YA MAYO yanguzizye yati: “U mulandu ci uno ukukanila ukupepela ivikolwe vyako? Utamanyile ukuti vikolwe i vyalenga ukuti uye nu umi? Uzye utanga utaizye pali vino vyakucitila? U mulandu ci uno ungakanila intambi zino fwensi tukakonka? Ukukana ukucindika ivikolwe ala ukupiliula ukuti ukupepa kwitu u kwa uwelewele.” Lino ya Mayo yalanzile vii, yatandike ukulila.

Imyezi inono ukucisila ala ya mayo yatali yalande amazwi yaa, ya Nte Yakwe Yeova yalondanga ukutandika ukusambilila Baibo na ya mayo. Nomba ya mayo yatalondanga ukusambilila, lelo pakuti yalange umucinzi, yanenyile ya Nte yaayo ukuti yasambilila sile nani. Pa mulandu wakuti lyonsi nuvwilanga ya mayo, yatansokelanga lelo icampezizye mano icakuti izile yatandika ukunsokela. Lelo pa mulandu wakuti nalondanga ukuzanzya Yeova, pa nsita ii ntalondanga ukuyuvwila. Citangupile, lelo Yeova wampeezile amaka.

Ulupwa lwitu lwali ulwa ya Buddha, wakwe vino antu aingi umu Japan yali. Lelo pa cisila ca kusambilila na ya Nte Yakwe Yeova pa myezi iili, nasininkizye ukuti Baibo i ya cumi. Lino nasambilile ukuti nakwata taata uwa kwiyulu, nalondesyanga ukumumanya. Pa kutandika ya mayo nani twaipakizyanga ukulanda pali vino nasambililanga. Natandike ukuzanwa uku kulongana kwa pa Mulungu pa Ng’anda ya Wene. Lino natwalilile ukusambilila, nanenyile ya mayo ukuti nata ukucitako intambi zya ya Buddha. Papo kwene sile ya mayo yatandike ukusoka. Yalanzile yati, “I ca muzewanya sana ukukwata umwi umu lupwa aataatemwa ivikolwe vitu.” Yanenyile ukuti inte ukusambilila Baibo nu kulongana kwene. Ntelenganyanga ukuti ya mayo yangalanda vii!

Ya tata nayo yazumile vino ya mayo yalanzile. Nasambilile muli Efeso icipande 6 ukuti Yeova walondanga nauvwila avyazi yane. Nalondanga ukuti twauvwana umu lupwa, nupya nelenginye ukuti nga nkuuvwila avyazi, yangasuka yauvwa vino nkuyanena. Apa nsita iiya, naipekanyanga ukulemba masindano, acino nazumile ukucita vino ya mayo yanenyile, apa myezi sile itatu. Nomba nanenyile Yeova ukuti ndatandika ukulongana nupya, ngi cakuti imyezi iyo itatu yapita.

Vino napingwilepo ukucita vitaali ningo, pa mulandu ni vintu viili. Cakutandikilako, nelenganyanga ukuti nanti papita imyezi itatu ndatwalilila ukulondesya ukuombela Yeova. Lelo ucuza wane na Yeova wizile utonta zuwa sana. Cakwe ciili  icakuti, ya Mayo na ya Tata ali lino yakomilepo na sana ukunena ukuti inte ukuombela Yeova.

Apa Ng’anda ya Wene, nazananga ya Nte Yakwe Yeova aingi yano yalupwa yao yakaanyanga kulongana. Yanenyile ukuti Yeova alankomya. (Mateo 10:34-37) Yanenyile ukuti ndi cakuti natwalilila ukuya uwa cisinka kuli Yeova, yalupwa yane yangasambilila icumi. Nalondanga ukutaila Yeova, acino fwandi natandike ukupepa sana.

Yalupwa yane yankaanyanga umu nzila izipusanepusane. Ya mayo yampaapatile ukuti inte ukusambilila Baibo. Ilingi nikalanga sile ukwaula ukuvwanga. Pano nga nalandapo cimwi ilingi ala tumapaazyanyanga sile, pano pataali uwalondanga ukuvwa vino umuze akulanda. Lyene niwisye ukuti ndi cakuti nkucindika vino ya mayo yakwelenganya alino ni vizumilo vyao ivintu vingayako ningo. Avyazi yane yampeelanga imilimo iingi pakuti sile ntaafuma pa ng’anda. Insita zimwi pakufumapo yafunganga ing’anda lyene nsyala panzi, nanti ukufumapo ukwaula ukusya ivyakulya.

Ya mayo yanenyile antu yauze ukuti aliyo yezye ukulanzyanya nani pakuti nzumile. Yezizye ukulanda na ya mwalimu yane, lelo citaomvile. Ya mayo yantwazile kuli maneja wao uwa ku ncito pakuti andyombeleke nzumile ukuti imipepele yonsi iyasilesile. Ya mayo nupya yezizye ukutumila yalupwa itu ukuyuzya vino yamacita, ala yakulila nu kulila. Cii calenzile ukuti nuvwe uyi sana. Lelo lino nali pa kulongana, yaeluda yanenyile ukuti vino ya mayo yanenangako yauze pa ntanzi iyo, viivi kwene ya mayo yasimikilanga.

Avyazi yane yalondanga ukuti inje uku yuniveziti pa kuti nkakwate incito isuma. Swensi twasosile icakuti tutalondanga ukulanda pi lyasi lii, fwandi nayalembile sile makalata ukuyalondolwela amauyo  yane. Ya tata yasosile sana icakuti yanenyile yati: “Ndi cakuti ukwelenganya ukuti ungazana incito, ulonde incito iyo mutondo, pano ngu taizanyile mutondo, ulafuma pano.” Napefile kuli Yeova nu kulenga ukuti angazwe. Uwanda kwene uuwa, ala indi umu mulimo wa kusimikila, ya nkazi yaili yanenyile ukuti yanjingizye incito iya kusambilizya ana yao. Ya tata yatatemilwe lino ningile incito, acino yatiile ukumvwanzya nu kuta ukunsumbako mano. Ya mayo yanenyile ukuti nga cazifilepo inja icipondo ukucila ukuya Inte Yakwe Yeova.

Insita zimwi natwisikanga ndi cakuti vino nacitanga uku yavyazi vyali sile ningo. Fwandi napefile kuli Yeova nu kwelenganya pali vino Baibo ikalanda ukuti wene waya nu kutemwa. Cii calenzile ukuti ntaelenganya iviipe nu kumanya ukuti avyazi yane yankaanyanga pa mulandu wakuti yansakamile. Yeova wangavwilizye ukuti naelenganya ningo nu kumanya vino nalinzile ukucita. Nupya nayanga sana nu luzango nga nkuya sana umu mulimo wa kusimikila. Nalondanga ukuya painiya.

Lino ya nkazi yamwi yuvwile ukuti nkulonda ukutandika upainiya, yanenyile ukuti ndolele tale avyazi yane yateekeko imyenzo. Napefile kuli Yeova ukuti ampeele amano, nezizye ukulondelezya ivyeo, nupya nelenginyepo sana umulandu uno nalondelanga ukuya painiya, nu kunena aina na yankazi aombela Yeova pa myaka ingi ukuti yangazwe. Lyene napingwilepo ukuti nzanzye Yeova. Nupya namanyile ukuti nanti icakuti nati ndolele papiteko insita pakutandika upainiya, limwi avyazi yalankaanya nupya kwene.

Natandike upainiya umu mwaka kwene uno namaliilemo isukulu. Lino naomvileko upainiya panono, natandike ukulondesya ukuya ukwalondekwanga sana yakasimikila. Nomba yamayo na yatata yatalondanga ukuti imfume pa ng’anda. Fwandi naloleezile mpaka imfisya imyaka 20. Lyene nalenzile uku musambo ukuti yangantuma uku kaeya ka mpanga ya Japan umupipi nu lupwa lwane pakuti ya mayo yataasakamala sana.

Lino nali kuuku, nali ni nsansa sana kulola yano nasambilizyanga Baibo yakuwatiziwa. Natandike ukusambilila Icizungu pano nalondanga ukuti naombesya umu mulimo wa kusimikila. Lino naweni vino yapainiya aiyele yaili ali umu cilongano citu yaombesyanga na vino yazwilizyanga yauze, natandike ukulondesya ukuya painiya umuiyele. Apa nsita iiyo, ya mayo yalwile sana imiku iili, nupya lyonsi nayanga umu kuyasakamala. Cii cazungwisye ya mayo, nupya yatandike ukuyako ni cikuku kuli nene.

Lino papisile imyaka 7, ya Atsushi aali pali ya painiya aiyele yano indandapo mpiti yantumile kalata. Yalondanga ukutwala nupya yuzyanga ndi cakuti nelenganyangapo pali aliyo. Ntatazile ndangapo icintemwa kuli ya Atsushi, nupya ntelenganyangapo ukuti yene yantemwa. Lino papisile umwezi onga, nayaswike ukuti ningatemwa ntale njamanye ningo. Twizile tuzana ukuti swensi twakweti amauyo aliyamwi. Twalondanga ukutwalilila umu mulimo wa nsita yonsi nupya twaipelisye ukupokelela umulimo uli onsi uno yangatupeela. Avino twizile tutwalana nu kutwalana. Natemilwe sana ukuti ya mayo na ya tata alino na yalupwa yauze iizile uku winga witu.

Papisile sile insita inono, ya Atsushi yizile yasontwa ukuya umwangalizi wa ciputulwa uwakwazwilizya ala tukaomba upainiya wa nsita yonsi. Lino papisile insita izile yatutuma muli upainiya uiyele, alino umukuya kwa nsita iiza yatutuma umu mulimo wa kutandalila ivilongano. Lino twamazile  ukutandalilila ivilongano ivyali umu ciputulwa ciitu umuku wa kutandikilako, iofesi lya musambo lyatutumiile foni. Yatuuzizye ndi cakuti tungatemwa ukuya uku Nepal nu kuyatwalilila ukuomba umulimo wa kutandalila ivilongano.

Nasakamiile sana pali vino avyazi yali nu kuuvwa ndi nayanena ukuti tukuya uku Nepal, pano kwali ukutali. Lino nayatumile foni, ya tata yaaswike yati, “Kuno mukuya u kusuma sana.” Fwandi ala umulungu wafumileko cuza wakwe ya tata wayapeezile ibuku ilyalandanga apa ncende ya Nepal nupya yelenganyanga ukuyatandalako.

Twali sana nu luzango ukuya pamwi na antu asuma aya umu Nepal. Lino papisile insita, izile yalundako incende ya Bangladesh uku ciputulwa cino twatandalilanga. Nanti icakuti incende ii yali umupipi na Nepal, yali iiyele. Twaipakizyanga ivintu ivisuma vingi umu mulimo wa kusimikila. Lino papisile imyaka 5, izile yatuwezya uku Japan, kuno ndakai tukuipakizya umulimo wa kutandalila ivilongano.

Nasambilile ivintu vingi sana lino twaombelanga umu Japan, Nepal na Bangladesh. Umu mpanga zii, mwaya intambi zipusane pusane, alino na vino antu yakacita navyo vyapusana pusana. Nupya cila muntu waiyela. Nalola vino Yeova akasakamala antu wenga na wenga, vino akayavwa nu kuyapoleelela.

Nakwata ivintu vingi cuze vino nkataizizyapo Yeova. Walenga kuti imumanye nu kumuombela nupya wampeela nu wane musuma cuze. Yeova wangazwa ukupingulapo ningo pa vintu, nupya ndakai naya na ucuza usuma na aliwe alino nu lupwa lwane. Nkataizya Yeova ukuti, nkauvwana na ya mayo nupya. Ala nkutaizya wakwe cimwi vino lyene nakwata umutende na Leza na ya mayo.