ANTU aingi yamanya ukuti Yesu wali na atumwa 12. Lelo, limwi yatamanya ukuti pa yasambi yakwe pali na anaci aombelanga pamwi nawe. Nupya pa anaci yaayo pali na Yoana.—Mate. 27:55; Luka 8:3.

U mulimo ci uno Yoana waombanga lino yaombelanga pamwi na Yesu umu mulimo wa kusimikila, nupya i vyani vino tungasambililako?

Yoana wali a “muka Chuza uwali musika wakwe Helodi.” Chuza wangalilanga imilimo icindame umu ng’anda yakwe Helodi. Yoana nawe wali apa yanaci yano Yesu wapozizye indwala. Yoana na anaci yauze yapitilanga pamwi na Yesu na atumwa yakwe.—Luka 8:1-3

Ya simapepo aYuda yasambilizyanga ukuti anaci yataalinzile ukuombela pamwi na onsi yano yatali alupwa yao nanti sile ukupitila pamwi nayo. Nupya aYuda aonsi yatalandanga na anaci pa nsita itali. Nomba nandi icakuti kwali intambi zii, Yesu wene wazumilizye Yoana na anaci yauze ataile, ukuti yangaombela pamwi nawe.

Yoana wasoolwilepo ukuya pamwi na Yesu na atumwa yakwe nandi icakuti limwi ya lupwa, ya simapepo na ya cuza yakwe nga yamusekanga. Yonsi yano yalondanga ukuombela pamwi na Yesu yali nu kuleka ukucita vimwi–vimwi vino yacitanga lyonsi pakuti yaombe ningo. Yesu walanzile ukuti yaaya amukonkanga ali yano yali ulupwa lwakwe pano watile: “Mayo na ina yane ayao akauvwa mazwi yakwe Leza nu kuyayela.” (Luka 8:19-21; 18:28-30) Uzye musikomeleziwa ukumanya ukuti Yesu waya umu piipi na yaayo akaipelesya apakuti sile yatandike ukumulondela?

Yoana na anaci yauze yatumikilanga Yesu na atumwa yakwe 12, ‘ukuomvya icuma cao.’ (Luka 8:3) Kalemba umwi walanzile ukuti: “Luka pakulemba vii atalozyanga umukuti anaci yaa yelekanga sile ivyakulya, ukufula imbale, nandi ukusuma vyakuzwala. Limwi tungati avino yacitanga . . . , lelo Luka wene ataalandapo.” Nupya anaci yaa, limwi yaomvyanga impiya zyao, alino na vyuze vino yaakweti kukwazwilizya Yesu na atumwa.

Lino Yesu na atumwa yakwe yaombanga umulimo wa kusimikila yataombanga umulimo na uze uwa kuzanilamo impiya. Fwandi tutange tuti, lyonsi yakwatanga impiya zyakukalilamo ivyakulya, alino na vyuze ivyalondekwanga pakuti limwi antu 20 yangakwana. Nandi icakuti insita zimwi antu yaayapokelelanga umu mang’anda yao, Yesu na  atumwa yakwe yakweti “cipao,” fwandi asi lyonsi lino yayasakamalanga umu mang’anda ya antu. (Yoa.12:6; 13:28, 29) Limwi Yoana na anaci yauze, yasangwilangako impiya izyakuomvya uku vintu ivyalondekwanga.

Antu yamwi yakalanda ukuti anaci aYuda yataakwatanga impiya. Lelo nga twawelenga umu malyasi ya mpiti amu nsita ya atumwa, yakalangilila ukuti umwanaci wakwatanga icuma umu nzila izipusane-pusane wakwe: (1) ukupyana ivyuma vyakwe isi ndi wafwa ukwaula ana aonsi, (2) ukupeelwa sile cuma, (3) ukupeelwa impiya ngi cakuti umonsi wamuta, (4) ukusyala ni cuma cino iya wakweti ndi wafwa, nandi (5) ukuzana impiya pa milimo ino waomba.

Kwaula nu kutwisika, alondezi yakwe Yesu yasangwilangako vyonsi vino yakwanisyanga. Pa yalondezi yakwe Yesu, limwi pali na anaci akweti ivyuma. Yamwi yakati Yoana wali ni cuma, pano wali a muka musika wakwe Helodi. Fwandi vino Yoana wali uwa cuma, limwi u wapezile na Yesu umwingila uuwa uwa mutengo uwapanzilwe ukwaula umulundo. Umwanaci umwi walemvile ukuti umwingila uuwa wali uwa mutengo icakuti “aci ya alondo ya nswi nga yataakwanisye ukuukala.”—Yoa. 19:23, 24.

Malembelo yatalandapo ukuti Yoana wasangwilangako impiya. Lelo wasangwilangako vyonsi vino wakwanisyanga, nupya tungasambililako vimwi kuli aliwe. Sweineco tukaipingwila ukusangwilako vino tungakwanisya pakuti twatungilila umulimo wa Wene. Fwandi Yeova wene akaalonda twapeela ni nsansa vino tungakwanisya ukwaula ukupatikiziwa.—Mate. 6:33; Mako 14:8; 2 Kol. 9:7

Yoana na anaci yauze, “yalondelanga Yesu lino wali ku Galile, nu kumutumikila. Kwali anaci na yauze aingi aizile nawe ku Yelusalemu,” limwi yonsi yaa akuno yaali lino Yesu umozilwe. (Mako 15:41) Lino yafumizye umwili wakwe Yesu apa cimuti ukuti yakamuziike, “anaci aalondile Yesu kufuma ku Galile yapita na Yosefu kuya lola ilindi na vino icala cakwe Yesu calalikwa. Alino yaswilila kumwao, yateyanya vya mununko usuma nga na mafuta acinunu cisuma.” Anaci yaayo, Luka wayalumbula amazina ukuti pali, “Maliya uwa ku Magadala, Yoana na Maliya nyina wakwe Yakobo” yaaswilile ukwi lindi lyakwe Yesu apacisila ca wanda wi sabata nupya yaweni angeli aayanenyile ukuti watazyukuka.—Luka 23:55–24:10.

Limwi Yoana na nyina wakwe Yesu alino na ato yakwe Yesu aonsi, yali pamwi na asambi aakongine umu Yelusalemu pa wanda uwa Pentekositi umu 33 C.E. (Mili. 1:12-14) Pa mulandu wakuti muka Yoana waombanga kuli Helodi, limwi Yoana wamanyile ivingi pali Helodi, fwandi tungati u wanenanga Luka ivingi pali aliwe. Nupya pali ya kalemba ilandwe lisuma yonsi, Luka sile uwalumbula izina lya mwanaci wii Yoana.—Luka 8:3; 9:7-9; 23:8-12; 24:10.

Ilyasi lyakwe Yoana lyatwazwa ukusambililako vimwi vino tungaelenganyapo lyonsi. Watumikile Yesu na maka yakwe yonsi. Afwile wayanga sana nu luzango nga walola ukuti impiya zino wasangwilangako zyavwilizyanga Yesu na atumwa yakwe 12, alino na asambi yauze ukuti yangatwalilila ukusimikila capamwi. Yoana watumikile Yesu ningo nupya wali na ucisinka kuli aliwe nu mu nsita ya macuzi. Fwandi cingazipa ukuti anaci aina Klistu ndakai yaamukolanya.