“Tukuzizye Utailo”
“Ungazwe kuti nkwatisye utailo!”—MAKO 9:24.
INYIMBO: 54, 24
1. U mulandu ci uno ukukwata utailo kwacindamila? (Lolini icikope cakutandikilako.)
LIMWI mwatala mwayuzyapo ukuti, ‘Uzye Yeova alampususya umu ucuzi ukulu cuze?’ Umutumwa Paulo walanzile ukuti imiyele icindame sana ino tulinzile ukukwata pakuti tukapusuke, uutailo. Walanzile ati: “Kusi umwi angazanzya Leza kwaula kukwata utailo.” (Ayebulai 11:6) Limwi cii cingaloleka kwati icanguke, lelo icisinka icakuti “asi yonsi akataila.” (2 Tesalonika 3:2) Malembelo yaa yoili yakaatwazwa ukumanya vino cacindama ukukomya utailo.
2, 3. (a) Uzye utailo witu wacindama uli? (b) I vyani vino tumasambilila?
2 Umutumwa Petulo walanzile pa utailo uno ‘weziwa.’ (Welengini 1 Petulo 1:7.) Ucuzi ukulu cuze wati upalama wakwe cimwi, fwandi tulinzile ukukwata “utailo” pakuti tukatuulwe. (Ayebulai 10:39) Acino fwandi tulinzile ukuombesya pakuti tukomye utailo witu. Tukulonda tukaye pali yaayo yano Yesu Klistu, Umwene witu, alapeela icilambu lino alasokololwa. Acino, wakwe vino muntu umwi walenzile Yesu ukuti amukuzizye utailo, naswe kwene tungalanda tuti: “Ungazwe kuti nkwatisye utailo!” (Mako 9:24) Nanti wakwe vino atumwa yacisile, naswe tungalanda tuti: “Tukuzizye utailo.”—Luka 17:5.
3 Umwi lyasi lii tumalanda pa mauzyo yaa: Uzye tungakomya uli utailo? Tungalanga uli ukuti twakwata utailo ukome? Alino nupya u mulandu ci uno tungasininkizizya ukuti Leza alatupeela utailo ndi twamulenga?
YEOVA AKATEMWA NGA TUKUKOMYA UTAILO WITU
4. Aantu ya musango ci angalenga tukomye utailo?
4 Utailo wacindama sana, ali cino Yeova watupeelela amalyasi aalembwa muli Baibo pa yantu yano yali nu utailo. Malyasi yaa ‘yalembiilwe ukutusambilizya.’ (Loma 15:4) Amalyasi yano tukawelenga pali Abulaamu, Sala, Isaki, Yakobo, Mose, Laabu, Gidyoni, Balaki, alino na yauze, yangalenga tukomye utailo. (Ayebulai 11:32-35) Ukulunda pa yantu aliko mpiti, na ndakai twakwata malyasi pa ina na yankazi autailo. * (Lolini futunoti.)
Ndakai twakwata malyasi pa ina na yankazi autailo
5. Uzye Eliya walangizye uli ukuti wataile sana Yeova, nupya naswe tungayuzya tutuuli?
5 Umuntu umwi uwalembwa muli Baibo uwali nu utailo, a Eliya. Lino mukwelenganya pali vino wali nu utailo, lekini tulole ivintu 5 muno walangizye ukuti wataile sana Yeova. (1) Lino Eliya wanenyile Umwene Aabu ukuti Yeova wali nu kuleta icilala, walanzile ukwaula nu kutwisika ati: “Nemo nalapa mwi zina lyakwe [Yeova], Leza wa umi wa ina Izlaeli, wino nkatumikila ukuti apa myaka iili nanti itatu kutalatala kuye ulumi nanti imvula suka sile ince mvwange.” (1 Yamwene 17:1) (2) Eliya wataile ukuti Yeova wali nu kumupeela, alino nu kupeela yauze vino yalondanga, umu nsita ya cilala. (1 Yamwene 17:4, 5, 13, 14) (3) Eliya nupya wataile ukuti, Yeova wali nu kutuutulula mwana umonsi wakwe mukamfwilwa. (1 Yamwene 17:21) (4) Wamanyile ukwaula nu kutwisika ukuti Yeova wali nu kutuma umoto, uwali nu koca impolelwa apa mwamba wa Kalimeli. (1 Yamwene 18:24, 37) (5) Na lino imvula itali itonye, Eliya wanenyile Aabu kwaula nu kutwisika ati: “Pitanga, kalye, nemo nuvwa kuno imvula ikuuza.” (1 Yamwene 18:41) Fwandi vii vino twalola vino Eliya wacisile, tungayuzya tuti, ‘Uzye utailo wane wakoma ndi vino wakwe Eliya wali?’
TUNGACITA ULI PAKUTI TUKOMYE UTAILO WITU?
6. I cani cino Yeova angatupeela icingatwazwa ukukomya utailo?
6 Pa mulandu wakuti tutanga tukomye utailo witu sweineco, tulinzile ukupepa kuli Leza pakuti atupeele umupasi wakwe. U mulandu ci? Pano utailo waya pa miyele ino umupasi wa muzilo ukalenga tukwate. (Galatiya 5:22) Fwandi nga tukulenga ukuti Leza atupeele umupasi wa muzilo wakwe vino Yesu walanzile, utailo witu ungaya ukome. Yesu watulavile ukuti Yeova alapeela “mupasi wamuzilo kuli yao akamulenga.”—Luka 11:13.
Nga tukulenga ukuti Leza atupeele umupasi wa muzilo wakwe vino Yesu walanzile, utailo witu ungaya ukome
7. Londololini vino tungacita pakuti tutwalilile ukuya nu utailo ukome.
7 Ngi cakuti twakwata utailo ukome, tulinzile ukutwalilila ukuusungilila. Utailo waya kwati umoto. Ngi cakuti alino twakozya umoto, kukaya sana icimbilimbili. Nomba ngi cakuti tusikwikapo inkwi, umoto ungatandika ukuzima panono-panono mpaka iusyala itwi litupu. Lelo ngi cakuti lili lili tukwikapo inkwi, ungatwalilila ukwaka. Ali vino nu utailo witu waya. Nga twatwalilila ukuwelenga nu kusambilila Izwi lyakwe Leza, tulatemwa sana Baibo na Yeova. Lyene tulatwalilila ukuya nu utailo nupya utailo witu ulakoma wakwe cimwi.
8. I cani icilamwazwa ukutwalilila ukuya nu utailo ukome?
8 Mutalinzile sile ukwikalilila pali vino mwasambilile lino mutali muwatiziwe. (Ayebulai 6:1, 2) Kusambilila pa mausesemo yano yafikiliziwa mpiti, kulamwazwa ukutwalilila ukuya nu utailo ukome. Nupya mungaomvya Baibo ukulola ndi cakuti utailo winu uukome nanti foo.—Welengini Yakobo 1:25; 2:24, 26.
9, 10. Uzye utailo witu ukakomeleziwa uli ndi cakuti (a) tukusoolola ya cuza aasuma? (b) tukuya umu kulongana lyonsi? (c) tukukosoola ilandwe lya Wene?
9 Umutumwa Paulo wanenyile Aina Klistu ukuti, “Utailo uno mukweti waakomya utailo wane, nani utailo uno nakwata waakomya utailo winu.” (Loma 1:12) Uzye cii cikusenula cani? Nga tukusumba insita pamwi na ina na yankazi, tungaakomelezyanya. Nupya nga tukusumba insita ukuya pamwi na yano utailo wao ‘weziwapo’ ali lino tungaakomeleziwa na sana. (Yakobo 1:3) Ya cuza aipe yangatoononela sile utailo, lelo ya cuza asuma yene yangakomya utailo witu. (1 Kolinto 15:33) Ali mulandu uno tulinzile ukulazanwa lyonsi uku kulongana. Nga tuli uku kulongana tungatwalilila ‘ukukomelezyanya.’ (Welengini Ayebulai 10:24, 25.) Nupya malyasi akalandwa lino tuli pa kulongana nayo yangatwazwa ukuya nu utailo ukome. Pano Baibo ikalanda ukuti, “umuntu akataila pa kuvwa Ilandwe.” (Loma 10:17) Fwandi muyuzye mweineco muti, ‘Uzye ukuya umu kulongana ali cintu cino nkacita lyonsi umu umi wane?’
10 Nupya tukakomya utailo witu, ndi cakuti tukukosoola nu kusambilizya yauze pi landwe lya Wene lya muli Baibo. Wakwe vino Aina Klistu amu nsita zya yatumwa yacitanga, tukasambilila ukutaila Yeova nu mwenzo onsi nu kulanda umu kusipa nga vimwi vyatucitikila.—Milimo 4:17-20; 13:46.
11. I cani icalenzile ukuti Kalebu na Yoswa yakwate utailo ukome, nupya tungacita uli pakuti tuyakolanye?
11 Tukataila sana Yeova ndi cakuti twelenganya vino akaatwazwa na vino akaasuka mapepo itu. Vii ali vino cali na kuli Kalebu na Yoswa. Yalangiliile ukuti yataile Yeova lino yaile yendezya Impanga ya Ulayo. Lino papisile insita, utailo wao wizile ukomelako lino yaweni vino Yeova wayavwiile. Yoswa wizile anena aina Izlaeli ukwaula ukutwisika ukuti: “Kusi nanti cimwi cisuma cino [Yeova] Leza winu wamulaya icitafikiliziwa.” Nupya wizile ayanena ukuti: “Fwandi lyene mulinzile koopa [Yeova] nu kumutumikila umucumi nu mukutailwa.” Alino nupya ayanena ati: “Lelo nemo na amu ng’anda yane, tumatumikilanga [Yeova].” (Yoswa 23:14; 24:14, 15) Ndi cakuti twataila Yeova nu kulola vino akatwazwa pa lwitu, utailo witu ulakomelako.—Masamu 34:8.
VINO TUNGALANGA UKUTI TWAYA NU UTAILO
12. Tungalanga uli ukuti twaya nu utailo ukome?
12 Uzye tungalanga uli ukuti twaya nu utailo ukome? Umusambi Yakobo walanzile ukuti: “Namamulanga utailo wane vino uli kupitila mu milimo yane.” (Yakobo 2:18) Milimo ino tukaomba ikalanga ukuti tuli nu utailo ukome. U munzila ci?
Yonsi akaombesya umu mulimo wa kusimikila yakalanga ukuti yaaya nu utailo ukome (Lolini palagalafu 13)
13. Uzye tukalanga uli ukuti twaya nu utailo nga tukusimikila?
13 Ukusimikila ali nzila isuma ino tungalangilamo ukuti twakwata utailo. U mulandu ci? A pa mulandu wakuti nga tukusimikila, tukaalanga ukuti twazumila ukuti impelelekezyo ili umupipi nupya ‘italacelwa nanti ukulezyalezya!’ (Habakuku 2:3) Pakuti tumanye nga utailo witu ukome, tungayuzya sweineco mauzyo yaa: ‘Uzye ukusimikila kwacindama uli kuli nene? Uzye nkaezya apapezile amaka yane ukunena yauze pali Leza? Uzye nkaomvya inzila zipusanepusane pakuti naombesya umu mulimo wakwe Yeova?’ (2 Kolinto 13:5) Lekini twalanga ukuti twaya nu utailo ukome lino ‘tukutaka pa utailo witu,’ kulikuti, ukusimikila ilandwe lisuma.—Welengini Loma 10:10.
14, 15. (a) Uzye tungalanga uli ukuti tuli nu utailo umu umi witu? (b) Landini cimwi icacitike kuli yamwi, icikalangilila ukuti yaali nu utailo.
14 Nupya tukalanga ukuti twataila Yeova ndi cakuti tukuzizimizya intanzi zino tukakwata umu umi. Ndi cakuti, tukulwalilila, tukusakamala sana, ukuulizya impiya nanti intazi zyuze, tulinzile ukutaila Yeova na Yesu ukuti ‘yalatwazwa lino twalonda ukwazwiwa.’ (Ayebulai 4:16) Tukalanga ukuti twataila Yeova ndi cakuti tukumulenga ukuti atwazwe. Yesu walanzile ukuti tungalenga Yeova tuti, “utupeele cila wanda ivya kulya vitu vya manda pe.” (Luka 11:3) Amalyasi aalembwa muli Baibo yakalanga ukuti Yeova angatupeela vyonsi ivikulondekwa. Lino kwali icilala iciipisye umu manda ya ina izlaeli, Yeova wapeezile Eliya ivya kulya na manzi. Baibo ikati: “Yamwankole iyamuletela umukate ni nyama akatondo na manguzi, nga amwa amanzi mu luzi.” (1 Yamwene 17:3-6) Naswe kwene twakwata utailo wa kuti Yeova angatupeela vino tukulonda.
Nga tukuzizimizya intazi zino tukakwata, ala tukulanga ukuti twaya nu utailo ukome (Lolini palagalafu 14)
15 Twasininkizya ukuti nga tukuomvya ivisinte vya masunde ya muli Baibo, tutalavilwa ukusakamala ulupwa lwitu. Nkazi umwi umutwalwe uwi zina lyakuti Rebecca, aakaikala uku Asia, walondolwile vino wene nu lupwa lwakwe yaomvizye ivisinte vya masunde ivyaya pali Mateo 6:33 na pali Mapinda 10:4. Walanzile ati ya iya yaweni ukuti incito ino yaombanga yali nu konona ucuza wao na Yeova. Acino fwandi yatiile incito. Nomba yakweti ana 4 aakusakamala, fwandi pakuti yasakamale ulupwa, yatandike ukupanga ivyakulya vyakuti yaakazya. Pa mulandu wa kuombesya kwao, lyonsi yakwatanga impiya izya kusakamalilamo ulupwa. Nkazi wii walanzile ati: “Twasininkizye ukuti Yeova wali naswe. Tutaatazile tulaalile nanti uwanda.” Uzye namwe kwaya ivyamicitikilapo, ivyakomizye sana utailo winu?
Twasininkizya ukuti nga tukuomvya ivisinte vya masunde aamuli Baibo, tutalavilwa ukusakamala ulupwa lwitu
16. Uzye ivintu vilaya uli ndi cakuti twataila Leza?
16 Tutalinzile ukutwisika ukuti nga tukukonka vino Yeova watunena, alatwazwa. Paulo walanzile amazwi yakwe Habakuku lino watiile: “Umuntu uwacitwa kuya umololoke pa kutaila, aliwe alaya nu umi.” (Galatiya 3:11; Habakuku 2:4) Ali mulandu uno tulinzile ukutaila sana Yeova pano aliwe angatwazwa. Paulo akatwiusyako ukuti Leza ali “wino ali na maka akucita munotuli vintu vilusile vino tungaleenga nanti vino tungelenganya.” (Efeso 3:20) Aomvi yakwe Yeova yakaezya apapezile maka yao ukucita ukulonda kwakwe, lelo yamanya ukuti yatanga yakwanisye ukucita vii uku maka yao. Fwandi tukazanga wakwe cimwi vino Leza waya naswe nupya akatwazwa ukuti twamuombela.
YEOVA ALATUPEELA UTAILO NGA TWAMULENGA
17. (a) Uzye Yesu wacisile uli lino atumwa yakwe yamulenzile ukuti ayakuzizye utailo? (b) U mulandu ci uno tungasininkizizya ukuti Yeova alatuupeela utailo nga twamulenga?
17 Wakwe vino twati tusambilila, naswe tunguvwa wakwe vino atumwa yuvwile lino yanenyile Yesu yati: “Tukuzizye utailo.” (Luka 17:5) Yesu wapeezile atumwa yakwe vino yamulenzile. Wizile ayapeela apa Pentecost umu 33, lino yapokeelile umupasi wa muzilo uwayavwilizye ukuvwikisya ukulonda kwakwe Leza. Cii calenzile ukuti utailo wao ukome sana. Uzye lyene i cani icacitike? Yatandike ukusimikila sana. (Kolose 1:23) Naswe kwene Yeova alatukuzizya utailo nga twamulenga. Yeova watulaya ukuti nga “twalenga ukulingana nu kulonda kwakwe” alatupeela utailo.—1 Yoane 5:14
18. Uzye Yeova akapolelela uli yayo akakomya utailo?
18 Yeova alatemwa sana ngi cakuti twamutaila sana. Alatupeela utailo, nupya utailo witu ulaya ukome, alino nupya tulaya “alinge ukukuma uku Wene wakwe” Leza.—2 Tesalonika 1:3, 5.
^ par. 4 Welengini ilyasi pa umi wakwe ya Lillian Gobitas Klose (Awake! yakwe Julai 22, 1993), Feliks Borys (Awake! yakwe Febuluwale 22, 1994), alino na ya Josephine Elias (Loleni! yakwe Okotoba 2009).
