LYASI LYAKUTANDIKILAKO UZYE UMUNTU NDI WAFWA—ANGAYA NU UMI NUPYA?
Uzye Cilaya Uli Uku Antu Aafwa?
Uzye afwe yangaya nu umi nupya?
VINO BAIBO IKASAMBILIZYA AEVI: “Kasita kakwiza, kano antu yonsi ali umu malindi yaluvwa izwi lyakwe [Yesu] nu kufumamo.”—Yoane 5:28, 29.
Fwandi ali cino Yesu wasowile ukuti lino alateeka umu Wene wakwe, umu malindi mutalaya nanti cimwi. Fernando uwatalumbulwa umu cipande cafumako, walanzile ukuti: “Nazungwike sana umuku wa kutandikilapo lino nawelenzile pali Yoane 5:28, 29.” Nupya walanzile nu kuti: “Mazwi yayo yankomelizye nupya natandike ukwelenganya sana pali vino ivintu vilazipa uku nkoleelo.”
Yobo umonsi uwa utailo uwaliko mpiti welenganyanga ukuti ndi wafwa, Leza wali nu kumutuutulula. Yobo uziizye ukuti: “Uzye umuntu ndi wafwa angaya nu umi nupya? Ndi cakuti ali vino cingaya nemo fwandi apa manda yonsi yano ningakuombela ningalolela kufika na pa nsita ino amalanda yane yangansilila. Lyene ali lino ungangama, nga nani inaasuke.”—Yobo 14:14, 15.
Ukutuutuluka kwakwe Lazalo kukalenga tutaile ukuti ivintu vilazipa uku nkoleelo
Mata kaci wakwe Lazalo atatwisikanga ndi cakuti kwaya ukutuutuluka. Lino Lazalo wafwile, Yesu wanenyile Mata ati: “Kalume wako amazyukuka nupya.” Mata waswike ati: “Nati manya vino alazyukuka nupya mu kuzyukuka kwa pa wanda wampelelekezyo.” Yesu nupya walanzile ati: “Nene kuzyukuka nu umi. Wino wensi wantaila nanti angafwa alaya nu umi nupya.” (Yoane 11:23-25) Lyene Yesu papo kwene watuutulwile Lazalo! Ilyasi lii ilyalembwa muli Baibo likatukomelezya sana lino tukweleganya pa vintu visuma ivilacitika uku nkoleelo. Elenganyini vino cilazipa ukulola kuno afwe yakutuutuluka umu nsi yonsi!
Uzye kwaya yamwi alaya ukwiyulu ndi yatuutuluka?
VINO BAIBO IKASAMBILIZYA AEVI: Baibo ikalanga ukuti ukutuutuluka kwakwe Yesu kwapusine nu kwa yantu 8 aatuutulwike yano Baibo yalandapo. Antu yaya 8 yatuutulwike iyaya nu umi pakwene pano nsi. Lelo pa kutuutuluka kwakwe Yesu, Baibo ikalanda ukuti: “Ndakai Klistu waya ukwiyulu kuno atenzi kwikasa lilunji lyakwe Leza.” (1 Petulo 3:21, 22) Uzye a Yesu sile aliwe wali nu kutuutulukila ukwiyulu? Yesu wanenyile atumwa yakwe ati: “Lyene ndi napita kukumuteyanyizizya incende, ndawela kwiza mutola kuti kunondi akuno namwe mukaye.”—Yoane 14:3.
Klistu waile ukwiyulu umu kupekanyizizya asambi yamwi incende. Yonsi alatuutulukila ukwiyulu yaaya 144,000. (Umbwilo 14:1, 3) Nomba i vyani vino yalaacita ukwiyulu?
Yalakwata ivyakucita ivingi sana! Baibo ikatunena ukuti: “Alongo nupya apolelelwe cuze ayao alakumako ku kuzyukuka kuu kwa nkoleelo. Imfwa yakwe ciili italaya na maka pano yali. Yene yalaya ya simapepo yakwe Leza na yakwe Yesu Klistu, nupya yalateeka pamwi na Klistu kulingana ni myaka izimbi lyonga [1,000].” (Umbwilo 20:6) Yonsi aalatuutulukila ukwiyulu yalaya ayene nupya ya simapepo, aalateeka capamwi na Klistu.
Aaweni yauze aalatuutuluka pa cisila cakwe ya 144,000?
VINO BAIBO IKASAMBILIZYA AEVI: Mutumwa Paulo walanzile amazwi akuti: “Nakwata upaalilo muli Leza uli umwi na uno yene yakweti, uwakuti antu onsi, [aololoke na asi aololoke], yalazyukuka kufuma ku afwe.”—Milimo 24:15.
Baibo yatulaya ukuti antu aingi cuze aafwa yalaya nu umi nupya
Uzye aaweni yano Paulo walozyangako lino walanzile ukuti aololoke? Lekini tulandeko pali Danieli umonsi uwali nu utailo. Danieli yamunenyile pa umi wakwe ukuti: “Alino lyene ulafwa, lelo pa mpela ya nsita ulazyukuka kuti upokelele caupyanyi cako.” (Danieli 12:13) Uzye aekwi kuno Danieli alatuutulukila? “Antu aololoke yalikala umutende umu mpanga, nu kuipyana umuyayaya.” (Masamu 37:29) Nupya Yesu wasowile ukuti: “Alongo antu afuke. Pano yalapyana insi.” (Mateo 5:5) Danieli alino na onsi na anaci aali nu utailo yalatuutuluka nupya yalikala pakwene pano nsi amanda pe.
Nga lyene aaweni yano Paulo walozyangako lino walanzile ukuti asi aololoke? Kwaya antu aingi cuze aaliko nupya yamwi yafwile ukwaula ukumanya icumi pali Leza. Fwandi yene lino yalatuutuluka yalapeelwa isyuko ilyakusambilila pakuti yakamanye Yeova *na Yesu. (Yoane 17:3) Yonsi aasoolola ukuombela Leza yatalatala yafwe, yalikala manda pe wakwe vino Yeova waya uwa manda pe.
Yonsi aasolola ukuombela Leza yalikala manda pe yalaya nu umi umalilike nupya yalaya nu luzango cuze
Uzye ivintu vilaya uli pano nsi?
VINO BAIBO IKASAMBILIZYA AEVI: Leza “alayakumbula minsozi yonsi. Kutalaya imfwa nupya. Kutalaya kulosya nanti ukulila, nanti ukuvwa ukuwaika.” (Umbwilo 21:4) “Yalakuula amang’anda ya kwikala mwenemo, yalaalima ni vyalo vya matingi nu kulya iviseekwa vya mwenemo.”—Ezaya 65:21.
Elenganyini vino cilaziipa ukwikala capamwi na ya lupwa inu nanti ya cuza inu aalatuutuluka! Nomba iuzyo lino tunguzya i lyakuti, Uzye twasininkizya uli ukuti aafwe yalatuutuluka?
^ par. 15 Yeova ali zina lyakwe Leza ilyaya muli Baibo.
