ILINGI Yesu wasambilizyanga antu ivya kupepa. Lino wali pano nsi intunguluzi zya mu mipepele ya Ayuda, zyayanga mukupepela mu “makoona ya miseo iikalamba.” U mulandu ci? Pano “yalondanga ukuti antu yayalole.” Nupya, yafwile yalondanga nu ukuti antu yakumbwa imilimo ino yaombanga. Aingi yapepanga mapepo atali nu kuswilizya mapepo aali yamwi, ala yakwelenganya ukuti ukulanda “mazwi aingi”, u kungalenga ukuti mapepo yao yaasukwa. (Mateo 6:5-8) Lelo Yesu walondolwile ukuti kucita vivyo kutali ningo, pano walondanga ukwazwa antu ukumanya vino yatalinzile ukucita lino yakupepa. Lelo, kwali na vyuze vino wasambilizye ukulunda pali vino tutalinzile ukupepa.

Yesu wasambilizye ukuti lino tukupepa, tulinzile ukulangilila ukuti tukulondesya ukuti izina lyakwe Leza licindikwe, Uwene wakwe wize, nu kulonda kwakwe kucitike. Wasambilizye nu kuti tungalenga ukuti Leza atwavwe pa vintu vya pa lwitu. (Mateo 6:9-13; Luka 11:2-4) Yesu waomvizye ivilangililo pa kulangilila ukuti nga tukulonda mapepo itu yasukwe, tulinzile ukuya nu mute wa kupepa, utailo, alino nu kuya aicefye. (Luka 11:5-13; 18:1-14) Nupya pakuti vino wasambilizyanga vyafika sana antu pa myenzo waomvyanga ivilangililo.—Mateo 14:23; Mako 1:35.

Ukwaula nu kutwisika vii vino Yesu wasambilizye vyazwilizye asambi yakwe ukulapepa amapepo asuma. Lelo, pa wanda wa kusyalikizyako uno Yesu wali pano nsi ali pano wasambilizye asambi yakwe isambililo ilicindame sana api ipepo.

Umu wanda uwa kusyalikizyako uno Yesu wali pano nsi wakomelizye sana atumwa yakwe aali ni icisinka. Fwandi iya kwene i yali insita isuma iya kuyaneena icintu cimwi icasenwike. Yesu walanzile ati: “Nene inzila ni cumi nu umi, kusi akaya kuli Tata ukwaula kupitila muli neene.” Lyene pa cisila wayalavile ulayo uwa yakomelizye uwakuti: “Consi cino mwalengela umwi zina lyane, ndacicita, pakuti Tata acindikilwe umu Mwana. Nga mwalenga icili consi umwi zina lyane, ndacicita.” Lyene lino wali umupiipi nu kumaliila vino waneenanga atumwa yakwe, walanzile ukuti: “Ukufika na ndakai mutaatala mwalenga icili consi ukupitila umwi zina lyane. Lengini nupya mulapokelela pakuti mungaya sana ni nsansa.”—Yoani 14:6, 13, 14; 16:24.

Amazwi yaa yaali acindame sana. Ulupapulo lumwi lwalondolwile ukuti “cii icintu cicindame sana icasenwike api pepo.” Yesu atalandanga ukuti tulinzile ukulapepa kuli aliwe ukucila ukupepa kuli Leza. Lelo wasokololanga inzila ipya iya kuilamo kuli Yeova Leza umwi pepo.

Nupya, lyonsi Leza akaasuka amapepo ya aomvi yakwe acisinka. (1 Samueli 1:9-19; Masamu 65:2) Lelo, kufuma lino Leza wapangine upangano wi isunde na ina Izlaeli, antu alondanga ukuti mapepo yao yaasukwa yalondekwanga ukutaila ukuti uluko lwa ina izlaeli lwali uluko luno Leza wasoolwile. Nupya pa cisila, kufuma umu manda yakwe Solomoni, antu yaayo yalondekwanga kutaila ukuti itempele aali cifulo cino Leza wasoolwile ukuti yapeelelapo amalambo. (Malango 9:29; 2 Milandu 6:32, 33) Lelo, antu yatali nu kutwalilila kucita ivintu vivyo. Nupya ukulingana na vino umutumwa Paulo walemvile, amasunde yano yapeezile aina Izlaeli alino na malambo yano yapeelelanga pi itempele yaali “wa cinzingwa ca vintu ivisuma iviliza, nomba yene asi ali vintu kwene vivyo.” (Aebele 10:1, 2) Umu cumi, ivintu vivyo ivyali wa cinzingwa vyali nu kucitika. (Kolose 2:17) Nupya ukufuma umu 33 C.E, muntu atanga aye cuza wakwe Yeova ukupitila umu kuvwila Masunde Yakwe Mose. Lelo, alinzile ukuya ni cuvwila kuli wino amasunde imililangako, kuli kuti Klistu Yesu.—Yoani 15:14-16; Galatiya 3:24, 25.

Yesu wapanzile inzila isuma ino tungailamo kuli Yeova, nupya walondolwile ukuti a cuza witu umusuma aakapanga inzila yakuti amapepo itu yauvwika kuli Leza nu kwasukwa, nupya wailondolwile ukuti a cuza witu uwa maka. I cani icalenzile ukuti Yesu atucitile ivintu vii?

Vino sweswe yayembu, kusi vili vyonsi vino tungacita nanti amalambo yano tungapeela pakuti tufumyepo uluyembu luu nanti pakuti tuye ya cuza yakwe Leza wa muzilo Yeova. (Loma 3:20, 24; Aebele 1:3, 4) Lelo, Yesu wapeezile umi wakwe umalilike nu kulipila pa membu zya yantunze pakuti Leza ayeleele. (Loma 5:12, 18, 19) Nupya yonsi akalonda ukuti imembu zyao zyelelwe yakwata isyuko lya kucita vivyo, nu kuya ya cuza yasuma yakwe Yeova alino nu ‘kulalanda ukwaula intete’ kuli Leza. Lelo yangacita sile vivyo ndi cakuti yali nu utailo umwi lambo lyakwe Yesu nupya yakupepela mwi izina lyakwe.—Efeso 3:11, 12.

Lino tukupepela umwi zina lyakwe Yesu, tukalanga vino twataila ukuti Yesu wacita ivintu vitatu pa kufikilizya ukulonda kwakwe Leza kuli kuti: (1) U “mwana wa mfwele wakwe Leza,” uwapeezile ilambo pakuti twelelwe imembu. (2) Yeova wamutuutulwile nupya ndakai a “simapepo mukalamba” uwatukulula pa mulandu ni lambo lyakwe. (3) Aali “nzila” sile ino tungailamo kuli Yeova umwi ipepo.—Yoani 1:29; 14:6; Aebele 4:14, 15.

Kupepela umwi izina lyakwe Yesu kukamulenga ukucindikwa. Nupya cico caya sile ningo, pano Yeova akalonda ukuti ‘yonsi yakafukame umwi zina lyakwe Yesu, nu ukuti yonsi yakalaanda apaswe ukuti Yesu Klistu u Mwene, pakuti Leza Tata acindikwe.’ (Filipi 2:10, 11) Lelo icicindamisye icakuti, ukupepela umwi zina lyakwe Yesu, kukalenga Yeova uwapeezile umwana wakwe pa mulandu witu ukulumbanyiziwa.—Yoani 3:16.

Baibo yalondolola Yesu ukuomvya amalumbo na mazina apusanepusane pa kutwazwa ukuvwikisya umulimo ukalamba uno wakwata. Nupya vivyo vikatwazwa ukuvwikisya ivisuma ivingi ivikatucitikila pa mulandu na vino Yesu watucitiile, vino akatucitila, alino na vino aali nu kutucitila uku nkoleelo. (Lolini kambokosi akaakuti “ Umulimo Ucindamisye uno Yesu Wakwata,””) Icumi kwene, Yesu wapeelwa “izina ilyacila amazina yonsi.” * Nupya wapeelwa amaka yonsi umwi yulu na pano nsi.—Filipi 2:9; Mateo 28:18.

Kwene, nga tukulonda ukuti Yeova aasuka amapepo itu tulinzile ukulapepela umwi zina lyakwe Yesu. (Yoani 14:13, 14) Nomba tutalinzile ukulalanda sile amazwi akuti “ukupitila muli Yesu” pa mulandu sile uwakuti avino twelezya. U mulandu ci?

Elenganyini pa cilangililo cii: Tuti mwapokelela kalata ukufuma kuli umwi lyene pa mpela yakwe kalata wiyo, pali amazwi akuti “aneene ciite.” Uzye mungelenganya ukuti amazwi yaayo iyafuma pansi ya mwenzo wakwe, nanti watalondela sile vino imilembele yakwe kalata ifwile ukuya? Fwandi lino tukuomvya izina lyakwe Yesu umu mapepo itu, tulinzile ukwikisyako sana amano ukupusanako na vino tukacita lino tukulemba amazwi akusyalikizyako muli kalata. Nanti tulinzile ‘ukulapepa lyonsi,’ tulinzile ukulacita vivyo nu ‘mwenzo onsi,’ asi ukulapepa sile cikulu ukupepa.—1 Tesalonika 5:17; Masamu 119:145.

Tungacita uli pakuti tutalanda sile amazwi akuti “kupitila mwi izina lyakwe Yesu” apasile sile? Mwaelenganya pa miyele isuma sana ino Yesu wakwata, alino na pali vino wamucitila na vino akalonda ukumucitila. Lino mukupepa mwataizya Yeova nu kumulumbanya pa nzila isuma ino waomvizyemo Umwana wakwe. Nga mukucita vivyo, mulataila sana ulayo uno Yesu walavile uwa kuti: “nga mwalenga icili consi kuli Tata, alamupeela umwi zina lyane.”—Yoani 16:23.