Ya Paul aali na ana yaili aonsi, yalanzile yati: “Umu mpanga ino twikalangamo, ivintu vyakomile umutengo cuze. Twatantamilanga ivyakulya, insita zimwi pakuti cikufikile, ala vyasila. Antu yonzile wakwe cimwi pa mulandu ni nzala, nupya yamwi yene yafwanga ni cipafi umu museo. Nanti sile utuntu utunono twakomile sana umutengo. Lyene impiya umu mpanga ii zyali kwati pasi na vino zyaombanga. Icaulanda icakuti naponzizye inambala iya ku banki, na mapepala yano nasonkelelangapo impiya uku kaungwe kano yakaati insyuwalansi, alino na mapepala yakwe pensyoni.”

Ya Paul yamanyile ukuti pakuti yasunge ningo ulupwa lwao, yalondekanga ukucenjela nu kuomvya “mano.” (Mapinda 3:21) Ya Paul yalanzile nu kuti: “Naangalilanga umulimo wakulungisya amalaiti pa kampani, lelo lino ivintu vyatazile natandike ukuomba umulimo onsi uwaloleka nupya ulupiya luno yampelanga lutangavwanga ukusunga ulupwa. Yamwi yampeelanga sile ivyakulya nanti vintu vyuze ivyakuomvya apa ng’anda. Ndi yampeela sopo 4 iyakufulalila, naomvyangapo iili, lyene iyasyala inkazya. Wanda umwi nizile inkwata utwana twankoko 40 tuno natesile. Lino utukoko twakuzile, nakazizye tonsi, inkalilapo na zyuze 300. Lyene nizile ntoolapo izili 50 inkauzya na masaaka yausu wakwe cisaka ma 50 kg aali 110. Uusu uu, wangavwile ukusunga ulupwa lwane nupya napelangako na yauze.”

Ya Paul yamanyile ukuti icacindama sana u kutaila Leza. Leza akatwavwa sana ndi tukulondela amasunde yakwe. Yesu walanzile ati: “Acino mutasakamala . . . pali vino mumalya nanti kumwa; pano . . . So wamanya vino mukalonda vintu vii.”—Luka 12:29-31.

Icaipa i cakuti ukutandika na mpiti, Satana walenga antu aingi umu nsi ukusakamikwa apa vintu vyamuwikazi. Yakasakamala pa mulandu wakuti yakalondesya  ukukwata ivintu vingi ivitayakwatile ni incito. Cii cikalenga yamwi ukutandika ukukongola impiya, lyene yakaaya ‘aazya yakwe yayo ayakongwesya.’—Mapinda 22:7.

Antu yamwi nayo yakavilwa ukupingulapo ningo. Ya Paul yalanzile yati: “Aingi yasyanga indupwa zyao iyaya ku mpanga zyuze uku kulonda incito iyakuomba, yamwi yaakatukanga sile ukwaula ni vitupa ivyakwingilila umu mpanga yuze nupya yatingilanga ni incito. Lyene icacitikanga i cakuti, yafisamanga pakuti yakapokola yatayalola nupya yalalanga sile umu miseo. Antu yatataile Leza ukuti angayazwa. Lelo nemo naombelanga capamwi nu ulupwa lwane nupya Leza watwavwanga.”

Nupya ya Paul yalanzile yati: “Yesu walanzile ati: ‘Mutasakamala pa vintu vya mutondo, pano uwa mutondo wene ulaisakamala uwisikulu. Manda yasyacela mumwi.’ Fwandi napepanga kuli Leza kuti ‘atupeele vyakulya’ ivyakuti tulye apa wanda uwo. Nupya vikwene aali vino Yeova watwavwile nu lupwa lwane. Lelo asi lyonsi lino twakwatanga vino tukulonda. Wanda umwi lino naali apa mulongo ntamanyile na vino yaakazyanga. Lino napalime, nazanyile ukuti pali sile umukaka utikame. Nemo ntatemwa umukaka utikame. Nomba pataali vino twaali nu kucita, twalile sile vivyo kwene. Lyonsi nkataizya Leza, pano watwavwile icakuti kutaali uwanda uno twalaalanga ukwaula ukulya.” *

“Ndakai ivintu vyayako ningo pano tusicuula sana nu lupiya. Fwandi vino ivintu vyatazile umu mpanga iitu, caleenga tusambilile ukuti ukutaila Leza kwacindama sana ndi tuli na masakamika. Twamanya ukuti, ndi twatwalilila ukuombela Yeova * alaatwavwa lyonsi. Twasininkizya ukuti amazwi aaya pali Masamu 34:8 aacumi, aakati: ‘Muyuvwile mweisikulu mwenga usuma wakwe Yeova vino waya! Wasyuka wiyo akasimwilila kunoli.’ Caleka, nanti intazi zivulisye tusisakamala.

“I cumicumi, twasininkizya ukuti incito nanti impiya, vitanga vyavwe umuntu ukuya nu umi, kano sile ivyakulya. Acino tukulolela lino ulayo wakwe Leza ulafikiliziwa uwakuti, kulaya ‘ivyakulya’ ivingi sana umu nsi. Fwandi ndakai ukukwata ‘ivyakulya ni vyakuzwala, ala vyati vitulingana.’ Tukakomeleziwa sana ndi twawelenga amazwi aaya muli Baibo, aakuti: ‘Mwaikala umi uwakuntatemwisya impiya, mwalola ukuti vino mukweti vyamukwana. Pano Leza wati: “Ntalatala imusye nanti ukumutazyela.” Lyene lekini tuvwange nu kupama tuti: “Mwene aali kaazwa wane, ntaloopa cimwi.”’” *

Pakuti twalondela masunde yakwe Leza tulinzile ukuya nu utailo, wakwe ya Paul nu lupwa lwao. (Utandiko 6:9) Ndi tukasakamala pa mulandu wa kuulizya impiya nanti limwi uku nkoleelo twaca twakwata uwavya uwo, tuce twaiusya utailo uno ya Paul yaaya nao alino na vino yaomvizye amano.

Nga lyene tungacita uli ndi tukusakamala pa mulandu ni ntazi izya mu lupwa?