“MWANACI.” Vikwene avino Yesu wamanga ya mama yamwi. Wakwe lino wapozizye umuntu umwi umulemale uwakongozanga pa myaka 18, walanzile ati: “Mwanaci we, wakululwa ku ndwala yako.” (Luka 13:10-13) Yesu nupya waomvyanga sana izwi kwene lii pa kwama nyina pano mpiti antu yaomvyanga izwi kwene lii ukulanga umucinzi pa kwama umwi. (Yoa. 19:26; 20:13) Nomba kwali izwi na lyuze ilyalusile pakucindika sile umwi.

Baibo ikaomvya izwi ilya kulanga uluse nu kusakamala sana umwi lino ikalanda pa yanaci yamwi. Yesu waomvizye izwi lilyo lino walandanga uku mwanaci umwi uwacuzile uku ulwale wa kufuma uwazi pa myaka 12. Vino umwanaci wiyo wizile kuli Yesu vyapusine na vino Isunde lyakwe Leza lyalanzile. Isunde lilyo lyalanzile ukuti umuntu uwali ni ndwala ya musango uwo ataali umusanguluke. Limwi yamwi yangalanda ukuti nga waipatwile uku yantu yauze pa mulandu ni ndwala ino walwile. (Levi 15:19-27) Nomba walondanga sana uwazwilizyo. Umwanaci wiyo “wapitanga muli yasing’anga aingi, nu kusumba impiya zyonsi. Mu cifulo cakuti aye ningo, indwala yayanga sile pa nkolelo.”—Mako 5:25, 26.

Umwanaci wii wasookelile apita umwi umba, aiza ukucisila cakwe Yesu nu kukumya ukwi sempe lya nsalu yakwe, nga lilyo kwene cendamongo cisila! Umwanaci wii welenganyanga ukuti kusi amamanya, lelo Yesu uzizye ati: “Uzye aweni uwankumya?” (Luka 8:40-47) Lino umwanaci wamanya icaticicitika kunoli, alino aiza, ala akuzakaza uku ntete, afukamila Yesu, “amunena icumi consi.”—Mako 5:33.

Pakuti Yesu atekezye umwanaci wii, wavwanzile ni cikuuku ati: “[Mwanane], teku mwenzo utasakamala!” (Mate. 9:22) Ukulingana na aasambilila sana Baibo, amazwi ya Ciyebulai ni Cigiliki asenulwa ukuti “mwanane” yangaomviwa umu nzila ya unkolanya ukulanga “uluse nu kusakamala sana umwi.” Yesu wateekizye sana umwanaci wiya lino wamunenyile ukuti: “Utailo wako wakupozya. Pita ulumi, upoziwe uku ndwala yako.”—Mako 5:34.

“Mwanane.” Vikwene avino umwina Izlaeli uwali sana ni cuma uwizina lyakuti Boazi wanenyile Luti umwina Moabu. Luti nawe kwene ataamanyile ivya kucita pano wasotolanga baale umu calo ca monsi wino atamanyile. Boazi wanenyile Luti ati: “Uvwa kuno mwanane.” Lyene Boazi wakomelizye Luti ukuti asotolezya umu vyalo vyakwe. Luti afukama pansi afupime nga anena Boazi ati: “Uzye pacani cino wansakamala vii, ne mwinamasi?” Boazi aasuka ati, “Nuvwa vyonsi vino wemo wacitila nyokovyala [muka mfwilwa Naomi] . . . Si [Yeova] angala akulambule sile pali vino wacita.”—Luti 2:8-12.

Ya eluda Aina Klistu yangaakolanya sana Boazi na Yesu! Insita zimwi, ya eluda yaili yangakomaanya umwanaci Umwina Klistu aakulondekwa ukwazwiwa nu kukomeleziwa ukuomvya Malembelo. Pacisila ca kupepa kuli Yeova ukuti ayazwe alino nu kukutika sana kuli vino nkazi akuyanena, ya eluda yangamuteekezya nu kuomvya Izwi Lyakwe Leza pa kumukomelezya.—Loma 15:4.