Lolini vino Baibo ikaasuka mauzyo yaa.

Milimo 24:15 ikatunena ukuti kulaya “ukutuutuluka kwa yantu alungame na asi alungame.” Alungame a yayo yano yuvwilanga Leza lino yatatala yafwa, fwandi mazina yao yalembwa umwi buku lya umi. (Malaki 3:16) Aasi yalungame a yayo aafwile ukwaula ukusambilila pali Yeova, fwandi mazina yao yatalembwa umwi buku lya umi.

Yoani 5:28, 29 ikalozya uku maumba yoili kwene aalandwapo pa Milimo 24:15. Yesu watiile “aacitanga ivisuma yalatuutulukila uku umi, na acitanga iviipe yalatuutulukila uku upinguzi.” Alungame yacitanga ivisuma lino yatatala yafwa. Yalatuutulukila uku umi pa mulandu wakuti mazina yao yatwalilila ukuya umwi buku lya umi. Lelo aasi yalungame yacitanga iviipe lino yatatala yafwa. Yalatuutulukila uku upinguzi. Mazina yao yatatala yalembwa umwi buku lya umi, nupya nga yatuutululwa Yesu alayaceeceta nu kulola vino yalacita pakuti mazina yao yakalembwe umwi buku lii. Pa nsita iyo yalakwata isyuko lya kusambilila pali Yeova nupya mazina yao yalalembwa umwi buku lya umi.

Kusokolola 20:12, 13 ikalondolola ukuti yonsi aalatuutululwa yalalondekwa ukuvwila ‘ivilalembwa umu mpapulo’ kuli kuti masunde apya yano Leza alatupeela umu nsi ipya. Yayo aataluvwila masunde yayo yalononwa.—Eza. 65:20.

Danieli 12:2 yasoowile ukuti yamwi aafwa yalatuutulukila uku “umi wa pee, yamwi nayo ku kupupana kwa pee.” Cikomo cii cikalanda pa vilacitikila yayo aalatuutululwa kuli kuti yamwi yalatuutulukila uku “umi wa pee” yauze nayo uku “kupupana kwa pee.” Fwandi pa cisila ca myaka 1,000, yamwi yalaya nu umi wa pe yauze nayo yalononwa manda pe.—Kuso. 20:15; 21:3, 4.

Elenganyini pa cilangililo cii. Ivilacitikila amu maumba yonsi yoili aalatuutululwa tungavikolanya kuli vino cikaya ndi cakuti umuntu akufuma uku mpanga yuze akuya umu kwikala uku mpanga yuze. Alungame yaya kwati a yaya yano uteeko ukapeela icipepala ca kuyazumilizizyapo ukuomba nanti ukwikala umu mpanga iyo pakuti yamanyikwe nu kuya nu untungwa. Nomba aasi yalungame yaya kwati aayaya aatiyafuma uku mpanga yuze yano iyapeela ivipepala vya kwikalila nanti ukutandala umu mpanga ino iyayako pa nsita inono. Fwandi asi yalungame aalatuutululwa yalalondekwa ukuvwila masunde yakwe Yeova nu kulanga ukuti aalungame pakuti yakatwalilile ukwikala umu Paladaise. Asi mulandu ni vipepala vino uteeko watiupeela umwi pa kwingila umu mpanga yuze, yamwi yakaiza iyayazumilizya ukwikalilila umu mpanga iyo yauze nayo iyayanena ukuswilila uku mwao. Ivikalenga yayanene ndi cakuti yalinzile ukwikalilila nanti ukuswililamo, i miyele ni vicitwa vyao lino yali uku mpanga yuze. Vikwene avino cilaya kuli yayo aalatuutululwa, yalapingulwa ukulingana nu utailo wao ni miyele yao umu nsi ipya.

Yeova Leza waya nu kutemwa nupya waya nu mulinganya. (Malan. 32:4; Masa. 33:5) Alalanga ukutemwa lino aalatuutulula yonsi aalungame na asi yalungame. Nomba alaenekela yonsi kwene ukuvwila masunde yakwe aakalanda pa viipe ni visuma. Yayo sile alamutemwa nu kuvwila masunde yakwe aalatwalilila ukwikala umu nsi ipya.