “Yeova wamanya ivya kupokolola ya kapepa yakwe umu wezyo.”—2 Pet. 2:9.

16. U mulandu ci uno tukalondekwa ukwazwiwa na Yeova pakuti tucimvye mezyo?

¹⁶ Mwalenga Yeova amwazwa ukucimvya mezyo. Pa mulandu wakuti tutamalilika, tukalwisyanya nu kucita iviipe lino tukulonda ukucita ivisuma. Satana akaezya ukulenga ivintu vyalukutalilako. Inzila yonga ino akaomvya i vya kuizanzya umwaya ivintu iviipe. Ivya kuizanzya vya musango uu  vingalenga twaelenganya pa vintu ivingalenga tuye akowele na cico cingalenga tucite imembu izipisye.—Mako 7:21-23; Yako. 1:14, 15.

17. I vyani vino tulinzile ukucita nga twalenga ukuti Yeova atwazwe kucimvya mezyo? (Loliniko ni cikope.)

¹⁷ Tukalondekwa ukwazwa ukufuma kuli Yeova pakuti tucimvye amezyo. Umwi pepo lya cilangililo, Yesu waomvizye amazwi ya kupaapata lino watiile: “Nupya utaleka tuponele umu kweziwa, lelo utupususye uku mwipe.” (Mate. 6:13) Nanti cakuti Yeova akalonda ukutwazwa, tulinzile ukumulenga. Tulinzile ukulacita ivintu kulingana na vino tukupepelapo. Tulinzile ukwezya na maka ukukanabelenga nanti ukukutika uku vintu iviipe ivyaseeka sana mu nsi ii yakwe Satana. (Masa. 97:10) Tungaya na melenganyo asuma nga tukubelenga nu kuisambilizya Baibo. Ukuzanwa umu kulongana nu kuombako umulimo wa kusimikila nako kwene kulatwazwa ukulaelenganya ivisuma. Nupya Yeova watulaya ukuti atalaleka tweziwe ukucila pali vino tungazizimizya.—1 Kol. 10:12, 13.

18. I vyani vino tulinzile ukucita lino tukupepa?

¹⁸ Pakuti tutwalilile ukuya acisinka kuli Yeova umu manda yaa aakusyalikizya, tulinzile ukulapepa sana. Cila wanda mwakwata insita iya kupepa ipepo ilya kufuma pansi ya mwenzo. Yeova akalonda twapepa kuli aliwe nu kumulondolwela vino tukuyuvwa. (Masa. 62:8) Mwalumbanya nu kutaizya Yeova pali vino akacita. Mwamulenga ukuti amwazwa ukuya asipe lino mukusimikila. Mwamulenga ukuti amwazwa ukuzizimizya intazi nu kumwazwa ukucimvya mezyo. Mutalinzile ukuleka icili consi nanti sile umuntu aliwensi ukumulesya ukulapepa kuli Yeova. Uzye Yeova akaasuka uli mapepo itu? Tulaasuka iuzyo lii ilicindame umu cipande icilondelilepo.