1. Twamanya uli ukuti Yeova akalonda ukupalama kuli sweswe?

 YEOVA akalonda tupalame kuli aliwe. (Yako. 4:8) Akalonda ukuya Leza witu, Tata witu nupya Cuza witu. Akaasuka mapepo itu nupya akatwazwa lino tuli ni ntazi. Nupya akaomvya iuvi lyakwe ukutusambilizya nu kutucingilila. Nomba i vyani vino tulinzile ukucita pakuti tupalame kuli Yeova?

2. Tungacita uli pakuti tupalame kuli Yeova?

² Tungapalama kuli Yeova ndi cakuti tukupepa kuli aliwe, ukubelenga Izwi lyakwe nu kwelenganyapo sana. Nga tukucita vivyo tukamutemelwako sana nu kumutaizya. Cikalenga twalondesya kumuvwila nu kumulumbanya umu nzila ino alinzile kulumbanyiziwamo. (Kuso. 4:11) Nga twamanya sana Yeova, tulamutaila sana alino ni iuvi lino wikako ilikatwazwa.

3. Uzye Ciwa akacita uli pa kutulesya ukuombela Yeova, nomba i vyani vingatwazwa ukukanata ukutaila Leza ni iuvi lyakwe? (Masa. 31:13, 14)

³ Nomba Ciwa akalondesya ukutulesya ukuombela Yeova sana sana lino tuli ni ntazi. Akacita uli vivyo? Akaezya panono panono ukutulenga tute ukutaila Yeova ni iuvi lyakwe. Nomba tungamucimvya. Ndi cakuti tuli nu utailo ukome nupya itutaila sana Yeova tutalasya Leza ni iuvi lyakwe.—Belengini Masamu 31:13, 14.

4. I vyani vino tumasambililapo mu cipande cii?

⁴ Umu cipande cii tumalanda pa ntazi zitatu izikafuma ku antu yano tusilongana nayo na vino intazi yonga na yonga ingalenga tute ukutaila Yeova ni iuvi lyakwe. Uzye intazi zii zingalenga uli tute ukuombela Yeova? Nupya i vyani vino tungacita  pakuti tutwalilile ukutaila Yeova ni iuvi lyakwe?

5. Uzye intazi zingalenga uli utailo witu muli Yeova nu mwi iuvi lyakwe ukucepa?

⁵ Insita zimwi tukakwata intazi, wakwe ukukaanya ukufuma kuli ya lupwa nanti ukutuzinga incito. Uzye intazi zya musango uwo zingalenga uli utailo witu muli Yeova nu mwi iuvi lyakwe ukucepa nu kutupaatula kuli aliwe? Nga twakwata intazi pa nsita itali, cingalenga upaalilo witu ucepe nupya tungasakamikwa sana. Satana akaomvya insita zii ukulenga twaelenganya ukuti Yeova atatutemwa. Ciwa akalonda twaelenganya ukuti Yeova nanti iuvi lyakwe aakalenga twacuula. Ivya musango uu i vyacitikiile na ina Izlaeli lino yali mu Ejipti. Pa kutandika yazuumiile ukuti Yeova u wasonsile Mose na Aloni ukuyafumya umu uzya. (Kufu. 4:29-31) Pa cisila lino Falao walenzile ukuti vintu viyatalile, yatandike ukupeela Mose na Aloni milandu pa ntazi zino yakweti nu kuyanena ukuti: ‘Imulenga Falao na ya cilolo yakwe kuti yatupate. Vino mwatimutucitila cili wa kuyapela ulupanga mu minwe kuti yatukome.’ (Kufu. 5:19-21) Yapeezile aomvi yakwe Leza imilandu. Cifile sana! Ndi cakuti imuzizimizya intazi imwi pa nsita itali, mungacita uli pakuti utailo winu muli Yeova ukomeleko?

6. I vyani vino tukusambilila kuli vino kasesema Habakuku wazizimizye intazi? (Habakuku 3:17-19)

⁶ Mwapepa kuli Yeova nu kuloleela ukuti amwazwe. Kasesema Habakuku wakweti intazi zingi. Pa nsita imwi cikaloleka ukuti watandike ukutwisika ndi cakuti Yeova wamusakamalanga. Fwandi wanenyile Yeova vyonsi vino wayuvwanga umwi pepo. Watiile: “Uzye ukufika lilaci lino we Yawe namalilila kunuli kuti ungazwe, lelo wemo usingasuuka? . . . Uzye pacani cino ukulonda kuti nalukulola amacuzi kwene yaa? Uzye pacani ukuzumilizya kuti ukakasi utwalilile?” (Haba. 1:2, 3) Yeova waswike ipepo lya muomvi wakwe uwa cisinka ilya kufuma pansi ya mwenzo. (Haba. 2:2, 3) Pa cisila cakuti Habakuku welenganyanga sana pali vino Yeova wapuswisye antu yakwe, watandike ukuya nu luzango nupya. Wizile asininkizya ukuti Yeova wamusakamalanga nupya wali nu kumwazwa ukuzizimizya intali ili yonsi. (Belengini Habakuku 3:17-19.) I vyani vino tungasambililako? Nga mwakwata intazi, mwapepa kuli Yeova nu kumunena vino mukuyuvwa. Nupya mwaloleela ukuti amwazwe. Nga mwacita vivyo, mungasininkizya ukuti Yeova alamupeela maka yano mukulondekwa pakuti muzizimizye. Nupya nga mwalola vino wamwazwa, utailo winu muli aliwe ulakomelako.

7. I vyani vino ya lupwa yakwe Shirley yalondanga acite, nupya i cani camwazwile ukutwalilila ukutaila Yeova?

⁷ Mwatwalilila kucita ivingalenga mupalame kuli Yeova. Lollini vino ukucita vivyo kwavwile nkazi Shirley aakaikala ku Papua New Guinea lino wakweti intazi. b Ulupwa lwakwe nkazi Shirley yali apiina nupya insita zimwi cayatalilanga nu kukwata ivyakulya ivikumanile. Lupwa wakwe umwi wezyanga kumulesya ukuti ate ukutaila Yeova. Wamunenyile ukuti: “Ukalanda ukuti umupasi wakwe Leza uwa muzilo ukakwazwa, nomba ukwazwa kuko kuli kwi? Ulupwa lwako lucili ulupiina. U kuisumbila sile insita ukusimikila.” Shirley watiile: “Nayuzizye inti: ‘Uzye Yeova akatusakamala nanti foo?’ Lilyo kwene sile napefile kuli Yeova nupya namunenyile vyonsi vino nelenganyanga.  Natwalilile ukubelenga Baibo ni mpapulo zitu, kusimikila alino nu kuzanwa umu kulongana.” Patalengiile, watandike ukulola vino Yeova wasakamalanga ulupwa lwakwe. Ulupwa lwakwe lutalalanga ni nzala nupya yali ni nsansa. Nkazi Shirley watiile: “Nayuvwanga ukuti Yeova waswike ipepo lyane.“ (1 Tim. 6:6-8) Ndi cakuti mwatandika ukwika mano kuli vino vingalenga mupalame sana kuli Yeova, namwe kwene mutalaleka intazi nanti ukutwisika vimupaatule kuli Yeova.

8. I vyani vingacitikila aina aapeelwa imilimo umwi iuvi lyakwe Yeova?

⁸ Antu atupata yangaomvya intaneti ku kusalanganya malyasi ya ufi apa ina apeelwa imilimo umwi iuvi lyakwe Yeova. (Masa. 31:13) Aina yamwi yayalema nu kuyapingula ukuti i vipondo. Aina Klistu akutandikilapo yakweti intazi ili imwi kwene lino umutumwa Paulo yamubepizye nu kumulema. Uzye yacisile uli?

9. Uzye aina Klistu yamwi yacisile uli lino umutumwa Paulo yamuyalile mu cifungo?

⁹ Aina Klistu yamwi akutandikilapo yatiile ukwazwa mutumwa Paulo lino yamuyalile mu cifungo uku Loma. (2 Tim. 1:8, 15) U mulandu ci? Uzye yuvwanga insonyi pa mulandu wakuti antu yamulolanga ukuti i cipondo? (2 Tim. 2:8, 9) Nanti limwi nayo yuvwanga intete nu kutina ukuti nayo yali nu kuyacuzya? Asi mulandu ni calenzile, elenganyini pali vino Paulo wayuvwile. Wazizimizye intazi zingi nu kwika umi wakwe mu uzanzo pa mulandu wao. (Mili. 20:18-21; 2 Kol. 1:8) Tutalinzile ukuya wa antu aatazwilizye Paulo lino walondekwanga uwazwilizyo! I vyani vino tulinzile ukwiusya lino aina apeelwa imilimo umwi iuvi yakuyacuzya?

10. I vyani vino tulinzile ukwiusya lino aina apeelwa imilimo umwi iuvi yakuyacuzya, nupya u mulandu ci?

¹⁰ Mwaiusya mulandu uno yakatucuzizya na aakalenga yatucuzya. Pali 2 Timoti 3:12 pakati: “Nupya asambi yakwe Klistu Yesu yonsi aakalonda ukupepa Leza, yalacuziwa.” Fwandi  tutalinzile ukuzunguka sana ukuti Satana akalonda ukucuzya sana aina aakatungulula. Akalonda aina yaa ukuta ukuya acisinka kuli Yeova nupya akatutinya.—1 Pet. 5:8.

11. I vyani vino tukusambilila kuli vino Onesifolasi wacisile? (2 Tim. 1:16-18)

¹¹ Mwatwalilila ukwazwa aina insita zyonsi. (Belengini 2 Timoti 1:16-18.) Onesifolasi wacisile ivipusaneko na vino yauze yacisile lino mutumwa Paulo yamunyefile. “Atuvwanga insonyi pa mulandu wakuti [Paulo wanyefilwe] umu maceni.” Lelo Onesifolasi walonzile Paulo, nupya lino wamuzanyile waweniko inzila zimwi zino wali nu kumwazwilamo. Pakucita vii, Onesifolasi wisile umi wakwe mu uzanzo. I vyani vino tungasambililako? Tutalinzile ukuleka ukutiina antu kutulesye ukwazwilizya aina yano yakucuzya. Lelo lekini twaezya na maka ukucita ivili vyonsi vino tungacita pakuti sile tuyazwe. (Mapi. 17:17) Yakalondekwa ukuti twayalanga ukutemwa nu kuyatungilila.

12. I vyani vino tungasambilila uku ina na ya nkazi aku Russia?

¹² Elenganyini vino aina na ya nkazi aku Russia yakaazwilizya aina Klistu yauze yano yayalila mu vifungo. Lino yamwi yakuyapingula, aina na ya nkazi yamwi yakaya mu kuvwako milandu ku cilye. I vyani vino tukusambililako? Lino aina apeelwa imilimo yayabepezya, kuyalema nanti ukuyacuzya mutalinzile ukuvwa intete. Mwayapepelako, ukusakamala indupwa zyao alino nu kulola inzila zimwi zino mungalangilamo ukuti mukuyatungilila.—Mili. 12:5; 2 Kol. 1:10, 11.

13. Uzye tungata uli ukutaila Yeova ni iuvi lyakwe ndi cakuti yakutuseka?

¹³ Ya lupwa asipepa Yeova, yano tukaomba nayo nanti yano tukasambilila nayo yangatuseka pa mulandu wakuti tukasimikila nanti pa mulandu wakuti tukalondela masunde yakwe Yeova. (1 Pet. 4:4) Yangatunena ukuti: “Nakutemwa vikwene sile vino waya, nomba kuno ukapepa yakomya sana masunde nupya yakalondela ivintu vya mpiti.” Yamwi yangatunenoola pali vino tukacitila antu azingwa. Yangalanda ukuti: “Uzye vikwene vino mukacita mungalanda ukuti mwatemwana?” Milandile ya musango uwo ingalenga tutandike ukutwisika. Tungayuzya ukuti: ‘Uzye Yeova akaenekela ukuti nacita ivicizilemo? Uzye iuvi lyakwe lyakomya sana ivintu?’ Ndi cakuti ivya musango uu vikumucitikila, mungacita uli pakuti mutwalilile ukupalama kuli Yeova nu kwi iuvi lyakwe?

14. Uzye tungacita uli ndi cakuti yamwi yakutuseska pa mulandu nu kulondela masunde yakwe Yeova? (Masamu 119:50-52)

¹⁴ Mwalondesya ukutwalilila ukulondela masunde yakwe Yeova. Yobo lyonsi walondelanga masundes yakwe Yeova asi mulandu na vino yamusekanga pa mulandu nu kucita vivyo. Wenga pali ya cuza yakwe wanenyile Yobo ukuti atacindime kuli Leza pakuti azumile ukuti ukulondela masunde yakwe Leza kutacindama. (Yobo 4:17, 18; 22:3) Nomba Yobo wakanyile kuzumila ufi uwo. Wamanyile ukuti masunde yakwe Yeova aakalanda pa visuma ni viipe yaya sile ningo nupya walondesyanga ukulayalondela. Atalesile yauze ukumulenga ukukanaya uwa kaele. (Yobo 27:5, 6) I vyani vino tukusambililako? Tutalinzile ukuleka vino yauze yakalanda pali sweswe vileke tutandike ukutwisika masunde yakwe Yeova. Elenganyini pali vino vyamucitikila. Mufwile mwalola visuma ivikacitika pa mulandu nu kulondela masunde yakwe Yeova. Fwandi mwalondesya lyonsi ukutungilila iuvi lyakwe ilikalondela masunde yakwe. Fwandi  asi mulandu na vino antu yangatuseka, tulatwalilila sile ukuombela Yeova.—Belengini Masamu 119:50-52.

15. U mulandu ci uno ya Brijeti yayacuzizyanga?

¹⁵ Elenganyini pali vino vyacitikiile nkazi Brijeti aakaikala ku India. Ya lupwa yamusekanga pa mulandu na vino wazumilemo. Lino wabatiziwe sile umu 1997, ya iya ataali ya Nte incito yasizile. Fwandi yapingwilepo ukuti ya Brijeti na ana yao akazyana yakuuke nu kutandika ukulaikala na avyazi yakwe ya iya aikalanga mu musumba uze. Nomba ya Brijeti yali nu kukwata intazi na zyuze izikulu. Pa mulandu wakuti ya iya incito yasizile, ya Brijeti yalondekwanga ukulaomba amanda yonsi pakuti yasakamala ulupwa. Nupya icilongano icayelile mupipi pali makilomita 350. Ca ulanda i cakuti ya lupwa yakwe ya iya yayakanyanga pa mulandu nu utailo wao. Ivintu vifile sana icakuti ulupwa lwakwe ya Brdijeti lwali nu kukuuka nupya. Lyene ukwaula ukwenekela ya iya yafwile. Lino papisile insita umwana wenga umukazyana wafwile nu ulwale wakwe cancer ala ali sile ni myaka 12. Ni cipisye i cakuti ulupwa lwakwe ya Brijeti lwatangi ya Brijeti alenzile vyonsi vii vicitike. Yayanenyile ukuti ndi cakuti yataya ya Nte Yakwe Yeova ivintu vyonsi vii nga vitacitike. Lelo yatwalilile ukutaila sana Yeova nu kupalama ukwi iuvi lyakwe.

16. Uzye ya Brijeti yapaazilwe uli pa mulandu nu kupalama kuli Yeova nu kwi iuvi lyakwe?

¹⁶ Pa mulandu wakuti ya Brijeti ikalilanga kutali nu kwayelile cilongano, mwangalizi wa ciputulwa wayakomelizye ukuti yasimikila kuku kwene kuno iikalanga nu kutungulula ukulongana pa ng’anda pa mwao. Pa kutandika yalolanga ukuti cingayatalila. Nomba yalondiile vino umwina wayanenyile. Yasimikilanga, ukutungulula ukulongana pa ng’anda pa mwao alino nu kupaatulako insita ya kukwata ukupepa kwa lupwa pamwi na ana yao. I vyani vyacitiike? Ya Brijeti yakwanisye kutandika ukutungulula masambililo ya Baibo aingi nupya aingi pali yayo yabatiziwe. Umu 2005, yatandike upainiya wa nsita yonsi. Yapaazilwe pa mulandu na vino yatwalilile  ukutaila Yeova nu kuya acisinka ukwi iuvi lyakwe. Ndakai ana yao yakaombela Yeova na ucisinka nupya uku ncende iya kwaya ivilongano viili. Ya Brijeti yasininkizye ukuti Yeova wayapeezile amaka ya kuzizimizya intazi zino yakweti na vino yayacuzyanga kuli ya lupwa lwao.

17. I vyani vino tulinzile ukulondesya ukucita?

¹⁷ Satana akalonda tuzumile ukuti Yeova alatusya ndi cakuti twakwata intazi nu kuti ukutungilila iuvi lyakwe Yeova kulalenga sile ivintu vitutalile umu umi. Akalonda twauvwa intete lino aina apeelwa imilimo umwi iuvi yayabepezya, ukuyacuzya nanti ukuyanyepa. Nupya akalenga yauze ukutuseka pano akalonda tute ukuvwila masunde yakwe Yeova nu kutaila iuvi lyakwe. Lelo twamanya micenjelo yakwe nupya tutanga tubepwe. (2 Kol. 2:11) Mwalondesya kukana ufi wakwe Satana nu kulondesya ukuya acisinka kuli Yeova nu kwi iuvi lyakwe. Mwaiusya ukuti Yeova atalatala amusye. (Masa. 28:7) Fwandi mutaleka icili consi cimulesye ukuombela Yeova.—Loma 8:35-39.

18. I vyani vino tulasambilila umu cipande cilondelilepo?

¹⁸ Mu cipande cii itusambilila pa ntazi zino tungakwata ukufuma ku antu yano tusipepa nayo. Nomba ukutaila Yeova ni iuvi lyakwe nako kungalenga tukwate intazi mu cilongano. Tungacita uli pakuti tucimvye intazi zizyo? Iuzyo lilyo lilasukwa umu cipande icilondelilepo.