Cipande cafumako, cikulanda pa cilangililo cino Yesu walanzile. Cilangililo cico cikalenga tusininkizye ukuti Uwene Wakwe Leza akuno waya ukwi yulu nupya Yesu Klistu ali Mwene.

Baibo ikalanda ukuti lino Yesu wapeezilwe amaka ya Wene wazinzile Satana ni viwa vyakwe ukufuma ukwi yulu. Fwandi ndakai yakwata sile amaka ya kucita iviipe pano nsi, cico kwene i calenga ivintu vipileko kufuma umu 1914.—Umbwilo 12:7, 9.

Asi mulandu na vino ivintu ivikucitika pano nsi vikuya vikwipilako sile, Yesu Umwene wa Wene Wakwe Leza wacita vimwi pakuti aazwe antu umu nsi yonsi. Pa mulandu nu mulimo wa kusambilizya Baibo uukucitika umu nsi yonsi uno Yesu wasoowile, antu aingi yakusambilila nu kuomvya ivisinte vya muli Baibo umu umi wao cila wanda. (Ezaya 2:2-4) Antu aingi yakusambilila ivya kucita pakuti yaye ni nsansa umu lupwa alino nu kukanalenga incito zino yakaomba ni vyuma ukuya ivicindame umu umi wao ukuluta icili consi. Antu yaa yakusambilila vino yangazifya imikalile yao ndakai nupya yakaya antu yano Leza akalonda ukwizateekwa nu Wene.

Nanti icakuti Yesu watandika mpiti ukuteeka ukwi yulu, amauteeko ya antunze yacili yakateeka pano nsi. Lelo, Leza wanenyile Yesu ukuti: “Yaa umwene wakuteeka anisi yako!” (Masamu 110:2) Likwene sile, Yesu wasya ace onone alwani yakwe nu kuleta upuzo uku antu aakaitemelwa ukuvwila Leza.

Pa nsita iyo, Uwene Wakwe Leza ulacita ivintu vii:

• Ulasisyapo ukupepa kwa ufi. Imipepele iikasambilizya ivya ufi pali Leza nu kucuzya antu italayako nupya. Baibo ikaama imipepele ya ufi ukuti a cizelele. Aingi yalazunguka sana pali vino ilononwa.—Umbwilo 17:15, 16.

• Ulasisyapo mauteeko ya antunze. Uwene Wakwe Leza ulaombesya nu konona mauteeko ya antunze.—Umbwilo 19:15, 17, 18.

• Ulasisyapo antu aipe. I vyani ivilacitikila antu aakacita iviipe nu kukana ukuvwila Leza? “Alino antu aipe yene Leza alayafumya umu mpanga.”—Mapinda 2:22.

• Ulonona Satana ni viwa. Satana ni viwa vyakwe yatalakwata amaka ya ‘kusomba antu amu nko nupya.’—Umbwilo 20:3, 10.

Uzye vii vyonsi vilapiliula cani ku antu aakauvwila Uwene Wakwe Leza?

Vino Yesu u Mwene ukwi yulu, alacita ivintu ivingi vino ya kateeka antunze yatatala yacita. Alateeka pamwi na ya 144, 000 asoololwa ukufuma mu antu. (Umbwilo 5:9, 10; 14:1, 3) Alasininkizya ukuti ukulonda kwakwe Leza kwacitika pano nsi. I vyani vino Uwene Wakwe Leza ulacitila antu pano nsi?

• Ulasisyapo ukulwala ni mfwa. “Kusi umwikazi wa mu mpanga alati “Nindwala,’” nupya “kutalaya imfwa nupya.”—Ezaya 33:24, NWT; Umbwilo 21:4.

• Ulaleta umutende wa cumi nu kucingililwa. “Umutende wao ulavula wakwe cimwi” nupya “umuntu ali wensi alaikalila mu mutende apakasi ka mitingi ni misamvu yakwe. Kusi nanti umwi alayoofya.”—Ezaya 54:13, NWT; Mika 4:4.

• Ulapeela antu incito isuma. “Asololwe yane yalasyukila vino yailimile aeneco. Yatalaicuzya sile ukuomba foo.”—Ezaya 65:22, 23.

• Ulazifya umusili nu muza vino antu yonona. “Ulwanga lulazanga, na maluwa yalawalula umu mpanga ilangoke.”—Ezaya 35:1.

• Ulasambilizya antu vino yalinzile ukucita pakuti yakikale amanda pe. “Umi wa pe uwakuti antu yamanye wewe, Leza wenga sile uwa cumi, nga nu kumanya Yesu Klistu wino watumile.”—Yoane 17:3.

Leza akalonda muce muipakizye mapaalo yayo. (Ezaya 48:18) Icipande icilondelilepo cimalondolola pali vino mungacita pakuti mukaipakizye ivintu visuma uku nkoleelo.