1. I vyani vino tungenekela, nupya i vyani vino tungasininkizya?

 TULINZILE ukwenekela ukuti antu yamwi yalaatukanya lino tukusimikila. Nupya vivyo i vilacitika sana uku nkoleelo. (Dan. 11:44; 2 Tim. 3:12; Kuso. 16:21) Nanti cingaya vivyo, twasininkizya ukuti Yeova alatwalilila ukutwazwa. U mulandu ci? A pa mulandu wakuti Yeova akaazwa aomvi yakwe ukuomba imilimo ino akayapeela asi mulandu na vino imilimo iyo ingakoma. Pakuti tumanye vino akacita vivyo, lekini tusambilile pali vimwi vyacitikiile Kasesema Ezekelo uwasimikilanga Ayuda aasenzilwe umu uzya umu Babiloni.

2. I vyani vino Yeova walanzile pa yantu yano Ezekelo wali nu kusimikilako, nupya i vyani vino tumasambilila umu cipande cii? (Ezekelo 2:3-6)

² Antu ya musango ci yano Ezekelo wali nu kulasimikilako? Yeova wayalondolwile ukuti yali ‘akome imitwe,’ ‘aumalale imyenzo,’ nupya ya ‘cisanguka’ ‘atalame’. Yali aipe wa myunga nupya wa makalela. Ali mulandu uno Yeova wanenyile Ezekelo pa miku iingi ukuti: “utaya ni ntete.” (Belengini Ezekelo 2:3-6.) Ezekelo wakwanisye ukuomba umulimo wa kusimikila pa mulandu wakuti (1) watumilwe na Yeova, (2) umupasi wakwe Leza wali nawe, na (3) Izwi lyakwe Leza lyakomyanga utailo wakwe. Uzye ivintu vii vitatu vyazwilizye uli Ezekelo? Nupya vikatwazwa uli ndakai?

3. A mazwi ci limwi aakomelizye Ezekelo, nupya uzye Yeova walangilile uli ukuti wali nu kumutungilila?

³ Yeova wanenyile Ezekelo ukuti: “Nkukutuma.” (Ezek. 2:3, 4) Amazwi yaa yafwile yakomelizye Ezekelo. U mulandu ci? Ukwaula ukutwisika afwile wiwisye ukuti Yeova waomvizye  amazwi aali yamwi kwene lino wasoolwile Mose na Ezaya ukuya ya kasesema yakwe. (Kufu. 3:10; Eza. 6:8) Nupya Ezekelo wamanyile ukuti Yeova wazwilizye ya kasesema yaa yaili ukuomba imilimo ino yapiilwe iyali ikome. Fwandi lino Yeova wanenyile Ezekelo pa miku iili ukuti: “nkukutuma” calenzile ataile ukuti Yeova wali nu kumwazwa. Nupya Ezekelo walemvile maila ingi amazwi yakuti: “Yawe avwanga kunondi ati.” (Ezek. 3:16; 6:1) Ukwaula nu kutwisika, Ezekelo wasininkizye ukuti watumilwe na Yeova. Nupya pa mulandu wakuti Ezekelo wali umwana wakwe simapepo afwile wasambilile ukuti Yeova lyonsi wanenanga ya kasesema yakwe ukuti wali nu kuyazwa. Wakwe, Yeova wanenyile Isaki, Yakobo na Yelemiya ukuti: “Indi nawe.”—Utan. 26:24; 28:15; Yele. 1:8.

4. A mazwi ci limwi aakomelizye Ezekelo?

⁴ Uzye Aina Izlaeli aingi yali nu kucita uli nga yuvwa vino Ezekelo wasimikilanga? Yeova watiile: “Aina Izlaeli yene awe, yasikuya yakakuvwe foo. Pano nani kwene yakana ukunguvwa.” (Ezek. 3:7) Vino antu yakananga ukukutika kuli Ezekelo a Yeova uno yakananga ukukutikako. Amazwi yayo yalenzile Ezekelo ukusininkizya ukuti waomvile ningo umulimo wakwe asi mulandu antu yakananga ukukutika kuli aliwe. Nupya Yeova wanenyile Ezekelo ukuti ndi cakuti vino wasimikilanga vyacitika, antu yali nu kumanya ukuti “pakasi kao paali kasema.” (Ezek. 2:5; 33:33) Ukwaula nu kutwisika amazwi yaa yakomelizye Ezekelo nu kulenga aombe ningo umulimo wa kusimikila.

5. Ukulingana na Ezaya 44:8, aekwi kuno tukafumya amaka?

⁵ Tukakwata amaka pa mulandu wakuti twamanya ukuti Yeova aliwe watutuma ukuomba umulimo wa kusimikila. Watucindamika pano  akatwama ukuti ya Nte yakwe. (Eza. 43:10) I syuko sana ukwamwa vivyo. Wakwe viivi kwene vino Yeova wanenyile Ezekelo ukuti: “Utaya ni ntete,” naswe kwene akatunena ukuti: “Mutazakaza.” U mulandu ci uno tutalinzile ukutiinila aakatukanya? A pa mulandu wakuti Yeova u watutuma nupya akatwazwa wakwe viivi kwene vino cali kuli Ezekelo.—Belengini Ezaya 44:8.

6. (a) Uzye Yeova akatulangilila uli ukuti akatwazwa? (b) I cani cikalenga ukuti tukomeleziwe?

⁶ Yeova watulaya ukuti alaatwazwa. Wakwe, lino Yeova atatala walanda amazwi yakuti: “Mwemwe muli yakambone yane,” watiile: “Lino wapita umu manzi azike, namayanga nawe, na lino ukulamba uluzi, utalamwela awe. Lino wapita umu moto, utalapya awe. Icimbilimbili cakweo citalakwambukila awe.” (Eza. 43:2) Lino tukuomba umulimo wa kusimikila insita zimwi kukacitika ivintu vikaya wa manzi aazike nupya tukakwata intazi izikaya wa moto. Nanti ciye vivyo Yeova akatwazwa pakuti tutwalilile ukusimikila. (Eza. 41:13) Wakwe vino cali umu manda yakwe Ezekelo, antu aingi ndakai yakakana ukukutika lino tukuyasimikila. Nanti ciye vivyo twamanya ukuti cii cisipiliula ukuti tusisimikila ningo. Tukakomeleziwa pa mulandu wakuti Yeova akauvwa ningo ndi cakuti twatwalilila ukusimikila nu kuya acisinka. Umutumwa Paulo watiile: “Cila muntu alapokelela icilambu kulingana nu mulimo wakwe.” (1 Kol. 3:8; 4:1, 2) Nkazi umwi uwaomba upainiya pa myaka iingi watiile: “Nkaya sana ni nsansa ukumanya ukuti Yeova alatulambula pali vino tukaomba.”

7. Uzye Ezekelo uvwanga uli lyonsi lino welenganya pa cilolwa cino waweni? (Lolini cikope icili pa nkupo.)

⁷ Ezekelo waweni vino umupasi wakwe Leza wakwata amaka. Vino Ezekelo waweni umu cilolwa, vyamwazwile ukumanya ukuti umupasi wa muzilo u wazwanga ya malaika nupya u walenganga imipeto iceleta ukuzinguluka. (Ezek. 1:20, 21) Uzye Ezekelo wacisile uli? Walemvile vyonsi ivyacitikanga. Watiile: “Apakulola cico, impona pansi mfupime.” Ezekelo wazungwike sana icakuti apona na pasi. (Ezek. 1:28) Lino papisile insita, lyonsi lino Ezekelo welenganya pa cilolwa cii, wakomeleziwanga sana nu kusininkizya ukuti umupasi wakwe Leza wali nu kumwazwa ukuomba ningo umulimo wa kusimikila.

8-9. (a) I vyani vyacitikiile Ezekelo lino Yeova wamunenyile ukuti katuka? (b) Uzye Yeova wakomelizye uli Ezekelo pa yantu yano wali nu kulasimikila?

⁸ Yeova wanenyile Ezekelo ukuti: “We mwana wa muntu, katuka ndande nawe!” Amazwi yaa pamwi nu mupasi wakwe Leza yaa vyalenzile Ezekelo ukukwata amaka yano walondekwanga pakuti akatuke. Ezekelo walemvile ati: “Mupasi wiza wingila munondi nu kunjimika apa ngazo zyane.” (Ezek. 2:1, 2) Lino papisile insita nupya umi wakwe onsi, Ezekelo watungululwanga na maka yakwe Leza kuli kuti mupasi wa muzilo wakwe Leza. (Ezek. 3:22; 8:1; 33:22; 37:1; 40:1) Umupasi wakwe Leza wakomizye Ezekelo ukuomba umulimo uno wapeezilwe uwa kusimikila antu “atalame nupya aumalale.” (Ezek. 3:7) Yeova wanenyile Ezekelo ukuti: “Nkukukonkomezya nupya uye umumalale ndi vino yaya. Nkukukomya ukuluta ni iwe, ukuluta na kaliwe kakankala kakwe daimondi akakome wa nkomolo, ala antu yaya utakayoope foo.” (Ezek. 3:8, 9) Cali kwati Yeova akunena Ezekelo ukuti: ‘Utaleka icilumba ca yantu cikutoovole. Namakukomyanga.’

⁹ Pa cisila cakwe cico, umupasi wakwe Leza wazwanga Ezekelo umu mulimo wa kusimikila. Ezekelo walemvile ukuti umupasi wakwe Yeova wali pali aliwe. Casenzile umulungu upuma  pakuti sile kasesema Ezekelo asambilile nu kuvwikisya vino wali nu kulasimikila. (Ezek. 3:14, 15) Lyene Yeova wamunenyile ukuya umu nyika muno “umupasi wakwe” wali nu kuya muli aliwe. (Ezek. 3:23, 24) Ezekelo waipekinye ukutandika umulimo wa kusimikila.

10. U wazwilizyo ci uno tukalondekwa pa kutwalilila ukuomba umulimo wa kusimikila, nupya u mulandu ci?

¹⁰ U wazwilizyo ci uno tukalondekwa pa kutwalilila ukuomba umulimo wa kusimikila? Pakuti twasuke iuzyo lii lekini twelenganye pali vino vyacitikiile Ezekelo. Lino atatala watandika umulimo wa kusimikila umupasi wakwe Leza wamwazwile ukukwata amaka yano walondekwanga. Wakwe Ezekelo, naswe kwene ndakai tungaomba sile ningo umulimo wa kusimikila ndi cakuti umupasi wakwe Leza watwazwa. U mulandu ci? Pano Satana akatulwisya pakuti tute ukusimikila. (Kuso. 12:17) Antu aingi yakaelenganya ukuti Satana wakwatisya amaka icakuti tutanga tumucimvye lino akutulwisya. Nomba tungamucimvya ndi cakuti tukuomba umulimo wakwe ukambone. (Kuso. 12:9-11) Tungacita uli vivyo? Lino tukusimikila, tukalanga ukuti tusitiina Satana. Fwandi lino tukusimikila Satana akacuula sana. U mulandu ci uno twatwalilila ukuomba umulimo wa kusimikila asi mulandu yakatukanya? A pa mulandu wakuti Yeova akatupeela amaka ukuomvya umupasi wakwe uwa muzilo nupya akatutungilila.—Mate. 5:10-12; 1 Pet. 4:14.

11. I vyani vino umupasi wakwe Leza ungatwazwa ukucita, nupya tungacita uli pakuti tutwalilile ukuupokelela?

¹¹ I vyani na vyuze vino tukasambilila nga twelenganya pali vino Yeova wapeezile Ezekelo maka yano walondekwanga pakuti aombe ningo umulimo wa kusimikila? Umupasi wakwe Leza ungatwazwa ukukwata amaka yano tukulondekwa pakuti tucimvye intazi ili yonsi ino tungakwata umu mulimo wa kusimikila. (2 Kol. 4:7-9) Nomba i vyani vino tungacita pakuti tutwalilile ukupokelela umupasi wakwe Leza? Tulinzile ukutwalilila ukupepa nu  kusininkizya ukuti Yeova amauvwa mapepo itu. Yesu wasambilizye asambi yakwe ukuti: “Mwalenga, . . . mwalonda, . . . mwakonkonsya. Lyene Yeova alapeela “umupasi wa muzilo kuli yano yakamulenga.”—Luka 11:9, 13; Mili. 1:14; 2:4.

12. Ukulingana na Ezekelo 2:9–3:3, aekwi kuno ulupapulo ulupombwe lwafumile nupya mwali vyani?

¹² Umupasi wakwe Leza wazwile Ezekelo ukukwata amaka nupya izwi lyakwe Leza lyakomiizye utailo wakwe. Umu cilolwa cino Ezekelo waweni, waweni ikasa ililema ulupapulo ulupombwe. (Belengini Ezekelo 2:9–3:3.) Aekwi kuno ulupapulo ulupombwe lwafumile? I vyani vyalimo? Uzye lwakomiizye uli utailo wakwe Ezekelo? Lekini tusambilile. Ulupapulo ulupombwe lwafumile ku cilimba ca Wene cakwe Leza. Yeova afwile waomvizye malaika wenga pali ya malaika 4 yano Ezekelo waweni ukumupeela ulupapulo ulupombwe. (Ezek. 1:8; 10:7, 20) Mu lupapulo luu mwali amazwi yakwe Leza kuli kuti mazwi ya upinguzi yano Ezekelo wali nu kusimikila pa nsita itali kuli ya cipondoka aasenzilwe umu uzya. (Ezek. 2:7) Amazwi yaa yalemvilwe uku mbali zyonsi zyoili izya lupapulo.

13. I vyani vino Yeova wanenyile Ezekelo ukucita uku lupapulo, nupya u mulandu ci uno lwalyompiile?

¹³ Yeova wanenyile kasesema ukulya ulupapulo nu kuti aikute. Ezekelo uvwilile nupya walile ulupapulo lonsi. Uzye iciputulwa cii ica cilolwa capiliulanga cani? Capiliulanga ukuti walondekwanga ukuvwikisya vino wali nu kusimikila. Wali nu kuzumila amazwi yayo pakuti aalondesya ukusimikila. Lyene kwacitike cimwi icakuzungusya. Ezekelo wizile amanya ukuti ulupapulo lwali ululyompe kwati uuci. (Ezek. 3:3) U mulandu ci uno lwalyompiile? A pa mulandu wakuti umulimo uno Ezekelo wapeezilwe uwa kuneena antu amazwi yakwe Yeova wali uulyompe nanti usuma sana. (Masa. 19:8-11) Uvwile ningo sana vino Yeova wamusoolwile ukuya kasesema wakwe nu kuomba umulimo uu.

14. I cani cazwile Ezekelo ukuipekanya ukuzumila umulimo uno wapiilwe?

¹⁴ Lino papisile insita Yeova wanenyile Ezekelo ukuti: “Uwawaka amazwi yonsi yano nkukunena. Ukutike ningo na matwi yako.” (Ezek. 3:10) Amazwi yayo, yalenzile Ezekelo ukulaiusya ivyalemvilwe umu lupapulo nu kulaelenganyapo sana. Fwandi ukucita vivyo kwakomyanga utailo wakwe Ezekelo. Nupya kwalenzile akwate amaka yano walondekwanga pakuti anene antu amazwi yakwe Leza. (Ezek. 3:11) Lino Ezekelo uvwikisye amazwi yakwe Leza nu kuyazumila, waipekinye ukutandika ukusimikila nu kutwalilila ukuomba umulimo uu ukufika lino waumalilile.—Loliniko na Masamu 19:14.

15. I vyani vino tulinzile ukucita pakuti twazizimizya?

¹⁵ Pakuti twazizimizya lino tukuomba umulimo wa kusimikila, tulinzile ukutwalilila ukuleka izwi lyakwe Leza ukulakomya utailo witu. Wakwe Ezekelo, tulinzile ‘ukuwaka’ vyonsi vino Yeova akutunena. Ndakai Yeova akalanda naswe ukuomvya Izwi lyakwe, Baibo. Tungacita uli pakuti Izwi Lyakwe Leza litwalilile ukutwazwa muli vino tukaelenganya, muli vino tukayuvwa na muli vino tukacita?

16. I vyani vino tulinzile ukucita api Izwi Lyakwe Leza, nupya tungacita uli pakuti vino tukubelenga viye umu myenzo itu?

¹⁶ Wakwe viivi kwene vino imili itu ikakoma ndi cakuti twalya ivya kulya nupya vyasalangana umu mwili, avino nu utailo witu ukakoma ndi cakuti tukuisambilizya Izwi Lyakwe  Leza nu kwelenganyapo. Nupya vikwene avino Yeova akalonda tusambilile. Yeova akalonda twikute Izwi lyakwe kuli kuti ukuvwikisya vino Baibo ikalanda. Tungacita vivyo nga tukupepa, ukubelenga nu kwelenganyapo. Ca nkoleelo tukapepa pakuti tuvwikisye vino Leza akaelenganya. Lyene tukabelenga cipande cimwi muli Baibo. Ni ca kusyalikizya tukatala itwimilila pakuti twelenganyepo sana pali vino twabelenga. I vyani lyene ivingacitika? Nga tukwelenganyapo sana pali vino tukubelenga, alino tuluvwikisya Izwi Lyakwe Leza nupya cilalenga utailo witu ukukoma.

17. U mulandu ci uno cacindamila ukwelenganyapo sana pali vino tukubelenga muli Baibo?

¹⁷ U mulandu ci uno cacindamila ukubelenga Baibo nu kwelenganyapo sana? Ukucita vivyo kukalenga tuye na amaka yano tukalondekwa pakuti tusimikile ilyasi lya Wene ndakai alino na lino tulasimikila ilyasi lya upinguzi uku nkoleelo. Nupya ndi cakuti tukwelenganya pa miyele isuma ino Yeova wakwata, ucuza witu na aliwe ukakomelako. Nupya tulaipakizya icintu cimwi icilyompe nanti cisuma kuli kuti mutende nu kuteeka mwenzo.—Masa. 119:103.

18. I vyani vino antu amu cifulo cino tukasimikilamo yalinzile ukumanya, nupya u mulandu ci?

¹⁸ Ezekelo wali a kasesema, nomba swemo asi sweswe ya kasesema. Nomba tukalondesya ukutwalilila ukunena antu amazwi yakwe Yeova aya umwi Izwi lyakwe ukufikila lino umulimo uu ulasila. Lino insita ya upinguzi ilafika, antu yano tukasimikilako yatalalanda ukuti kusi uwatucelwile nupya Leza atatwisileko mano. (Ezek. 3:19; 18:23) Lelo yalalanda ukuti yatusimikile ilyasi lisuma ukufuma kuli Leza.

19. I cani cilalenga tuye na maka ya kuomba ningo umulimo wa kusimikila?

¹⁹ I cani cilalenga tuye na maka ya kuomba ningo umulimo wa kusimikila? Ivintu vitatu ivyazwile Ezekelo vingatwazwa naswe kwene. Tukatwalilila ukuomba umulimo wa kusimikila pa mulandu wakuti Yeova u watutuma, umupasi wa muzilo wakwe Leza ukatupeela maka yano tukulondekwa nupya Izwi Lyakwe Leza likakomya utailo witu. Pa mulandu wakuti Yeova akatwazwa, tukatwalilila ukuomba ningo umulimo wa kusimikila nu kuzizimizya “ukufika nu ku mpela”—Mate. 24:13.