1, 2. Uzye Yeova watusambilizya uli ukumutemwa?

ANA yakasambilila ningo kuli isi uwaya ni miyele isuma. Ndi cakuti isi akulanga ukutemwa uku yana yakwe, ala akuyasambilizya ukuti nayo yaaya nu kutemwa. Kutaya ali wensi wino watutemwa wakwe vino Tata witu Yeova watutemwa. Fwandi tukasambilila ukuya nu kutemwa “pano Leza u watandike ukututemwa.”—1 Yoane 4:19.

² U munzila ci muno Yeova walangilila ukuti u “watandike ukututemwa?” Baibo ikatunena ukuti: “Lino twali tucili yakaifya Klistu watufwilile.” (Loma 5:8) Yeova Tata witu uwaya nu kutemwa, watupeezile umwana wakwe ukuti aize atukulule uku maifyo ni mfwa. Yeova watupeela uwila ucindame uno ukalenga ukuti tupalame kuli aliwe nu kumutemwa. Pa mulandu wakuti Yeova watupeela uwila ucindame watulangilila vino naswe tungaya nu kutemwa, ukuluta ukuya nu lusoko na ukaitemwe.—1 Yoane 4:10.

3, 4. Uzye tungalanga uli ukuti twatemwa Yeova?

³ Ukutemwa ali miyele icindame sana ino Yeova wakwata. Fwandi tunguvwikisya sana umulandu uno Yesu walanzile ukuti isunde ilyacindamisya ilyakuti: “Uwatemwa Mwene Leza wako nu  mwenzo wako onsi, nu umi wako onsi, na mano yako onsi, na maka yako yonsi.” (Mako 12:30) Yeova akaalonda ukuti tumutemwe nu ‘mwenzo witu onsi.’ Yeova atanga auvwe ningo ndi cakuti twatemwisya umuntu nanti sile vyuze ukuluta vino twamutemwa. Tutalinzile ukutemwa sile Yeova umu mwenzo. Lelo akaenekela ukuti tulinzile nu kumutemwa na ‘mano itu yonsi’ alino na ‘maka itu yonsi.’ Ci cikupiliula ukuti tulinzile ukulanga ukuti twatemwa Yeova muli vino tukaelenganya alino na muli vino tukacita vyonsi.—Welengini Mika 6:8.

⁴ Fwandi tulinzile ukutemwa Yeova muli vyonsi vino tukucita na vyonsi vino twakwata. Ndi cakuti tukwelenganya pali Yeova muli vyonsi vino tukucita, ala tukumulanga ukuti twamutemwa umu cumi. Umwisambililo ilyafumileko twasambilile apa vintu 4 ivikalanga vino Yeova watemwa sana ana yakwe. Fwandi lekini naswe tusambilile pali vino tungalanga ukuti twatemwa sana Yeova.

5. Ndi cakuti twelenganya pali vyonsi vino Yeova watucitila, uzye ivyani vino tulinzile ukulondesya ukucita?

⁵ Ndi cakuti umwi wamipela uwila, mukalanga ukuti imutaizya sana. Nupya pa mulandu wakuti imucindika uwila uwo, musiwika sile lelo mukauomvya. Yakobo walemvile ukuti: “Wila usuma onsi, ni cakupeelwa cifumaluke consi cikafuma ukwiyulu, kuli Tata, kaumba wino uwaumvile ivya mwiyulu vyonsi vino vikapeela luswepo. Wene aliumwi lyonsi, nupya luswepo lwakwe lusyazima nanti panono.” (Yakobo 1:17) Tukataizya wakwe cimwi pano Yeova akatupeela vyonsi vino tukaalonda umu umi witu onsi nu kuya ni nsansa. Twamanya ukuti umu cumi Yeova watutemwa, fwandi tukalonda twamulanga ukuti naswe kwene twamutemwa. Uzye mwemo mutange mutemwe ukucita vivyo?

6. I vyani vino Aina Izlaeli yaali nu kutwalilila ukucita apakuti Yeova ayapolelela?

⁶ Aina Izlaeli yapokelile ivintu ivingi ivisuma sana ukufuma kuli Yeova. Pa myaka iingi wayatungululanga ukuomvya masunde yakwe, nupya wayapeelanga vyonsi vino yalondekwanga. (Malango 4:7, 8) Aina Izlaeli yaali nu kulanga ukuti yakataizya pali vino Yeova wayacitilanga nga yakukonka amasunde yakwe. Yeova wayanenyile ukuti yalinzile ukumupeela ‘ivya uzombozi vyao ivyankolelo.’ (Kufuma 23:19) Aina Izlaeli yaamanyile ukuti ndi cakuti yatwalilila ukuvwila Yeova nu kumuombela nu mwenzo onsi alino wali nu kutwalilila ukuyapolelela.—Welengini Malango 8:7-11.

7. Uzye tungapeela uli “icuma” citu ukulanga ukuti twatemwa Yeova?

⁷ Naswe kwene ndakai tungalanga ukuti twatemwa Yeova nga tukupeela “icuma” citu kuli aliwe. (Mapinda 3:9) Tukacita vii nga tukumucindika ukuomvya vino twakwata. Limwi tungasangulako impiya pakuti tutungilile umulimo wa Wene apa cilongano citu alino nu mu nsi yonsi. Nandi icakuti twakwata ivingi nanti utunono, swensi tungaomvya vili vyonsi vino twakwata ukulanga ukuti twatemwa Yeova. (2 Kolinto 8:12) Lelo kwaya inzila na zyuze zino tungalangilamo ukuti twatemwa Yeova.

8, 9. Iinzila ci na yuze ino tungalangilamo ukuti twatemwa Yeova? I vyani vino ya Mike nu lupwa lwao yacisile?

⁸ Yesu watusambilizye ukuti twalonda Uwene wakwe Leza inkoleelo nu kuti tutalinzile ukusakamikwa pa vyakulya ni vyakuzwala. Tata witu uwa mwiyulu watulaya ukuti  alatupeela vyonsi vino tukalonda. (Mateo 6:31-33) Twataila nu kumanya ukuti Yeova alatwalilila ukucita vino watulaya. Pano twamanya ukuti nga twatemwa umwi, ala twamutaila. Fwandi i cacumi ukuti ndi twataila sana Yeova, ala tulaamulanga ukuti twamutemwa sana. (Masamu 143:8) Fwandi tungayuzya tuti: ‘Uzye mapange yane na vino nkaomvya insita yane na maka vikalanga ukuti natemwa Yeova? Uzye cila wanda nkataila ukuti Yeova amampeela vino nkulonda?’

⁹ Ya Mike nu lupwa lwao yataile sana Yeova. Lino ya Mike yali ance yalondanga ukuyaombako umulimo wakusimikila uku mpanga yuze. Ya Mike iizile iyatwala nu kukwata ana yaili, nupya kwene yatatile ukwelenganya apakuya umu kuombela uku mpanga yuze. Lino ya Mike nu lupwa lwao yawelenzile pa ina na ya nkazi aombelanga kuno kwalondwekwanga ya kasimikila aingi, nayo yapingwilepo ukuti yangangupazya imikalile yao pakuti nayo yace yakaombeko. Yakazizye ing’anda yao nu kukukila uku ncende yuze inono. Ya Mike yacefizyeko ni miombele ya uculuzi uno yaombanga nu kutandika ukuombela uku mpanga yuze ukuomvya Intaneti. Lyene ya Mike nu lupwa lwao yakukile uku mpanga yuze, nupya yaile iyaomba umulimo wakusimikila ni nsansa sana. Ya Mike yalanzile ukuti, “Alino twamanyile usuma nu upiliulo wa mazwi akazanwa api lembelo lyakwe Mateo 6:33.”

10. U mulandu ci uno cazipila ukwelenganyapo sana pali vino tukasambilila pali Yeova wakwe vino Umwene Davidi wacisile?

¹⁰ Umwene Davidi walemvile ukuti: “Amayulu yakalanda apa lulumbi lwakwe Leza, ulwelele lukaalazya apa lwalala vicitwa vya minwe yakwe!” Nupya walemvile nu kuti: “Amasunde yakwe [Yeova] yaya alungame. Yakapeela umi upya. Upinguzi wakwe [Yeova] u wa cumi. Ukapela amano kuli yao akayalonda.” Lino Davidi welenganyanga pa masunde yakwe Yeova yano yalungama nu uumbo wakwe, calenzile ukuti apalame kuli Yeova nupya walondesyanga ukulanga Yeova ukuti wamutemilwe. Walanzile ukuti: “Sungala upokelele amazwi ya pa kanwa kane, na melenganyo amu mwenzo wane. We [Yeova] we ciliwe cane na katuula wane.”—Masamu 19:1, 7, 14.

11. Uzye tungaomvya uli icumi cino twasambilila ukulanga ukuti twatemwa Yeova? (Lolini cikope ca kutandikilako.)

¹¹ Ndakai, Yeova akatusambilizya ivingi sana pali aliwe, akatusambilizya ukulonda kwakwe, pa uumbo wakwe, alino na pali Baibo. Antu amu nsi ii yakakomelezya yauze ukuya uku masambililo aku yuniveziti aakalenga ukuti antu yate ukutemwa Yeova. Lelo Yeova wene asitukomelezya sile ukusambilila, lelo akatwazwa nu kuya na mano. Akaalonda ukuti vino tukusambilila vyatwazwa nu kwazwa Yauze. (Mapinda 4:5-7) Yeova akaalonda ukuti twanenako yauze kuti, ‘yamanye icumi’ pakuti yangiza yapusuke. (1 Timoti 2:4) Tukalanga ukuti twatemwa Yeova na antu lino tukusambilizya antu aingi papezile amaka itu pa Wene wakwe Yeova na vino  ulacitila antunze.—Welengini Masamu 66:16, 17.

12. Uzye uwa cance walanzile uli pa wila uno wapokelile ukufuma kuli Yeova?

¹² Na acance nayo kwene yalinzile ukwelenganya sana pali vino Yeova wayasambilizya nu kuyapeela. Shannon acili akaelenganya pali vino uvwile lino wazanyilweko uku ukongano wa citungu lino wali ni myaka 11 nu muto wakwe umukazyana uwali ni myaka 10. Umwaka uuwa umutwe wa ukongano wa citungu watangi ‘Ukuipelesya Muli Ukapepa’ (Godly Devotion), acance yonsi yakweti icifulo iciiyele kuno yayanenyile ukwikala, na pa yance yaa pali Shannon nu muto wakwe. Pa kutandika uvwile intete. Lyene wizile azunguka lino waweni ukuti ance yonsi yayapela ibuku lyakuti Ifipusho Abacaice Bepusha—Ifyasuko Ifingabafwa. Uzye Shannon uvwile uli pa wila uu usuma ukufuma kuli Yeova? Walanzile ukuti: “Alino nizile manya ukuti Yeova umu cumi akuno waya nupya wantemwa sana. Kwene twasyuka, nupya cikatuletela uluzango ukukwata Tata witu Yeova, aakatupeela mawila asuma!”

13, 14. Uzye tulinzile ukucita uli ndi cakuti Yeova watusunda, nupya u mulandu ci?

¹³ Baibo ikatucelula ukuti: “[Yeova] akasunda yano watemwa, ndi vino umukwasi akasunda umwanakwe umonsi wino watemwa.” (Mapinda 3:12) Ndi cakuti tuuvwila ukusunda kwakwe Yeova twamuzumilizya nu kutusambilizya, tukamanya ukucita ivisuma nupya  tukaya nu mutende. I cumicumi, “Lino tukasundwa cikaloleka kwati icintu cakutuletela ulanda, asi nsansa.” (Ayebulai 12:11) Lelo nandi caya vii, uzye tulinzile ukucita uli ndi cakuti Yeova watusunda? Tutalinzile ukusuula ukusunda kwakwe Yeova nandi sile ukutwalilila ukusoka nga tuvwa vimwi vino tutatemilwe. Twatemwa Yeova, acino tukauvwa lino akutusunda nupya tukasenuka muli vino vikulondwekwa.

¹⁴ Mu nsita yakwe Malaki, Ayuda aingi yatuvwilile Yeova. Yataasakamile ndi cakuti impolelwa zino yapeelanga Yeova zyali izisuma nanti foo. Acino Yeova wizile ayakalipila sana pali vii vino yacitanga. (Welengini Malaki 1:12, 13.) Yeova wayakalipilanga pa cili cimwi kwene amaila aingi, lelo yatamuvwilile. Fwandi wizile ayanena ukuti: “Ndamuponyezya icitipu. Ndaponyezya icitipu pa vintu vino mukapokelela vyakutungilila wikazi winu.” (Malaki 2:1, 2) I cacumi ukuti ndi twatwalilila ukukana ukusunda kwakwe Yeova nu kutwalilila ukwelenganya ukuti amasunde yakwe Yeova yatacindama, ucuza witu na Yeova ungasila.

15. I myelenganyizizye ya musango cii ino tutalinzile ukuya nayo?

¹⁵ Antu amu nsi ii yakwe Satana yakakomelezya antu yauze ukuya ni cilumba na ukaitemwe. Antu aingi yasilonda ukuyakalipila nandi sile ukuyanena ivyakucita. Yamwi yasizumila ukusunda ukufuma pansi ya mwenzo. Swemo tutalinzile ukuya vivyo. Baibo ikatucelula ukuti: “Mutakolana na antu amu nsi mu miyele yao.” Lelo, tulinzile ukumanya vino Yeova akalonda kuli sweswe nu kucita vino vikamuzanzya. (Loma 12:2) Yeova akaomvya iuvi lyakwe ukutusunda pa nsita ilinge. Lyonsi, iuvi lyakwe Yeova likatucelula vino aonsi na anaci yalinzile ukulola yano yatatwalana nayo, ukusoolola ningo ivyuza, na vino tungasoolola ningo ivya kulezezyamo icitendwe. Ndi cakuti twazumila vino Yeova akutusunda nu kusenuka,  alino nu kutandika ukucita vino akaalonda, ala tukulanga ukuti tukataizya pali vino akatutungulula nupya ala twamutemwa sana.—Yoane 14:31; Loma 6:17.

16, 17. (a) U mulandu cii uno tulinzile ukumanya vino Yeova akwelenganya pali vimwi lino tutatala twapingulapo? (b) I vyani vino Aina Izlaeli yacisile ukuluta ukutaila Yeova?

¹⁶ Ana anono yakataila avyazi yao ukuti a yano yangayazwa nu kuyacingilila. Na ikolo kwene insita zimwi yakaya uku ya vyazi yao ukuti yayazwe. Yakamanya ukuti nandi icakuti yangaipingwila ivya kucita, avyazi yao yangayazwa ukupingulapo ningo. Tata witu Yeova akatuzumilizya ukuipingwila ivyakucita. Lelo pa mulandu wakuti twamutaila nupya twamutemwa, lyonsi lino tutatala twapingulapo ivyakucita, tukalonda ukuti atwazwe nu kwezya ukumanya vino wene akwelenganya pali vino tukulonda tucite. Ndi cakuti twataila Yeova, alatupeela umupasi wakwe pakuti utwazwe ukucita icisuma.—Filipi 2:13.

¹⁷ Umu nsita yakwe Samueli, Aina Izlaeli yayacimvizye uku ina Filisiti. Yataalenzile uwazwilizyo kuli Yeova, lelo yapingwilepo yati: “Katuye tukasende Mbokosi ya Upangano ku Syilo pakuti twapita nayo nga iyatutuulanya ku maka ya anisi itu.” I cani icacitike pali vino yapingwile? “Kwali ukucimviwa kukulu wakwe cimwi, nga asilika ya pa ngazo, aina Izlaeli akomilwe yali amazimbi amakumi yatatu (30,000). Pali pakupoka Mbokosi ya Upangano yakwe Leza.” (1 Samueli 4:2-4, 10, 11) Aina Izlaeli yelenginye ukuti nga yasenda Mbokosi ya Upangano yakwe Leza, ale lyene Yeova amayacingilila. Lelo yatalenzile uwazwilizyo kuli Yeova nandi ukutala yuzye vino wene welenganyanga ukuti yangacita. Yene yacisile vino yalolanga aeneco ukuti vili sile ningo, nupya yacuzile wakwe cimwi.—Welengini Mapinda 14:12.

18. Uzye Baibo ikatusambilizya uli ukutaila Yeova?

¹⁸ Kalemba wa masamu u wataile sana Yeova nu kumutemwa, walemvile ati: “Nemo nkanataila sile Leza, pano nemo awino namalumbanyanga ndi vino nacitanga mpiti, pano ali katula wane na Leza wane. Umwenzo wane nemo ukukulukunta wakwe cimwi, ali cino fwandi, nkanalukukwiusya we Leza wane.” (Masamu 42:5, 6) Uzye namwe, a vino mukauvwa pali Yeova? Uzye mukayuvwa ukuti mwapalama kuli aliwe nu kumutaila? Limwi mungasambilila ukumutaila sana. Baibo ikatuneena ukuti: “Uwataila muli [Yeova] nu mwenzo wako onsi, utaezya ukutaila amano yako foo. Waiusya [Yeova] muli vyonsi vino ukucita, nga nawe amakulanganga muno ungacitila pe.”—Mapinda 3:5, 6.

19. Uzye mungacita uli pa kulanga ukuti mwatemwa Yeova?

¹⁹ Pa mulandu wakuti Yeova watandikilepo ukututemwa, watusambiilizya vino naswe tungamutemwa. Lekini twaelenganya lyonsi pali vino watucitila na pali vino watutemwa. Nupya lekini twamulanga ukuti twamutemwa nu mwenzo witu onsi, umi witu onsi, amano alino na maka itu yonsi.—Mako 12:30.