Leza wanenyile Adamu ukuti: “Uwanda kwene uno ulalyako [ku cimuti],” “ulafwa.” (Utandiko 2:17) Ndi cakuti Leza waumvile Adamu ukuti akakote nu kufwa, nga tamupeezile isunde lilyo. Adamu wamanyile ukuti ndi cakuti atalile uku cimuti atali nu kufwa.

Adamu na Eva yatalondekwanga ukulya uku cimuti cici pakuti yaye nu umi usuma pano umu calo ca Edeni mwali ivimuti ivingi ivyaseekanga ivizao. (Utandiko 2:9) Ndi cakuti Adamu na Eva yatalya uku muti uwa nga yalangilile ukuti yali ni cuvwila kuli Kapeela wao uwa umi. Nupya nga calangilile ukuti yamanyile ukuti Leza wakweti insambu zya kuyanena ivya kucita.

Pakuti tumanye ningo cino Adamu na Eva yafwilile tulinzile tuvwe ukulanzyanya ukwaletelile swensi. Satana Ciwa waomvizye inzoka pakuti asombe. Baibo ikati: “Lyene inzoka yali icenjelesye pa viumbwa vyonsi ivya mu mpanga vino Yeova Leza waumvile. Inzoka yuzya umwanaci iti, ‘Uzye icacumi Leza wamuinda ukulya iviseekwa vyaku miti yonsi ya mu calo?’”—Utandiko 3:1.

Lyene Eva waswike ati: “Tungalya iviseekwa vyaku miti yonsi yamu calo, suka sile ku muti uno uli pakasi ka calo. Leza watuinda ukulya iviseekwa vyaku muti uwo nantu ku ukumya, pano ndi twacita vivyo tulafwa.’” Lyene inzoka yanenyile umwanaci iti, “Cico cisi cacumi, mutalafwa awe. Pano Leza wamanya vino uwanda uno mulalyako iviseekwa vivyo mulalingana na aliwe nu kumanya visuma ni viipe.” Fwandi Satana walanzile ukuti Yeova wali u waufi, atalondanga Adamu na Eva ukukwata cintu cimwi cisuma.—Utandiko 3:2-5.

Eva wazumile vino uvwile. Walolekisye icimuti. Calolike ningo kuli aliwe nupya wacikumvilwe. Wakulwile icizao cimwi atandika nu kulya. Lyene Baibo ikati: “Nga atoola iviseekwa vimwi apeela iya nga nawe kwene alya.”—Utandiko 3:6.

Cintu cico cifwile casosizye sana Leza ukulola ukuti ana yano watemwa sana yakana ukumuvwila. I vyani vino wacisile? Yeova wanenyile Adamu ukuti: “Ulaswilila ku musili kuno waumvilwe. Waumvilwe ukufuma ku musili, nupya ku musili akuno ulaswilila.” (Utandiko 3:17-19) Pa mulandu wakwe cii Adamu “wafwile ali ni myaka 930.” (Utandiko 5:5) Adamu ataile ukwi yulu nanti ukuya umu kwikala uku ncende yuze. Ataaliko lino Yeova atatala wamuumba ukufuma uku lukungu. Fwandi lino wafwile, ataali nu umi wakwe vivi kwene vino ulukungu luno waumvilweko lutakwata  umi. Watiile ukuyako. Ala icintu cii cifile wakwe cimwi.

Pa mulandu wakuti Adamu na Eva yatuvwilile uku mufulo sile, yaponzizye umi wao umalilike ni syuko lya kwikala amanda pe. Ivintu vyasenwike; izile iyaya ya kaifya nupya aula ukumalilika. Nomba vino ifizye lino yakanyile ukuvwila Leza vitalenzile sile aliyo yonga ukuculilamo. Na ana yonsi yano yaviile izile iyaya ya kaifya. Pali Loma 5:12 pakati: “Iifyo lingile muno nsi pa mulandu wa muntu wenga, nga ni iifyo lyakwe ilyaleta imfwa. Caleka, imfwa nayo yasalangine mu antu yonsi pano antu yonsi iifizye.”

Baibo akalondolola iifyo ni mfwa ukuti “ikumbi lya ulanda lino lyavimba antu amitundu yonsi, ilyafupilizya antu amu nko zyonsi.” (Ezaya 25:7) Ikumbi lii lyavimba antu wakwe kungwi umwipisye wino kusi ali wensi angapusuka ndi cakuti wapitamo. Mu cumi cumi “Adamu walesile imfwa kunotuli swensi.” (1 Kolinto 15:22) Iuzyo lino umutumwa Paulo uzizye lino tungayuzya aeli: Uzye aweni amankulula ku mwili uno ukuntwala ku mfwa?” Uzye kuli aliwensi angatukulula?—Loma 7:24.