Ali vino mukazyana uwa myaka 13 walanzile lino yamupeezile kasimbwa. Mwanaci umwi aakacita uculuzi nawe wayuvwile ukuti kompyuta wino ya isi yamupeezile ale acili pa sukulu, ali wila ucindame sana uno wapokeliilepo. Umonsi umwi nawe ala wacitwala sile, wayuvwile ukuti kadi ino mama wakwe wamupangile ale yamala umwaka umu cupo, ali wila uwali ucindame sana uno wapokelilepo.

Cila mwaka antu aingi yakaombesya sana ukulonda mawila “asuma” yano yangapeelako ivyuza nanti ya lupwa pa nsita ziiyele. Nupya aingi yakatemwa sana ukuvwa kuno yano yapeela uwila yalanda mazwi akolineko na yano yatiyalandwapo pakutandika. Nga mwemo? Uzye mutanga mutemwe kupeela nanti ukupokelela uwila ungamulenga ukuvwa ningo?

Kucita vii kungamwazwa sana, asi mulandu sile na vino wino mukupeela angayuvwa lelo na vino mwemuno mukupeela mungayuvwa. Nupya na Baibo kwene ikalanda ukuti: “Mukupeela mwaya upolelelo ukulu cuze kuluta mukupokelela.” (Milimo 20:35) Kwaula nu kutwisika insansa zino mungakwata lino mukupeela umwi uwila zingalenga na wino mukupeela kwene acindike sana uwila uwo.

Uzye lyene mungacita uli pakuti mwensi, aakupeela na akupokelela muye ni nsansa zya cumi? Nupya ndi cakuti mutakweti uwila ucindame sana uno mungapeela yauze, mungacita uli pakuti yano mwapeela yataizye pa wila uwo?