“Lyasi Lisuma Lii Ilya Wene Lilasimikilwa”

“Ni lyasi lisuma lii ilya Wene lilasimikilwa umu nsi yonsi ukuya unte ku yantu amu nko zyonsi, lyene alino impela iliza.”​—MATEO 24:14.

Vino Cikapiliula: Kalemba wi landwe Luka walanzile ukuti: “Yesu waile umu misumba nu mu mizi ala akusimikila nu kumanyisya antu api lyasi lisuma ilya Wene wakwe Leza.” (Luka 8:1) Yesu nawe wailandiile umwineco ati: “Ndinzile ukuyasimikila ilyasi lisuma ilya Wene wakwe Leza nu mu misumba yuze, pano cii acino natumiilwe.” (Luka 4:43) Watumile asambi ukuya mu kusimikila mu misumba nu mu mizi nupya pa cisila wayanenyile ati: “Mulaya inte zyane . . . kufika kuno insi yapela.”—Milimo 1:8; Luka 10:1.

Uzye Aina Klistu ya Kutandikilapo Yalondelanga Uli Isunde Lya Kusimikila? Asambi yakwe Yesu yuvwilanga vino Yesu wayanenyile. “Cila wanda yasambilizyanga nu kusimikila ilyasi lisuma pali Klistu Yesu umwi tempele nu ku ng’anda ni ng’anda ukwaula ukuta.” (Milimo 5:42) Mulimo wa kusimikila waombwanga na antu yonsi aa mu cilongano, asi kaliumba sile kamwi. Umuntu umwi uwasambilila malyasi ya mpiti uwi zina lyakuti Ninda walanzile ati: “Umonsi umwi uwapasile aina Klistu uwi zina lyakuti Seosesi walanzile ukuti, antu aombesyanga umulimo wa kusimikila ilyasi lisuma yali aakapikula, ya kasuma ya nsapato, azwalanga ivyakuzwala vya mpapa, ataali asambilile, alino na antu aali asulwe.” Umwi buku lino Jean Bernardi walemvile (The Early Centuries of the Church) walemvilemo ati: “[Aina Klistu] yalinzile ukulaya umu kusimikila uku ncende zyonsi nu ku yantu yonsi. Umu miseo nu mu misumba, uku ncende ukukazanwa antu aingi nu ku mang’anda. Nupya yali nu kulasimikila usi mulandu antu yakuyakaanya nanti foo. . . . Umu nsi yonsi.”

Aaweni Akacita Vivyo Ndakai? Simapepo umwi uwa mu ceici cakwe ya Anglican uwi zina lyakuti David Watson walemvile ukuti: “Conga icikalenga ukuti antu aa mu ceici yataika amano uku kuombela Leza, a pa mulandu wakuti yasiika amano uku mulimo wa kusimikila nu kusambilizya.” Joze Luizi Pelezi Gwadalupe walemvile umwi buku limwi (Why Are the Catholics Leaving?) pali vino aa mu ceici cakwe ya Evangelical, Adventist, alino na aa mu maceici yauze yacitanga, nupya walanzile ukuti: “Yasisimikila uku ng’anda ni ng’anda.” Lelo pali ya Nte Yakwe Yeova pene walemvile ukuti: “Yene yakasimikila uku ng’anda ni ng’anda lyonsi.”

Umu lupapulo lumwi ulwa ku cilye icikalamba ulwa mu 2001 ukufika umu 2002 mwali icisinka cimwi cino Jonathan Taali wazanyile icakuti: “Ndi cakuti umwi walanda pali ya Nte Yakwe Yeova, ala antu yamatandika ukwelenganya pali ya Kasimikila akaaya pa mang’anda yao pa nsita ino yasikuyenekela. Ya Nte Yakwe Yeova yasiya sile umu kusimikila uku ng’anda ni ng’anda pakuti yakomye utailo wao lelo ukusimikila kwacindama sana kuli aliyo.”

 [Kambokosi pifwa]

Aaweni Ndakai Aakalangilila Ukuti Aina Klistu ya Cumi?

Ukulingana na vino Malembo yakalanda vino twasambilila umu vipande vii, mungati aaweni ndakai aakalangilila ukuti aina Klistu ya cumi? Nanti cakuti ndakai kwaya imipepele iingi ikalanda ukuti iya ina Klistu, mwaiusya vino Yesu wanenyile alondezi yakwe ukuti: “Asi wensi aakangama ati: ‘Mwene, Mwene, aalingila umu Wene wa kwi yulu, suka sile aakacita vino Tata uwa kwi yulu akalonda.” (Mateo 7:21) Ukumanya aakacita ukulonda kwakwe Tata, kuli kuti aina Klistu ya cumi nu kulazanwa pamwi nayo kungalenga ukuti mukapokelele mapaalo yano Uwene Wakwe Leza ulaleta. Tukumukomelezya ukuti mukanene ya Nte Yakwe Yeova aamupeezile magazini yii pakuti yakamulondolwele pa Wene wakwe Leza na pa mapaalo yano ulaleta.—Luka 4:43.