1-3. Uzye ale ukukana uvwana ukwali pali Yuodia na Sintike kwatandike uli, nupya i cani icingazwa ukusenka uku ntazi zya musango uwo? (Lolini cikope cakutandikilako.)

AOMVI yakwe Yeova yakacindika sana Izwi Lyakwe Leza ilyamuzilo, Baibo. Vino tutamalilika, insita zimwi tukapokelela ukwazwa ukufuma umu Malembelo. Uzye tulinzile ukucita uli ndi caya vivyo? Elenganyini pa Ina Klistu aaliko umu nsita ya atumwa Yuodia na Sintike. Anaci kwene ya aali apakwe yatuvwananga. Uzye iintazi ci ino yakweti? Baibo itaalanda. Nomba pakuti tulangilile sile, elenganyini ukuti yakweti intazi ino tumalanda muli palagalafu ilondeliilepo.

² Elenganyini ukuti Yuodia walalike aina yamwi na ya nkazi uku ng’anda ukwakwe ukuti yakizizye pamwi nu kuliila capamwi ivyakulya. Sintike wene yataamwamile, nomba uvwile ukuti aileko yaipakiizye sana. Limwi Sintike nga welenginye ati: ‘Ntanga nzumile ukuti Yuodia ataangamile! Nemo natangi acuza wane sana.’ Pa mulandu wakuti Sintike welenginye ukuti Yuodia atamusumvileko amano, lyene watandike ukumutwisika nu kumutunganya. Fwandi Sintike wapekanyizye icimulo nawe aama aina na ya  nkazi yano Yuodia wamile, nomba ataamileko Yuodia! Intazi iyali pali Yuodia na Sintike ifwile yalenzile ukuti umu cilongano mutaya umutende. Baibo isitunena ivyafumilemo, lelo ya nkazi yaa limwi yuvwilile vino Paulo wayanenyile.—Filipi 4:2, 3.

³ Ivya musango uu vikaleta sana intazi umu vilongano vya yantu yakwe Yeova na ndakai kwene. Nomba, intazi zya musango uu zingaombelwapo nanti ukuzitaluka sile ndi cakuti tukuomvya ukusunda ukwaya umwi Zwi Lyakwe Leza, Baibo. Nupya ndi cakuti tukacindika sana Izwi Lyakwe Leza, tulauvwila vino likatunena.—Masa. 27:11.

4, 5. U kusunda ci kuno Izwi Lyakwe Leza likatunena pa kukana soka zuwa?

⁴ Citangupala ukuteeka umwenzo ndi cakuti twalola ukuti umwi watucitila ivipe nanti watatufyenga. Cikawaya sana ndi cakuti umwi watucitila ivipe pa mulandu ni nkulilo itu, imilolekele ya nkanda, nanti vino umwili witu ukaloleka. Nupya cikawaya sana ndi cakuti Umwina Klistu aliwe akutucitila ivitazifile! Uzye Izwi Lyakwe Leza likatunena amazwi akutwazwa ndi cakuti ivya musango uu vyatucitikila pa mulandu nu kukana malilika kwa untunze?

⁵ Yeova walola ivingi sana pa myuvwanile ya antunze ukufuma pano wayaumbiile. Yeova akamanya vino tukuyuvwa alino ni micitile itu iya vintu. Akamanya amelenganyo itu kumwi ni vyativilenga ukuti twaelenganya vimwi ivingalenga tulande nanti ukucita ivingalenga twalanguluka uku nkoleelo. Fwandi cingazipa twaomvya ukusunda ukwaya muli Baibo ukwakutwazwa ukucefya icifukusi nu kukana sepukilwa ndi umwi watuluvyanya! (Welengini Mapinda 16:32; Kasambilizya 7:9.) Swensi kwene tulinzile ukwezya na maka ukuti tutasoka zuwa nupya tulinzile ukulondesya sana ukweleela yauze. Yeova na Yesu yakalonda ukuti twaelela yauze. (Mate. 6:14, 15) Uzye mulinzile ukuzifyako muli vino mukaelela yauze nanti ukuta ukusoka zuwa?

6. U mulandu ci uno tulinzile ukuicingilila uku cipyu?

⁶ Antu aakasoka zuwa yakaya ni cipyu. Nupya cico cingalenga antu yauze yataalonda ukuya pamwi na amusango uu. Umuntu uwaya ni cipyu angalenga ukuti ivintu vitazipa umu cilongano. Angaezya ukufisilizya icipyu cakwe nanti ulupato luno wakwatila yamwi umu cilongano, “lelo uyi wakwe uli nu kulolekela pa antu kwaula insita.” (Mapi. 26:24-26) Ya eluda yangazwa antu ya musango uwo umu cilongano ukulola ukuti icipyu nu lupato visilondekwa umwi uvi lyakwe Leza. Izwi Lyakwe Leza likalanda ukwaula nu kupita umumbali api lyasi lii. (Levi 19:17, 18; Loma 3:11-18) Uzye mukazumilizya vino Baibo ikalanda?

7, 8. (a) Uzye Yeova akatungulula uli iuvi lyakwe ilya pano nsi? (b) I vyani vimwi vino Leza akatunena ukucita ivyaya muli Baibo, nupya u mulandu ci uno tulinzile ukumuvwila?

⁷ Yeova aakatungulula nu kusambilizya yonsi aaya umwi uvi lyakwe ilya pano nsi ukupitila umu “muomvi mutailwe uwa mano” aakatungululwa na Klistu “umutwe wi uvi.” (Mate. 24:45-47; Efes. 5:23) Wakwe vino cali ukwi umba ilyatungululanga umu nsita ya atumwa, umuomvi mutailwe ndakai wazumila Izwi Lyakwe Leza nupya akalicindika sana. (Welengini 1 Tesalonika 2:13.) Uzye uutunguluzi wa musango ci nanti uwazwilizyo uwaya muli Baibo uungatwazwa?

⁸ Baibo ikatunena ukuti twazanwa uku kulongana lyonsi. (Ayeb. 10:24, 25) Ikatukomelezya ukuti twatungilila ivisambilizyo vya cumi. (1 Kol. 1:10) Izwi Lyakwe Leza likatunena ukuti tulinzile ukukolezya Uwene umu  umi witu. (Mate. 6:33) Nupya Amalembelo yakatukonkomezya ukuti tulinzile ukuomba umulimo wa kusimikila uku ng’anda ni ng’anda, umu vifulo umukazanwa sana antu na konsi kuno tuli. (Mate. 28:19, 20; Mili. 5:42; 17:17; 20:20) Izwi Lyakwe Leza likanena ya eluda ukusungilila iuvi lyakwe Leza ukuya ilisanguluke. (1 Kol. 5:1-5, 13; 1 Tim. 5:19-21) Nupya Yeova akatunena ukuti yonsi aaya umwi uvi lyakwe yalinzile ukuya nu usaka wa ku mwili nu kuya asanguluke umu mipepele.—2 Kol. 7:1.

9. Uzye utunguluzi ci uwayako ndakai uukatwazwa ukuvwikisya ivyaya umwi Zwi Lyakwe Leza?

⁹ Yamwi yangayuvwa ukuti yangalondolola Baibo pa lwao. Lelo, Yesu wasonta ‘umuomvi mutailwe’ ukuti aliwe sile apeela antu yakwe Leza ivya kulya ivyaya umwi Zwi Lyakwe. Ukufuma umu 1919, Yesu wapeelwa ululumbi nupya akaomvya umuomvi kwene wii pa kwazwa alondezi yakwe ukuvwikisya ivyaya umwi Zwi Lyakwe Leza nu kuvwila vino likalanda. Ndi tukuvwila ivyaya muli Baibo, tukaazwilizyako ukuti umu cilongano muye umutende, ukuombela pamwi alino nu kuleka icilongano ciye icisanguluke. Swensi kwene cila muntu tulinzile ukuyuzya ukuti, ‘Uzye naya na ucisinka uku utunguluzi uno Yesu akaomvya ndakai?’

10. Uzye iuvi lyakwe Yeova lyalondololwa uli umwi buku lyakwe Ezekelo?

¹⁰ Izwi lyakwe Yeova ilyalembwa likatwazwa ukumanya vimwi api iuvi lyakwe ilya kwi yulu. Ezekelo wapokelile icilolwa muno waweni iuvi lyakwe Leza ilya kwi yulu ilikaimililwako ni celeta lya kwi yulu. (Ezek. 1:4-28) Yeova aakapisya iceleta kwene lilyo, nupya likaya konsi kuno umupasi walitungulula ukuya. Nupya iuvi lyakwe Leza ilya kwi yulu likatungulula iuvi lyakwe ilyaya pano nsi. Ukwaula nu kutwisika iceleta likapitisya! Elenganyini pa vintu uwingi ivyasenuka umwi uvi lyakwe Leza pa myaka iyapitapo, nupya mwaiusya ukuti Yeova aaliwe akalenga ukuti ivintu visenuke. Vino Yesu na angeli yali apiipi nu konona insi ii umwaya antu aipe, iceleta lyakwe Yeova likusimulisya pakuti Yeova akamanyikwe ukuti u walinga ukuteeka na pakuti izina lyakwe Yeova ilyamuzilo likacindikwe!

11, 12. I vintu ci vimwi vino iuvi lyakwe Yeova lyacita?

¹¹ Elenganyini pali vino iuvi lyakwe Leza ilyaya pano nsi likaomba umu manda yaa akusyalikizya. Amakuule. Aomvi acincile aingi yakuulanga amaofesi yakalamba apya yakwe ya Nte Yakwe Yeova uku Warwick, New York, U.S.A. Ukutungululwa na dipatimenti ikaangalila ivya makuule, aomvi yakuitemelwa aingi umu nsi yonsi yakuombesya umu mulimo wa kukuula amang’anda ya Wene nu kukuzya ivikulwa vya misambo. Tukataizya sana uku yaomvi aingi akuitemelwa aakaombesya pa milimo kwene ii! Mwaiusya ukuti Yeova akapaala sana ya kasimikila aaya umu nsi yonsi aakasangwilako pakuti yazwilizye iuvi apa mpiya izikulondekwa uku milimo kwene ii.—Luka 21:1-4.

 ¹² Masambililo. Elenganyini pa masukulu ya uleza apusane pusane aayako. (Eza. 2:2, 3) Twakwata Isukulu lya Mulimo wa Upainiya, Isukulu Lyakwe ya Kakosoola ya Wene, Isukulu Lya Baibo Ilya Gilyadi, Sukulu lya Kusambizya Aciiza pa Betele, Isukulu lya Angalizi ya Ciputulwa na Yamama Yao, Isukulu Lyakwe ya Eluda Amu Vilongano, Isukulu Lya Mulimo wa Wene, Isukulu Lyakwe Yayo Aya Muli Komiti Ikatungulula Iofesi Lya Musambo na Yamama Yao. Yeova watemwa sana ukusambilizya antu yakwe! Nupya yakatukomelezya ukusambilila Baibo pa webusaiti ya jw.org, pano twakwata impapulo umu ndimi izingi cuze. Paaya ni viputulwa vimwi ivyaiyela ivya yana anono ni vya ndupwa alino ni ciputulwa ca mpapulo zipya izilipo. Uzye mukaomvya jw.org umu mulimo wa kusimikila na pa kupepa kwinu ukwa lupwa?

13. U mulimo ci uno twakwata swe ya kapepa yakwe Yeova acisinka?

¹³ I syuko sana ukuya umwi uvi lyakwe Yeova! Vino twamanya vino Yeova akaalonda, tufwile ukucita ivyaololoke nu kusinkizya ukuti u walinga ukuteeka. Lino umu nsi ii mukucitika ivintu ivipisye, swemo tulinzile “ukupata iviipe” wakwe vino Yeova wavipata. (Masa. 97:10) Tusilonda ukuya wa antu amu nsi ‘aakalola iviipe ngati ivisuma. Alino nu kulola ivisuma ukuya iviipe!’ (Eza. 5:20) Pa mulandu wakuti tukalonda ukuzanzya Leza, tukaezya na maka ukuya nu usaka, ukuya ni miyele isuma, alino nu kuya asanguluke umu mipepele itu. (1 Kol. 6:9-11) Twatemwa sana Yeova nupya twamutaila. Tukasoolola ukuya acisinka kuli aliwe lino tukulondela ivyalembwa umwi Zwi Lyakwe. Nupya tukaezya na maka ukulondela vino akatunena umu ndupwa zitu, umu cilongano, apa ncito, apa sukulu, alino na konsi kuno tuli. (Mapi. 15:3) Lolini inzila na zyuze zino tungalangilamo ukuti twaya na ucisinka kuli Leza.

14. Uzye avyazi Aina Klistu yakalanga uli ukuti yaya na ucisinka kuli Leza?

¹⁴ Ukukuzya ana. Avyazi Aina Klistu yakalanga ukuti yaya na ucisinka kuli Yeova lino yakusambilizya ana yao ivyaya umwi Zwi Lyakwe. Avyazi atemwa Leza yasileka intambi izyaya kuno yakaikala iziyalenga ukukana kuzya ana yao ningo. Umupasi wa mu nsi usilondekwa umu ndupwa zyakwe ya kapepa. (Efes. 2:2) Umuvyazi Umwina Klistu atalinzile ukwelenganya ati, ‘Umu mpanga itu mama aakasambilizya umwana.’ Baibo isipita nu mumbali pa kulanda api lyasi lii lino ikati: ‘Mwe [yaisi] namwe . . . mwakuzya [ana inu] mu kuyasunda nu kuyasambilizya kwa wina Klistu.’ (Efes. 6:4) Avyazi aakatiina Leza yakalonda ana yao ukukula wakwe Samueli, pano Yeova wali nawe lino wakulanga.—1 Sam. 3:19.

15. Uzye tukalanga uli ucisinka kuli Yeova lino tukupingula ivyakucita pali vimwi?

¹⁵ Ukupingulapo ivyakucita. Lino tukupingulapo ivyakucita umu umi, inzila yonga iyakulangilamo ukuti sweswe ya cisinka kuli Leza, u kulondela ukwazwa ukwaya umwi Zwi lyakwe alino nu kwaya mwi iuvi lyakwe. Pakuti tulondolole ningo umulandu uno cacindamila ukucita vivyo, lolini icipande icavwa sana avyazi aingi. Caya iciyelezyo uku ya vyazi aingi akaya mu kuombela uku mpanga zyuze ukutuma umwana uwavyalwa kuli yalupwa ukuti aliyo yamusakamala pakuti yene yatwalilile ukuomba nu kupanga impiya uku mpanga ino yayako. Icacumi ukuti umuntu aliwe afwile ukuisoolwela umwineco ivyakucita, lelo tulinzile ukulaiusya ukuti Leza aliwe afwile ukuya pankoleelo muli vino tukupingula ukucita. (Welengini Loma 14:12.) Uzye cingayamo amano  ukupingula ivya kucita pa vintu vicindame ivya pa lupwa ni vya mu wikazi ukwaula ukuti tutale tulole vino Baibo ikalandapo? Awe foo! Tukalondekwa ukwavwiwa na tata witu uwa mwi yulu pano tutanga tutungulule ingazo zitu.—Yele. 10:23.

16. I vyani vino mama umwi wasoolwilepo ukucita lino umwanakwe wavilwe, nupya icani icamwazwilizye ukupingulapo ningo?

¹⁶ Mama umwi uwakweti umwana umulumendo ala akaikala uku mpanga yuze wali nu kutuma umwana uku mpanga ya kumwao pakuti avyazi yakwe aliyo yakamusungila umwana. Lino kwasiile panono ukuti apaape, Nte Wakwe Yeova watandike ukusambilila nawe Baibo. Walundulwike nupya wamanyile ukuti aliwe wali nu mulimo wa kukuzya umwanakwe nu kumusambilizya pali Leza. (Masa. 127:3; Mapi. 22:6) Mama kwene wii wapefile kuli Yeova, wakwe vino Amalembelo yakatunena ukucita. (Masa. 62:7, 8) Nupya wanenyileko nkazi uwamusambilizyanga Baibo nu kunenako yauze umu cilongano. Nanti icakuti yalupwa yakwe ni vyuza yamupatikizyanga ukuti akatume umwanakwe uku yavyazi yakwe, wapingwilepo ukuti citaali ningo ukucita vivyo. Iya watemilwe sana ukulola vino icilongano cazwilizye mamakwe nu mwana icalenzile ukuti nawekwene azumile ukusambilila Baibo nupya watandike nu kulongana pamwi na mamakwe nu mwana. Uzye mukwelenganya ukuti Yeova waswike ipepo lino mama wii wapefile? Ukwaula nu kutwisika, wayuvwile ukuti ipepo lyakwe lyaswikwe.

17. I vyani vino yatunena pali yano tukasambilizya Baibo?

¹⁷ Ukulondela utunguluzi. Inzila yonga iyacindama sana ino tungalangilamo ukuti twaya na ucisinka kuli Leza u kuvwila vino iuvi lyakwe lyatunena ukucita. Elenganyini pali vino yatunena pali yano tukasambilizya Baibo. Yatunena ukuti lino twatandika sile ukusambilizya umwi Baibo umwi buku lyakuti Uzye Baibo Ikasambilizya Ukuti Uli? tulinzile ukuomvya amamineti anono ukulanzyanya nawe pali vino iuvi lyakwe Yeova likaomba. Tungacita vivyo ukuomvya vidyo yakuti I Vyani Vikacitika pa Ng’anda ya Wene? na kabuku kakuti Uzye Ndakai Aaweni Aakacita Vino Leza Akaalonda? Yalaanda ukuti ndi twamala ukusambilila umwi buku lyakuti Vino Baibo Ikasambilizya? nu musambi aakulunduluka, cingazipa ukutandika ukuomvya ibuku lyakuti “Ikalini mu Kutemwa Kwakwe Leza” nanti icakuti limwi pa nsita iiyo ala umusambi wawatiziwa. Iuvi lyatunena ukucita vii pakuti asambi ‘yakomeleke mu utailo.’ (Kolo. 2:7) Uzye mukalondela vikwene vino iuvi lyakwe Yeova lyatuneena?

18, 19. I vyani vimwi vimwi vino vilinzile ukutulenga ukutaizya Yeova?

¹⁸ Kwaya ivintu ivingi sana ivilinzile ukutulenga ukutaizya Yeova! U watupeezile umi, pano ukwaula aliwe nga tutayako. (Mili. 17:27, 28) Watupeela uwila usuma cuze, kulikuti Izwi Lyakwe, Baibo. Twazumila ukuti umu cumi Baibo iizwi Lyakwe Leza, wakwe vivi kwene vino Aina Klistu amu Tesalonika yapokelile Izwi lyakwe Leza nu kuzumila ivyayamo.—1 Tesa. 2:13.

¹⁹ Pa mulandu wakuti twakwata Izwi Lyakwe Leza, caleenga tupalame kuli Yeova nawe wapalama kuli sweswe. (Yako. 4:8) Tata witu uwa mwi yulu watupeela isyuko ilisuma cuze ilya kuya umwi uvi lyakwe. Tukataizya sana pa kutupeela isyuko lii! Kalemba wa masamu wavwanzile ningo sana lino wimvile ati: “Taizini [Yeova], pano wene umusuma, pano uluse lwakwe ulwa pe na pe.” (Masa. 136:1) Muli Masamu 136, tukazanamo amazwi yakuti “uluse lwakwe ulwa pe na pe” imiku 6. Ndi tuli na ucisinka kuli Yeova nu kwi uvi lyakwe, tulalola ukuti amazwi yaa acumi pano tulikala amanda pe!