U MULANDU CI UNO TUKAPEPELA?
IPEPO lyaya pa malyasi anono yano antu yatemwa sana nupya yano yakalondesya ukumanya. Lolini mauzyo 7 yano antu yakauzya sana api pepo; lyene mulole vino Baibo ikaasuka mauzyo yayo. Ivipande vii viyelileko ukumwazwa ukumanya ivya kupepa, vino mungatandika ukupepa nanti vino mungazifya mapepo inu.
UMU nsi yonsi, antu amu mitundu yonsi nu mu mipepele, yakapepa. Yamwi yakapepa lino yali yonga, yauze nayo yakapepa umu maumba. Yakapepa umu macalici, umu matempele, umu masunagogi, umu vikuulwa vyakwe ya Mozilemu na pa vikuulwa vya muzilo. Yangaomvya insalu zya kwanza pansi pa kupepa, ukasi wa ku musalaba, matayala yi pepo, ivikope, mabuku ya mapepo nanti amapepo aalembwa pa tupampa tuno yakakoweka pali vimwi.
Ipepo likapusanya antu uku viumbwa vyonsi ivyaya pano nsi. I cacumi twakolana ni inyama muli vimwi. Wakwe vino caya uku nyama, tukalondekwa ivyakulya, umuza, na manzi. Nupya wakwe vino caya uku nyama, tukavyalwa, tukaya nu umi nupya tukafwa. (Kasambilizya 3:19) Lelo antu sile aakapepa. U mulandu ci?
Limwi casuko ca mukulungatika icakuti vikwene avino Leza watuumba. Antu aingi yakalola ipepo ukuti inzila iyakulanda ni cintu cino yakalola ukuti ica muzilo nanti icicindikwe nupya ica manda pe. Baibo ikalanda ukuti twaumvilwe kuti twalondesya ukupepa. (Kasambilizya 3:11) Yesu nawe kwene walanzile ati: “Ansansa aantu aakalondesya vyakwe Leza.”—Mateo 5:3.
‘Ukulondesya vyakwe Leza’ u kukalenga antu yakwate ivikuulwa ni vintu vyuze vino yakaomvya umu kupepa, nupya i cikalenga yasumba insita ikulu ala yakupepa? Lelo antu yamwi yakaitaila nanti ukutaila antu yauze lino yakulondesya vyakwe Leza. Nomba, uzye musilola ukuti antu yatakwata amaka afikepo akwazwa antu yauze? Twacepelwa sana amaka, tukaya nu umi pa nsita sile inono, nupya tusimanya ivya ku nkoleelo. Wenga sile uwaya sana na mano, na maka, nupya aasifwa, aangatupeela vino tukalondekwa. Nupya uzye vyakwe Leza kwene vii ivikalenga twalondesya ukupepa, i vyani?
Tale elenganyini: Uzye mwatala mwalondapo utunguluzi, amano nanti amasuko uku mauzyo yano antu yatanga yasuke? Uzye mwatazile imuyuvwa ukuti mwalondekwanga ukuteekeziwa lino mwaponzizye ivintu vimwi ivicindame, nanti ukulonda utunguluzi lino mwapingulanga pali vimwi ivitale, nanti ukulonda ukwelelwa lino mwayuvwile amulandu?
Ukulingana na vino Baibo ikalanda, vivyo vyonsi vyaya pa milandu icindame ino mulinzile ukupepelapo. Baibo ali buku ilitailwe sana ilikalanda api pepo, nupya mwaya mapepo yano aonsi na anaci ya utailo yapefile. Yapefile pakuti yateekeziwe, pakuti yazane utunguluzi, pakuti yelelwe, na pakuti yazane ivyasuko uku mauzyo atale.—Masamu 23:3; 71:21; Danieli 9:4, 5, 19; Habakuku 1:3.
Amapepo alembwa muli Baibo yapusine, lelo yakoline muli cimwi. Aapefile yamanyile icintu cimwi icicindame cino antu muno nsi ndakai yasiikako mano. Yamanyile wino yalinzile ukupepako.