Wanda umwi umu Yelusalemu, Yesu wasambilizyanga antu pali Isi, Yeova nu kusokolola ufi wakwe ya simapepo aliko pa nsita iiya. (Yoani 8:12-30) Vino walanzile pa nsita iiya vikatusambilizya pali vino tungamanya ivisambilizyo ivyaseeka ndakai ivikalanda pali Leza . Yesu walanzile ukuti: “Nga mukuvwila mazwi yane, ale mwemwe yasambi yane umu cumi, nupya mulamanya icumi, ni cumi cilamulenga ukuya antungwa.”—Yoani 8:31, 32.

“Nga mukuvwila mazwi yane.” Lino Yesu walanzile amazwi yaa walangilile vino tungamanya ndi cakuti ivisambilizyo vya mu upefi umwi i vya “cumi.” Nga muvwa mazwi yamwi pali Leza, mwayuzya imuti, ‘Uzye vii vikuvwana na mazwi yakwe Yesu na vyonsi ivyaya umu Malembo ya Muzilo?’ Mwakolanya auvwile vino mutumwa Paulo walanzile nupya aalondelezyanga sana “umu Malembo cila wanda pakuti yalole ndi cakuti vino yuvwile vyali ivya cumi.”—Milimo 17:11.

Marco, Rosa, na Raymonde, atiyalumbulwa umu cipande ca kutandikilapo pa vipande vii, yonsi yaceeceesile ivizumilo vyao lino yasambilile Baibo na ya Nte Yakwe Yeova. I vyani vino yasambiliile?

Marco: Walanzile ukuti: “Uwatusambilizyanga Baibo waomvyanga Malembo ukwasuka mauzyo yonsi yano nemo na mamane twakweti. Twatandike ukutemwa sana Yeova nupya twatandike ukutemwana sana na mamane!”

Rosa: Walanzile ukuti: “Pa kutandika nelenganyanga ukuti Baibo i buku umwaya sile mano ya untunze ilikalondolola Leza ukuomvya imyelenganyizizye ya yantu. Lelo panono panono nazanyile amasuko muli Baibo pa mauzyo yano nakweti. Ndakai lyene Yeova uwa cumi cumi kuli nene. Lyene namutaila.”

Raymonde: Walanzile ukuti: “Napefile kuli Leza ukuti angazwe ukumumanya. Pataalengile, ya wane nani twatandike ukusambilila Baibo. Lyene twasambilile icumi pali Yeova! Twizile ituya sana ni nsansa lino twamanyile vino Leza waya.”

Baibo isisokolola sile ufi uno antu yakalanda pali Leza, lelo ikasokolola ni cumi icikalanda pa miyele yakwe isuma. Yafuma kuli aliwe nupya ikatwazwa ukumanya “ivintu vino Leza watupeezile pa mulandu ni cikuuku cakwe.” (1 Kolinto 2:12) Uzye mutanga mutemwe ukuilolela vino Baibo ikaasuka mauzyo aingi acindame pali Leza, vino akalonda ukucita alino na pali vino vilacitika uku nkoleelo? Belengini amasuko ku mauzyo yamwi pali yaa, muye apakuti “Visambilizyo Vya Muli Baibo >Masuko ku Mauzyo Amuli Baibo” pa www.pr418.com. Nupya mungalenga kusambilila Baibo pa Webusaiti kwene yii nanti kuli Nte Wakwe Yeova. Itusininkizya ukuti nga mwacita vivyo, cilamwangukila ukumanya Leza ukucila na vino mwelenganyanga.