1. I visuma ci ivingacitika ndi cakuti tukunenako yauze pali vino cali pakuti tuye umu cumi?

 “UZYE cali uli pakuti muye umu cumi?” Ukwaula nu kutwisika mufwile mwasuka iuzyo lilyo pa miku iingi. Ali iuzyo lino tukauzya aina itu na ya nkazi aingi ndi cakuti tukulonda ukuyamanya ningo. Tukatemwa ukuvwa vino aina na ya nkazi izile iyamanya Yeova nu kumutemwa, nupya tukaipakizya ukuyanenako umulandu uno twatemelwa ukuya ya Nte Yakwe Yeova. (Loma 1:11) Ukulanzyanya kwa musango uu kukatwazwa ukutwalilila ukwelenganya pali vino twatemwa ukuya ya Nte Yakwe Yeova. Ukucita vivyo kukalenga twalondesya ukuya umu cumi kuli kuti ukulaikala ukulingana na vino Yeova akalonda.—3 Yoa. 4.

2. I vyani vino tumasambilila umu cipande cii?

² Umu cipande cii, tumalanda pali vimwi ivyalenga tutemwe icumi. Lyene tumalanda na pali vino tungacita pakuti tulange ukuti tukataizya pa upe uu. Ukwaula nu kutwisika ukupituluka umu visinka vii kumatwazwa ukulataizya sana pali vino Yeova watuleta umu cumi. (Yoa. 6:44) Nupya kumalenga twalondesya ukusambilizyako yauze icumi ca muli Baibo.

3. U mulandu ci ucindamisye uno twatemelwa icumi?

³ Kwaya imilandu iingi yalenga ukuti tutemwe icumi. Umulandu ucindamisye sana u wakuti twatemwa Yeova Leza intulo ya cumi. Ukupitila umwi Izwi lyakwe, Baibo, tutamanya sile ukuti wakwatisya amaka nupya ali Kaumba wi yulu  ni insi lelo twamanya nu kuti a Tata wa kwi yulu uwaya nu kutemwa nupya aakatusakamala. (1 Pet. 5:7) Twamanya ukuti Leza wakwata “uluse na mizu, asisoka zuwa, uwazula nu kutemwa kwa manda pe, uwatailwa na antu yakwe.” (Kufu. 34:6) Yeova watemwa umulinganya. (Eza. 61:8) Akauvwa sana uyi nga tukucuula nupya akalondesya ukuti insita ikafike lino alafumyapo ukucuula konsi. (Yele. 29:11) Naswe kwene tukalondesya ukuti insita iyo ikafike. Ali mulandu uno twatemelwa sana Yeova.

4-5. U mulandu ci uno umutumwa Paulo wakolanyizizye utailo uno twakwata uku nanga?

⁴ U mulandu ci na uze uno twatemelwa icumi? Icumi cikalenga twaipakizya ivintu ivisuma. Elenganyini pali cii. Pa cumi ca muli Baibo paya nu upaalilo witu uwa ku nkoleelo. Pa kulangilila vino upaalilo uu wacindama, umutumwa Paulo walemvile ati: “Tukweti upaalilo uu uwaya wa nanga apasintilila umi witu, nupya wasininkiziwa.” (Aeb. 6:19) Wakwe viivi kwene vino inanga ikalenga uwato ukukanasendwa nu muza, avino nu upaalilo uwasintilila pali Baibo ukatwazwa ukuteeka umwenzo lino twakwata intazi.

⁵ Paa Paulo walandanga pa upaalilo wa kwikala ukwi yulu uno Aina Klistu apakwe yakwata. Nomba amazwi yano walanzile yakaomba nu ku Ina Klistu aakwata upaalilo wa kwizaikala umu paladaise pano nsi. (Yoa. 3:16) Ukwaula nu kutwisika ukusambilila pa upaalilo wa kwikala umi wa manda pe kukalenga umi witu ukuzipilako.

6-7. I visuma ci vino ya Ivon yaipakizye lino yasambilile cumi pali vino ivintu vilaya uku nkoleelo?

⁶ Uvwini ivyacitikile ya Ivon. Yatakuliile pali ya Nte Yakwe Yeova nupya lino yali ance yatiinanga imfwa. Yakaiusya amazwi yamwi yano yabelenzile yano yatalatala ilile aakuti: “Wanda umwi ulaya ali wanda wa kusyalikizya.” Ya Ivon yatandike sile ukwelenganya pa mulandu uno tukaikalila sile imyaka inono itufwa. Yatuvwikisye umulandu uno twayelako nupya yatalondanga ukufwa.

⁷ Lino papisile insita ala ya Ivon yacili akazyana, yakomenkine na ya Nte Yakwe Yeova. Yatiile: “Natandike ukuzumila ukuti ningakwata upaalilo wa kwizaikala umu paladaise pano nsi.” Uzye ukusambilila icumi kwavwile uli nkazi wii? Yalanzile nu kuti: “Nsifilwa ukukasula pa mulandu wa kwelenganya pali vino vilacitika uku nkoleelo na pa mfwa.” Tusikutwisika ukuti ya Ivon yatemwa sana icumi caya muli Baibo nupya yakaipakizya ukunenako yauze pa upaalilo wa ku nkoleelo.—1 Tim. 4:16.

8-9. (a) Uzye umonsi uwalumbulwa umu mulumbe wakwe Yesu walangilile uli ukuti wacindike icuma cino wazanyile? (b) Uzye mungalanga uli ukuti mwika mano uku cumi?

⁸ Umu cumi caya muli Baibo mwaya ni lyasi lisuma ilikalanda pa Wene Wakwe Leza. Yesu wakolinye icumi icikalanda pa Wene uku cuma cino yafisile. Pali Mateo 13:44 Yesu watiile: “Uwene wa kwi yulu waya wa cuma cino yafisile umu mpanga, cino umuntu wazanyile nu kufisa; lyene pa mulandu ni nsansa, waile akazya vyonsi vino wakweti nu kukala impanga iiyo.” Asi kuti umonsi wii walondanga icuma. Nomba lino wacizanyile waipeelisye pakuti akwate icuma cico. Wakazizye vyonsi vino wakweti. U mulandu ci? Pano wamanyile ukuti icuma cino wazanyile cali i cicindamisye. Cacindime sana ukucila vyonsi vino wali nu kusya.

⁹ Uzye namwe a vino mukayuvwa pa cumi cino mwasambilila? Ukwaula nu kutwisika  avino mukayuvwa. Twamanya kuti kusi icili consi umu nsi ii icingalingana nu luzango luno tukakwata lino tukuombela Yeova ndakai, alino nu upaalilo wa kwikala manda pe uku nkoleelo lino Uwene Wakwe Leza ulateeka. Isyuko lya kuya na ucuza usuma na Yeova lyacindama ukucila vyonsi vino tungasya. Icikatuletela sana uluzango u kumuzanzya.—Kolo. 1:10.

10-11. I cani cazwile ya Michael ukusenula umi wao?

¹⁰ Sweingi twaipeelesya sana pakuti pakuti twacita vino Yeova akalonda. Yamwi yasya yata ukuomba incito izisuma zino yaombanga. Yamwi nayo yata ukulondesya ivyuma. Yauze nayo yata ukuya ni miyele iipe ino yakweti mpiti pa cisila ca kusambilila pali Yeova. Vikwene a vino ya Michael yacisile. Yatakuliile umu cumi. Lino yali alumendo yayasambilizye ukulwa kalati. Yatiile: “Natemilwe sana icangalo cii nupya nacicindike. Insita zimwi nayuvwanga ukuti kusi aangancimvya.” Nomba lino ya Michael yatandike ukusambilila Baibo, yasambilile pali vino Yeova akalola unkalwe. (Kolo. 1:10) Ya Michael yalanzile pa yatwalane aayasambilizyanga Baibo ukuti: “Yatatazile iyanenapo ukuti inte ukulwa kalati. Lelo yatwalilile sile ukunsambilizya icumi ca muli Baibo.”

¹¹ Lino ya Michael yatwalilile ukusambilila pali Yeova, yayanga yakumutemelwako. Yatemilwe sana lino yasambilile ukuti Yeova waya ni cikuuku kuli ya kapepa yakwe. Lino papisile insita, ya Michael ilwike ukuti yalondekwanga ukupingulapo pa vintu vicindame ivyali nu kusenula umi wao. Yatiile: “Namanyile ukuti cali nu kuntalila sana ukuta ukulwa kalati. Nupya namanyile nu kuti ukucita vii u kwali nu kuzanzya Yeova nupya nasininkizye ukuti ukuombela Yeova u kwali ukucindame ukucila vyonsi vino nali nu kusya.” Ya Michael yamanyile ukuti icumi cino yazanyile cali i cicindame sana nupya ali mulandu uno yaitemilwe ukusenuka umu umi.—Yako. 1:25.

12-13. Uzye icumi caya muli Baibo cavwile uli ya Meli?

¹² Pa kulangilila vino icumi cacindama, Baibo yakolanya icumi kuli lampi iikwaka umu mfinzi. (Masa. 119:105; Efes. 5:8) Ya Meli aku Azerbaijan, yacindika sana icumi cino yasambilila umwi Izwi Lyakwe Leza. Avyazi yao yatapepanga ukuli kumwi. Ya isi yali a Mozilemu, ya nyina nayo yali Ayuda. Yatiile: “Nanti cakuti ntatwisikanga ukuti Leza akuno waya, nakweti mauzyo aingi. Nasakamalanga inti, ‘U mulandu ci uno Leza waumbiile antunze, nupya u mulandu ci uno wayaumbiiile ukuti yacuula umi wao onsi na pa cisila ukulacuululuka umu moto usizima?’ Vino antu yakalanda ukuti vyonsi ivikacitika u kulonda kwakwe Leza, nayuzyanga inti, ‘Uzye Leza akatungulula antu nupya ala akuvwa ningo lino yakucula?’”

¹³ Ya Meli yatwalilile ukulonda masuko uku mauzyo yano yakweti. Lino papisile insita, yazumile ukutandika ukusambilila Baibo nupya izile iyaya ya Nte Yakwe Yeova. Yatiile: “Vino Baibo ikalanda vyangavwile ukuya ni nsansa. Ukuzumila muli vino Baibo ikalanda kwangavwile ukuya nu mutende.” Wakwe ya Meli, swensi kwene tukalumbanya Yeova uwatwamile “ukufuma umu mfinzi nu kuya umu luswepo lwakwe ulusuma.”—1 Pet. 2:9.

14. Uzye tungacita uli pakuti tutemwe sana icumi? (Lolini akambokosi kakuti “ Ivintu Vyuze Vino Tungakolanyako Icumi Icaya Muli Baibo.”)

¹⁴ Vii i vinono sile ivikulangilila vino icumi cacindama. Ukwaula nu kutwisika mungelenganyako na pali vyuze ivingi.  Uzye citange cizipe ukulonda inzila na zyuze lino mukuisambilizya Baibo pa mulandu uno tulinzile ukutemelwa icumi? Ndi cakuti twatemwa sana icumi, tulalondesya ukuzana inzila zino tungalangilamo ukuti twacitemwa.

15. Iinzila ci yonga ino tungalangilamo ukuti twatemwa icumi?

¹⁵ Tukalanga ukuti twatemwa icumi nga tukuisambilizya Baibo nu kubelenga impapulo izikalanda pali Baibo lyonsi. Asi mulandu ni myaka iyatipitapo ukufuma pano twayela umu cumi, lyonsi kwene tukalondekwa ukusambilila. Magazini ii iya Lupungu Lwa Mulinzi iyakutandikilapo yatiile: “Icumi caya kwati iluwa ilinono ilili umu mpanga ilyazingulukwa ni vikona. Pakuti mucizane nu kucikwata mulinzile ukuombesya. Mutaikalila sile umu cumi conga cino mwamanya, mwalondelezya na vyuze.” Citanguka ukuisambilizya, nomba cacindama ukucita vivyo.

16. Iinzila ci imwi ino mwazana ukuti ikaomba ningo sana? (Mapinda 2:4-6)

¹⁶ Asi swensi swemuno twatemwa ukubelenga nu kuisambilizya. Nomba Yeova akutunena ukuti twalondelezya icumi ca muli  Baibo pakuti tucuvwikisye. (Belengini Mapinda 2:4-6.) Ndi cakuti tukwika sana mano uku kucita vivyo, tukaipakizya. Umwina Koli walanzile ukuti lino akuisambilizya Baibo akaika mano uku cikomo conga na conga. Walondolwile ati: “Nkabelenga mafutunoti yonsi, ukulondelezya malembo aakuvwana ni lembo lino nkuisambilizyapo alino nu kulondelezya ivyeo na vyuze. . . . Inzila ii ikangavwa ukusambilila ivintu ivingi.” Nampo nga tukaomvya inzila ii nanti inzila zyuze, tukalanga ukuti tukataizya pa cumi lino tukupatulako insita ya kuisambilizya.—Masa. 1:1-3.

17. Uzye cikapiliula cani ukuomvya vino tukusambilila? (Yakobo 1:25)

¹⁷ Kwene, twamanya ukuti tutalinzile sile ukupelela pa kusambilila icumi. Pakuti tuipakizye tulinzile ukulondela icumi, kuli kuti ukulacita vino tukusambilila umu umi witu. Nga tukucita vivyo, icumi cilalenga tuye ni nsansa zya cumi cumi. (Belengini Yakobo 1:25.) Tungacita uli pakuti twalondela icumi? Umwina umwi watiile tungaiceceta ukulola muno tukuomba ningo na muno tulinzile ukuzifya. Umutumwa Paulo watiile: “Asi mulandu na pano twafika ukulunduluka, lekini tutwalilile ukulunduluka vikwene.”—Filipi 3:16.

18. U mulandu ci uno tulinzile ukwezezya na maka ‘ukutwalilila ukuya umu cumi’?

¹⁸ Tale elenganyini pa visuma ivikacitika ndi cakuti tukwezya na maka ‘ukutwalilila ukuya umu cumi’. Umi witu usizipilako sile, lelo tukalenga Yeova na ya kapepa yanji ukuya nu luzango. (Mapi. 27:11; 3 Yoa. 4) Ii ali milandu iyalenga tutemwe icumi nu kutwalilila ukucilondela.