CIPANDE CA KUSAMBILILAMO 33
Yeova Akasakamala Antu Yakwe
“Yawe akawaka yayo akamuyela.” —MASA. 33:18.
LWIMBO NA. 4 “Yeova U Mucemi Wane”
VINO TUMASAMBILILAPO *
1. U mulandu ci uno Yesu walengiile Yeova ukuti asakamale alondezi yakwe?
PA WANDA wa kusyalikizyako usiku lino atatala wafwa, Yesu walenzile icintu cimwi icicindame kuli Isi wa kwi yulu. Walenzile Yeova ukucingilila alondezi yakwe. (Yoa. 17:15, 20) Ukuya kwene Yeova lyonsi akasakamala nu kucingilila antu yakwe. Lelo Yesu wamanyile ukuti Satana wali nu kulacuzya sana alondezi yakwe. Yesu wamanyile nu kuti yalondekwanga Yeova ukuyazwa pakuti yacimvye Satana.
2. Ukulingana na Masamu 33:18-20, u mulandu ci uno tutalinzile ukuvwila intete ndi cakuti twaya ni ntazi?
2 Ndakai Aina Klistu ya cumi yakakwata intazi izingi umu nsi ii iikatungululwa na Satana. Tukakwata intazi izingalenga tutoovoke nupya izingezya na ucisinka witu kuli Yeova. Nomba wakwe vino tumalola mu cipande cii, tutalinzile ukutiina icili consi. Yeova akatusakamala, akalola intazi zino tukakwata nupya akalondesya ukutwazwa. Lekini tulande pa vilangililo viili ivyaya muli Baibo ivikalangilila vino Yeova akasakamala “yayo aakamuyeela.”—Belengini Masamu 33:18-20.
YEOVA AKATWAZWA LINO TUKUYUVWA UKUTI TULI SWENGA
3. A lilaci lino tungayuvwa ukuti tuli swenga?
3 Nanti cakuti twakwata aina aingi na ya nkazi umu cilongano, insita zimwi tungayuvwa ukuti tuli swenga. Acance yangayuvwa ukuti yali yonga lino yakulondolola vino yazumilamo kuli yano yakasambilila nayo nanti lino yakuukila uku cilongano cuze. Swe yamwi tungauvwa uyi nga twelenganya ukuti tulinzile ukuzizimizya intazi zya musango uu swenga sile. Tungasitooka ukunena yauze pali vino tukuyuvwa pa mulandu wakuti tukwelenganya ukuti yatamatuvwikisya. Nupya insita zimwi tungatandika nu kutwisika ndi cakuti kwaya aliwensi aakatusakamala. Asi mulandu ni cingalenga ukuti twasakamikwa, insita zimwi tungasakamikwa nu kuyuvwa ukuti kusi aliwensi aangatwazwa. Yeova asilonda ukuti twayuvwa vivyo. U mulandu ci uno twalandila vivyo?
4. U mulandu ci uno Eliya walandiile ati: “Anene mutupu nemuno nasyala penepo”?
4 Elenganyini pali vino vyacitikiiile umonsi wa utailo Eliya. Yezebele walondanga ukumukoma, fwandi utwike apa manda 40. (1 Yamw. 19:1-9) Lyene lino wali wenga umwi cele, wanenyile Yeova ukuti: “Nene nenga sile (kasesema) nasyala penepo. (1 Yamw. 19:10) Kwali ya kasesema na yauze umu mpanga iya; Obadiya wapuswisye ya kasesema 100 pakuti Yezebele atayakoma. (1 Yamw. 18:7, 13) Uzye lyene u mulandu ci uno Eliya wayuvwilile ukuti wali wenga? Uzye welenginye ukuti ya kasesema yano Obadiya wapuswisye pa nsita iya yafwa? Uzye waweni ukuti wali wenga pa mulandu wakuti antu yauze yatapepanga Yeova pamwi nawe nanti sile alino yaweni ukuti Yeova ali Leza wa cumi ukucila Baali apa mwamba wa Kalimeli? Uzye limwi wasakamiile pa mulandu wakuti antu aingi yalondanga ukumukoma nupya kusi uwamwisileko amano? Baibo italondolola vyonsi pali vino Eliya wayuvwanga. Nomba cino twamanya i cakuti Yeova wamanyile icalenganga Eliya ayuvwa vino wayuvwanga nupya wamanyile na vino wali nu kumwazwa.
Ndi cakuti tukuyuvwa ukuti tuli swenga, a masambililo ci yano tungasambilila kuli vino Yeova wazwile Eliya? (Lolini mapalaglafu 5-6)
5. Uzye Yeova walenzile uli Eliya ukusininkizya ukuti ataali wenga?
5 Yeova wazwile Eliya umu nzila izingi. Wamukomelizye ukuvwanga. Pa miku iili, uzizye Eliya ati: “Uzye i cani cino ukulonda kuno?” (1 Yamw. 19:9, 13) Lyonsi lino Eliya wamunena vino wayuvwanga, Yeova wakutikanga. Yeova waswike Eliya lino wamulangizye ukuti wali papa kwene nupya wakwata amaka. Nupya wanenyile Eliya ukuti kwali Aina Izlaeli na yauze atwalilile ukumupepa. (1 Yamw. 19:11, 12, 18) Ukwaula nu kutwisika, Eliya uvwile ningo sana ukulanda na Yeova nupya watekeziwe ukuvwa vino waswike. Yeova wapeezile Eliya imilimo iingi icindame. Wamunenyile ukupaka Azaeli ukuya umwene wa Ina Asilya, Yeu ukuya umwene wa Ina Izlaeli, na Elisya ukuya kasesema. (1 Yamw. 19:15, 16) Vino Yeova wapeezile Eliya imilimo ii vyamwazwile ukwika amano ku vintu ivicindame. Leza wamupeezile Elisya uwakuti yaombela pamwi. Uzye Yeova angamwazwa uli ndi cakuti mukuyuvwa ukuti muli mwenga?
6. I vyani vino mungapepelapo lino mukuyuvwa ukuti muli mwenga? (Masamu 62:8)
6 Yeova akalonda ukuti mwapepa kuli aliwe. Akalola intazi zino mukakwata nupya wamulaya ukuti alakutika uku mapepo inu apa nsita ili yonsi. (1 Tesa. 5:17) Akauvwa ningo ukukutika kuli ya kapepa yakwe. (Mapi. 15:8) I vyani vino mungapepelapo lino mukuyuvwa ukuti muli mwenga? Mwanena Yeova vino mukuyuvwa wakwe vino Eliya wacisile. (Belengini Masamu 62:8.) Mwamunena ivikumusakamika na vino ivintu vivyo vikulenga mwayuvwa. Mwalenga Yeova ukuti amwazwe ukumanya vino mungacita lino mukuyuvwa ukuti muli mwenga nanti lino imusoka. Ndi cakuti mukuyuvwa ukuti muli mwenga nanti limwi mukuvwa intete lino yano mukasambilila nayo yamyuzya iuzyo pali vino mwazumilamo, mwalenga Yeova ukuti amupeele amaka pakuti mulondolole vino mwazumilamo. Mungamulenga na mano pakuti mulondolole ningo vino mwazumilamo. (Luka 21:14, 15) Ndi cakuti muli nu ulanda nanti mukuvwa ukutoovoka, mungalenga Yeova ukuti amwazwe ukulanda nu Mwina Klistu uwakula muli vyakwe Leza apa ntazi ino mukweti. Mungalenga Yeova ukwazwa wino mukuya umu kulondolwela intazi ino mukweti ukuti auvwikisye. Mwanena Yeova vyonsi vino mukuyuvwa. Mwalola vino akwasuka mapepo inu, nupya mwazumila lino yauze yakulonda ukumwazwa; mulata ukuyuvwa ukuti mwaya mwenga lyonsi.
Uzye mukulonda inzila zya kulundulwilamo umulimo wa kusimikila lino mukuombela pamwi na yauze? (Lolini mapalaglafu 7)
7. I vyani vino mwasambililako kuli vino vyacitikiile umwina umwi?
7 Swensi kwene Yeova watupeela imilimo icindame iya kuomba. Mungasininkizya ukuti akalola nupya akataizya pali vino mukaombesya umu cilongano nu mu mulimo wa kusimikila. (Masa. 110:3) Uzye ukuya apamviwe mu mulimo uu kungamwazwa uli lino mukuyuvwa ukuti muli mwenga? Lolini ivyacitikiile umwina umwi uwacance. Lino papisile sile insita inono ukufuma pano umwina wii wabatiziwilwe, cuzakwe wino yatemwanine sana watandike ukufuma umu cumi panono panono. Watiile: “Lino naweni umunji wasya Yeova, natandike ukuitwisika. Natwisikanga ndi cakuti nali nu kufikilizya umulapo uno nalafile uwa kuombela Yeova nu kutwalilila ukuya mu lupwa lwakwe. Nayuvwile ukuti nali nenga nupya nelenganyanga ukuti kusi aliwensi aanganguvwikisya.” I cani icavwile umwina wii? Walanzile ukuti: “Natandike ukuombesya umu mulimo wa kusimikila. Ukucita vivyo kwangazwile ukuta ukwelenganya sile pali nemwineco na pali vino nayuvwanga. Nayanga ni nsansa nupya ntayuvwanga ukuti indi nenga ndi cakuti nkuombela pamwi na yauze umu mulimo wa kusimikila.” Nanti icakuti tutanga tusimikile pamwi na ya kapepa yanji wakwe vino cali mpiti, tungakomelezyanya lino tukusimikila ukuomvya makalata na mafoni. I cani cuze icavwile umwina wii? Walanzile nu kuti: “Naombesyanga ndi cakuti yampeela imilimo pa cilongano. Napekanyanga ningo nga yampeela ilyasi lya asambi. Imilimo ii yalenganga nayuvwa ukuti nacindama kuli Yeova alino na kuli yauze.”
YEOVA AKATWAZWA NDI CAKUTI TWATOOVOKA PA MULANDU NI NTAZI ZIPISYE
8. Uzye intazi zipisye zingalenga twayuvwa uli?
8 Tukaenekela ukulakwata intazi umu manda yaa akusyalikizya. (2 Tim. 3:1) Nomba insita zimwi tungazunguka ndi cakuti twakwata intazi iyaula ukwenekela. Limwi tungakwata intazi ya kuulizya impiya, ya dokota yangatunena ukuti itukwata ulwale uwipisye nanti limwi tungafwilwa wino twatemwa. Pa nsita iyo tungauvwa sana ulanda nu kusakamikwa sana sana ndi cakuti intazi zizyo zikucitika umu kukonkana, nanti ndi cakuti zyacitikila pamwi. Mwaiusya ukuti Yeova akatusakamala nupya angatwazwa ukuya asipe nu kucimvya intazi ili yonsi ino tungakwata.
9. Londololini intazi zimwi zino Yobo wakweti.
9 Elenganyini pali vino Yeova wavwile umonsi wa utailo Yobo. Wakweti intazi izingi izyacitike umu nsita sile inono. Umu wanda sile onga, Yobo yamunenyile ukuti yivile iviteekwa vyakwe nanti ukuvikoma, nu kuti aomvi yakwe na ana yakwe nayo kwene yakomilwe. (Yobo 1:13-19) Lino acili akulosya, Yobo wizile alwala ulwale uwipisye. (Yobo 2:7) Intazi zino wakweti zipiisye sana icakuti walanzile nu kuti: “Nemo napata umi wane; nsilonda ukwikalilila pano nsi.”—Yobo 7:16.
Yeova akunena Yobo pali vino akasakamala vyonsi vino waumba pakuti Yobo asininkizye ukuti wamutemwa nupya alatwalilila ukumusakamala (Lolini palaglafu 10)
10. Uzye Yeova wapeezile uli Yobo vino walondekwanga pakuti azizimizye intazi? (Lolini cikope icili pa nkupo.)
10 Yeova walolanga ivyacitikilanga Yobo. Pa mulandu wakuti Yeova watemilwe Yobo, wamupeezile vyonsi vino walondekwanga pakuti atwalilile ukuya uwa cisinka. Yeova walanzile na Yobo, ukumwiusya pa mano yano wakwata na pali vino akasakamala iviumbwa vyakwe. Walanzile pa nyama izingi izyapangwa umu kuzunguka. (Yobo 38:1, 2; 39:9, 13, 19, 27; 40:15; 41:1, 2) Yeova nupya waomvizye Eliu ukukomelezya nu kuteekezya Yobo. Eliu wamunenyile ukuti Yeova lyonsi akapaala ya kapepa yakwe pali vino yakazizimizya. Nupya Yeova waomvizye Eliu ukukalipila Yobo. Eliu wazwile Yobo ukwika mano ku vintu ivicindame lino wamwiwisyeko ukuti twacepa sana ngu kuilinganya kuli Yeova Kaumba wi yulu ni nsi. (Yobo 37:14) Nupya Yeova wapeezile Yobo umulimo; wamunenyile ukupepelako auze yatatu ayembwike. (Yobo 42:8-10) Uzye Yeova akatwazwa uli nga twakwata intazi ndakai?
11. Uzye Baibo ikatwazwa uli nga twakwata intazi?
11 Yeova asilanda naswe umu kulungatika wakwe vino cali kuli Yobo, lelo akacita vivyo ukuomvya Izwi lyakwe, Baibo. (Loma 15:4) Vino watulaya ukuti ivintu vilazipa uku nkoleelo, vikatuteekezya. Lekini tulande pa vintu vimwi ivinono sile ivyaya muli Baibo ivingatuteekezya nga twakwata intazi. Yeova watunena umu Malembo ukuti kusi ivili vyonsi, nanti sile intazi zipisye “vilalenga Leza ate ukututemwa.” (Loma 8:38, 39) Akatunena nu kuti “wene waya umupipi kuli yonsi aakakuta kunoli” umwi pepo. (Masa. 145:18) Yeova watunena ukuti tungazizimizya intazi ili yonsi ndi cakuti twamutaila, nupya tungaya ni nsansa nanti cakuti tukucuula. (1 Kol. 10:13; Yako. 1:2, 12) Izwi lyakwe Leza likatwiusyako ukuti intazi zino tukakwata i zya pa kasita sile kanono ngu kuzilinganya uku cilambu cino tulapokelela uku nkoleelo. (2 Kol. 4:16-18) Yeova watulaya ukuti alafumyapo iviipe vyonsi vino Satana ciwa na yayo aakamutungilila yaleta. (Masa. 37:10) Uzye imwiusyako ivipande vimwi ivya muli Baibo ivingamwazwa ukuzizimizya intazi zino mungakwata uku nkoleelo?
12. I vyani vino Yeova akalonda twacita pakuti twaipakizya ivyaya umwi Izwi lyakwe?
12 Yeova akalonda twapatulako insita ya kubelenga Baibo lyonsi nu kwelenganya pali vino twabelenga. Nga tukuomvya vino tukusambilila, utailo witu ukakomelako nupya tukapalama sana kuli Tata witu uwa kwi yulu. Na cico cikalenga tukwate amaka ya kucimvya intazi. Yeova akapeela umupasi wakwe uwa muzilo kuli yayo aakataila sana Izwi lyakwe. Nupya umupasi kwene uwo ungatupeela “amaka acila amaka ya antu” aangatwazwa ukuzizimizya intazi ili yonsi.—2 Kol. 4:7-10.
13. Uzye ivyeo ivikalanda pali Baibo vino “muomvi mutailwe nupya uwa mano” akatupekanyizizya vikatwazwa uli ukuzizimizya intazi?
13 Pa mulandu nu kwazwa kwakwe Yeova, umuomvi mutailwe nupya uwa mano akapekanya ivipande ivingi, amavidyo ni nyimbo ivikatwazwa ukukomya utailo witu nu kupalama sana kuli Yeova. (Mate. 24:45) Tulinzile ukulaomvya vyonsi vino Yeova akatupekanyizizya. Likwene sile, nkazi umwi aakaikala uku United States walanzile ukuti akataizya sana pa vyeo vyonsi ivikatwazwa muli ukapepa. Walanzile nu kuti: “Pa myaka 40 yonsi ino imbombela Yeova, utailo wane weziwa pa miku iingi.” Wakweti intazi zipisye, ya isikulu yayapunsile kuli kapisya wakwe motoka uwali umukoleke, avyazi yakwe yafwile nu ulwale uwipisye, nupya wacuzile ku ulwale wakwe kansa pa miku iili. I cani camwavwile ukuzizimizya? Watiile: “Lyonsi Yeova wansakamalanga. Ivyeo vino Yeova akatupekanyizizya ukupitila mu muomvi mutailwe nupya uwa mano vyangazwa ukuzizimizya. Pa mulandu ni vyeo kwene vii, nkayuvwa wakwe vino Yobo wayuvwile lino walanzile ukuti: “Ntalatala inte ukuvwanga ukuti nene muntu umwi uwa kaele.”—Yobo 27:5.
Tungacita uli pakuti twaazwa amu cilongano? (Lolini palaglafu 14)
14. Uzye Yeova akaomvya uli aina na ya nkazi ukutwazwa ukuzizimizya intazi? (1 Tesalonika 4:9)
14 Yeova wasambilizya antu yakwe ukutemwana nu kukomelezyanya lino yakwata intazi. (2 Kol. 1:3, 4; belengini 1 Tesalonika 4:9.) Aina na ya nkazi yakakolanya Eliu lino yakulonda ukutwazwa ukutwalilila ukuya nu utailo ukome lino twakwata intazi. (Mili. 14:22) Elenganyini pali vino amu cilongano yakomelizye ya Diana nu kuyazwa ukupalama kuli Yeova lino ya iya yalwile ulwale uwipisye. Yatiile: “Catazile sana. Nomba twaweni vino Yeova watusakamiile lino twakweti intazi zii zipisye. Amu cilongano yatwazwile sana. Vino yatutandalilanga, ukututumila mafoni nu kutukuukula vyalenzile tuzizimizye. Pa mulandu wakuti ntamanya ukupisya motoka, aina na ya nkazi yasininkizyanga ukuti yatutwala umu kulongana nu mu mulimo wa kusimikila.” Twaya sana ni nsansa pa kukwata aina na ya nkazi umu cilongano aaya sana nu kutemwa!
TUKATAIZYA SANA PALI VINO YEOVA AKATUSAKAMLA
15. U mulandu ci uno twasininkizizya ukuti tungazizimizya intazi?
15 Swensi kwene tukakwata intazi zimwi. Nomba wakwe vino itusambilila, tutanga tucimvye intazi zizyo swenga. Wakwe Isi uwaya nu kutemwa, Yeova lyonsi akatusakamala. Akaya umupipi naswe nupya waiteyanya ukutwazwa. (Eza. 43:2) Twasininkizya ukuti tungazizimizya intazi pa mulandu wakuti watupeela vyonsi vino tukalondekwa pakuti tuzizimizye. Watupeela upe wa kupepa, Baibo, impapulo izingi zikalanda pali Baibo na ina itu na ya nkazi aakatwazwa lino tukulondekwa uwazwilizyo.
16. Tungacita uli pakuti Yeova atwalilile ukutusakamala?
16 Tukataizya sana pa kukwata Tata witu uwa kwi yulu aakatusakamala. “Muli aliwe umwaya insansa zitu.” (Masa. 33:21) Tukalanga Yeova ukuti tukataizya pali vino akatusakamala ndi cakuti tukuomvya vyonsi vino akatupeela uku kutwazwa. Nupya tukalonda ukucita vyonsi vino tungacita pakuti Leza atwalilile ukutusakamala. Mu mazwi yauze tungati nga twatwalilila ukuvwila Yeova nu kucita ivisuma, alatwalilila ukutusakamala amanda pe!—1 Pet. 3:12.
LWIMBO NA. 30 A Tata, Leza Wane Nupya Cuza Wane
^ Tukalondekwa ukuti Yeova atwazwe pakuti tucimvye intazi zino tukakwata ndakai. Cipande cii cimatwiusyako ukuti Yeova akasakamala antu yakwe. Akaika mano ku ntazi zino cila muntu akakwata, nupya akatupeela ivikalondekwa pakuti tucimvye intazi zizyo.