CIPANDE CA KUSAMBILILAMO 40
‘Kusambilizya Antu Avule Ukucita Ivisuma’
“Yayo asambilizya antu avule ukucita ivisuma yalaengesa wa ntanda amanda pe.”—DAN. 12:3.
LWIMBO NA. 151 Alayama
VINO TUMASAMBILILAPO *
1. I visuma ci vilacitika umu Kuteeka Kwa Myaka 1,000?
UWANDA uno ukutuutululwa kulatandika pano nsi ulazipa sana umu Kuteeka Kwa Myaka 1,000 Kwakwe Klistu. Yonsi aafwilwa atemwikwa yao yakalondesya ukuyalola nupya. Vikwene a vino na Yeova akayuvwa. (Yobo 14:15) Elenganyini vino antu yonsi aalaya pano nsi yalaya ni nsansa lino yalalola atemwikwa yao yatuutululwa. Wakwe vino twasambilile umu cipande icafumako, alungame yano mazina yao yalembwa umwi buku lya umi “yalatuutulukila uku umi.” (Mili. 24:15; Yoa. 5:29) Limwi atemwikwa itu aingi yalatuutululwa pa cisila sile cakwe Amagedoni. * Lyene asi alungame, wakwe yayo aatakweti isyuko lya kusambilila pali Yeova nanti ukumuombela na ucisinka lino yatatala yafwa, “yalatuutulukila uku upinguzi.”
2-3. (a) Wakwe vino Ezaya 11:9, 10 ikalanda, u mulimo ci ukalamba uulaombwa uutatala waombwapo? (b) I vyani vino tumasambilila umu cipande cii?
2 Yonsi aalatuutululwa yalalondekwa ukusambiliziwa. (Eza. 26:9; 61:11) Fwandi mulimo ukalamba uwa kusambilizya uutatala wayako ulalondekwa ukuombwa. (Belengini Ezaya 11:9, 10.) U mulandu ci? Umulandu onga u wakuti, asi yalungame aalatuutululwa yalalondekwa ukusambilila pali Yesu Klistu, pa Wene Wakwe Leza, api lambo lyakwe Yesu, pa mulandu uno izina lyakwe Leza lyacindamila alino na pa mulandu uno aliwe sile uwalinga ukuteeka. Na alungame kwene yalalondekwa ukusambilila pali vino Yeova watwalilila ukusambilizya antu yakwe pali vino akalonda ukucita pano nsi. Yamwi pa antu yayo aali ni cisinka yafwile mpiti sana ala na Baibo atatala wasila ukulembwa. Yonsi kwene alungame na asi yalungame yalalondekwa ukusambilila ivintu ivingi.
3 Umu cipande cii tumalanda pa mauzyo yaa: Uzye umulimo uu uwa kusambilizya ulaombwa uli? Uzye vino antu yalacita ndi cakuti yasambilila vilalanga uli ukuti mazina yao yalinzile ukutwalilila ukuya umwi buku lya umi nanti foo? Mauzyo yaa iyacindama sana ukuyuzya ndakai. Wakwe vino tumalola mausesemo yamwi acindame aalembwa umwi buku lyakwe Danieli ni lya kusokolola, yamatwazwa ukuvwikisya ivilacitika lino afwe yalatuutululwa. Lekini tutandikilepo ukulanda pali vimwi ivilacitika ivyasoowilwe pali Danieli 12:1, 2.
“AFWA MPITI YALAZYUKUKA”
4-5. I vyani vino ilembo lyakwe Danieli 12:1 likasokolola pali vino vilacitika umu nsita ya mpela?
4 Belengini Danieli 12:1. Ibuku lyakwe Danieli likatusokolwela vino ivilacitika umu nsita ya mpela vilakonkana. Wakwe, Danieli 12:1 ikatusokolwela ukuti Mikaeli kuli kuti Yesu Klistu “akacingilila antu yako [Leza].” Ciputulwa ca kutandikilako ica usesemo uu catandike ukufikiliziwa umu 1914 lino Yesu wasonsilwe ukuya Umwene wa Wene Wakwe Leza ukwi yulu.
5 Nomba Danieli yamunenyile nu kuti Yesu wali nu kuloleka mu “nsita ya macuzi, iipisye wakwe cimwi ino itatazile iyako ukufuma sile ku kutandika kwa nko ukufika na pilelo kwene.” “Insita ya macuzi” ii “uucuzi ukalamba” uwalandwapo pali Mateo 24:21. Yesu alaloleka nanti kucitapo vimwi pakuti akacingilile antu yakwe Leza umu nsita ya mpela iya macuzi kuli kuti pa Amagedoni. Ibuku lya Kusokolola likalondolola iumba lii ukuti iumba ilikalamba ililapusuka ukufuma “umu ucuzi ukalamba.”—Kuso. 7:9, 14.
6. I vyani vilacitika pa cisila cakuti iumba ilikalamba lyapusuka ucuzi ukalamba? Londololini. (Lolini ni cipande icakuti “Mauzyo Yano Aakabelenga Yakauzya” icili muli magazini kwene wii icikulanda pa kutuutulukila uku umi pano nsi.)
6 Belengini Danieli 12:2. I vyani vilacitika pa cisila cakuti iumba ilikalamba lyapusuka insita ii ya macuzi? Mpiti, twelenganyanga ukuti ilembo lyakwe Danieli 12:2 likalozya uku kutuutulukila ukwi yulu nanti kuli vino umulimo wa kusimikila waomvilwe sana pa cisila lino yalondanga ukulesya umulimo witu umu 1918. * Nomba twalola ukuti amazwi yaa yakalozya uku kutuutululwa kwa yafwe ukulacitika umu nsi ipya. Ukutuutululwa kuu ukulacitika pa cisila ca manda akusyalikizya na pa cisila ca nkondo ya Amagedoni.
7. (a) U mu nzila ci muno yamwi yalatuutulukila “uku umi wa pe”? (b) U mulandu ci uno tungalandila ukuti ukutuutuluka kuu kulaya ningo ukucila ukwaliko mpiti?
7 Uzye ilembo lyakwe Danieli 12:2 likalozya mwi lino likalanda ukuti yamwi yalatuutulukila “uku umi wa pe”? Likalozya umukuti, yayo aalatuutululwa nu kumanya Leza na Yesu, nanti ukutwalilila ukuyamanya nu kuyuvwila umu myaka 1,000 yalapokelela umi wa pe. (Yoa. 17:3) Yano yalatuutululwa pa nsita ii yene yalatuutululwa ningo ukucila yaya aatuutulwilwe uku cisila. (Aeb. 11:35) U mulandu ci? A pa mulandu wakuti aatuutulwilwe mpiti izile iyafwa nupya.
8. Uzye yauze yalatuutulukila uli uku “kupupana kwa pee”?
8 Nomba asi yonsi aalatuutululwa alazumila ukusambiliziwa na Yeova. Usesemo wakwe Danieli ukulanda ukuti yamwi yalatuutulukila uku “kupupana kwa pee.” Pa mulandu wakuti yalalangilila ukuti aacipondoka, mazina yao yatalalembwa umwi buku lya umi nupya yatalapokelela umi wa pe. Lelo yalapokelela “ukupupana kwa pee” nanti ukononwa. Fwandi ilembo lyakwe Danieli 12:2 likulanda pali vino vilacitikila yayo aalatuutululwa ukulingana na vino yalacita pa cisila ca kutuutululwa. * (Kuso. 20:12) Yamwi yalaya nu umi wa pe yauze foo.
‘KUSAMBILIZYA ANTU AVULE UKUCITA IVISUMA’
9-10. I vyani vyuze ivilacitika pa cisila ca ucuzi ukalamba, nupya aaweni yano “yalaengesa wakuswepa kwa mwiyulu”?
9 Belengini Danieli 12:3. I vyani vyuze ivilacitika pa cisila ca “nsita ya macuzi”? Ukulunda pali vino Danieli 12:2 ikalanda, cikomo 3 cikalanda na pali vyuze ivilacitika pa cisila ca ucuzi ukalamba.
10 Aaweni yano “yalaengesa wakuswepa kwa mwiyulu”? Pali Mateo 13:43 pakatwazwa ukumanya antu yayo, pakati: “Pa nsita iiya aalungami yalaengesa wi lanzi mu Wene wakwe Isi uwa kwi yulu.” Umu mazwi yaa, Yesu walandanga pa “aana ya mu Wene” kuli kuti aina yakwe apakwe aalaombela pamwi nawe umu Wene wa kwi yulu. (Mate. 13:38) Fwandi Danieli 12:3 ifwile ikalozya uku yapakwe nu mulimo uno yalaomba umu Kuteeka Kwa Myaka 1,000.
Ya 144,000 yalaombela sana pamwi na Yesu Klistu ukutungulula umulimo wa kusambilizya uulaombwa pano nsi umu myaka 1,000 (Lolini palaglafu 11)
11-12. I milimo ci uno ya 144,000 yalaomba umu myaka 1,000?
11 Uzye apakwe yalasambilizya uli “antu avule ukucita ivisuma”? Apakwe yalaombela sana pamwi na Yesu Klistu ukutungulula umulimo wa kusambilizya uulaombwa pano nsi umu myaka 1,000. Ya 144,000 yatalaya sile aene lelo yalaya na ya simapepo. (Kuso. 1:6; 5:10; 20:6) Fwandi yalaombako nu mulimo wa “kupozya antu amu nko” nupya yalazwa antu ukuya amalilike panono panono. (Kuso. 22:1, 2; Ezek. 47:12) Apakwe yaluvwa ningo sana ukuombako imilimo yonsi ii.
12 Aaweni alaya pa “antu avule” aalasambiliziwa ukucita ivisuma? Palaya yayo aalatuutululwa, aalapusuka pa Amagedoni alino na ana aalavyalwa umu nsi ipya. Lino imyaka 1,000 ilasila, yonsi aalaya pano nsi yalamalilika. A lilaci fwandi lino mazina yao yalalembwa na peni ukucila ukulembwa na penso?
UWEZYO WA KUSYALIKIZYAKO
13-14. I vyani vino antu yonsi aamalilike alaya pano nsi yalalondekwa ukucita pakuti yaye nu umi wa pe?
13 Tulinzile ukwiusya ukuti ukuya umumalilike cisipiliula ukuti ala muntu alaya nu umi wa pe. Elenganyini pali Adamu na Eva. Yali amalilike, lelo yalondekwanga ukulangilila ukuti yali ni cuvwila kuli Yeova Leza lino atatala wayapeela umi wa pe. Ica ulanda i cakuti yafizilwe ukumuvwila.—Loma 5:12.
14 I vyani vilacitikila yonsi aalaya pano nsi pa cisila ca myaka 1,000? Yonsi yalaya aamalilike. Uzye yonsi aalaya amalilike yalatungilila ukateeka wakwe Yeova manda pe? Nanti limwi yamwi yalaya wakwe Adamu na Eva aafizilwe ukuya acisinka nanti cakuti yali aamalilike? Mauzyo yaa yalinzile ukwasukwa, nomba yamaasukwa uli?
15-16. (a) A lilaci lino antu yonsi yalakwata isyuko lya kulanga ucisinka wao kuli Yeova? (b) I vyani vilacitika pa cisila ca wezyo wa kusyalikizyako?
15 Satana alanyepwa pa myaka 1,000. Pa nsita iyo, atalakwata maka ya kuponzya aliwensi. Nomba imyaka 1,000 nga yasila yalamusapula. Lyene alalondesya ukuponzya antu aamalilike. Pa nsita iyo, antu yonsi aamalilike aalaya pano nsi yalakwata isyuko lya kulanga ndi cakuti yakacindika izina lyakwe Leza nupya yakatungilila ukateeka wakwe. (Kuso. 20:7-10) Vino yalacita pa nsita iya, vilalanga ndi cakuti yalalembwa umwi buku lya umi amanda pe nanti foo.
16 Baibo ikatunena ukuti antu yamwi yalaya wakwe Adamu na Eva aatali na ucisinka nupya yalakana ukuteekwa na Yeova. I vyani vilayacitikila? Ibuku lya Kusokolola 20:15 likatunena ukuti: “Wensi uwazanyilwe ukuti atalemvilwe umwi buku lya umi, wasumbiilwe muli yemba wa moto.” Fwandi ya cipondoka yonsi yalononwa manda pe. Nomba antu aingi aamalilike yalakwanisya ukucimvya uwezyo uu uwa kusyalikizya. Amazina yao yalalembwa umwi buku lya umi amanda pe.
IVILACITIKA UMU NSITA YA MPELA
17. I vyani vino malaika wanenyile Danieli ukuti i vilacitika umu manda itu? (Danieli 12:4, 8-10)
17 Tukauvwa ningo sana ukwelenganya pa vintu ivilacitika uku nkoleelo. Nomba Danieli wapokeliile ivyeo na vyuze ukufuma kuli malaika ivyalandanga pa vilacitika umu nsita itu kuli kuti umu nsita ya mpela. (Belengini Danieli 12:4, 8-10; 2 Tim. 3:1-5) Malaika wanenyile Danieli ati: ‘Antu avule yalezya ukumanya ivikucitika.’ Antu yakwe Leza sile aliyo yali nu kuvwikisya muno amazwi yaa yano Danieli walemvile yalozyanga. Malaika walanzile nu kuti umu nsita iya “yayo akacita vyaukakasi yatalasangululwa, lelo yalatwalilila ukuya aukakasi. Kusi nanti wenga muli yayo akacita vya ukakasi wino aliiluka.”
18. I vyani vyasya vicitikile antu aakacita iviipe?
18 Ndakai cingaloleka kwati aipe yasifululwa pa viipe vino yakacita. (Malaki 3:14, 15) Likwene sile Yesu wasya apingule antu aya wa mbuzi nu kuyapaatula uku yantu aya wa mfwele. (Mate. 25:31-33) Antu yaa aipe yatalapusuka ucuzi ukalamba nanti ukutuutululwa kuti yakikale umu nsi ipya. Mazina yao yatalazanwa umu “lupapulo lwa ciusizyo” ulwalandwapo pali Malaki 3:16.
19. I vyani vino tulinzile ukucita ndakai, nupya u mulandu ci? (Malaki 3:16-18)
19 Ii ali nsita ya kulanga ukuti tutaya pa antu aakacita iviipe. (Belengini Malaki 3:16-18.) Ndakai Yeova akulonganika antu aacindama sana kuli aliwe. Kwaula nu kutwisika tukalondekwa ukuya pa antu yayo.
Tulatemwa sana ukulola Danieli, atemwikwa itu aafwa alino na yauze aingi ‘yazyukuka uku kupokelelela ica upyanyi’ cao umu nsi ipya! (Lolini palaglafu 20)
20. Uulayo ci uwa kusyalikizya uno yalavile Danieli, nupya u mulandu ci uno mukalondesya ukuti uwanda uno ulayo uwo ulafikiliziwa ukafike?
20 Tukwikala umu nsita ino ivintu ivingi vikucitika. Nomba kuli na vyuze ivingi sana ivili nu kucitika likwene. Likwene sile tulalola kuno aipe yonsi yakononwa. Pa cisila cakwe vivyo, tulalola kuno ulayo uno Yeova walavile Danieli ukufikiliziwa uwakuti: “Apa mpela ya nsita ulazyukuka kuti upokelele caupyanyi cako.” (Dan. 12:13) Uzye mukalondesya ukuti uwanda uno Danieli na aatemwikwa inu ‘yalazyukuka’ ukafike? Nga avino cili mwaezya na maka ndakai ukuya aacisinka kuli Yeova, nga mwacita vivyo mulasininkizya ukuti izina linu lilalembwa umwi buku lyakwe Yeova ilya umi.
LWIMBO NA. 80 ‘Muyuvwile Mweisikulu Usuma Wakwe Yeova’
^ Icipande cii cikulanda pa kusenuka pali vino twamanyile pa mulimo ukalamba uwa kusambilizya uwalondololwa pali Danieli 12:2, 3. Tumalanda pali lino umulimo uu ulaombwa alino na alaombako. Nupya tumalola na vino umulimo kwene uu uwa kusambilizya ulapekanyizizya antu aalaya pano nsi uku wezyo wa kusyalikizyako uulayako pa mpela ya Myaka 1,000 Iya Kuteeka Kwakwe Klistu.
^ Limwi ukutuutululwa kulatandikilapo na yayo aafwile ni cisinka umu manda ya kusyalikizya alino pakalondelele yayo aatandikilepo ukufwa pali aliyo. Ndi cakuti avino cilaya, ale yonsi yalakwata isyuko lya kupokelela aatemwikwa yao afwa. Asi mulandu na vino cilaya, Malembo yakalanda pa kutuutulwilwa ukwi yulu ukuti “cila muntu alatuutululwa pa nsita yakwe” fwandi tungasininkizya ukuti na pano nsi kwene avino cilaya.—1 Kol. 14:33; 15:23.
^ Ulondolozi uu, u kusenuka pali vino twamanyile ivyaya umwi buku lyakuti Mwaika Mano Uku Usesemo Wakwe Danieli! umu cipande 17, nu mu Lupungu Lwa Mulinzi lwakwe Julai 1, 1987 apa mafwa 21-25.
^ Amazwi yakuti “alungame na asi alungame” aakazanwa pa Milimo 24:15 alino na mazwi yakuti “aacitanga ivisuma” na akuti “acitanga iviipe” aya pali Yoani 5:29 yakalanda sana pa miyele ino yayo aalatuutululwa yakweti lino yatatala yafwa.
