Ilandwe lisuma ilya wene wakwe Leza likukosolwa mu nsi yonsi, wakwe vivi kwene vino Yesu wasoowile. (Mateo 24:14) Ibuku lyakwe Danieli likatunena ukuti uwene uu uuteko wakwe Leza. Mu Cipande 2 ica usoowelo wakwe Danieli mwaya vimwi vino mawene aaliko mpiti yacisile, kutandikila mu Babiloni ukwizafika na ndakai. Pa kulanda pa vilacitika ku nkolelo, Cikomo 44 cikalanda ukuti:

“Leza wa kwiyulu alakatusya uwene uno utalatala wononwe. Wene utalatala ucimviwe, lelo ulonona amawene yauze yonsi nga lyene wikalilila amanda pe.”

Usoowelo uu alino na mausowelo yauze yakalanda ukuti Uwene Wakwe Leza ulasisyapo mawene yonsi a yantu pakuti antu yakaikala ningo pano nsi. Uzye antu yalaikala uli lino Uwene ulateeka? Apisika pali malayo yano yasya yafikiliziwe likwene sile.

• KUTALAYA INKONDO NUPYA

  Masamu 46:9: “[Leza] wene akalesya inkondo pano nsi yonsi. Akakontola amalapwa, avunola masumo nu kusumbila visyangu apa moto mpaka ivipya!”

  Elenganyini vino insi ingaya ndi cakuti impiya zyonsi zino ndakai yakaomvya ku kupangila ivyanzo, zyaomviwa ku kwazwa antu mu ncende muno yakulondekwa uwavwilizyo. Ulayo uu ulafikiliziwa lino Uwene wakwe Leza ulaateeka.

• KUTALAYA UKULWALA

  Ezaya 33:24: “Patalaya nanti wenga alailizyanya apa kulwala.”

  Mutale mwelenganye umu nsi musi ukucuula ku ulwale wa ku mwenzo, kansa, maleelya alino ni ndwala zyuze. Vipatala ni milembo vitakweti incito. Muli nu umi umalilike. Vikwene i vilacitika mu nsi ipya.

• KUTALAYA KUCEPELWA IVYAKULYA

  Masamu 72:16: ‘Mulavula ivyakulya umu mpanga yakwe ni viseekwa vilavula nu mu myamba kwene.’

  Mu nsi mulaya ivyakulya vya kukumana muntu ali wensi. Cipowe nu ulwale wa nzala kutalaya.

• KUTALAYA KUWAIKA, KULOSYA NI MFWA

  Umbwilo 21:4: “[Leza] alayakumbula minsozi yonsi. Kutalaya imfwa nupya. Kutalaya kulosya nanti kulila, nanti kuvwa kuwaika. Vintu vyampiti vyati vipita.”

   Kulaya umi umalilike muli paladaise pano nsi. Vii ali vino kaumba witu Yeova uwaya nu kutemwa watulaya.

Uzye malayo yaa yalafikiliziwa? Nanti icakuti antu aingi yakazumila malayo yano yaya muli Baibo, lelo pa nsita zimwi yakafilwa ukusininkizya ulayo wa kwikala manda pee. Cii cisyatuzungusya, pano kutatala kwaya muntu nanti awenga uwatala wikala manda pee aangalondolola ningo.

Antu yonsi yateekwa uzya kwi ifyo ni mfwa ivyalenga kuti twawaika, kucuula alino nu kucuziwa, na cii calenga yazumile ukuti avino umi ufwile ukuya nupya ulatwalilila ukuya vikwene. Nomba Ukwelenganya vivyo kwapusana sana na vino Kaumba witu Yeova walondanga ukucitila antu kufuma na mpiti.

Pa kutwazwa ukusininkizya ukuti vino watulaya vilafikiliziwa, Leza walanzile api zwi lyakwe ukuti: “Lisiweluluka kunondi, suka lyatala lyacita vino nkulonda, lyamalila nu mulimo uno nalitumile.”—Ezaya 55:11.

Baibo yalondolola ukuti Yeova a leza “wino asitumpoka.” (Tito 1:2) Pa mulandu wakuti watulaya malayo yaa asuma cuze, cingazipa sana ukwelenganya pa mauzyo yaa: Uzye umu cumi, antunze yalikala amanda pee umu Paladaise pano nsi? Tungacita uli pakuti tukaipakizye vino Leza watulaya? Amasuko ku mauzyo yaa mumayazana mu vyeo ivili pa mafwa alondeliilepo mu lupapulo kwene luu.