1. I vintu ci ivisuma ivingi vino acance yacita?

 CILA mwaka acance aingi Aina Klistu yakabatiziwa. Uzye namwe mwabatiziwa? Ndi cakuti avino mwacita aina inu na ya nkazi yaya sana ni nsansa pali vino mwacita nupya na Yeova kwene akazanga pa mulandu namwe. (Mapi. 27:11) Tale elenganyini panono pa vintu uwingi ivisuma vino mwacita. Mwasambilila Baibo, limwi pa myaka iingi. Vino mwasambilila vyalenga musininkizye ukuti Baibo Iizwi Lyakwe Leza. Ni cicindamisye i cakuti mwamanya nu kutemwa umwineco wakwe Baibo. Mwatemwa sana Yeova icakuti mwapingulapo ukuipeela kuli aliwe pakuti mwamuombela nu kubatiziwa. Mwacita ningo sana.

2. I vyani vino tumasambilila umu cipande ci?

² Ukwaula nu kutwisika lino mutatala mwabatiziwa mwakwatanga intazi izingi izyalenganga camutalila ukuya acisinka kuli Yeova. Nomba lino mukuya mukukula mulaakwata, intazi na zyuze. Satana alaezya na maka ukumulesya ukutemwa Yeova nu kumuombela. (Efes. 4:14) Mutalinzile ukuleka ivya musango uwo ukumucitikila. I vyani ivingamwazwa ukutwalilila ukuya acisinka kuli Yeova nu kufikilizya vino mwamulavile ukuti mulamuombela? Mulinzile ukutwalilila ukulunduluka muli ukapepa. (Aeb. 6:1) Nomba mungacita uli vivyo?

3. I vyani vino Aina Klistu yonsi yalinzile ukucita pa cisila ca kubatiziwa?

³ Pa cisila ca kubatiziwa swensi kwene tulinzile ukulondela ukusunda kuno umutumwa Paulo wapeezile Aina Klistu ya ku Efeso. Wayakomelizye ukuya “aikolo” muli ukapepa.  (Efes. 4:13) Cii capiliulanga ukuti yalinzile ukutwalilila ukulunduluka. Paulo wakolinye ukulunduluka kwa yaomvi yakwe Yeova kuli vino umwana akakula. Avyazi yakatemwa sana umwanao ndi cakuti wavyalwa nu kuya sana acilumba. Nomba umwana atange aikalilile sile pali pamwi ukwaula ukukula. Lino insita ikuya ikupita akaya aakuta “ivya wance.” (1 Kol. 13:11) Vikwene avino caya nu ku Ina Klistu. Pa cisila ca kubatiziwa tulinzile ukutwalilila ukulunduluka. Lekini tulande pali vimwi ivingatwazwa ukucita vivyo.

4. I miyele ci ingamwazwa ukulunduluka? Londololini. (Filipi 1:9)

⁴ Mwaya mukutemelwako Yeova. Mwatemwa mpiti Yeova. Nomba ukutemwa kuno mwamutemwa kulinzile ukulakulilako. Mungacita uli vivyo? Umutumwa Paulo walanzile pa nzila yonga ino tungacitilamo vivyo, pali Filipi 1:9. (Belengini.) Paulo wapefile ukuti ukutemwa kwa Ina Filipi “kwakulilako.” Fwandi ukutemwa kwitu kungakulilako. Tungacita uli vivyo? Tungacita vivyo ndi cakuti “kumanya nu kwiluka” kwitu vikuya vikukulilako. Lino tukuya tukumanyilako Yeova tulaya tukumutemelwako nu kucindika sana imiyele yakwe na vino akacita ivintu. Tulalondesya ukumuzanzya nu kulondesya ukukanacita icili consi icingamusosya. Tukaezya na maka ukumanya vino akalonda twacita na vino tungacita vivyo.

5-6. Tungacita uli pakuti twatemelwako sana Yeova? Londololini.

⁵ Tungatemelwako sana Yeova ndi cakuti twamanya ningo umwanakwe aakakolanya imiyele yakwe. (Aeb. 1:3) Inzila yonga ino tungamanyilamo ningo Yesu u kusambilila umu mabuku ya Malandwe 4. Ndi cakuti mutatala mwatandika ukubelenga Baibo cila wanda, mungatandikila na mabuku kwene yaa akalanda pali Yesu. Lino mukubelenga amalyasi aakalanda pali Yesu mwaika sana mano ku miyele yakwe. Antu yatemilwe ukuya sana pamwi nawe nu kulanda nawe, nawe watemilwe sana ukuya pamwi na ana anono. (Mako 10:13-16) Yesu wali ni cikuuku na ucuza nupya asambi yakwe yatuvwanga intete ukumunena vino yakuyuvwa. (Mate. 16:22) Vyonsi vii vino Yesu wacitanga wakolanyanga Isi wa kwi yulu. Twamanya ukuti Yesu akakolanya Isi, fwandi twasambilila ukuti na Yeova kwene waya na ucuza nupya waya ni cikuuku. Tungapepa kuli aliwe. Lino tukupepa tungamulondolwela vyonsi vino tukwelenganya na vino tukuyuvwa. Twasininkizya ukuti atange atukalipile. Watutemwa nupya akatusakamala.—Mate. 16:22.

⁶ Yesu uvwilanga antu uluse. Umutumwa Mateo watiile: “Lino waweni maumba ya yantu, wayuvwilile uluse, pano yayacuzyanga nupya yaali atazyelwe wa mfwele izyaula kacema.” (Mate. 9:36) Nupya uzye Yeova akauvwa uli? Yesu watiile: “Tata wa kwi yulu asilonda ukuti nanti wenga pali yaa aaya wa yana anono aponge.” (Mate. 18:14) Mazwi yaa yakalenga tuye sana ni nsansa pano yakalangilila ukuti Yeova watutemwa sana. Ndi cakuti twamanya ningo Yesu, tulatemelwako sana Yeova.

7. Uzye ukuzanwa na Ina Klistu aika mano kuli vyakwe Leza kungamwazwa uli?

⁷ Mungalanga sana ukutemwa nu kwika sana mano kuli vyakwe Leza ndi cakuti mukuya pamwi na ina na ya nkazi aaya umu cilongano cinu aikako sana amano kuli vyakwe Leza nu kwezya ukuyamanya ningo. Mwalola vino yaya ni nsansa. Yasilanguluka pali vino yapingulapo ukuombela Yeova.  Mungayuzya pali vino vyayacitikila umu mulimo wakwe Yeova. Ndi cakuti imukwata ivya kupingulapo ivicindame mungayuzya pakuti yamupandeko amano. Mwaiusya ukuti “ukwaya yampanda mano avule, kwaya nu mutende kwene.”—Mapi. 11:14.

8. I vyani vino mungacita ndi cakuti mukutwisika vino Baibo ikalanda?

⁸ Mutatwisika. Wakwe vino itulandapo umu palaglafu 2, Satana angezya ukumulesya ukuya nu utailo ukome nu kumulesya ukupalama kuli Yeova. Inzila yonga ino angacitilamo vivyo u kulenga mwatwisika vimwi vino Baibo ikasambilizya. Wakwe, limwi yamwi yangezya ukulenga muzumile ukuti Leza asi wino waumvile ivintu vyonsi, lelo vyonsi vyasangwike sile. Lino mwali ance limwi mutamanyile nanti acimwi apa cisambilizyo cii, nomba lyene vino imukula limwi mukusambilila api lyasi kwene lii uku sukulu. Limwi vino ya mwalimu yakulanda ndakai vikuvwika ningo nupya vikuloleka ivya cisinka. Nomba limwi yateezya ukulondelezya pakuti yamanye ndi cakuti kwaya Kaumba. Mwaiusya icisinte icaya pa Mapinda 18:17 apakati: “Uwakolela ukulondolola akaloleka kwati watalungika, ukufikila lino umuze wiza nu kumusinila.” Ukucila sile ukuzumila vino mukusambilila uku sukulu mulinzile ukuvwikisya sana icumi icaya umwi Izwi Lyakwe Leza, Baibo. Mwalondelezya umu mpapulo. Mwalandako na ina na ya nkazi aazumile umu kusanguka mpiti. Mwayuzya ivyalenzile yasininkizye ukuti kwaya Kaumba uwatutemwa sana. Kulanzyanya kwa musango uwo kungamwazwa ukumanya ivisinka ivikalangilila ukuti kwaya Kaumba.

9. I vyani vino mwasambilila kuli vino vyacitikile nkazi Melisa?

⁹ Nkazi wi zina lyakuti Melisa wasambilile api lyasi ilyalandanga pa uumbo na cico camwazwile ukuta ukutwisika. * Watiile: “Vino ya mwalimu yakasambilizya uku sukulu pa kusanguka vikalenga antu yalola kwati ivya cumi. Pa kutandika cantalile sana ukuta ukutwisika. Ntalondanga ukulondelezya pano natiinanga ukuti limwi ningazana ukuti i cacumi ivintu vyasangwike sile. Nomba nilwike ukuti Yeova akalonda twasininkizya vino twazumilamo. Fwandi natiile  ukutwisika. Nabelenzile ibuku lya kuti Is There a Creator Who Cares About You? na kabuku kakuti Was Life Created? alino na kakuti Vino Umi Watandike​—Mauzyo 5 Acindame Sana. Vikwene avino nalondekwanga ukumanya. Nga cazifile imbelengamo zuwa.”

10-11. I cani icingamwazwa ukutwalilila ukuya asanguluke? (1 Tesalonika 4:3, 4)

¹⁰ Mwakana imiyele iipe. Ndi cakuti acance yafika pa musinku wa ulumendo nu ukazyana yakakwata sana insuna nupya limwi yakayapatikizya ukucita uzelele. Satana akalonda mwacita vivyo kwene. I cani icingamwazwa ukutwalilila ukuya asanguluke? (Belengini 1 Tesalonika 4:3, 4.) Lino mukupepa kuli Yeova, mwamunena vino mukuyuvwa, nu kumulenga ukuti amupeele amaka. (Mate. 6:13) Mwaiusya ukuti Yeova akalonda ukumwazwa asi kumupingula foo. (Masa. 103:13, 14) Na Baibo kwene ingamwazwa. Nkazi Melisa wino itulandapo wacuzile sana pakuti ate ukuya na melenganyo aipe. Watiile: “Ukubelenga Baibo cila wanda kwangazwile ukukanatoovoka. Kwanjiusyanga ukuti nene wakwe Yeova nu kuti nkalonda ukumuombela.”—Masa. 119:9.

¹¹ Mutaezya ukumala mwenga intazi zino mukweti. Mwalanda na avyazi inu pali vino vikumucuzya. Citanguka ukulanda na avyazi inu pa vintu vino vikumucuzya nomba cacindama ukucita vivyo. Nkazi Melisa watiile: “Napefile pakuti inje umusipe, lyene nalanzile na ya tata pa ntazi ino nakweti. Pa cisila nuvwileko ningo. Namanyile ukuti Yeova wantemilwe.”

12. Mungacita uli pakuti mwapingula ningo pa vintu?

¹² Mwatungululwa ni visinte vya muli Baibo. Lino mukuya mukukula, avyazi inu yalamuzumilizya ikuipingwila pa vintu. Nomba kuli ivintu ivingi vino mutatala mwamanya. Uzye mungacita uli pakuti mutapingulapo ukucita ivintu ivingonona ucuza winu na Yeova? (Mapi. 22:3) Nkazi Kari walondolwile ivyalenzile aapingula ningo pa vintu. Wilwike ukuti Umwina Klistu uwika amano kuli vyakwe Leza asilondekwa amasunde akumutungula muli vyonsi umu umi. Watiile: “Nalondekwanga ukumanya vino Yeova akaelenganya pa vintu ukucila sile ukulalondela masunde.” Lino mukubelenga Baibo, mwayuzya ukuti: “I vyani vino icipande cii cikunsambilizya pali vino Yeova akaelenganya? Uzye muli ivisinte ivingangazwa ukucita ivisuma? Ndi cakuti avino cili, i visuma ci ivingacitika nga nkuomvya ivisinte vii? (Masa. 19:7; Eza. 48:17, 18) Nga mukubelenga Baibo nu kwelenganya pali vino mukubelenga cilamwangukila ukupingulapo ivingazanzya Yeova. Lino mukutwalilila ukulunduluka mulalola ukuti musilondekwa amasunde pa cili consi pano mulamanya vino Yeova akaelenganya pa vintu.

13. Uzye ya cuza asuma yangamwazwa uli? (Mapinda 13:20)

¹³ Mwasoolola ya cuza aatemwa Yeova. Wakwe vino itulandapo mpiti, ya cuza yano mukasoolola yangamwazwa ukulunduluka muli ukapepa nanti foo. (Belengini Mapinda 13:20.) Nkazi Sara watiile ukuya nu luzango. Lyene kwali cimwi icacitike icalenzile atandike ukuya nu luzango nupya. Nkazi Sara watiile: “Nizile inzana ya cuza asuma pa nsita ilinge. Nkazi uwacance nani twakomenkananga cila mulungu ku kusambilila Ulupungu Lwa Mulinzi. Cuzane muze wangazwile ukutandika ukwasukapo pa kulongana. Pa mulandu na vino ya cuza yane yangazwa,  natandika ukwika sana mano ku kuisambilizya Baibo nu kupepa. Natandika ukukomya ucuza wane na Yeova nupya natandika ukuya ni nsansa nupya.”

14. Uzye ya Julien yapanzile uli ya cuza asuma?

¹⁴ Mungacita uli pakuti mukwate ya cuza angamwazwa? Ya Julien yano ndakai aa eluda yatiile: “Lino nali umwance, napanzile ivyuza ivingi ukupitila umukuombako umulimo wa kusimikila. Ya cuza yaa yali acincile nupya yangazwile ukulola vino ningacita pakuti naipakizya umulimo. Natandike ukwelenganya pa kuombako umulimo wa nsita yonsi. Nupya nizile iniluka ukuti icalenzile ntakwata ya cuza aingi a pa mulandu wakuti nalondanga ya cuza ya musinku wane. Lino papisile insita nizile inkwata na ya cuza aombelanga pa Betele. Vino yacitanga vyalenzile nasoolola ningo ivya kuizanzya, na cico calenzile mpalame sana kuli Yeova.”

15. U kucelula ci kuno Paulo wapeezile Timoti pa kusoolola ivyuza? (2 Timoti 2:20-22)

¹⁵ I vyani vino mulinzile ukucita ndi cakuti mwalola ukuti ukuzanwa nu muntu umwi uwa mu cilongano kungonona ucuza winu na Yeova? Paulo wamanyile ukuti antu yamwi umu cilongano yatelenganyanga nanti ukucita ivintu wa Ina Klistu, fwandi wanenyile Timoti ukutaluka uku yantu ya musango uwo. (Belengini 2 Timoti 2:20-22.) Ucuza witu na Yeova wacindama sana. Twaombesya sana pakuti tupalame kuli Yeova, fwandi tutalinzile ukuleka ivyuza vitononele ucuza witu na aliwe.—Masa. 26:4.

16. A mauyo ci yano mungimika?

¹⁶ Mwaimika mauyo angamwazwa. Mwaimika mauyo aangakomya utailo winu nu kumwazwa ukulunduluka muli vyakwe Leza. (Efes. 3:16) Wakwe mungapingulapo ukuzifya imibelengele inu yakwe Baibo cila wanda. (Masa. 1:2, 3) Nanti limwi mungezyako ukulapepa imiku iingi nupya ukufuma pa nsi ya mwenzo. Limwi mukulonda ukulapingulapo ningo lino mukusoolola ivya kuizanzya nanti ukulaomvya ningo insita. (Efes. 5:15, 16) Ndi cakuti Yeova walola vino mukuombesya pakuti mulunduluke alaya ni nsansa.

17. Uzye ukwazwa yauze kungamwazwa uli?

 ¹⁷ Mungalunduluka muli vyakwe Leza ndi cakuti mukwazwako yauze. Yesu watiile: “Mu kupeela mwaya insansa izingi ukucila izyaya umu kupokelela.” (Mili. 20:35) Mulaya sana ni nsansa ndi cakuti mukuomvya insita inu uku kwazwa yauze. Wakwe, mungimika uyo wa kwazwako akote na aakalwalilila aaya umu cilongano cinu. Mungayazwako ukukala ivintu nanti ukuyasambilizya ivya kuomvya utuombelo twa malaiti. Ndi cakuti mwemwe ina, mungimika uyo wakuya muomvi aakatumikila pakuti mwaazwa sana aina na ya nkazi. (Filipi 2:4) Mungalanga ukutemwa na kuli yano yataya umu cilongano nga mukuyasimikilako ilyasi lisuma ilya Wene. (Mate. 9:36, 37) Nga cingacitika mungimika nu uyo wa kuombela Yeova umu mulimo wa nsita yonsi.

18. Uzye ukuombako umulimo wa nsita yonsi kungamwazwa uli ukulunduluka?

¹⁸ Ukuombako umulimo wa nsita yonsi kungamwazwa ukucitako ivintu ivingi ivingalenga muye sana ya cuza yakwe Yeova. Ukuombako upainiya kungalenga muzanweko nu kwi Sukulu Lyakwe ya Kakosoola ya Wene. Mungaombelako na pa Betele nanti umu makuule. Nkazi umwi uwacance painiya watiile: “Ukuombela pamwi na ina na ya nkazi aakula muli vyakwe Leza kwangazwile ukulunduluka pa cisila ca kubatiziwa. Vino yacitanga vyangazwile ukulaisambilizya sana Baibo nu kuzifyako imisambilizizye yane.”

19. I visuma ci vino mulaipakizya ndi cakuti mwatwalilila ukulunduluka muli vyakwe Leza?

¹⁹ Lino mukutwalilila ukulunduluka muli vyakwe Leza, Yeova alamupeela ivintu ivingi ivisuma. Mutalaomvya amaka inu uku vintu ivya sile sile. (1 Yoa. 2:17) Mutalauvwa uyi uukaiza pa mulandu nu kukanapingulapo ningo. Lelo ivintu vilamuzipila nupya mulaya ni nsansa. (Mapi. 16:3) Vino mukacita vilakomelezya aina na ya nkazi yonsi. (1 Tim. 4:12) Ni cicindamisye i cakuti mulaya nu mutende uukaiza pa mulandu wa kuzanzya Yeova nu kuya na ucuza usuma na aliwe.—Mapi. 23:15, 16.