“Asi ya mu Nsi”

“Injanena mazwi yako, lelo antu ya mu nsi iyayapata pa mulandu wakuti yene asi ya mu nsi, wakwe vino nani insi wa mu nsi.”​—YOANI 17:14.

Vino Cikapiliula: Vino Yesu atali uwa mu nsi, ataikanga umu vikanza vya mu wikazi ni vya miteekele. Yesu walanzile ukuti: “Uwene wane usi wa pano nsi. Ndi cakuti Uwene wane iuya uwa pano nsi, aomvi yane ngi iyalwa pakuti ntapeelwa uku Yayuda. Lelo Uwene wane usi wa pano nsi.” (Yoani 18:36) Nupya wakomelizye alondezi yakwe ukuti yatalinzile ukuya ni miyele, imilandile, ni vicitwa ivisiuvwana na vino Izwi Lyakwe Leza likalanda.—Mateo 20:25-27.

Vino Aina Klistu ya Kutandikilapo Yalangililanga Ukuti Asi ya Muno Nsi: Kalemba umwi uwi zina lyakuti Jonathan Daimondi uwalembanga pa vya mipepele walondolwile ukuti aina Klistu ya kutandikilapo “yatalwangako inkondo usi mulandu na vino yali nu kulayacuzya, ukuyanyepa, nanti ukuyakoma.” Yasoolwilepo ukucula ukucila ukuya umu vikanza vya miteekele. Nupya imiyele ino yakweti yapusineko na ino aa mu nsi yakweti. Aina Klistu yayanenyile ukuti: “[Antu] yakazunguka pali vino mutatwalilila ukuya pamwi nayo umu miyele iiyo iipe, acino yakalandila iviipe pali mwemwe.” (1 Petulo 4:4) Umonsi umwi uwi zina lyakuti Wiu Dulanti uwasambilila malyasi ya mpiti walemvile pa ina Klistu ukuti “yacuzyanga aa mu mipepele ya ufi pa mulandu na vino yasambilizyanga icumi alino na vino yacitanga.”

Aaweni Ndakai Aakalangilila Ukuti Asi ya Muno Nsi? Ibuku limwi lyakwe ya Katolika (New Catholic Encyclopedia) lyalanzile pali vino aina Klistu yakalanda ukuti yatalinzile ukuya umu vikanza vya miteekele ukuti: “Citaya ningo umuntu ukukanakwata imfuti iya kuomvya pa kuicingilila.” Icipande cimwi icali umwi buku limwi (Reformierte Presse) calondolwile ukuti, lipoti iyafumile uku kaungwe kamwi aka mu Africa akakalokesya pa nsambu zya yantu, yalangilile ukuti lino kwali ukukomaana uku Rwanda, umu 1994 yazumilizye aa mu maceici yonsi ukulakoma antu, “ukufumyako sile ya Nte Yakwe Yeova.”

Lino mwalimu umwi walandanga pali vino uteeko wa Nazi wakomanga sana antu, walanzile ukuti “kutaya iumba nanti akaungwe akakalanda iviipe pali vino antu yakabepa sana, vino yaya nu unkalwe, na vino yakakoma sana antu.” Nomba lino waile kuno yakalondolwela antu vino yakomanga antu mpiti, calenzile alembe ukuti: “Lyene inzana icasuko.” Wizile amanya ukuti ya Nte Yakwe Yeova yene yakatwalilila ukucita vino yazumilamo usi mulandu na vino yakayacuzya.

Nga masunde yao yene? Magazini imwi yakwe ya Katolika iya ku United States yalanzile ukuti: “Ya Katolika acance aingi yakalanda ukuti vino yakayasambilizya uku ceici cao pa vintu vimwi wakwe, umonsi nu mwanaci yangikala umu ng’anda ili imwi lino yatatala yatwalana nanti antu yangapanga icupo na lino yatatala yatwalana, vitaya ningo.” Muli magazini mwali mazwi yano dikoni umwi walanzile akuti: “Impendwa ikulu iya yantu, limwi ukucila pakasi yakatala iyaikala pamwi lino yatatala yatwalana.” Ibuku limwi (New Encyclopædia Britannica) lyalanzile ukuti ya Nte Yakwe Yeova “yakatwalilila ukulondela masunde nu mu vintu vya palwao.”