Uzye Mwamanya Upiliulo wa Malembelo?
Uzye Mwamanya Upiliulo wa Malembelo?
“Lyene wayalenzile ukuti yamanye ningo upiliulo wa malembelo.”—LUKA 24:45, NW.
I VYANI VINO MWASAMBILILA UKU CILANGILILO . . .
cakwe kata wa mbezu uwaizi usiku?
ca mukwau?
ca mwana uwaponzile?
1, 2. Uzye Yesu wakomelizye uli asambi yakwe pa wanda uno watuutulwike?
ASAMBI yakwe Yesu yaili yaayanga uku muzi umwi apaali amakilomita apiipi na 11 kufuma uku Yelusalemu. Yaali sana nu ulanda pano ala Yesu wafwile nupya yataamanyile ukuti apa nsita ii ala watutuluka. Zuwa-zuwa, Yesu walolekiile ku ya sambi kwene yaa atandika nu kupitila pamwi nayo. Lyene “Yesu ayalondolwela vyonsi vyaya mu mpapulo zyakwe Mose na yakasema, pamulandu wakwe umwisikulu.” (Luka 24:13-15, 27) Cii cayateekizye, nupya imyenzo yao yatandike ukupya ukuluzango, pano ‘walandanga’ nayo nu ‘kuyalondolwela’ malembelo—Luka 24:32.
2 Uwanda kwene uuwa amanguzi, asambi yaaya yaili yaaswilile uku Yelusalemu. Lino yazanyile atumwa yauze, yaalondolwile vyonsi ivyacitiike. Lino yasimikanga, Yesu walolekiile ku atumwa yakwe yonsi. Lelo, atumwa yakwe Yesu yuvwile sana intete. Yaatandike ukutwisika. Uzye Yesu wayakomelizye uli? Tukawelenga ukuti: Yesu “wayalenzile ukuti yamanye ningo upiliulo wa malembelo.”—Luka 24:45, NW.
3. Uzye i ntazi ci zino tungaya nazyo, nupya i cani icingatwazwa ukutwalilila ukuomba ningo umulimo wakusimikila?
3 Insita zimwi naswe tungaya nu ulanda wakwe vino cali uku yasambi yakwe Yesu. Nanti icakuti tukuombesya umu mulimo wakwe Yeova, lelo tukatoovoka ndi cakuti tusikulola ivisuma ivikufuma mukuombesya kwitu. (1 Kolinto 15:58) Nanti limwi cingaloleka kwati yano tukusambilila nayo Baibo yasikulunduluka sana. Yamwi yano tukwazwa yangata nu kuombela Yeova. Uzye tungacita uli pakuti tutwalile ukuomba ningo umulimo wakusimikila ndi caya vivyo? Cintu conga icingatwazwa, u kumanya ningo upiliulo wa vilangililo vino Yesu walanzile ivyaya umu malembelo yamuzilo. Lekini tulaande pa vilangililo vitatu tulole vino tungasambililako.
KATA WA MBEZU UWAIZI
4. Uzye icilangililo cino Yesu walanzile pali kata wa mbezu uwaizi usiku, cikapiliula cani?
4 Welengini Mako 4:26-29. Uzye icilangililo cino Yesu walanzile pali kata wa mbezu uwaizi usiku, cikapiliula cani? Umonsi uwalumbulwa umu cilangililo akaimililako kasimikila wenga na wenga aakakosoola pa Wene Wakwe Leza. Imbezu nazyo i landwe lya Wene lino likasimikilwa uku yantu aaya ni myenzo yaufumacumi. Wakwe vino caaya umu wikalo wa yantu, kata wa mbezu ‘akalala insita ya usiku, nga lino waca azyuka.’ Pakaapita insita pakuti imbezu zimele nu kukula, kufuma pa nsita ya kukomela ukufika na pa nsita ya uzombozi. Pakuti ‘imbezu zimele nu kukula,’ pakaapita insita. Ukukula kwene kuu ukwa mbezu, kukacitikila ‘mumusili,’ panono-panono. Mu nzila iliyonga kwene, ukulunduluka muli vyakwe Leza nako kukacitika panono-panono. Ndi cakuti umuntu walunduluka watandika ukuombela Leza, akaseeka ivizao lino waipeela kuli Leza nu kuwatiziwa.
5. U mulandu ci uno Yesu walandiile icilangililo ci?
5 U mulandu ci uno Yesu walandiile icilangililo ci? Yesu akaatwazwa ukumanya ukuti Yeova sile aakalenga kuti icumi cikule umu myenzo ya antu aakalonda ukuya nu umi wa pe. (Milimo 13:48; 1 Kolinto 3:7) Swemo tukakomela nu kukontelela, nomba tusilenga kuti imbezu zikule. Tutanga tupatikizye ukuti imbezu zikule. Wakwe viivi kwene vino caali uku monsi wa mucilangililo, tusimanya vino imbezu zikamela nu kukula. Ilingi cii cikacitika swemo ukwaula nu kumanya lino tukuomba imilimo umu wikazi witu. Lelo, umukuya kwa nsita, imbezu zya Wene zingaseeka ivizao. Umusambi umupya lyene akatandika ukuombela pamwi naaswe umu mulimo wa uzombozi, nupya tukatemwa sana ukuombela pamwi nawe.—Yoane 4:36-38
6. Uzye tulinzile ukumanya cani pa kulunduluka kwa muntu wino tukasambilizya Baibo?
6 Uzye tungasambililako vyani uku cilangililo cii? Icakutandikilako, tulinzile ukuzumila ukuti tutakwata amaka yakulenga wino tukasambilizya Baibo ukulunduluka. Ukumanya ukuti amaka itu yapeleela kulatwazwa ukukana patikizya wino tukasambilizya Baibo ukuti awatiziwe. Tukaomba apapezile amaka itu ukuti twazwe umuntu, nomba tukaicefya nu kuzumila ukuti umuntu kwene wiyo aalinzile ukuipeela kuli Yeova umwineco. Umuntu alinzile ukuipeela kuli Leza pa mulandu wakuti watemwa Yeova nupya akulondesya ukumuombela. Asilonda ukupatikizya umwi ukuipeela kuli aliwe.—Masamu 51:12; 54:6; 110:3.
7, 8. (a) I vyani navyuze vino tukasambilila uku cilangililo cakwe Yesu pali kata wa mbezu uwaizi? Simikini icacitiike. (b) Uzye cii cikatusambilizya vyani pali Yeova na Yesu?
7 Cakwe ciili, ndi twamanya vino tukusambilila uku cilangililo cii, tutalaatoovoka ndi cakuti twalola kwati yano tukusambilizya Baibo yasikulunduluka. Tulinzile ukuteeka umwenzo. (Yakobo 5:7, 8) Ndi cakuti ituomba apapezile amaka itu ukwazwa umusambi nomba asikulunduluka, tukamanya ukuti ukukana lunduluka kwa musambi wiyo, kusipiliula ukuti tusi yakasambilizya yasuma. Yeova akazumilizya imbezu zya cumi ukukula umu myenzo yakwe yaayo sile aakalonda ukusenuka. (Mateo 13:23) Fwandi tutalinzile ukulola ukuti ndi cakuti asambi yakulunduluka ala alino tukuomba ningo. Yeova wene asilola ukuti ndi cakuti yano tukusambilizya yakulunduluka ala alino tukuomba ningo. Lelo, wene akatemwa sana imiombele itu ndi cakuti tuli na ucisinka nanti cakuti asambi yasikulunduluka.—Welengini Luka 10:17-20; 1 Kolinto 3:8.
8 Cakwe citatu icakuti, asi lyonsi lino tukamanya ndi cakuti umuntu akusenuka. Yamwi atwalana yano misyonali wasambilizyanga Baibo, yaaile kuli aliwe nu kumunena ukuti yaalondanga ukuya yakasimikila aatali yawatiziwe. Wayanenyile ukuti pakuti yaliinge, yalondekwanga ukuta ukupeepa fwaka. Icazungwisye misyonali i cakuti, yalanzile ukuti yaata ukupeepa nupya paapita ni myezi ingi. I cani icalenzile kuti yate ukupeepa? Izile iyiluka ukuti Yeova wayalolanga nanti cakuti yangaapeepa lino pasi akuyalola, nupya Yeova wapata antu aaya nu usomvi. Fwandi imyezo yao yaayalenzile ukuti yaipingwile aineco—ukutwalilila ukupeepa na lino misyonali apanoli nanti ukuta ukupeepa. Lyene pa nsita iiya yaatemilwe sana Yeova, nupya cii calenzile kuti yapingulepo ningo. Yaalundulwike muli ukapepa, nanti icakuti misyonali wene atamanyile ni vyacitiike.
MUKWAU
9. Uzye icilangililo ca mukwau cikapiliula cani?
9 Welenginini Mateo 13:47-50. Uzye icilangililo ca mukwau cino Yesu walanzile cikapiliula cani? Yesu wakolinye umulimo wa kusimikila ilandwe lya Wene uku yantu yonsi ku mukwau ukulu cuze uno yasumbiile pali yemba. Wakwe vino umukwau ukalema “inswi zya misango yonsi,” umulimo witu uwakusimikila nao ukalenga antu amisango yonsi yasambilile icumi. (Ezaya 60:5.) Antu aingi aakazanwa uku maukongano ya citungu nu ku Ciusyo cila-mwaka ali cino cikalangilila ukuti tukaombesya umu mulimo wakusimikila. Yamwi pa yantu kwene yaa, yaaya wa nswi “zisuma” izya unkolanya nupya yakaiza yaya umu cilongano ca Ina Klistu ya cumi. Nomba yamwi yene yaakolana ni nswi “ziipe”; kulikuti asi yonsi akatemwikwa kuli Yeova.
10. U mulandu ci uno Yesu walandiile icilangililo ca mukwau?
10 U mulandu ci uno Yesu walandiile icilangililo ci? Ukulekanya inswi zya unkolanya kusilozya uku upinguzi wakulekelezya umu nsita ya ucuzi ukulu cuze. Lelo, kukalangilila ivili nu kucitika umu manda yakusyalikizya umu nsi ii ipe. Yesu walanzile ukuti asi yonsi aali nu kutemwa Yeova lino yapokelela icumi. Antu aingi yakaiza uku kulongana naswe. Yauze nayo yakaitemelwa ukusambilila naswe Baibo, nomba yasilonda ukutwalilila pakuti yalunduluke. (1 Yamwene 18:21) Lelo, kwaya nayauze aakaata ukulongana pamwi na Ina Klistu ya cumi. Alumendo na akazyana yamwi yaakulila umu ndupwa zyakwe yakapepa nomba yene yataasambilila ukutemwa Yeova. Yesu walanzile ukuti swensi kwene cila-muntu tulinzile ukuipingwila ukuombela Leza nanti foo. Yeova akaalola yaayo aakapingulapo ningo ukuti ali visuma ivya mu ‘mitundu ya antu yonsi.’—Hagai 2:7.
11, 12. (a) Uzye tungasambililako vyani uku cilangililo ca mukwau? (b) Uzye cii cikutusambilizya vyani pali Yeova na Yesu?
11 Uzye tungasambililako vyani uku cilangililo ca mukwau? Ukuvwikisya isambililo ilyaya umu cilangililo cii, kungatwazwa ukukana-uvwa uyi sana ndi umusambi wa Baibo nanti umwana witu asikulonda ukuya umuomvi wakwe Yeova. Cii cingacitika nanti lino twezya ukuombesya sana ukwazwa umuntu wiyo. Umwi ndi wazumila ukusambilila Baibo nanti ndi wakulila pali yakapepa, cisipiliula ukuti ala amaya sana cuza wakwe Yeova. Ndi cakuti umwi asikulonda ukutontela utunguluzi wakwe Yeova, atanga aye umuomvi wakwe Leza.
12 Uzye cii cikupiliula ukuti yaayo aafuma umu cumi yatalatala yazumiliziwe ukuwela? Nanti ndi cakuti umwi wafilwa ukuipeela kuli Yeova, uzye ala lyene umuntu wiyo atalatala alinge? Awe. Kucili syuko lyakuti umwi angaya cuza wakwe Leza lino ucuzi ukulu cuze utatala wiza. Cili kwati Yeova akwama antu ukuti: ‘Welini kuno ndi, nani kwene ndawela kunomuli.’ (Malaki 3:7) Cii calandwapo sana umu cilangililo cuze cino Yesu walanzile, cilangililo ca mwana uwaponzile.—Welengini Luka 15:11-32.
MWANA UWAPONZILE
13. Uzye icilangililo ca mwana uwaponzile cino Yesu walanzile cikapiliula cani?
13 Uzye icilangililo ca mwana uwaponzile cino Yesu walanzile cikapiliula cani? Isi wa luse umu cilangililo cii akaimililako Yeova Tata witu uwa kwiyulu uwaya nu kutemwa. Umwana umonsi uwalenzile kuli isi ivyuma vyakwe vino wali nu kupyana, akaimililako yaayo aakapumbuka ukufuma umu cilongano. Ndi yafuma umu cilongano, cikaya kwati yaaya uku “mpanga ya kutali,” kulikuti insi ino Satana aali kateeka, umwaya antu asicita ukulonda kwakwe Leza. (Efeso 4:18; Kolose 1:21) Yamwi umukuya kwa nsita yakaiza iyasenuka, nu kuswilila ukwiuvi lyakwe Yeova nanti icakuti citaangupala ukucita vivyo. Yaayo aakaicefya nu kusenuka, Yeova Tata witu a kayapokelela pano wene akaelela antu.—Ezaya 44:22; 1 Petulo 2:25.
14. U mulandu ci uno Yesu walandiile icilangililo pa mwana uwaponzile?
14 U mulandu ci uno Yesu walandiile icilangililo ci? Yesu walanzile umu nzila isuma sana ukuti Yeova akalonda ukuti yano yaapumbuka ukufuma umu cilongano yalinzile ukuwela kuli Leza. Isi umu cilangililo ataatiile ukupaalila ukuti umwana wakwe angawela. Lino waweni umwana wakwe akwiza, wasimwile nu kuya mukuukula nanti icakuti umwana wali apatali. Fwandi cii cilinzile ukulenga yaayo aafuma umu cilongano ukutandika ukulondesya ukuwela kuli Yeova ukwaula kusumba ni nsita! Limwi yangaya atonte muli ukapepa, alino nupya cingayatalila ukuti yawele umu cilongano cakuti limwi yangauvwa ni insonyi. Nomba ukuwela uku cilongano icili cintu cisuma sana—na angeli umwiyulu yakazanga ndi cakuti umuntu wawela kuli Leza.—Luka 15:7.
15, 16. (a) Uzye twasambililako vyani uku cilangililo ca mwana uwaponzile? Landini ivyacitiike. (b) Uzye cii cikutusambilizya vyani pali Yeova na Yesu?
15 Uzye tungasambililako vyani uku cilangililo ca mwana uwaponzile? Tulinzile ukukolanya Yeova. Tutafwile ‘ukucizyapo ukuya aasuma’ cakuti itwafilwa nu kupokelela yano yata ukucita iviipe nu kuwela umu cilongano. Cii cingalenga sile ukuti tute ukuya yacuza yakwe Yeova. (Kasambilizya 7:16) Tungasambililako icintu na cuze uku cilangililo cii. Tulinzile ukulola uwafuma umu cilongano ukuti ali wa “mfwele iponge” nupya angawela. (Masamu 119:176) Uzye ndi twazana umuntu uwapumbuka ukufuma umu cilongano, tulamwazwa ukuti awele? Uzye tulamanyisya zuwa-zuwa ya eluda umu cilongano pakuti yamwazwe? Tulacita vivyo ndi cakuti tukulondela vino iitusambilila umu cilangililo cino Yesu walanzile pa mwana muponge.
16 Yaayo aakawela umu cilongano yakataizya sana pa luse lwakwe Yeova na vino yauze amu cilongano yakayazwa. Umwina umwi uwazinzilwe umu cilongano i papita ni myaka 25, walanzile ati: “Uluzango lwane lukakulilako sile ukufuma pano yambwezezya umu cilongano pano lyonsi Yeova ‘akampeela upemwilo.’ (Milimo 3:19-20) Yonsi amu cilongano yakangazwa sana! Lyene naaya umu lupwa lwa yaomvi yakwe Yeova.” Nkazi uwa cikazyana uwapumbwike ukufuma kuli Yeova pa myaka 5 walanzile ati: “Ntanga ndondolole insansa zino nali nazyo lino aina umu cilongano yandangizye ukutemwa kuno Yesu walanzilepo. Ukuya umwiuvi lyakwe Yeova i cintu icisuma cuze!”
17, 18. (a) A masambililo ci acindame sana yano twasambilila umu vilangililo vitatu vino Yesu walanzile? (b) Uzye lyene icani cino tulinzile ukucita?
17 Uzye i sambililo ci ilicindame sana lino twasambilila uku vilangililo vii vitatu? Icakutandikilako, tulinzile ukumanya ukuti tutakwata amaka akulenga umuntu ukulunduluka muli ukapepa. Yeova u wakwata amaka yaayo. Cakwe ciili, tutafwile ukwelenganya ukuti yonsi aakaiza uku kulongana naswe nu kusambilila Baibo naswe yalalunduluka nu kuya aomvi yakwe Yeova. Na cuze i cakuti, nanti icakuti yamwi yangapumbuka ukufuma umu cilongano nu kuta ukuya yacuza yakwe Yeova, tutalinzile ukwelenganya ukuti caasila yatalawela. Ndi cakuti yawela, tufwile ukuyapokelela wakwe vino Yeova akapokelela aawela umu cilongano.
18 Si lekini swensi cila-muntu tutwalilile ukwiluka, ukumanya nu kuya na mano lino tukuwelenga pa vilangililo vino Yesu walanzilepo. Nupya tulinzile nu kulayuzya sweineco pa upiliulo wa vilangililo vivyo, umulandu uno vyalembiilwe muli Baibo, vino tungaomvya masambililo yano twazanamo, na vino tungasambilila pali Yeova na Yesu. Ndi tukucita vivyo, tulaalanga ukuti tukuvwikisya upiliulo wa mazwi yakwe Yesu.
[Mauzyo ya Masambililo]
[Cikope api’fwa 16]
Ndi mwawelenga Mateo 13:47-50 . . .
[Cikope api’fwa 17]
. . . mulande vino tungasambililako ndakai
Yamwi pali yano yakasambilila icumi yalatandika ukuombela Yeova (Lolini mapalangalafu 9-12)
