1. Uzye tungaomvya uli ipepo ilyaya pali Mateo 6:9-13 umu mulimo wa kusimikila?

ANTU aingi yamanya sana ipepo lya Mwene. Ndi tukusimikila uku ng’anda ni ng’anda, ilingi tukalanda api pepo kwene lii pakuti twazwe antu kumanya ukuti Uwene Wakwe Leza, uteeko uwayako uno ulasenula ivintu pano nsi. Nanti limwi tungalanda pali vino vyalumbulwa apa kutandika umwi pepo kwene lii pakuti twazwe antu ukumanya ukuti Leza wakwata izina, lino tulinzile ukucindika.—Mate. 6:9.

2. Twamanya uli ukuti Yesu atalozyanga umu kuti tulinzile ukulaswilizyapo amazwi amwi pepo lii lyonsi lino tukupepa?

² Uzye Yesu walozyanga umu kuti lyonsi lino tukupepa tulinzile ukulanda amazwi kwene aaya umwi pepo lii, wakwe vino amu macalici yakacita? Awe. Lino Yesu atali alande api pepo lii, walanzile ati: “Lino mukupepa, mutaswililoka mu mazwi.” (Mate. 6:7) Pa nsita yuze, Yesu walanzile api pepo kwene lii, nomba waomvizye amazwi yauze. (Luka 11:1-4)  Fwandi Yesu watwazwilizye ukumanya ivintu vino tulinzile ukupepelapo.

3. A mauzyo cii yano mungayuzya mweineco lino tumasambililanga ivyaya mwi pepo lii?

³ Umwi sambililo lii ni lilondelilepo, tuli nu kulanda sana pali vino vyaya umwi pepo kwene lii. Lino tumasambililanga, mwayuzya mweineco muti, ‘Uzye ipepo lii lingangavwa uli ukuti napepa ningo? Na cuze icacindama cino tungayuzya sweineco i cakuti, uzye nkacita ivyaya umwi pepo lii?’

4. Uzye amazwi aakuti “Tata witu” yakatwiusya cani? U munzila ci muno Yeova wayela a Tata witu?

⁴ Amazwi aakuti “Tata witu” yakatwiusya ukuti, Yeova a Isi wakwe yonsi aina na ya nkazi umu nsi. (1 Pet. 2:17) Yano Yeova akasolola ukuti yakikale ukwiyulu yene akayama ukuti aana yakwe, fwandi a Isi wao umu nzila iiyele! (Loma 8:15-17) Na yaayo aalikala pano nsi yangamwama ukuti “Tata,” pano akayasakamala nu kuyapeela ivikalondeka. Antu yonsi aalaya pano nsi yalaya “ana yakwe Leza” lino yalaya aamalilike nu kutwalilila ukuya acisinka kuli Yeova apa kweziwa kwa kusyalikizya.—Loma 8:21; Umbw. 20:7, 8.

5, 6. U wila ci ucindame uno avyazi yangapeela ana yao, nupya i cani cino cila mwana afwile ukucita pa wila uu? (Lolini icikope ca kutandikilako.)

⁵ Ndi cakuti avyazi yakwazwa ana yao ukumanya ukuti Yeova a Isi wao uwa kwiyulu, nu kuyasambilizya ukuti yapepa kuli aaliwe, ala yakuyapeela uwila usuma. Umwangalizi umwi uwa ciputulwa uku South Africa walanzile ati: “Ukufuma pano ana itu akazyanya yavyalilwe, napepanga nayo lyonsi lino yakuya ukukulala, suka sile nga nsipo. Ana itu yakalanda ukuti yatanga iusye amazwi alumbulwanga umu mapepo. Lelo cino yakaiusya icakuti twalandanga na Tata witu Yeova. Lino yakuzile, nayakomelezyanga ukuti yaapepa pakuti inuvwa vino yakupepa. Insita ii yaali isuma sana iyakuti ningayavwa ukumanya ningo ivyakupepa. Alino lyene nayanenanga apa vintu ivicindame sana ivyaya umwipepo lino Yesu wasambilizye asambi pakuti amapepo yao yaaya asuma.”

⁶ Ana yakwe yonsi yaatwalilile ukupalama kuli Yeova na lino yakuzile. Ndakai yatwalwa nupya yakaombela Yeova pamwi na ya iya yao umu mulimo wa nsita yonsi. Fwandi uwila uno avyazi yangapela ana yao, u kuyasambilizya ukuti yaye ya cuza yakwe Yeova, Leza wa papela-pela. Lelo cila mwana afwile ukutwalilila ukuya cuza wakwe Yeova nu kucindika sana izina lyakwe.—Masa. 5:11, 12; 91:14.

7. I syuko ci lino twakwata, nupya tufwile ukucita uli apisyuko lii?

⁷ Twasyuka sana apa kumanya izina lyakwe Leza nupya fwefwe “antu yakwe.” (Mili. 15:14; Eza. 43:10) Tukapepa kuli Yeova ukuti: “Izina lyako licindikwe,” kulikuti liye ilya muzilo. Nupya tukapepa kuli Yeova ukuti aatwavwa ukutaluka uku vintu viipe ivisimuzanzya. Umutumwa Paulo walemvile ati: “Mwemwe mwaleka ukuti akulukuwa yavwanga mazwi ya misuuli kuli Leza.”—Loma 2:21-24.

8, 9. Langililini vino Yeova aka-azwa yaayo akalondesya ukucindika izina lyakwe.

⁸ Tukalonda ukucindika izina lyako Leza. Nkazi umwi uku Norway uwafwililwe iya asyala nu mwana umonsi uwa myaka iili, walanzile ati: “Ivintu vyasile  vintalila sana. Napepanga kuli Leza cila wanda nupya cila nsita, ukuti angangavwa ukutwalilila ukuya uwa cisinka kuli aaliwe pakuti Satana atakwata apaakwingilila nu kuzewanya Yeova. Nalondesyanga ukucindika Yeova, nupya nalondanga ukuti umwanane akize akalole ya isi nupya umu Paladaise.”—Mapi. 27:11.

⁹ Uzye Yeova waswike ipepo lyakwe nkazi wii? Ee. Aina na yankazi yamwavwanga nu kumukomelezya cila nsita. Lino paapisile imyaka 5, watwazilwe kuli eluda. Ndakai umwanakwe ali ni myaka 20, nupya wawatiziwa. Nkazi wiya walanzile ati: “Naaya ni nsansa cuze, pano ya wane yangazwa ukusunga umwana wii.”

10. I cani icilalondekwa apa kuti izina lyakwe Leza likacindikwe ningo?

¹⁰ Uzye i cani icilalondekwa apa kuti izina lyakwe Leza likacindikwe ningo? Izina lyakwe Leza lilacindikwa ningo sana lino Yeova alonona yaayo aasimucindika alino na yaayo aakana ukateeka wakwe. (Welengini Ezekelo 38:22, 23.) Lyene antu yonsi yalaya amalilike. Ala tukalondesya insita ii, lino iviumbwa vya kwiyulu na antu yonsi yalaapepa Yeova! Nupya vyonsi vino yalaelenganya, vino yalavwanga, na vino yalaacita, vilaacindika izina lyakwe Leza ilya muzilo. Apa cisila cakwe vii, Tata witu uwaya nu kutemwa, “alaya kateeka wa vintu vyonsi.”—1 Kol. 15:28, Cimambwe New Testament.

11, 12. I cani cino Yeova wavwilizye antu yakwe ukumanya umu 1876?

¹¹ Lino Yesu ataatala waya ukwiyulu, atumwa yakwe yamuzizye yati: “Mwene, uzye lyene umawezezya Uwene uku Izlaeli?” Vino Yesu waswike vyalanganga ukuti itaali insita yakuti atumwa yamanye lino Uwene Wakwe Leza wali nu kutandika ukuteeka. Wayanenyile ukuti yalinzile sile ukusumba amano uku mulimo ucindame uwa kusimikila. (Welengini Milimo 1:6-8.) Nakupya, Yesu wasambilizye alondezi yakwe ukulolela insita ino Uwene Wakwe Leza uliiza. Fwandi ukutandika sile umu nsita ya atumwa, Aina Klistu yakaapepa ukuti Uwene kwene uu wize pano nsi.

¹² Lino insita yapalamanga iyakuti Uwene Wakwe Leza utandike ukuteeka ukwiyulu, Yeova wavwilizye antu yakwe ukumanya insita ino Uwene wali nu kutandika ukuteeka. Umu 1876, Charles Taze Russell, walemvile icipande icatangi “Uzye Insita ya Ina Masi, Ilasila Lilaci?” (Gentile Times: When Do They End?). Walondolwile ukuti “myaka 7” iyalumbulwa umu usesemo wakwe Danieli, i cili cimwi ni ‘insita’ ya ina masi iyalumbulwa umu usesemo wakwe Yesu. Icipande cii calondolwile ukuti insita zii zyali nu kusila umu 1914. *—Dan. 4:16; Luka 21:24.

13. I vyani ivyacitike umu 1914, nupya ivikacitika ukutandika umu mwaka kwene uwa, vikalangilila cani?

¹³ Umu 1914, inkondo yatandike umu Ulaya nupya izile ikumana umu nsi yonsi. Pa mulandu ni nkondo kwene ii, kwali ivipowe ivipisye sana. Nakupya lino inkondo yasizile umu 1918, indwala iipisye iya cifine, yumozile antu nyanya umu nsi ukucila na yaaya afwile uku nkondo iya nsi. Ivintu vii a vimwi pali vino Yesu walanzile ukuti i vilaya umu  “cilangililo” ca kumanyilako ukuti akuteeka. Fwandi vyalangilila apaswe ukuti Yesu watandike ukuteeka ukwiyulu umu 1914. (Mate. 24:3-8; Luka 21:10, 11) Umu mwaka kwene uwa Yesu “wapisile wakwe kacimvya kuti akacimvye.” (Umbw. 6:2) Lili kwene, alino Yesu wasumvile Satana ni viwa vyakwe pano nsi ukufuma ukwiyulu. Ukutandika umu mwaka kwene uwa, antu yaalola kufikiliziwa kwa usesemo wa kuti: “Kalanda ku amu nsi na yemba! Pano Ciwa watasumbwa pansi kuno muli, nupya ali nu ukali cuze pano amanyile ukuti watasyala sile ni nsita inono.”—Umbw. 12:7-12.

14. (a) U mulandu ci uno tukapepela ukuti Uwene Wakwe Leza wize? (b) U mulimo ci ucindame uno tulinzile ukuomba?

¹⁴ Usesemo uu uwalembwa apa Umbwilo 12:7-12 ukatwavwa ukumanya ningo umulandu uno ivintu iviipe vyatandikile ukucitika pano nsi lino Yesu watandike ukuteeka umu Wene Wakwe Leza. Nanti icakuti Yesu akaateeka ukwiyulu, Satana nawe akaateeka insi. Lelo likwene sile Yesu wasya amalilile ‘ukucimvya,’ lino alafumyapo iviipe vyonsi pano nsi. Lino tukulolela insita ii, tukapepa ukuti Uwene Wakwe Leza wize, nupya tukaaya aapamviwe lyonsi ukusimikila apa Wene kwene uu. Umulimo uu ukafikilizya usesemo uno Yesu walanzile uwakuti: “Ilandwe  lisuma lii lya wene lilakosolwa umu nsi yonsi kuya umboni ku antu amu nko zyonsi, alino impelelekezyo iliiza.”—Mate. 24:14.

15, 16. Uzye tungacita uli pakuti vino tukacita vyauvwana na vino tukapepa ukuti ukulonda kwakwe Leza kucitike?

¹⁵ Mpiti sana lino antu yataatala yapondoka, ukulonda kwakwe Leza kwacitikanga pano nsi. Ali mulandu uno Leza walandiile ukuti: vyonsi vino waumvile vyali “ivisuma wakwe cimwi.” (Utan. 1:31) Lyene Satana wapondwike, nupya ukufuma liili kwene, antu anono sile aakacita ukulonda kwake Leza pano nsi. Lelo ndakai twasyuka sana ukuti twaya apiumba lya Nte Zyakwe Yeova apiipi na 8 milyoni aakapepa ukuti ukulonda kwakwe Leza kucitike pano nsi nupya yakaezya na maka ukucita ivintu ukulingana ni pepo kwene lii. Vikwene ali vino yakacita umu wikalo wao na lino yakuombesya umu mulimo wa kupanga asambi.

¹⁶ Nkazi umwi misyonali umu Africa uwa watiziwe umu 1948 walanzile ukuti: “Ukulingana na vino ipepo kwene lii likalanda, nkapepa ukuti antu yonsi aaya wa mfwele yace yamanye icumi nu kwazwiwa ukumanya Yeova lino kucili insita. Nupya lyonsi lino nkulonda ukusimikila umwi, nkapepa kuli Leza ukuti ampeele amano pakuti imfike umuntu wiyo pa mwenzo. Lyene pa yantu aaya wa mfwele aatandika mpiti ukusambilila icumi, nkapepa ukuti Yeova aalukutwazwa pakuti twayasakamala ningo.” Fwandi ali mulandu uno nkazi wi umukoloci uwa myaka 80 akaombela ningo sana umu mulimo wa kusimikila lino akuombela pamwi na yauze, nupya wazwa aingi ukusambilila icumi. Ukwaula nu kutwisika kwaya aina na ya nkazi na yauze yano mwamanya aakacita ukulonda kwakwe Leza nanti icakuti yatakwata amaka pa mulandu nu kukota.—Welengini Filipi 2:17.

17. Uzye mukauvwa uli pali vino Yeova alacita lino alaasuka ipepo litu ilyakuti ukulonda kwakwe kucitike pano nsi?

¹⁷ Tulatwalilila ukupepa ukuti ukulonda kwakwe Leza kucitike pano nsi ukufika lino alwani yakwe Leza yalafumiziwapo. Lyene tulailolela kuno ukulonda kwakwe Leza kulaacitika lino antu aingi cuze yalatuutuluka nu kwikala umu paladaise pano nsi. Yesu walanzile ukuti: “Mutazunguka pali ci pano kasita kakwiza, kano antu yonsi ali mu malindi yaluvwa izwi [lyane], nu kufumamo.” (Yoa. 5:28, 29) Ala ilaya insita isuma cuze lino kulaya ukupokelela ya lupwa alatuutuluka! Leza “alakumbula aminsozi [itu] yonsi.” (Umbw. 21:4) Antu aingi aalatuutuluka a yaayo aafwile ukwaula ukusambilila icumi pali Yeova na Yesu. Cilaziipa sana ukusambilizya antu kwene yaayo ukumanya vino Yeova akaalonda, nu kuyazwa ukuti yalinge ukwizaya nu “umi wa pe.”—Mili. 24:15; Yoa. 17:3.

18. I vyani vino antunze yakalondesya sana?

¹⁸ Pakuti kukaye umutende konsi, Uwene Wakwe Leza uulalenga ukuti izina lyakwe Yeova licindikwe. Lyene, ivintu vitatu ivyativilandwapo ivyaya umwi pepo lino Yesu wasambilizye asambi yakwe, vilafikiliziwa. Nomba, kuli na vyuze 4 ivicindame ivyalumbulwa umwipepo kwene lii lino Yesu wasambilizye asambi. Tulasambilila pa vintu vivyo umwi sambililo ililondeliilepo.