Kuombela Pamwi Lino Tukulolela Impelelekezyo ya Nsi
Kuombela Pamwi Lino Tukulolela Impelelekezyo ya Nsi
“Sweswe vilundwa vya mwili onga.”—EFESO 4:25, NW.
MUNGASUKA MUTUULI?
I viyelezyo ci vino acance yalinzile kutaluka, nupya u mulandu ci?
U mulandu ci uno tulinzile ukuombela pamwi?
Uzye mungalanga uli ukuti mukalonda ukuombela pamwi na ina inu amu cilongano?
1, 2. Uzye Leza aakaalonda ukuti antu yakwe, ance na aikolo, yaamupepa uli?
UZYE namwe mwemwe acance? Ndi cakuti avino cili, manyini ukuti, namwe mwacindama sana umu cilongano ca yantu yakwe Yeova ica mu nsi yonsi. Umu mpanga izingi, icipendo icikalamba pali yaayo aawatiziwa, aance. Cikakomelezya sana ukulola ance aingi aaipela nu kuya pali yaayo aakaombela Yeova!
2 Vino mwemwe ya cance, uzye mukaipakizya ukuya pamwi na ance yauzo? Mufwile mukatemwa sana ukuya pamwi nauzo. Tukasansamuka ukuya pamwi na anji yano tulingine umusinku. Lelo, nanti tungaya ance nanti aikolo nupya asi mulandu na kuno twakulila, Leza akaalonda ukuti twamupepela pamwi. Mutumwa Paulo walemvile ukuti, Yeova akaalonda ‘umuntu wensi atuulwe nu kumanya cumi.’ (1 Timoti 2:3, 4) Pa Umbwilo 7:9, paaya ulondolozi wakwe yakapepa yakwe Leza aakaafuma “mu nko zyonsi, mu mitundu yonsi ya antu, mu misango yonsi ya antu nu mu ndimi zyonsi.”
3, 4. (a) Uzye acance aingi ndakai yaaya ni miyele ya musango ci? (b) Kulingana na Efeso 4:25, uzye Paulo walondolwile uli icilongano?
3 Paaya upusano sana pa yance aakaombela Yeova na ance amu nsi ii. Aingi aasiombela Yeova yakacita sile ivintu ivya ukaitemwe, yakasumba sile mano kuli vino yakulonda. Antu yamwi aakalondelezya ivyeo yaalanda ukuti acance ndakai yaitemwa sana ukuluta na vino cali mpiti. Imivwangile ni mizwalile yao ikalanga ukuti yasicindika antu yauze, sana-sana aikolo.
4 Miyele ya musango uu yaya mpanga yonsi, fwandi cikalondekwa ukuombesya pakuti tupusaneko na antu amu nsi ii, nu kuzanzya Yeova. Nu mu nsita ya atumwa kwene, Paulo wacelwile Aina Klistu pa miyele yamusango uu. Walanzile ukuti umupasi kwene uu uwa mu nsi “wakwata maka pa muntu wensi wino asyayela Leza.” (Welengini Efeso 2:1-3.) Cikatukomelezya sana ukulola acance umu cilongano aataaya ni miyele ya musango uwo. Yakalonda ukuombela Yeova pamwi na ina yao. Yamanya ukuti icilongano caya wa mwili uwakwata ivilundwa ivingi, ivikaombela pamwi. Paulo walemvile ati: “Sweswe vilundwa vya mwili onga.” (Efeso 4:25, NW) Lino tukupalamila ukumpelelekezyo ya nsi ii, ukuombela pamwi na ina itu kulalondekwa sana. Lekini tulole amalyasi ya antu yamwi yano tungakolanya aalembwa muli Baibo yano yali nu kutwazwa ukulola vino ukuombela pamwi na ina itu kwacindama kuli sweswe.
YAOMBELANGA PAMWI
5, 6. Uzye tungasambilililako cani kuli Loti nu lupwa lwakwe?
5 Antu yakwe Yeova aaliko mpiti, yazizimizyanga ivintu ivitale sana. Yeova wayacingililanga lino yaombelanga pamwi nu kwavwana. Swensi kwene ndakai, acance na ikolo, tungasambililako uku yantu yaaya aalembwa muli Baibo. Lekini tulole ivyacitike kuli Loti.
6 Loti nu lupwa lwakwe yaali umu uzanzo, pano Yeova wali nu konoona umusumba wa Sodoma uno iikalangamo. Angeli yakwe Leza yanenyile Loti ukufuma umu musumba uuwa nu kuutukila uku myamba, yamunenyile yati: “Simula.” (Utandiko 19:12-22) Loti uvwilile, nupya ana yakwe akazyana yaili nayo yuvwilile ukufuma umu musumba. Icaulanda cali icakuti, yalupwa yao yamwi yatuvwilile. Yasivyala yakwe Loti aali nu kutwala ana yakwe yene ‘yelenginye ukuti imyawe.’ Cii calenzile kuti yafwe. (Utandiko 19:14) Loti sile na ana yakwe akazyana, aatwaliliile ukuya pamwi, nupya aaliyo sile aapuswike.
7. Uzye Yeova wavwilizye uli iumba lya yantu ilyafumile umu Eguputo?
7 Tungasambilila na kuli vino vyacitiike lino aina Izlaeli yaafumile umu Eguputo, yataapatukiine umu tumaumba utunoono, pakuti cila-yano yaisoolwele inzila yakupita pakuya uku Mpanga ya Ulayo. Nupya lino Yeova wapatwile amanzi pali Yemba Muyenzu, Mose ataalamvile wenga nanti na ina Izlaeli anoono sile. Lelo, uluko lonsi ulwa ina Izlaeli lwalambiile pamwi, nupya Yeova wayacingiliile. (Kufuma 14:21, 22, 29, 30) Na antu yauze aingi aataali aina Izlaeli yaapingwilepo ukutandika ukuombela Yeova, nupya yafumile umu Eguputo pamwi na ina Izlaeli. Antu yonsi yaapitiile pamwi. (Kufuma 12:38) Kwene ngacitaaziifile ukuti yamwi yaipatule nu kupita kaliumba, limwi akaliumba ka yance yatupu ukuipitila yonga sile, ukuomvya inzila ino yangalola ukuti iyaali ningo. Uzye nga calimo amano ukucita vivyo nu kukana cingililwa na Yeova?—1 Kolinto 10:1.
8. Uzye antu yakwe Leza yaombelanga uli pamwi umu manda yano Yeosafati wali umwene?
8 Umu manda yano Yeosafati wali umwene, iumba ilikalamba lizile uku kuzanza antu yakwe Leza. (2 Milandu 20:1, 2) Uzye aina Izlaeli yaacisile uli lino alwani yao aatinyanga iizile? Yaataile Yeova nu kupepa kuli aliwe ukuti ayazwe. (Welengini 2 Milandu 20:3, 4.) Nupya yataacisile vivyo cila-wino pa lwakwe, ukulingana na vino yelenganyanga. Baibo ikati: ‘Insita kwene ilya ala antu yonsi pyu a mpuka yakwe Yuda yatiyimilila pa mulola wakwe Yeova pamwi na aci yao na ana yao akulu na anono kwene.’ (2 Milandu 20:13) Yonsi pamwi aikolo na ance yaataile Yeova, nupya yaombisye ukukonka vino Yeova wayanenyile, na Yeova wayacingiliile uku yalwani yao. (2 Milandu 20:20-27) Ali vino na Ina Klistu yalinzile ukucita ndakai lino yamwi yakuyakanya.
9. I vyani vino tungasambilila kuli vino Aina Klistu akutandikikako yaaombelanga pamwi?
9 Aina Klistu yakutandikilako nayo yaapepelanga Yeova capamwi umu mutende. Lino aYuda na asenusi aingi izile yaya Aina Klistu, yonsi yalondelanga ivisambilizyo ivilivimwi. (Milimo 2:42) Ukuombela pamwi kwa musango uu kwalolekanga lino yaayazunyanga, pa nsita ino yalondekanga ukwavwana. (Milimo 4:23, 24) Uzye namwe mukuzumilizya ukuti umu nsita izitale cacindama sana ukuombela pamwi?
MWAOMBELA PAMWI LINO UWANDA WAKWE YEOVA UKUPALAMA
10. Alilaci lino ukuombela pamwi kulaalondekwa sana?
10 Uwanda wakutiinya uutatala wayako umu wikazi wa yantunze wati-upalama. Kasema Yowelo walondolwile insita iiyo ukuti, “ulaya uwanda wa mfinzi nu ulanda.” (Yowelo 2:1, 2; Zefaniya 1:14) Antu yakwe Leza yene alino yalaalondekwa ukuombela pamwi sana. Iusyini amazwi yano Yesu walanzile akuti: “Antu amu wene uli onsi ndi yakatukilana aisikulu nu kuilwisya, lyene uwene uwo ulawa.”—Mateo 12:25.
11. Uzye antu yakwe Leza ndakai yangaomvya uli ivyeo ivyaya pa Masamu 122:3, 4? (Lolini cikope cakutandikilako.)
11 Lino insita iiyo ilafika, cilaalondekwa sana ukuombela pamwi. Kuombela pamwi muli ukapepa kuno tulaalondekwa, tungakukolanya kuli vino mang’anda aali umu Yelusalemu yaapalamine. Amang’anda kwene yaayo yapalamine sana icakuti kalemba wa masamu walanzile pa musumba wa Yelusalemu ati, “ivikulwa vyakweo vyonsi ivititikane.” Cii calenganga ukuti aikazi ya mu musumba uuwa ya-avwana nu kucingililana. Nupya, kupalamana kwa musango uuwa kwimililangako ukupepela Leza capamwi ukwa mitundu yakwe Yeova iyakongananga uku kupepa. (Welengini Masamu 122:3, 4.) Ndakai nu mumanda atale aakwiza, naswe tulinzile ukutwalilila ukuombela capamwi.
12. I cani icilatwazwa ukuti tukapusuke lino Gogi alazanza antu yakwe Yeova?
12 U mulandu ci uno cilacindamila sana ukuti tukaaombela pamwi pa nsita iiya? Ezekelo cipande 38 paaya mazwi ya kusoowela aakuti: “Gogi waku mpanga ya Magogi” alakatukila antu yakwe Leza. Pa nsita iiya citanga ciziipe ukwiza leka icintu nanti cimwi ukutupaatukanya. Nupya citanga ciye icamano ukwelenganya ukuti ivintu vya mu nsi yakwe Satana vingiza vitucingilile. Lelo, tulalondeka ukuya sana apiipi na ina itu. Kuya kwene, cisikupiliula ukuti ndi twaya pamwi na ina itu alino tuliza tupusuke. Fwandi swensi kwene cila-muntu tulinzile ukutaila Yeova nu kumuuvwila. Ndi twacita vivyo, alino Yeova na Yesu yalatucingilila lino Gogi alatuzanza, nupya tulaya umu nsi ipya. (Yowelo 2:32; Mateo 28:20) Nomba tulinzile nu kutwalilila ukuombela pamwi na antu yakwe Leza. Uzye vwilini Leza alapususya antu aalapingulapo ukucita vino aineco yakwelenganya?—Mika 2:12.
13. I vyani vino acance yangasambililako kuli vino tulanzilepo?
13 Ndi cakuti mwemwe yacance, uzye mwati-mulola vino cicindime ukuya sana apiipi na ina inu? Mwaezya sana na maka ukuti mutaaya pamwi na amusinku winu sile nupya mutaipaatula uku ina inu. Likwene sile swensi, ance naikolo pamwi, tulaalonda sana ukuya pamwi na ina itu. Mwakomya ucuza winu na ina inu na yankazi, nupya mwaipakizya ukuombela pamwi nayo. I cumicumi, kuombela pamwi na antu yakwe Yeova ndakai, kulalenga mukapusuke uku nkoleelo!
“VILUNDWA VYA MWILI ONGA”
14, 15. (a) U mulanduci uno Yeova akutusambilizizya ukuti twaombela pamwi? (b) I vyani vino Yeova akatuneena ivingatwazwa ukuti twaombela pamwi?
14 Yeova akatwazwa ukuti “twamuombela capamwi.” (Zefaniya 3:8, 9) Akatusambilizya ukuti ivintu vikatuzipile uku nkoleelo, lino “alakonganika ivintu vyonsi kupitila muli Klistu.” (Wengini Efeso 1:9, 10, NW) Yeova akaalonda ukulemanya antu aaya pano nsi ni viumbwa vya kwiyulu ukuya ulupwa longa lwakwe yakapepa yakwe. Nupya tusitwisika ukuti Yeova alacita vivyo kwene. Mwe ya cance mungaya umu lupwa kwene luulo amanda pe. Uzye mukalonda ukuombela pamwi na antu yakwe Yeova?
15 Yeova akatusambilizya ukuombela pamwi ndakai pakuti tukikale umutende pamwi na anji umu nsi ipya. Akatuteekanyizizya lino akutusambilizya pakuti ‘twasakamalana,’ ‘kutemwana cuze,’ “kukomelezyanya,” alino nu “kwazwana.” (1 Kolinto 12:25; Loma 12:10; 1 Tesalonika 4:18; 5:11) Yeova wamanya ukuti Aina Klistu yatamaliilika, nupya cii, cingalenga ukuti insita zimwi catutalila sana ukuombela pamwi. Ali cino akatuneenela ukuti, “mwaelelana.”—Efeso 4:32.
16, 17. (a) U mulandu ci onga uno tukayila uku kulongana? (b) Uzye ivyani vino ance yangasambilila kuli Yesu?
16 Inzila nayuze ino Yeova akatusambilizizyamo ukuti twaombela pamwi, u kulongana. Ibuku lya Ayebulai 10:24, 25 likatuneena ukuti, umulandu onga uno tukayila uku kulongana, u kukomelezyanya pakuti twacita ivisuma. Nupya tulaalondeka sana ukulongana pamwi lino uwanda wakwe Yeova uwa konoona antu aipe ukupalamila.
17 Tulinzile ukukolanya Yesu, pano wene watemilwe sana ukulongana pamwi na antu yakwe Yeova. Lino Yesu wali ni myaka 12 iya kuvyalwa pano nsi, wayile na avyazi yakwe uku ukongano ukalamba. Pa nsita imwi, avyazi yakwe Yesu yataamanyile kuno wali. Uzye wayile kumwi umu kwizizya pamwi na ance yauze? Awe. Lino avyazi yakwe yamuzanyile, Yesu wali na yasimapepo apa ng’anda yakupepelapo, ala yakulanzyanya pa Malembelo.—Luka 2:45-47.
18. Uzye ipepo lingatwazwa uli ukuombela pamwi na ina itu?
18 Nupya tungakomya ucuza witu na ina lino tukuyapepelako nu kulenga ukuti Yeova ayazwe muli vimwi. Ukupepela aina itu kungatwazwa ukwiusya vino tukayasakamala. Cacindama sana ukutemwa aina itu, ukuyakomelezya pa nsita ya kulongana, nu kuyapepelako. Mwe ya cance, uzye mwatala mwezya ukucita ivintu vii pakuti muye yacuza yasuma uku ina inu yano mwaya nayo umu cilongano? Pakuti tukapusuke lino impelelekezyo iliza, tulaalondekwa ukuya sana apiipi na ina itu, asi kuya ucuza na antu amu nsi yakwe Satana.
VINO TUNGALANGA UKUTI “SWESWE VILUNDWA VYA MWILI ONGA”
19-21. (a) Uzye tukalanga uli ukuti “Sweswe vilundwa vya mwili onga”? Landini pali vino vyacitiike. (b) Uzye i vyani vino mukusambilila kuli vino aina yaka-azwana lino kwacitika uzanzo?
19 Ndakai kwaya ivintu ivingi ivikalanga ukuti antu yakwe Yeova i “vilundwa vya mwili onga.” (Loma 12:5) Ndi kwacitika uzanzo uukaalenga aina itu yaacula, tukauvwa sana uluse nupya tukalonda ukwazwa aina itu aakucula. Mu Dizemba 2011, imvula ya citalawe yatoonyizye apa cilila ca Mindanao, uku Philippines. Umu wanda onga sile usiku, amang’anda ukucila pali 40,000 yaunzile, pa mang’anda kwene yaa, paali na mang’anda ya ina itu. Iofesi lya musambo lyalanzile ukuti na lino vimwi ivya kwazwilizya aina itu vitatala vyafika uku cifulo cii ukufuma kuli komiti ikalolekesya pa mazanzo, “aina ukufuma uku mpanga zyuze yatumanga uwazwilizyo.”
20 Lino uku Japan kwacitiike icilundumusi icalenzile ukuti kuye sunami (kulikuti cimuza cikulu cikaakatusya manzi), uku ufumo ndaka wa mpanga iiya, aina itu yacuzile sana. Aingi yaasile sile ukwaula nanti kamwi. Ing’anda yakwe ya Yoshiko yawiile. Ya Yoshiko ikalaanga ukutali sana ni Ng’anda ya Wene, apiipi na makilomita 40. Yalanzile yati: “lino papisile insita, twazungwike ukwizamanya ukuti umwangalizi wa ciputulwa na ina yauze izile ala yakutulonda lino papisile uwanda onga ukufuma pano icilundumusi cacitikiile.” Ya Yoshiko yamwentwile nu kulanda yati: “Twataizye sana ukuti yatusakamile muli vyakwe Leza. Nupya, twapokeliile amakoti, insapato, ivyola, ni vya kuzwala pa kulaala.” Umwina uwaya muli komiti iikalolekesya pa mazanzo walanzile ati: “Aina aaya umu mpanga ya Japani yaombelanga pamwi, ukwezya sana na maka ukwavwana. Aina yamwi yafumile uku United States ukuti ize yavwilizyeko. Lino yayuzizye icalenzile ukuti ize ukufuma ukutali wakwe vii, yaswike yati, ‘Twalemana sana na ina itu aku Japani, nupya yakulondeka uwazwilizyo.’” Uzye mukayuvwa ningo sana pa mulandu wakuti mwaya umwiuvi lino antu yatemwana sana? Yeova afwile akauvwa ningo sana ukulola ukulemana kwa musango uu.
21 Ndi cakuti tukuombela pamwi na ina itu ndakai, tulatwalilila ukuombela pamwi na ina yano tukalongana nayo na lino ivintu vyatala nanti cakuti limwi yangatupaalukanya na ina itu aaya umu mpanga zyuze. Ukuombela pamwi na ina itu kukatusambilizya ukuiteyanya uku ntazi zino tungakwata ukunkoleelo lino insi ii ikuya uku mpelelekezyo. Ya Fumiko, apuswike lino kwacitiike icilundumusi uku Japani yalanzile yati: “Impelelekezyo yatipalama sana. Tulinzile ukutwalilila ukwazwa aina itu lino tukuloleela insita ino kutalaya amazanzo.”
22. Uzye ukuombela pamwi na ina itu kulatwazwa uli uku nkoleelo?
22 Mwaezya sana na maka ukuombela pamwi na ina inu likwene lino uwanda wakwe Yeova utatala wiza pakuti mwaya aipekanye. Lino insi yakwe Satana iloononwa, Yeova alacingilila antu yakwe wakwe vino wacingiliile antu yakwe aaliko mpiti. (Ezaya 52:9, 10) Swensi kwene ance pamwi na aikolo, tulinzile ukutwalilila ukuombela pamwi na ina itu pakuti tukapusuke. Umwilyasi lilondeliilepo, tuli nu kusambilila pa mulandu uno tulinzile ukutaizya pali vino Leza watucitila mpiti.
[Mauzyo ya Masambililo]
[Cikope api’fwa 21]
Swensi kwene cila-muntu tungaapepelako aina itu (Lolini palagalafu 18)
