Ya Seth * yalanzile iyati: “Nemo na mamane incito zizile izisilila pamwi. Pa myaka iili twali ni ntazi pali vino twali nu kusakamala ulupwa nupya twaombanga sile incito iyakuwayawaya. Lyene ni cacitiike i cakuti mamane Priscilla watandike ukusakamala sana nupya natandiike ukuilola uwasile-sile.

“Twacisile uli pakuti tuzizimizye? Lyonsi Priscilla wiusyanga amazwi yano Yesu walanzile pali Mateo 6:34. Walanzile ukuti tutafwile ukusakamikwa pa vintu vya mutondo, pano uwa mutondo wene ulaisakamala uwisikulu. Nupya ipepo lino wapepanga kufuma pansi ya mwenzo, lyamukomizye cuze. Lyene nani amazwi aya pali Masamu 55:22 yantekiizye sana. Ndi vino caali kuli kalemba wa masamu, nani kwene natuuzile masakamiko yonsi kuli Yeova, nupya naweni ukuti wangavwilizye. Nanti icakuti ndakai nazana incito, twangupazya uwikalo ndi vino Yesu walanzile pali Mateo 6:20-22. Lyene ni caziipisya i cakuti, twaya sana ya cuza yakwe Leza nupya twatemwana sana na mamane.”

Ya Jonathan yalanzile iyati: “Lino uculuzi uno twaombanga ononike, nasakamiile sana pali vino twali nu kulaikala. Ulupiya luno twaombiile pa myaka 20 pasi kuno lwatutwazile, pano ivintu vyakomile umutengo sana. Lyene twatandike ukulemanila na mamane pa mulandu nu lupiya. Twatiinanga ukukala ivintu ukuomvya kadi ya ku banki pano twelenganyanga ukuti yamatukaanya.

“Nomba Baibo nu mupasi wakwe Leza, vyatwavwile ukupingulapo ningo ivya kucita. Natandike ukuzumila incito ili yonsi iyaloleka, nupya twatiile ukukala ivintu ivitatukwatile incito. Nupya vino sweswe ya  Nte Yakwe Yeova, ya kapepa yanji yatwavwilizyangako. Yatukomelezyanga sana nu kutupeela vino tukulondekwa umu nsita ino ivintu vyativitutalila.”

Ya Raquel nayo yalanzile iyati: “Lino ya wane yansiile, nuvwile uyi sana, nupya naali nu ulanda uwipisye. Nomba ukupalama kuli Leza, kwanteekizye cuze. Napepanga kuli Leza cila wanda nupya wanteekizye. Naweni kwati Leza wapozya umwenzo wane.

“Nupya nkataizya na pi Izwi lyakwe, kulikuti Baibo, iyangavwilizye ukuta kuya ni cikonko ku mwenzo. Niusyanga amazwi yano umutumwa Paulo walanzile aaya pali Loma 12:21 aakuti: ‘Mutacimviwa ni nkota, lelo cimvini inkota pa kucita visuma.’”

“Cuza wane wangavwile sana ukumanya muno naalondekwanga ukuombela. Wandanzile ilembelo lyakwe Kasambilizya 3:6 alino anena mu cikuuku ukuti kwaya insita yakwilila ku cintu cino ‘ituponzya.’ Kwene amazwi yaa ntayatemilwe, lelo avino nalondekwanga. Lyene paa natandika ukwelenganya pa visuma nupya naata ukusakamala.”

Ya Elizabeth nayo yalanzile yati: “Ndi cakuti icupo casila, cikalondekwa ukukomeleziwa. Nakweti cuzane uwankomelezyanga sana cila-wanda. Twalosezyanga pamwi, wanteekezyanga nupya wali sana ni cikuuku. Nasininkizya ukuti Yeova waomvizye cuzane ukungavwa kuli vino naculanga.”

Ya Luis yano tulanzilepo umu cipande cakutandikilako, yakacula ku ndwala ya ku mwenzo napya pa maila yaili yakasi yafwe. Ndakai yakayika kuli masyini akuno yakapemela pa ma-awala 16 cila wanda. Lyene yalanzile iyati: “Nkapepa kuli Leza lyonsi nupya ndi napepa nkauvwa kwati umupasi wakwe wankomya. I cumi kwene ipepo likangavwa ukuya musipe pano nataila Leza nakupya namanya ukuti akansakamala.”

Ya Petra aali ni myaka ukucilako pali 80 yalondolwile iyati; “Nkalonda ukuomba ivintu vingi, lelo nkavilwa, pano amaka yacepelwa. Nkatonta sana nupya umi wane u wa mulembo sile. Ilingi nkaelenganya wakwe vino Yesu wanenyile Isi ukuti ndi cingacitika leka ucuzi ufume pali nene.” Lelo Yeova wakomelizye Yesu nupya nani kwene akankomya. Ipepo aali  mulembo wane. Nkauvwa ningo sana ndi cakuti napepa kuli Leza.”—Mateo 26:39.

Ya Julian, yano yacula ku ndwala ipisye pa myaka mupiipi na 30, nayo yalanzile iyati: “Natandika ukupitila pa kanjinga kayalemale. Lelo umi wane wacindama sana pano nkaomvya insita yane kukwavwilizyako na antu yauze. Ukwazwilizyako yauze kungalenga umwi ukuya nu luzango, nupya Yeova akaiusya ulayo wakwe uwa kutukomya lino twaya ni ntazi. Nkakolanya umutumwa Paulo, lino nkulanda nkuti: ‘Klistu wampeela maka akulungatana ni miyele ili yonsi.’”—Filipi 4:13.

Ya Antonio yalanzile iyati: “Lino ya tata yayapunsile na motoka, nafizilwe ukusininkizya umuku wakutandikilapo lino nuvwile. Calolike kwati u lufyengo pano yaipitilanga sile nupya yali pansi. Lelo kutali cili consi cino ningacita. Apa manda 5 yaali aakulolelela sile suka iyafwa. Ndi cakuti tuli na yamayo, ntalilanga ndi vino cayanga lino indi nenga. Fwandi nayuzyanga nemwineco ukuti; ‘U mulandu ci uno cacitikila vii’?

“Apa manda yonsi yano naali nu ulanda, napepanga kuli Yeova ukuti angavwe inje nu mutende nu kuleka ukuya nu ulanda. Nupya natandike ukwililako kuli vino nali nu ulanda. Nizile niusya vino Baibo ikalanda ukuti intazi zikacitikila aali wensi ukwaula ukwenekela. Lyene vino Leza asitumpoka, nasininkizya ukuti ndalola ya tata linoyalatuutuluka.”—Kasambilizya 9:11; Yoane 11:25; Tito 1:2.

Ya Robert, atiyalumbulwa umu cipande cakutandikilako, nayo kwene cayacitikiile icili cimwi. Yalanzile iyati: “Mamane naani twaya nu mutende uwalandwa pali Filipi 4:6, 7. Umutende uu wizile pa mulandu wakuti twapepanga kuli Yeova. Nupya watwavwile ukuti twalanda uku yantu aakasimika malyasi pa milawasa apa upalilo uno twakwata uwa kutuutuluka. Nanti icakuti umwanitu umonsi wafwile mu uzanzo wa mu ndeke, ndi twelenganya pa tusita tuno twayanga nawe pamwi, tukaya ni nsansa. Nupya tukaezya ukwelenganya pa nsita kwene zizyo.

“Lino ya Nte yanji yatunenyile ukuti yatuweni tukulanda pa utailo witu pa TV, twayanenyile ukuti icatwavwile ukucita viivi, a mapepo inu aingi cuze. Nasininkizya umu cumi ukuti Yeova watwavwanga ukupitila mu mameseji aingi cuze yano yatutumilanga akututeekezya.”

Ndi vino twalola muli vino vyacitikile antu yonsi yano twalandapo, tungasininkizya ukuti Leza angateekezya yonsi aali ni ntazi. Nga mwemo uzye Leza angamuteekezya? Nanti mungaya ni ntazi zya musango uli, kwaya angamwavwa ukucimvya intazi zizyo. * Fwandi mwalenga kuli Yeova ukuti amwavwa, pano wene aali “ntulo ya kutekeziwa konsi.”—2  Kolinto 1:3.