U Munzila ci Muno Imfwa Umulwani Witu Ingacimviwa?
NANTI icakuti iifyo lino avyazi itu akutandikilako Adamu na Eva yacisile lyalenga antu yaye yakaifya nu kulafwa, ukulonda kwakwe Leza uku yantu kutasenuka. Baibo yalanda maila iingi amazwi akalangilila ukuti ukulonda kwakwe Leza kutasenuka foo.
-
“Antu aololoke yalikala umutende umu mpanga, nu kuipyana umuyayaya.”—Masamu 37:29.
-
‘Lilyo ala wataonona ni mfwa kwene! Yeova alakumbula aminsozi mu manso ya antu yonsi.’—Ezaya 25:8.
-
“Nu mwanisi uwa kusyalikizya kucimviwa alaya imfwa.”—1 Kolinto 15:26.
-
“Kutalaya imfwa nupya. Kutalaya kulosya nanti kulila, nanti kuvwa kuwaika.”—Umbwilo 21:4.
Uzye Leza alacita uli pakuti ‘akonone imfwa’ nanti ukusisyapo ifwa? Wakwe vino itulola, Baibo ikalanda umu kulungatika ukuti “aololoke yalikala . . . umuyayaya.” Nomba ikalanda nu kuti “mu nsi ii mutaya umuntu nanti umwi akacita vyaololoke lyonsi.” (Kasambilizya 7:20) Uzye cikupiliula ukuti pa kucimvya imfwa Leza atalalondela ivikalondekwa pakuti antu atamalilika yakikale amanda pe? Ca musango uwo citange cicitike! Atange acite vivyo pano a “Leza wino asitumpoka.” (Tito 1:2) Nomba ivyani fwandi vino Leza alacita pa kufikilizya ukulonda kwakwe ukwa pa kutandika?
LEZA ‘ALONONA IMFWA’ AMANDA PE.—EZAYA 25:8
WACIMVIZYE IMFWA KUOMVYA IMPOLELWA
Yeova Leza wacisile icintu cimwi icalangilile ukuti watutemwa pakuti atukulule uku mfwa, kuli kuti watupeezile impolelwa. Impolelwa ikaimililako icintu cimwi icikalipilwa icilingane umutengo na cino caticononeka pakuti paye umulinganya. Vino antu yonsi aakaifya nupya yapingulwa ukufwa, Baibo ikalanda ukwaula nu kupita umumbali ukuti: “Ala mwine umuntu angaposiwa ukuituula umwenzo wenga. Wene atange alole nanti cimwi icakupeela Leza apakuitulanya. Pano umutengo wakulipila apa kuituula, wakulisya ukuluta umu cipimo. Consi cino angezya ukulipila citange cikwane.”—Masamu 49:7, 8.
Lino umuntu aatamalilika wafwa, akalipila sile pa maifyo yakwe umwineco, atange aituule nanti ukulipililako yauze maifyo yao. (Loma 6:7) Twalondekwanga umuntu uwali umumalilike nupya atakweti uluyembu ukuti apeele umi wakwe asi pa mulandu na maifyo yakwe lelo pa mulandu na maifyo itu.—Ayebulai 10:1-4.
Vivyo kwene avino Leza wapekinye ukuti vicitike. Watumile Umwanakwe Yesu ukufuma ukwi yulu ukwizavyalwa pano nsi ngu muntu umumalilike nupya aatali kaifya. (1 Petulo 2:22) Yesu walanzile ukuti wizile mu “kupeela umi wakwe kuti akulule antu aingi.” (Mako 10:45) Wafwile pa mulandu na maifyo itu nu kutukulula uku mfwa pakuti tuye nu umi.—Yoane 3:16.
UZYE IMFWA ILACIMVIWA LILACI?
Ndakai usesemo wa muli Baibo ukufikiliziwa pano tukwikala mu “tusita tutale” utukulangilila ukuti tukwikala “umu manda akusyalikizya” ansi ii. (2 Timoti 3:1) Amanda akusyalikizya yalasila lino “yakaifya yalapingulwa nu kononwa.” (2 Petulo 3:3, 7) Nomba antu atemwa Leza yalapusuka lino kulaya unonesi uwo nupya yalapeelwa “umi wa pe.”—Mateo 25:46.
Yesu wizile umu “kupeela umi wakwe kuti akulule antu aingi.”—Mako 10:45.
Antu na yauze aingi cuze yalakwata isyuko lya kuya nu umi wa pe lino yalatuutululwa. Yesu watuutulwile umuntu lino watandalile umusumba wa Naini. Umwana wenga sile wakwe mukamfwilwa Luka 7:11-15) Nupya umutumwa Paulo walanzile ukuti: “Nakwata upaalilo muli Leza . . . uwakuti antu onsi, aololoke na asi aololoke, yalazyukuka kufuma ku afwe.” Upalilo uu ukome ukalenga tusininkizye vino Leza watemwa antu.—Milimo 24:15.
wafwile, Yesu wizile “aya na mizu” nupya watuutulwile umulumendo wiya. (Antu aingi yangapalila ukwiza ikala amanda pe uku nkoleelo. Baibo ikati: “Antu aololoke yalikala umutende umu mpanga, nu kuipyana umuyayaya.” (Masamu 37:29) Pa nsita iyo, yalaya ni nsansa nupya yalakomeleziwa ukulola ukufikiliziwa kwa mazwi yano umutumwa Paulo walemvile imyaka mupipi na 2,000 yatipita akuti: “Mfwa we, uzye luoya lwako luli kwi?” (1 Kolinto 15:55) Pa nsita iya umwanisi wa yantu kuli kuti imfwa alacimviwa.