UKULOZYA ukwi pepo, antu aingi amu mipepele yakaikisya mano kuli vino yafwile ukucita umwili pa kupepa, mazwi yano yafwile ukulanda, ni ntambi zino yafwile ukulondela. Lelo Baibo ikatunena ukuti vivyo asi vino tulinzile ukwikisyako amano, tufwile ukwika amano ukwi uzyo ilicindame ilyakuti, “Uzye tulinzile ukupepa uli?”

Baibo yalanda pa yaomvi ya cumi yakwe Leza, aapepanga umu ncende izipusanepusane ale yaimi nanti ukufukama. Yapepanga amapepo ya mu mwenzo nanti ala mazwi yakuvwika, kulingana na vino vintu vyali. Yapepanga ala iyalingamila umwi yulu nanti ala iinama. Yapepanga ukufuma pansi ya mwenzo umu mazwi yao, yataomvyanga ivikope, ukasi wakwe kolona nanti mapepo alembwa umu mabuku. I cani icalenzile ukuti Leza auvwa mapepo yao?

Wakwe vino icilandwa umu cipande icafumako, yapepanga sile kuli Leza wenga, Yeova. Kwaya na cuze icicindame. Tukabelenga pali 1 Yoani 5:14 ukuti: “Utailo uno twakwata muli aliwe u wakuti, consi cino twamulenga icikuvwana nu kulonda kwakwe, akatuvwa.” Mapepo itu yafwile ukulauvwana nu kulonda kwakwe Leza. Uzye cico cikupiliula cani?

Pa kupepa ukulingana nu kulonda kwakwe Leza, tufwile ukumanya vino akalonda. Fwandi ukusambilila Baibo kwacindama sana pa kupepa. Uzye cii cikupiliula ukuti Leza atanga auvwe mapepo itu nga tutamanya sana Baibo? Awe, lelo Leza akalonda kuti tumanye ukulonda kwakwe, tuvwikisye nu kulacita vivyo kwene. (Mateo 7:21-23) Vino tukupepelapo vifwile ukulauvwana na vino tukasambilila.

Lino tukusambilila pali Yeova na pali vino akalonda, utailo witu ukakomelako; cico naco cacindama ukwi pepo. Yesu walanzile ati: “Vyonsi vino mwalenga umwi pepo, ndi muli nu utailo, mulapeelwa.” (Mateo 21:22) Ukuya nu utailo cisipiliula ukuzumila icizumilezumile. Lelo cikapiliula ukuzumila umu cintu icakuti nanti cisiloleka, cakwata usininkizyo ukome. (Aebele 11:1) Muli Baibo mwaya sana usininkizyo ukalanga ukuti nanti icakuti Yeova asiloleka, akuno waya, asibepa nupya akaitemelwa ukwasuka amapepo ya yantu aya nu utailo muli aliwe. Nupya lyonsi tungalenga ukuti Yeova atupeele utailo ukome, nawe akalondesya ukutupeela vino tukulondekwa.—Luka 17:5; Yakobo 1:17.

Kuli na cuze icicindame icikalondekwa pa kupepa. Yesu walanzile ati: “Kusi akaya kuli Tata ukwaula kupitila muli nene.” (Yoani 14:6) Fwandi Yesu ali nzila ino tulinzile ukuilamo kuli Isi, Yeova. Uli mulandu uno Yesu waneniile alondezi yakwe ukulapepela umwi zina lyakwe. (Yoani 14:13; 15:16) Cico citakupiliula ukuti tufwile ukupepa kuli Yesu. Lelo tukapepela umwi zina lyakwe Yesu, pano twamanya ukuti Yesu uwalenga kuti tupalame kuli Tata witu umumalilike nupya uwa muzilo.

Pa nsita imwi alondezi yakwe Yesu yamunenyile iyati: “Mwene tusambilizye ukupepa.” (Luka 11:1) Yatalandanga pa vintu wakwe vino itulandapo. Yalondesyanga ukumanya ivya kulumbula umu mapepo; cili kwati yamuzyanga ukuti, ‘I vyani vino tulinzile ukupepelapo?’