1. U mulandu ci uno Yeova walinga ukutaizya?

YEOVA ali Kapeela wa “wila usuma onsi ni cakupeelwa cifumaluke,” fwandi walinga ukutaizya. (Yako. 1:17) Yeova Kacema witu uwaya nu kutemwa, akatusakamala muli vyonsi vino tukalonda alino na muli ukapepa witu. (Masa. 23:1-3) Nupya ‘aali wino swemo tukazina muno ali nupya aali wino akatupeela amaka’—nalino twaya ni ntazi! (Masa. 46:1) Icumi kwene, fwandi tungazumila nu mwenzo onsi vino kalemba wa masamu walemvile ati: ‘Taizyini Yeova, pano wene umusuma. Ukutemwa kwakwe u kwa manda pe.’—Masa. 106:1.

2, 3. (a) Iintazi ci iyaya umu kukana taizya pali vino Leza watucitila? (b) A mauzyo ci yano tumazana amasuko umwisambililo lii?

² U mulandu ci uno icicindamila ukwelenganya apilyasi lii ilya kutaizya? Wakwe vino casoowilwe, antu aingi umu manda yaa akusyalikizya yasitaizya. (2 Tim. 3:2) Aingi yasitaizya pali vino yaakwata. Pamulandu wakuti antu yakasombwa ku vyauculuzi vino amu nsi yakalumbilizya, aingi yakalondesya ukukwata ivintu ivingi kucila ukuteeka umwenzo pali vino yaakwata. Naswe kwene  ndi tutacenjile, tungatandika ukukolanya antu amu nsi aasitaizya. Wakwe vino aina Izlaeli yataataizyanga, tungata ukutaizya pali ucuza witu na Yeova na pa visuma vino twapokeelela ukufuma kuli aaliwe.—Masa. 106:7, 11-13.

³ Lyene lekini tulande pali vino vingacitika ndi cakuti twaya na mezyo aipe. Pansita iyo, tungatoovoka zuwa icakuti tute nu kutaizya pali vino Yeova akatucitila. (Masa. 116:3) Uzye lyene tungacita uli pakuti twalanga ukuti tukataizya? Nupya i cani icilatwazwa ukutwalilila ukuya na melenganyo yasuma na lino ivintu vyatala? Lekini tulole icingatwazwa.

4. Uzye tungacita uli pakuti twataizya lyonsi?

⁴ Ndi cakuti tukulonda twalanga ukuti tukataizya, tulinzile ukwelenganya sana pali vino Leza watucitila alino na pa kutemwa kuno akalaanga kuli sweswe. Lino kalemba wa masamu wacisile vivyo, wazungwike sana pa vintu vya kuzungusya vino Yeova wacita.—Welengini Masamu 40:5; 107:43.

5. I cani cino tungasambilila kuli Paulo pali vino wataizyanga Leza?

⁵ Tungasambilila ivingi kuli Paulo pali vino tungalaanga ukuti tukataizya. Paulo afwile welenganyanga sana pali vino Leza wamucitiile, pano lyonsi wataizyanga sana. Paulo wamanyile ningo ukuti pa nsita imwi ‘wavwanganga iviipe, ukuzunya nu kutuka’ Aina Klistu. Acino, Paulo wataizyanga sana, pano nanti cakuti mpiti wali ni miyele iipe, Leza na Yesu yamuvwiliile uluse nupya yaamupeezile umulimo wa kukosoola. (Welengini 1 Timoti 1:12-14.) Paulo wataizyanga na Ina Klistu yauze nupya ilingi wataizyanga Yeova pa miyele yao isuma alino na pakuya acisinka umu mulimo wakwe Leza. (Filipi 1:3-5, 7; 1 Tesa. 1:2, 3) Lino Paulo weziwanga, wataizyanga Yeova ukwaula nu kusumba insita pali vino aina yaamwazwanga. (Mili. 28:15; 2 Kol. 7:5-7) Fwandi ali cino mazwi aaya muli Baibo yano Paulo walemvile yakakomelezezya sana Aina Klistu ukuti: “Mulinzile mwataizya . . . , mwatungululana na mano onsi. Mwaimbi nyimbo zya kulumbanya, ni zyamuzilo kuli Leza.”—Kolo. 3:15-17.

6. Uzye icani cino Yeova wamucitila icikalenga ukuti mwamutaizya?

⁶ Uzye tungaakolanya uli Paulo pali vino tulinzile ukutaizya Leza? Wakwe Paulo, tulinzile ukwelenganya sana pali vino Yeova watucitila cila-muntu. (Masa. 116:12) Ndi cakuti yamuzizye ukuti, ‘I vyani vino Yeova wamucitila vino mukataizya?’ uzye mungasuka mutuuli? Uzye lino mukwasuka mungalumbula na ucuza winu na Yeova? Nanti uzye mungalumbulamo vino Leza wamwelela pa maifyo inu pa mulandu wakuti mwataila umu mpolelwa yakwe Klistu? Uzye mungalumbula amazina ya ina na ya nkazi amwavwile lino mwali ni intazi izitale sana? Kwene, mutanga mwilile nu kulumbula uwinu nanti ana inu yano mwatemwa sana. Ukwelenganya sana pa vintu kwene vii ivisuma vino Tata witu uwatutemwa, Yeova watucitila, kulalenga ukuti mwataizya sana nupya mulaataizya cila wanda.—Welengini Masamu 92:1, 2.

7. (a) U mulandu ci uno tulinzile ukupepa amapepo ya kutaizya? (b) Uzye cilaya uli kuli mwemwe ndi cakuti mukutaizya Leza umu mapepo inu?

⁷ Ndi cakuti tukwelenganya sana pa vintu ivisuma vino Yeova watucitila, tukaya aiteyanye ukupepa kuli aliwe nu kumutaizya. (Masa. 95:2; 100:4, 5) Aingi yakalola kwati ukupepa  inzila yakulengelamo sile vino yakulonda kuli Leza. Lelo, twamanya ukuti Leza akatemwa sana ndi tukumutaizya pali vino twakwata. Muli Baibo mwaya amapepo aingi akutaizya asuma cuze, pano paaya ni pepo lino Hana wapefile alino na lino Hezekiya wapefile. (1 Sam. 2:1-10; Eza. 38:9-20) Fwandi mwakolanya aomvi yakwe Leza kwene yaa aataizyanga. Mwataizya Yeova lino mukupepa kuli aliwe pa vintu ivisuma vino wamucitila. (1 Tesa. 5:17, 18) Ivintu vikatuziipila sana ndi tukucita vivyo. Ndi mukucita vivyo, mulaaya sana nu luzango, ukutemwa sana Yeova, nupya mulaya sana cuza wakwe.—Yako. 4:8.

8. Uzye icani cingalenga kuti tutaataizya pali vino Leza watucitila?

⁸ U mulandu ci uno tulinzile ukucenjela sana pakuti tutaililako ukutaizya Yeova pa vintu ivisuma vino akatucitila? Pano twapyana imiyele yakukana taizya. Elenganyini pali cii: Avyazi itu akutandikilapo, Adamu na Eva, yaapeezilwe icifulo icisuma sana. Mwali na vyonsi ivyalondekwanga pakuti yatwalilile ukuya nu umi, nupya yaakweti isyuko lya kwikala manda pe umu mutende. (Utan. 1:28) Nomba yatataizye pali vino Leza wayacitiile. Yalondelangapo navyuze pamulandu na ukaitemwe. Ni cacitiike icakuti, yaaposilwe vyonsi vino yaapezilwe. (Utan. 3:6, 7, 17-19) Vino twaya umu nsi umwaya antu asitaizya, naswe tungata ukutaizya Yeova pali vino watucitila. Tungatandika ukulola kwati ucuza witu na Leza utacindama. Tungata ukutaizya apisyuko lino twakwata ilyakuya umwiumba lya ina amu nsi yonsi. Tungatandika ukusumba sana amano uku vintu vya mu nsi ivili nu kononwa likwene. (1 Yoa. 2:15-17) Pakuti tutaaya viivyo, tulinzile ukwelenganya sana pali vino Yeova akatucitila nu kumutaizya lyonsi apisyuko lino twakwata ilya kuya antu yakwe.—Welengini Masamu 27:4.

9. U mulandu ci uno tulinzile ukwelenganyizya sana pa vintu ivisuma vino Leza watucitila lino twaya na mezyo aipisye?

⁹ Ndi cakuti tukutaizya Leza, cikatwazwa nu kucimvya amezyo atale sana. Limwi ivintu vingatutalila sana ndi cakuti kwaya vimwi ivyatucitikila ukwaula ukwenekela, wakwe ndi cakuti iya nanti mama wacita ucende, ndi twalwalisya, ndi twafwilwa, nanti ndi kwacitika amazanzo aakaiponela sile nu konona vino twakwata. Ivya musango uu ndi vyacitika, tulaateekeziwa nu kukomeleziwa ndi  cakuti tukwelenganya pa vintu ivisuma vino Leza watucitila. Elenganyini pa vintu ivilondeliilepo ivyacitikiile yamwi.

10. Uzye ukwelenganya pali vino Yeova akayacitila cila-wanda kwazwa uli ya AiIina?

¹⁰ Ya AiIina, * ya painiya ya nsita yonsi aakaikala uku North America, yaatwazilwe kuli eluda uwizile ayapondokela apuka na pa ng’anda ayasya na ana. I cani icaleenzile ukuti ya AiIina yatwalilile ukuombela Leza na ucisinka? Yaalanzile yati: “Nkataizya sana kuli Yeova pa kunsakamala. Cila-wanda nkaelenganya pa visuma vino Leza akancitila, nupya cii candenga ukumanya ukuti i syuko ukutemwikwa nu kumanyika kuli Tata witu uwa mwiyulu aakatucingilila. Namanya ukuti atalatala antazyele.” Nanti cakuti ya AiIina yakaaya ni ntazi izingi sana umu umi, ukutwalilila ukuya ni nsansa kwayazwa sana nupya cii calenga ukuti yaakomelezya nayauze.

11. I cani icavwile ya Kungusuku ukuzizimizya indwala iipe sana?

¹¹ Ya Kungusuku, aakaikala uku Asia, yaomvile upainiya pa myaka 20 na ya iya yao. Ukwaula nu kwenekela, ya dokota izile iyayazana ni ndwala yakwe kansa kuli ya pwapwa nu kuyanena ukuti limwi pa mapita imyezi itatu nanti 6 ale yaafwa. Nanti icakuti yene na ya iya yaakwatanga intazi zipusane-pusane, Lyonsi yaalolanga ukuti umi wao wali sile ningo. Yaalanzile yati: “Lino yaanzanyile ni ndwala yakwe kansa nuvwile sana uyi. Nayuvwile kwati nati-mponzya vyonsi, nupya nali sana ni ntete.” I cani icavwile ya Kungusuku ukuzizimizya? Yalanzile yati: “Cila-wanda lino ntatala naya uku kusendama, Nkapepa pa vintu 5 vino Leza wata-ncitila uwanda kwene uuwo. Lyene cii cikalenga inteeke umwenzo, nupya nkapepa kuli aliwe ukufuma pansi ya mwenzo wane.” Uzye ukupepa cila-wanda usiku kwazwa uli ya Kungusuku? Yalanzile yati: “Nizile iniluka ukuti Yeova akatwazwa lino tuli na mezyo nupya akatucitila ivintu visuma ivingi ukucila na pa ntazi izikatuponela.”

12. Uzye ya Jason yaacisile uli pakuti yatekeziwe pa mfwa ya yaci yao?

¹² Ya Jason, aakaombela apiofesi limwi lyakwe ya Nte umu Africa, yaaomba umu mulimo wa nsita yonsi ukucila pa myaka 30. Yaalanzile ukuti: “Papita imyaka 7 pano mamane wafwiliile, nupya nkauvwa uyi sana. Ndi natandika ukwelenganya pali vino mamane wacuzile ni ndwala yakwe kansa nkauvwa sana uyi.” I cani icavwa ya Jason ukuzizimizya? Yalanzile yati: “Pa nsita imwi nelenganyanga pa vintu vimwi ivisuma ivyacitikanga ala tuli pamwi, nupya napefile kuli Yeova nu kumutaizya pa kungazwa ukwiusya ivintu vivyo. Nuvwileko ningo nupya ukufuma paapo natandike ukutaizya Yeova lyonsi pa visuma vino niusyanga. Ukutaizya kwalenga ukuti vintu vinzipileko. Ncili nkauvwa uyi pa mfwa yakwe mamane, nomba ukutaizya Yeova pa cupo icisuma cino naalimo, ni syuko lino nakweti ilya kuombela pamwi nu muntu uwatemilwe sana Leza kwalenga kuti nauvwako ningo.”

13. I cani icavwile Sheril lino ulupwa lwakwe lwafwile?

¹³ Lino kwacitiike imvula iipisye iya citalawe uku central Philippines uku kusila kwa mwaka wakwe 2013, Sheril, uwali ni myaka sile 13 iyakuvyalwa pa nsita iiya, wasiile sile ukwaula nanti kamwi. Walanzile ati: “Ing’anda itu yaawile, nupya yonsi amu lupwa lwane yaafwile.” Ya isi, ya nyina, alino na kalume wakwe wenga na ya kaci yauze yaili yaafwile umu mvula kwene iiya iyacitalawe. I cani icavwa Sheril ukuteekeziwa pa cintu cii icacitiike? Akataizya nupya wasumba sana mano uku vintu ivisuma vino Leza acili akamucitila  na ndakai kwene. Walanzile ati, “Naweni vyonsi vino aina na yankazi yaacisile pa kwazwa nu kukomelezya yonsi aalondekwanga uwavwilizyo. Namanyile ukuti aina umu nsi yonsi yampepelangako.” Walanzile nu kuti: “Nkataizya sana ukumanya ukuti Yeova a Leza wane. Lyonsi akatupeela ivintu vino tukalondekwa.” I cumicumi, ukwiusya lyonsi ivintu ivisuma vino Leza akatucitila kuka-azwa sana ukucefyako ulanda. Ukutaizya kukatwazwa ukutwalilila ukuya ni nsansa na lino twaya ni ntazi iziipisye.—Efes. 5:20; welengini Filipi 4:6, 7.

14. I vintu ci ivisuma sana vino tukaloleela ukuti Leza akatucitile? (Lolini cikope cakutandikilako.)

¹⁴ Ukufuma sile na mpiti, antu yakwe Yeova yakazangila umu vintu ivisuma vino Leza akayacitila. Lino Leza wapuswisye aina Izlaeli kuli Falao ni vita vyakwe pali Yemba Muyenzu, aina Izlaeli yalumbanyizye Leza umu nyimbo nu kumutaizya sana. (Kufu. 15:1-21) Ndakai, pa vintu ivisuma sana vino tukataizizyapo Leza, paya nu upaalilo wa kutukulula ukufuma uku kuwaika ni ntazi zyuze. (Masa. 37:9-11; Eza. 25:8; 33:24) Elenganyini pali vino tuluuvwa lino Yeova aloonona alwani yakwe yonsi nu kutwingizya umu nsi ipya umulaya umutende nu wololoke. Ala tulataizya wakwe cimwi apa nsita iiya!—Umbw. 20:1-3; 21:3, 4.

15. I vyani vino mukulonda ukucita umu mwaka onsi wakwe 2015?

¹⁵ Tukuloleela ukuti Yeova ali nu kutucitila ivintu ivingi ivisuma sana umu mwaka uu wakwe 2015. Nomba, limwi tungaya na mezyo. Asi mulandu na vyonsi ivingacitika, twamanya ukuti Yeova atalatutazyela. (Malan. 31:8; Masa. 9:9, 10) Alatwalilila ukutupeela vyonsi vino tukalondekwa pakuti tutwalilile ukumuombela na ucisinka. Fwandi, Lekini twaezya na maka ukukolanya Kasema Habakuku, uwavwanzile ati: ‘Nanti umutingi utangaseeka ivizao, nu musamvu utangaya ni luwa nu kuseeka ivizao, ni cazi kwene citangaseeka, lelo umu vyalo vyao mutakatale mufume kamwi. Nga imfwele mu vitata ni ng’ombe zyao kwene mu nduwa zifwe zilukute zyonsi. Lelo nemo namazangila muli Yeova, namakwatanga insansa pamulandu wakuti Leza a Katuula wane.’ (Haba. 3:17, 18) I cumicumi, lekini umwaka uu, twaezya ukuya ni nsansa pamulandu ni vintu ivisuma vino Leza akatucitila nu kuvwila vino ilembelo lya mwaka wakwe 2015 likutuneena ukuti: ‘Taizyini Yeova, pano wene u musuma.’—Masa. 106:1.