LYASI LYAKUTANDIKILAKO UZYE UMUNTU NDI WAFWA—ANGAYA NU UMI NUPYA?
Uzye Umuntu Ndi Wafwa Akaaya Kwi?
Ya Lionel yalanzile iyati: “Nemo natangi kwaya ivifulo vitatu kuno umuntu akaaya ndi wafwa: kwiyulu, uku moto nanti uku cifulo cuze umu kucuululuka. Namanyile ukuti nemo intacitanga ivisuma ivyali nu kundenga ukuya ukwiyulu nanti ukucita iviipe ivyali nu kundenga ukuya uku moto wa pe. Nupya ntamanyile ningo ivikacitika uku cifulo cino umuntu akaaya umukucuululuka. Ntatazile inzane ivisinka vivyo muli Baibo. Antu sile aalio yalandanga vivyo.”
Ya Fernando yalanzile iyati: “Nemo yansambilizye ukuti antu yonsi ndi yafwa yakaya ukwiyulu, nomba ntasininkizye. Nelenganyanga ukuti umuntu ndi wafwa ala casila atalatala aloleke nupya.”
Uzye mwatala mwelenganyapo apa mauzyo yaa: ‘Uzye aafwe yakaaya kwi? Uzye kwaya icifulo cimwi kuno yakaaya umu kucuula? Uzye tulatala tuyalolepo nupya? Tungasininkizya uli?’ Fwandi lekini tulole vino Baibo ikasambilizya. Cakutandikilapo, tumasambilila pali vino aafwe yaaya. Lyene tumalanda na vino Baibo yatulaya pali vino cilaya kuli yonsi aafwa.
Uzye cikaaya uli umuntu ndi wafwa?
VINO BAIBO IKASAMBILIZYA AEVI: “Antu lino yacili nu umi yakamanya ukuti yalafwa. Lelo afwe yatamanya nanti acimwi. Yene yatakwata icilambu nacuze. Yene yililika pyu. Uwaombesya muli vyonsi vino ukucita, pano kuzimo [ukwilindi] kutalaya vicitwa, kutalaya amano, nga kuko akuno ukuya.” *—Kasambilizya 9:5, 10.
Ilindi ilyaomviwa muli Baibo, i cifulo ica unkolanya ukwaya antu afwa, kuno yasitwalilila ukwelenganya nanti ukucita icili consi. Nga Yobo umonsi wa utailo, wamanyilepo uli pi lindi? Mu wanda sile onga Yobo waponzizye ivyuma vyakwe vyonsi kumwi na ana yakwe, nupya watandike ukucuula uku ulwale uwipisye uwa vipute. Wapapasile kuli Leza ati: “Iye mwe! Fwandi cangecizipe umfisa kuko kwene ukwaya afwe.” (Yobo 1:13-19; 2:7; 14:13) Fwandi, Yobo atelenganyanga ukuti ilindi i cifulo ukwaya umoto kuno angaya akatwalilile nupya ukucuululuka ndi wafwa. Lelo wene wamanyile ukuti u kwa kupuzila.
Kwaya inzila nayuze ingatwavwa ukumanya vino aafwe yaaya. Tungasambilila malyasi alembwa muli Baibo aakalanda pa yantu 8 aatuutulwike.—Lolini kambokosi akakuti: “ Antu 8 Aatuutulwike Yano Baibo Yalandapo.”
Pataya nanti aumwi pali yonsi uwalanzile ukuti lino wafwile waile aya nu luzango sana uku cifulo cimwi nanti ukucuululuka. Ndi cakuti antu yaa 8 aatuutulwike, yaile uku cifulo cimwi lino yafwile, uzye ndi yatasimikileko antu vino uku cifulo cico kwaya? Nupya, uzye muli Baibo ndi mutalembwa malyasi yano yasimike pakuti antu yonsi yamanye? Muli Baibo mutaya malyasi yaayo. Antu yaayo 8 aatuutululwike pasi vino yalanzile ivikalangilila ukuti umuntu ndi wafwa akaaya akutwalilila nu umi uku cifulo cuze. U mulandu ci? Pano lino yafwile yatelenganyanga nanti acimwi, caali sile kwati iyakasula utulo. Insita zimwi Baibo ikaomvya izwi lyakuti utulo ku kulangilila vino imfwa yaaya. Lino Lazalo wafwile, Yesu wavwanzile ati: “Watakasula” sile.—Yoane 11:11-14.
Nga lyene cilaya uli uku yafwe? Uzye yalakatuka umu tulo?
^ par. 7 Izwi lyakuti “Kuzimo” nanti ukwilindi, ali lino yasenula ukufuma ukwizwi lya ciYebulai ilyakuti “Sheol,” ni lya ciGliki ilyakuti “Hades.” Mu maBaibo yamwi, yaomvya izwi ilyakuti “umoto wa pe,” lelo icisambilizyo icakuti umuntu ndi wafwa akaaya umu kucuululuka umu moto citafuma muli Baibo.
