Na ndakai kwene antu aingi yaaya wakwe Alex wino twalanda paa, pano nayo kwene yasiipakizya incito ino yakaomba. Aloni aakaomba incito yakulungisya ivintu walanzile ati: “Antu aingi yakaelenganya ukuti ndi cakuti umwi akaomba incito iikaloleka ukuti iisulwe, ala wasyalikila sana, yakaati: ‘Nemo incito ii a pakuloleelela sile, lino ndazana isuma ndasya naata.’”

U mulandu ci uno antu aingi yakalolela ukuti incito yakuombesya itayaliinga? Limwi ivintu vino yakalumbilizya apa ma TV, aali vino vikayavulunganya nu kutandika ukwelenganya ukuti yatalinzile ukuombesya. Mefyuzi wino akaombela uku kusakamala ivikuulwa, walanzile ati: “Antu yakaelenganya ukuti ndi ukuombesya pakuti uwaikala ningo, ala utalatunguluka.” Syeni nawe kwene wasininkizya cii. Walanzile ati: “Antu yasilonda ukuomba ukulingana na malipilo.”

Nupya tungati, antu aingi aatunguluka ningo yakaipakizya incito. Danieli aali ni myaka yakuvyalwa 25, aakaombela ku vya makuule, walanzile ukuti, “Nkaelenganya ukuti umu kuombesya mukafuma ivisuma, sana-sana ndi cakuti ivikulenga uwaomba incito kwene iiyo ivintu vyampomvu.” Andala, aali ni myaka 23, wazumilizye, alanda nu ukuti: “Namanya ukuti ndi umuntu ali ni nsansa, akailyokezya sana ukuomba incito, ukukana-ombesya kusiavwa umwi ukutwalilila ukuya ni nsansa, lelo kukalenga umuntu aaya nu ulanda sana!”

Uzye i vyani ivyazwilizya antu aakolana na Danieli na Andala kuti yaelenganya ivisuma pa kuombesya? Ukwaula nu kutwisika, yakaomvya ivisinte vya muli Baibo. Baibo isikomelezya ukukanaombesya, lelo ikakomelezya ukuombesya nu kukana-toovoka umu miombele. Baibo itatunena sile ukuti twaomba incito, lelo yatunena na vino tungacita pakuti twaipakizya lino tukuomba.

I visinte ci ivyaya muli Baibo ivingamwazwa ukuipakizya incito inu? Mukwai sambililini pa visinte vimwi umu cipande icilondelilepo.