Amawe yakusiila yayaomvyanga uku kusiila usu uwa kupangilako umukate. Cila wanda anaci nanti azya aombanga umu mang’anda, yaomvyanga sana mawe kwene yaayo. Fwandi pa nsita iiya icongo ca mawe aakusiila cuvwikanga sile cila wanda.—Kufuma 11:5; Yelemiya 25:10.

Uku Eguputo kwaya ivintu vya mpiti iviwaze ivikalangilila vino yaomvyanga mawe yakusiila. Yatoolanga ingano iika piwe ilyakusiilapo. Lyene umuntu watoolanga umwanansyo atandika ukusya. Kulingana na vino yalondelezya, cazanikwa ukuti umwanansyo wafinanga ma kg ukutandikila pali yaili kufika kuli 4. Ndi cakuti yaomvya umwanansyo ukutamilako umuntu, umuntu wiyo ale amafwa.—Yakapingula 9:50-54.

Umwanansyo wali umucindame sana, ali cino Baibo yalesizye antu ukuti yatalinzile ukulemelamo umwanansyo ndi cakuti umwi wayakongola vimwi. Pa Malango 24:6 pakaati, “Ndi cakuti wazima umuzo icintu cimwi, utalinzile walemela penepo umwanansyo wakwe kuti ace akuwezezye icintu cico zuwa. Awe, ndi caya vivyo ale wamukoma sile.”

Baibo yalanda ukuti Yesu “wikala pamwi ni Isi.” (Yoane 1:18) Amazwi yaa yakalozya kuli vino Yesu yatemwana sana na Leza nupya waya umupiipi na aliwe. Amazwi kwene yaa yafuma uku lutambi luno Ayuda yalondelanga apakulya.

Lino Yesu wali pano nsi, Ayuda ndi yakulya iikalanga ala yati yazinguluka tebo. Antu akulya yakuwamilanga kuli tebo ala iyasintilizya nu tunkonci twakuli cimani apa musamilo utonte. Nomba ikasa lya kwilunji lyene, yataalisintilizyanga apali ponsi. Ibuku limwi lyalanzile liti: “Vino antu yonsi alyanga yakuwamilanga kuli cimani, calenganga ukuti cila muntu aapalama sana uku muze, nupya umuze wikanga umutwe wakwe lwa pa cisao camuze.”

Acino ukupalamana nu muntu aatapekanya ivyakulya, lyali isyuko wakwe cimwi. Caleka, lino Yesu wazevyanga Ucilo wakusyalikizya, Yoane umutumwa wino Yesu “watemilwe” wapalamiile apa “cifuwa cakwe Yesu” lino wamuzyanga iuzyo.—Yoane 13:23-25; 21:20.