Navyalilwe umu musumba uwa Mulhouse, incende iyaela uku France, nupya uku ncende ii kwali sana unkalwe. Ukufuma sile lino nali mwance niusyanga unkalwe uwacitikanga uku yantu aikalanga uku ncende kwene ii. Umu lupwa lwitu anaci twayalolanga ukuti aapansi sana, nupya asi ilingi lino aonsi yuzyanga vimwi uku yanaci. Nasambilile ukuti anaci yalinzile ukwikala sile umu cikini ala yakusakamala sile aonsi na ana.

Imikulile yane itazifile. Lino nali ni myaka 10, yatata yafwile pa mulandu na ucakolwa. Nupya lino papisile sile imyaka 5, tatalenzi waikulike. Umu mwaka uli umwi kwene naweni na kuno umuntu umwi yamukomile umu lupwa lumwi ulwalemaniile, nupya nuvwile uyi sana. Amu lupwa yansambilizye ivya kulwa ukuomvya imipeni ni mfuti ndi cakuti kwacitika ulwete. Nizile inja sile cuze-cuze cakuti natandike nu kuilembola ivilembo kumwili nupya natandike nu kumwa.

Lino nali ni myaka 16 namwanga mabotolo yawengwa ukutandika pali 10 ukufika kuli 15 apa wanda sile onga, nupya lino papisile sile insita inono natandike ukumwa imilembo ikavulunganya uwongo. Pakuti nakwanisya ukukala vintu vii, nakazyanga ivyela vyakwengulula, nupya natandike nu kwiya. Lino nali ni myaka 17 ala yatala yanjalilapo umu cifungo. Imilandu yonsi ino nakweti yafisile 18, nupya yonsi kwene yacitike pa mulandu nu upupu alino nu unkalwe.

Lino nali ni myaka ukutandika pali 20, umi wane wipiileko. Cila wanda napeepanga imisyanga ya mpwanyi 20 alino nu kuomvya imilembo yuze ikavulunganya uwongo. Nupya imiku iingi ivintu vii vyamvulunganyanga, nayanga sile umupipi ni mfwa. Natandike ukuomvya sana imilembo ikavulunganya uwongo, fwandi insita zyonsi napitanga sile ni mipeni ni mfuti. Wanda umwi kwasile sile kwempe ukuti indase umuntu umwi ni mfuti, lelo icazifileko sile, i cakuti impolopolo zitamulasile umu mwili, zyalasile sile umu cisulo ca musipi uno wazwite. Lino nali ni myaka 24, yamayo yafwile, lyene icipyu alino cakulileko sana. Ndi cakuti antu yakupita umu museo yandola, yutukilanga umu mpanga. Pa mulandu wakuti nacitanga sana ulwete, ilingi yanjalilanga umu cifungo apa mpela ya milungu, ngi cakuti insi umu cifungo, ala indi umu cipatala pa mulandu ni vilonda vino nakwatanga umu kucita ulwete.

Lino nali ni myaka 28, natwazile. Wakwe vino namwe kwene mungelenganya, kwene mamane wene ntamucindike, namusuuzile wakwe cimwi. Namusaalulanga nupya namumanga. Tutaombelanga ivintu capamwi wakwe vino atwalana yalinzile ukucita. Nelenganyanga ukuti cali sile ningo vivi kwene vino namupeelanga ivintu ivya kwiya, ivili wa vibango, maelena  alino ni vintu vyuze. Nomba icintu cino ntenekelanga i cacitike. Mamane watandike ukusambilila Baibo na ya Nte Yakwe Yeova. Lino watandike sile ukusambilila Baibo, watile ukupeepa, watandike nu kukana impiya iziye, nupya wawezizye ni vibango na maelena vino namupeezile. Nuvwile uyi sana. Natandike ukumulesya ukusambilila Baibo, nupya ndi nkupeepa fwaka namufutumwilanga ni cunsi pa manso. Nupya namusaalulanga ala na antu yakulolako.

Uwanda umwi nosile umuputule uno twalalangamo ukwaula ukumanya pa mulandu wakuti nakolike. Mamane u wampuswisye ukuti ntapya, nupya u wapuswisye nu mwanitu umukazyana uwali ni myaka 5. Lino nakololwike, natandiike ukulanguluka pali vino nacisile. Nupya nuvwanga ukuti nemo Leza atanga anjelele. Niwisye vino nuvwile kuli simapepo umwi lino walanzile ati, ya kacita yaviipe yakaya umu kupya umu moto. Na lino naile uku cipatala, dokota wanenyile ati: “Wemo ononeka casila! Utalatala uye ningo.”

Lino ing’anda ino twikalangamo yapile, twakuukile uku yavyazi yakwe mamane. Lino ya Nte iizile umu kulanzyanya na mamane, nayuzizye ukuti: “Uzye icacumi Leza anganjelela amaifyo yane yonsi?” Lyene yandanzile vino Baibo ikalanda pali 1 Kolinto 6:9-11. Api lembelo lii pakalanda imiyele ino Leza wapata, lelo paaya na mazwi aakuti: “Yamwi munomuli mwali wakwe yaa.” Mazwi yaa yalenzile insininkizye ukuti fwandi nani kwene nali nu kusenuka uku viipe vino nacitanga. Lyene ya Nte yankomelizye ukuti Leza wantemilwe lino yandazile amazwi aya pali 1 Yoane 4:8. Ala mwandi nakomeleziwe wakwe cimwi cakuti nayanenyile nu ukuti twasambilila nayo Baibo imiku iili cila mulungu, nupya natandike nu kulongana uku mwao. Napepanga lyonsi kuli Yeova.

Mu mwezi sile onga, napingwilepo ukuta ukuomvya imilembo ikavulunganya uwongo alino nu kukoleka. Nupya lino natiile vintu vii, natandike ukucuula sana. Ngi indala nacuulanga sana uku viloto, nuvwanga umutwe ukuwaya, mwili onsi wawayanga, alino ni ndwala zyuze. Lelo apa nsita yonga kwene namanyile ukuti Yeova wali umupipi nani nupya wankomelezyanga. Nuvwanga wakwe vino umutumwa Paulo uvwanga. Paulo walemvile pali vino Leza wamwavwanga ati: “Ala nkweti amaka ya kucita vyonsi muli Klistu aakankomya.” (Filipi 4:13, Cimambwe New Testament) Nupya umukuya kwa nsita, na fwaka kwene natiile ukupeepa.—2 Kolinto 7:1.

Baibo yangavwile ukusenuka uku viipe vino nacitanga, nupya yavwile nu ulupwa lwitu. Nasenwike na muli vino nasunganga mamane. Natandike ukumucindika nupya naomvyanga na mazwi aakuti “emukwai” alino nu kulanda ukuti “nataizya.” Napya nizile inja isi umusuma sana uku mwana wino twakweti. Lino nasambilile Baibo umwaka onga, naipeezile kuli Yeova nupya nawatiziwe wakwe vino mamane wacisile.

Cumi kwene masunde aya muli Baibo yangavwa ukuya nu umi usuma. Nanti sile aalupwa aasi ya Nte Yakwe Yeova nayo kwene yamanya ukuti nga nafwa pa mulandu nu kuomvya imilembo ikavulunganya uwongo nanti limwi nga yankoma umu lwete.

Masambililo aya muli Baibo aakalanda pa milimo ino iya na isi yakwata umu lupwa yangavwile, nupya yalenzile ukuti swensi umu lupwa lwitu tuye ni miyele isuma. (Efeso 5:25; 6:4) Twatandike ukuombela capamwi nu ulupwa. Napya ndakai insinena mamane ukuti aikala sile umu cikini, lelo nkauvwa ningo lino inkumwavwilizya umulimo uno akaomba uwa kusambilizya antu Baibo insita yonsi. Nakapya nawe akangazwilizya sana pakuti inaomba ningo ueluda pa cilongano.

Cumi kwene ukutemwa kwakwe Leza alino nu luse lwakwe vikankomelezya wakwe cimwi. Nkalondesya sana ukulanda pa miyele yakwe Leza uku yantu akaelenganya ukuti limwi maifyo yao yatanga yelelwe, wakwe vino nani nelenganyanga. Namanya ukuti Baibo ingaavwa umuntu ali wensi ukuya ni miyele isuma alino nu kumanya ukuti umi wacindama. Kuya kwene Baibo itansambilizya sile ukucindika anji, aonsi na yamama, lelo yalenga nu ukuti nacindika umi wane.