Naakulile umu musumba wa Los Angeles ku California umu U.S.A., antu yamwi aali uku ncende kwene ii, yaali ankalwe nupya yaomvyanga imilembo iikavulunganya uwongo. Umu lupwa lwitu twaali ana 6 nupya nene ndi wakwe ciili apa yana kwene yaayo.

Yamayo yatusendanga uku evanjeliko ceici. Lino naafisile apa ulumendo, natandike ukucita iviipe. Pa mulungu naayanga uku ceici uku kwimba. Lyene umukasi ka mulungu naayanga uku kwizizya capamwi na anji; twaomvyanga milembo iikavulunganya uwongo, nupya twacitanga nu upulumusi.

Nasokaanga zuwa nupya naali nu unkalwe. Naomvyanga icanzo cili consi ku kumilako antu. Vino nasambilile uku ceici vitangavwanga nanti acimwi. Naelizye ukuomvya amazwi aakuti, “Nene nkalandwilako Umwene Leza!” Lino naali apa sukulu umu myaka yakwe ya 1960, natandike ukuya umu tu-ungwe twa yantu akacuzya sana auze. Nupya ningile umu kaungwe akakalandilako antu apa nsambu zyao. Imiku ingi twacitanga ivimvulunganya icakuti na ya kasukulu iyatala iyalaalika isukulu apa manda yamwi.

Nomba naweni kwati ivimvulunganya vii, vitafisilepo. Acino natandike ukuya umwiumba lya vipondo. Kwali insita imwi ino twaile umu kutamba filimu, lyene filimu ino twatamvile yalanganga vino azungu yacuzyanga sana aina Africa. Lino twaweni vivyo, twasosile sana, icakuti itutandika nu kuuma azungu ance yano twazanyile umu cikulwa kwene ciico. Lyene lino twafumile mu cikulwa ciico, twaile umu mang’anda pakuti tuume azungu na yauze kwene.

Lino paasiile pano ukuti nkumanye imyaka 20, twaali sana nu lwete capamwi na inane yatatu. Twatandike ukuya ni intazi sana pali vino twacitanga. Umuto wane wenga wali umwiumba lya vipondo ivipisye, nupya nani kwene natemilwe sana ukuya apiumba kwene lilyo. Icumi kwene, naweni ukuti imiyeele yane ikwipilako sile!

Cuzane, wali a mwana ya Nte. Wanda umwi avyazi yakwe yandaalikeko uku kulongana, nupya naazumile. Uwanda kwene uuwa, naweni ukuti ya Nte yaiyeela sana. Pano yonsi yaali na maBaibo nupya yaayaomvyanga lino yakulongana. Lyene ni canzungwile sana, i cakuti na acance kwene iimililanga apa nkoleelo ala yakulanda amalyasi umu cilongano! Ala mwandi natemilwe sana lino namanyile ukuti Leza wakwata izina, ilyakuti Yeova nupya nuvwile na kuno yakuliomvya. (Masamu 83:18) Umu cilongano mwali antu aafuma umu mpanga izipusane-pusane, lelo calolike apaswe ukuti yonsi kwene yakauvwana asi mulandu nu kupusana kwa nkanda.

 Apa kutandika ntalondanga ukusambilila Baibo na ya Nte, nomba uku kulongana kwene naayanga. Uwanda umwi, lino naaile uku kulongana kuli ya Nte, aanji yano twacitanga nayo iviipe, nayo yaile ukuviila vyao. Kuuko kwene akuno yaile yakoma umulumendo umwi, pa mulandu wakuti wakanyile ukuzula jaketi. Uwanda walondelilepo, yatandike nu kuitakizya pali vino yaacisile. Yasekanga nu kuseka, yene yelenganyanga ukuti pataali viipe vino yaacisile. Lyene aingi pali yaayo yaayapingwilile ukufwila umu cifungo. Ntamanyile na vino ningalanda apa luzango luno nakweti, pano nemo uwanda uuwo ntaali na antu yaayo. Lilyo kwene aali lino napingwilepo ukutandika ukusambilila Baibo nupya nasenwike.

Icumi kwene vino naweni muli ya Nte Yakwe Yeova, vyampezizye amano sana pano nemo napasile antu aankanda yuze. Nazungwike sana ukulola Nte umuzungu wasiila umwina Africa kuti aamusungila ana yakwe apa nsita ino wafumilepo. Nupya ulupwa lumwi ulwa yazungu lwatozile umulumendo umwina Africa nu kutandika ukumusunga. Nasininkizye ukuti ya Nte Yakwe Yeova yakalondela sana amazwi yano Yesu walanzile aaya pali Yoane 13:35 aakuti: “Ndi mukutemwana lyene antu yonsi yalamanya vino mwemwe alondezi yane.” Icumi kwene namanyile ukuti kuu kuli kupepa kwa cumi umwaya ulupwa ulwatemwana.

Lino natandike ukusambilila Baibo, nizile niluka ukuti ndinzile ukusenuka muli vino nelenganyanga. Pano nazanyile ukuti ukuya ni miyeele isuma kwali nu kulenga umi wane ukuya usuma. (Loma 12:2) Fwandi natandike ukulunduluka muli ukapepa. Lyene umu Januwale 1974, nawatiziwe.

Lelo nanti nawatiziwe nalondekanga ukuombela apa wavya uno naali nao, uwakusoka zuwa. Uwanda umwi, lino nayanga umu kusimikila uku ng’anda ni ng’anda, kwali umupuupu umwi uwanjiyile ledyo iyaali muli motoka, lyene namuzinginye pakuti nkapoke ledyo. Lino waweni ukuti inamuzana, wasile waponya ledyo. Lyene lino naile indondolwelako yauze vino caali pakuti impoke ledyo, eluda umwi uno twali nawe apiumba, wanguzizye ati: “Stephen, uzye umuzana umuntu wiyo, ngu wacita uli?” Iuzyo lii lyandenzile ukuti ntandike ukwelenganyapo sana nu kulondesya ukuombesya pakuti naaya uwa mutende uku yanji.

Umu Okotoba 1974, natandike ukuomba sile umulimo wakusimikila, nupya cila mwezi naombanga ama-awazi 100 mu mulimo wa kusambilizya antu Baibo. Lyene nizile nkwata isyuko ilya kuombela api Ofesi Lyakwe ya Nte Ilikalamba Umu Nsi yonsi uku Brooklyn, New York. Umu 1978, naswilile uku mwitu ku Los Angeles uku kusakamala yamayo aalwalanga. Lino papisile imyaka iili, nizile ntwala Aarhonda. Ala mama wii wantungililanga sana ukusakamala yamayo kufika na lino yafwile. Lyene, apacisila twaile ku Sukulu Lya Baibo Ilya Gilyadi, nupya yatutumile uku Panama, kuno twatwalilile ukuomba umisyonali.

Ukufuma lino nawatiziwe, nakwatanga intazi izingi izyalenganga ukuti limwi ningatandika unkalwe. Fwandi antu ndi yaansonka nasambilile ivyakucita, pakuti ningacimvya uwavya uwo. Antu aingi kumwi na mamane, yakantaizya sana pakulola vino naombesya ukutaaluka unkalwe. Nanti anene kwene nkazunguka pali vino nasenuka! Icalenga ukuti nsenuke, aasi amaka yane foo. Lelo nazumila ukuti icalenga, aamaka yano Baibo yakwata aakusenula antu.—Ayebulai 4:12.

I cumicumi Baibo yalenga umi wane ukuziipa nupya yangavwa ukumanya vino ningauvwana ningo na anji. Lyene naata ukuma antu, cino nkacita sile u kuyasambilizya icumi. Nupya natandike nu kusambizya Baibo umuntu umwi uno napasile sana lino naali pa sukulu! Lino wizile awatiziwa, apa nsita imwi twatazile twikalapo nawe umu ng’anda ili imwi. Ndakai lyene, twatatemwana cuze. Lyene paa, mamane naani, twavwa antu ukucila pali 80 ukuya Inte Zyakwe Yeova, ukupitila mukuyasambilizya Baibo.

Nkataizya Yeova nu mwenzo wane onsi, pano umi wane walondoloka nupya naaya ni nsansa cuze apa kuzana yakapepa ya cumi.