LINO nafisile imyaka 9, natiile ukukula. Nanti icakuti ndakai indi ni myaka 43, ciimo cane caya sile miita wenga. Lino avyazi yane yaweni ukuti naata ukutalimpa, yankomeliizye ukuti naombesya, pakuti ntaelenganya lyonsi pa wipi wane. Ali vino napanzile akantemba apa ng’anda, pano natantikanga ivizao vya kukazya. Naziifyangapo lyonsi icakuti antu aingi yatemilwe ukwiza umu kukala vizao.

Kuya kwene ukuombesya kuno naombesyanga kutasenwile ivintu vyonsi. Nali ncili nene mwipi viivi kwene, nupya cantalilanga ukuomba utuntu utwanguke, wakwe ukufilwa ukufikila pa tebulo pano yakaakazizya ivintu umu sitolo. Cali kwati nemo pasi cino yampangiile, kwati vyonsi yapangiile sile atali. Nuvwanga sana uyi, lelo ivintu vyasenwike lino nali ni myaka 14.

Uwanda umwi anaci yaili ya Nte yakwe Yeova yakazile vizao pa kantemba kane, nupya yanguzizye ngi cakuti ningatemwa ukusambilila Baibo. Lyene nizile iniiluka ukuti vino namanyile Yeova nu kulonda kwakwe, ali cintu icicindame ukuluta ukusakamala pa ciimo cane. Ukwelenganya pali vii kwangazwile sana. Ilembelo lyakwe Masamu 73:28 aali lino niizile intemwa sana. Amazwi aakutandikilako umu cikomo 28 yakati: “Natemwisya ukukupalamila, we Leza.”

Lyene twizile itukuuka pamwi nu lupwa ukufuma uku Côte d’Ivoire ituya uku Burkina Faso, nupya vintu vyasenwike. Kuno nafumile, namanyiikwe uku yantu pano yandolanga ilingi pa kantemba kane. Lelo kuno twakuukile, nali umwenyi, nupya aingi yandolanga ukuti nene mupusaneko. Antu yandolekesyanga sana, fwandi pa milungu iingi niikalanga sile umu ng’anda. Lyene niizile iniusya vino natemwisizye ukupalamila kuli Yeova. Acino fwandi nalembiile iofesi lyakwe ya Nte yakwe Yeova, nayo yantumile umuntu wino niizile intemwa. Yatumile misyonali uwi zina lya kuti Nani, uwizile umu kuntandalila ala ali pali onda wakwe uwa matayala yatatu.

Umuseo uwali uku ncende iiyo, wali uwipe sana pano mwali umu canga, nupya icisiku mwayanga sana matipa. Misyonali wii, waponanga pali onda yakwe imiku iingi lino wizanga umu kunsambilizya Baibo, lelo atatiile ukwiza. Uwanda umwi wanenyile ukuti ansendeko uku kulongana. Natandike ukwelenganya ukuti, nga nafuma pa ng’anda nupya antu yamaya yakandolekesya. Alino nupya ukunsenda pali onda kwali nu kulenga Nani camutalila ukupindulula, pano ale lyene onda wafinilako. Nanti ciye vivyo nazumile ukuti ansende, pano niwisye amazwi na yauze aya pa cikomo  28 ci lembelo lyakwe Masamu akuti: “Akuli wewe we [Yeova] akuno nemo nazina.”

Insita zimwi twaponelanga umu matipa, lelo pa mulandu wakuti twatemilwe ukulongana, tutaasakamalanga. Ala vino antu yandolekesyanga lino nali uku ng’anda, vyapusiine sana ni nsansa zino naile nzana uku ina na yankazi pa Ng’anda ya Wene! Lino papisile imyezi 9, nawatiziwe.

Amazwi na yauze aya umwi lembelo lino natemwisizye sana, yakati “Apakuti inalumbilizya vyonsi vino wemo ukacita.” Kuya kwne namanyile ukuti umulimo wa kusimikila wali nu kuya iintazi ikulu kuli nene. Nkaiusya lino naile umu kusimikila uku ng’anda ni ng’anda umuku wa kutandikilapo. Yonsi ance na ikolo yandolekesyanga, nupya yankonkanga, ala yakunseka. Ala cambayanga, lelo lino niwisye ukuti antu yaaya, yalondekwanga Insi ipya wakwe vino nani nailondesyanga, nazizimizye.

Pakuti vintu vyangupaleko, nalonzile injinga yakupisizya na makasa. Wino twaombanga nawe umu mulimo wa kusimikila wansunkanga pa kulemela umulundu lyene nga twafika pa mateelo nga alino atolokela ala injinga ikuikunkulukila. Nanti icakuti umulimo wa kusimikila watazile pa kutandika, niizile ntandika ukuya ni nsansa sana, icakuti umu 1998, nizile inja painiya wa nsita yonsi.

Natungululanga masambililo ya Baibo aingi, nupya antu 4 pali yaayo, izile iyawatiziwa. Alino nupya nkazi yane wenga wizile atandika ukusambilila icumi! Nga nuvwa vino antu yauze yalundulukanga, cankomelezyanga ndi cakuti vintu vyatala. Uwanda umwi ala nalwala Malelya, napokeliile kalata ukufuma uku Côte d’Ivoire. Natandike isambililo lya Baibo kuli kasukulu umwi uwali pa yuniveziti umu Burkina Faso, nupya nasiilile umwina umwi kuti awino yasambilila nawe. Lino papisile insita kasukulu wiyo wizile aya uku Côte d’Ivoire. Niizile intemwa ukuvwa ukuti umuntu wiyo a kasimikila uwaula ukuwatiziwa!

Uzye nkacita uli pa kuisakamala? Akaungwe akakaazwilizya alemale, kansambilizye ivya kusuma. Lino wenga pali yano yansambizyanga waweni miombele yane, walanzile ati, “tumakusambilizya ivya kupanga sopo.” Nupya avino yacisile. Lyene nkapanga sopo, uwa kufulila alino nu wa kufulalila. Antu yatemwa sana sopo wino nkapanga nupya yakanenako na yauze ukuti sopo wino nkapanga u musuma sana. Nkapisyanya sopo wiyo ukuomvya onda wane uwa matayala yatatu, ala nkukazya.

Ica ulanda icakuti, umu 2004, natiile upainiya pa mulandu wakuti itundu lyatandike ukuwaya sana. Nomba nanti ciye vivyo umu mulimo mwene nayanga sana.

Antu yakati namanyikilwa uku kumwentula. Icacumi mfwile sile ukuya ni nsansa, pano ukupalamila kuli Leza akuno natemwisya sana.—Asimike ilyasi lii, a Sarah Maiga.