Ukulingana na 1 Kolinto 15:8, Paulo watiile: “Pa kusyalikizya walolekiile na kuli nene nemuno naya wa mwana uwavyalwa lino insita itali ifike.” Mpiti twalondololanga ukuti Paulo afwile walozyanga kuli vino vyamucitikiile lino waweni icilolwa ala Yesu ali nu lulumbi lwa kwi yulu. Cali kwati wapeelwa isyuko lya kuvyalwa nanti ukutuutuluka umu mupasi lino insita ya kutuutuluka kuko itatala yafika. Nomba pa cisila ca kusambilila sana pa cikomo cii, twazanyile ukuti tulinzile ukusenula ulondolozi wa cikomo cii.

I cacumi Paulo api lembo lii walandanga pali vino vyacitike lino wasenwike. Nomba aemwi muno walozizye lino walanzile ukuti wali “wa mwana uwavyalwa lino insita itali ifike”? Kwaya ivintu ivingi vino walozizyeko?

Ukusenuka kwakwe kwacitike zuwa sana nupya kwali u kwakutiinya. Kapopo kakavyalwa ukwaula ukwenekela. Lino Saulo (wino izile iyatandika ukwama ati Paulo) wayanga uku Damasika umu kucuzya Aina Klistu, atenekelanga ukulola icilolwa icalanganga Yesu ala watuutululwa. Lino Paulo wasenwike, asi aliwe sile uwazungwike lelo na Ina Klistu kwene yano walondanga ukuya umu kucuzya umu musumba uu yazungwike sana. Nupya, ivyacitike vyali ivyakutiinya icakuti watiile nu kulola pa nsita imwi.—Mili. 9:1-9, 17-19.

Wasenwike pa “nsita itaali ningo.” Izwi lya Cigiliki ilyasenulwa ukuti kuvyalwa “lino insita itali ifike” lingasenulwa nu kuti “kuvyalwa apa nsita isi ningo.” Ibuku lyakuti The Jerusalem Bible lyatiile: “Cali kwati navyalwa apa nsita ino kusi nanti umwi uwenekelanga.” Lino Paulo wasenukanga ala Yesu waswilila mpiti ukwi yulu. Ukupusanako na yano Paulo walanzilepo umu vikomo ivyafumako wene ataweniko kuno Yesu uwatuutulwilwe waswililanga ukwi yulu. (1 Kol. 15:4-8) Vino Yesu walolekiile kuli Paulo ukwaula ukwenekela calenzile akwate isyuko lya kulola Yesu pa cisila ca kutuutululwa nanti cakuti calolike ukuti pali a “pa nsita itaali ningo.”

Waicefizye lino walandanga amazwi yaa pa mwineco. Ukulingana na asambilila yamwi, amazwi yano Paulo waomvizye yanguvwika kwati Paulo wainenolanga. Nga avino cali, ale Paulo walozyanga umu kuti atalinzile ukupeelwa isyuko lino wapeezilwe. Nupya walanzile nu kuti: “Nene nacepesya pa yatumwa, nupya ntalinga ukwamwa umutumwa, pano nacuzizye icilongano cakwe Leza. Lelo naya vii pa mulandu ni cikuuku cikulu cakwe Leza.”—1 Kol. 15:9, 10.

Nomba cikaloleka kwati Paulo walozyanga kuli vino Yesu walolekiile kuli aliwe zuwa zuwa nupya ukwaula ukwenekela, vino wasenwike pa nsita ino atenekelanga nanti ukuti atalinzile ukusokolwelwa ivintu vino wasokolwelilwe. Asi mulandu na vino walandangapo, ivyacitike vyacindime sana kuli aliwe. Calenzile aisininkizizye umwineco ukuti Yesu watuutulwilwe. Ali mulandu uno ilingi walandilanga sana pali vino vyamucitikiile ukwaula ukwenekela nga akusimikila yauze pa kutuutululwa kwakwe Yesu.—Mili. 22:6-11; 26:13-18.