Akakazyana akali ni myaka umu piipi na 4 kaweni icunsi cikuloleka kwati amakumbi cikufuma umu mipaipi ya cikuulwa muno yakapangila ivintu. Kasondwelile ukuti umu cikuulwa cici amuno yakapangila makumbi. Umwana umunono ndi walanda ivintu vya musango uwo vino atuvwikisye, vingamusekesya sana. Lelo ukukana uvwikisya ivintu vimwi ivicindame kungasenula umi witu. Tuti limwi umuntu atawelenzile ningo ivilemvilwe pa cikopo ca mulembo, cingalenga ailetelele.

Ukukana uvwikisya amazwi yano Leza akatunena, kwene kungacila napo ukutuletelela. Antu yamwi yatuvwikisye vino Yesu wasambilizyanga. (Yoane 6: 48-68) Mu cifulo cakuti yasambililepo na vyuze, yene yakanyile ukuvwa vyonsi vino Yesu wasambilizye. Yaaipuswile uku vintu ivingi sana!

Uzye mukawelenga Baibo pakuti yamutungulula? Nga vino mukacita ale caya sile ningo. Nomba uzye mungakwata intazi ndi cakuti mutuvwikisye vimwi vino mwawelenga? Ca musango uwo cikacitikila antu aingi. Lekini tulande pa vintu vitatu vino antu yakavilwa ukuvwikisya.

• Antu yamwi yakafilwa ukuvwikisya muno isunde ilyaya muli Baibo lyalola, ilyakuti: “Uwaoopa Leza.” Yakaelenganya ukuti tulinzile ukumutiina sana. (Kasambilizya 12:13) Nomba Leza asilonda ya kapepa yakwe yauvwa vivyo. Watunena ukuti: “Ali cino mwemo mutaoopa, nemo namayanga pee namwe. Mutasakamala nanti cimwi pano nene indi Leza winu. Nene namamukomyanga nupya namamwavwanga.” (Ezaya 41:10) Ukoopa Leza cikapiliula ukuti tulinzile ukumupeela sana umucinzi.

• Yamwi yasiuvwikisya amazwi afuma kuli Leza akuti: “Icintu consi icikacitika muno nsi, cakwata insita ino cikacitikilapo. . . . Kwaya insita ya kuvyalwa ni nsita ya kufwa.” Yakalanda ukuti Leza wikila limwi insita lino cila muntu alafwa. (Kasambilizya 3: 1, 2, NWT) Lelo amazwi yayo yakalanda sile pali vino umi waya nupya yakamanyisya nu kuti imfwa ali cintu icaseka sana. Nupya Izwi Lyakwe Leza likasambilizya ukuti vino tukapingulapo ukucita vingalenga tufwe zuwa nanti twikale amanda aingi. Tukawelenga ukuti: ‘Ukoopa Yeova kukalundulula uumi.’ (Mapinda 10:27; Masamu 90:10; Ezaya 55:3) U mulandu ci? Ukucindika vino Izwi Lyakwe Leza likalanda kungalenga twataluka uku miyele iipe ili wakwe ukukoleka alino nu uzelele.—1 Kolinto 6: 9, 10.

• Yamwi yakaelenganya ukuti vino Baibo yalanda ukuti mayulu ni nsi “vilononwa nu moto,” aali vino cilaya, nupya yakati Leza alonona insi yonsi. (2 Petulo 3:7) Nomba Leza watulaya ukuti atalazumilizya insi ii ukononwa. Leza “wasimpisya insi ndi, isi yakutelengana foo.” (Masamu 104:5; Ezaya 45:18) Ivintu iviipe ivikacitika umu nsi i vilononwa, asi insi foo, vilononwa icakuti vitalatala vicitikepo nupya cilaya kwati vyononwa nu moto. Lelo ndi Baibo yalanda pa mayulu, limwi ingalozya ku makumbi, intanda nanti kuno Leza akaikala. Pasi nanti acimwi pali vii vyonsi icilononwa.

Wakwe vino tuvwa papela ilingi antu yakavilwa ukuvwikisya viputulwa vino yakawelenga muli Baibo. Nomba u mulandu ci uno Leza angazumilizizya ivya musango uu ukucitika? Yamwi yangati: ‘Ngi cakuti Leza wakwatisha amano nu kumanya konsi, nga watupeela ibuku ilyalembwa ningo umuli ivyeo vyuvwike vino antu yanguvwikisya. U mulandu ci uno atacitile vivyo?’ Lekini tulande pa vintu vitatu ivyalenga antu yatauvwikisya vino Baibo ikalanda.

1. Baibo yalembwa umu nzila yakuti antu aicefye nupya akaitemelwa ukusambilila aaliyo  yauvwikisya. Yesu wanenyile Isi ukuti: “Tata, Mwene wi yulu ni nsi! Nakutaizya pano watusokolola ku antu atasambilila cino wafisa ku antu yamano na asambilile.” (Luka 10:21) Baibo yalembwa umu nzila yakuti antu akulondesya ukusambilila aliyo yauvwikisya amazwi aayamo. Antu “yamano na asambilile” yaya ni cilumba na ci cikalenga yafilwa ukuvwikisya ivyaya muli Baibo. Lelo antu “atasambilila” yafuuka nupya yaya wa ana anono aakalondesya ukusambilila, na cii cikalenga yauvwikisya amazwi yakwe Leza aya muli Baibo. Mu cumi Leza walemba ningo Baibo!

2. Baibo yapangilwa antu aakalonda ukuti Leza ayaazwa ukuvwikisya. Yesu walangilile ukuti antu yalondekwanga uwazwilizyo pakuti yuvwikisye vino wasambilizyanga. Nomba yaali nu kupokelela uli uwazwilizyo uwo? Yesu walondolwile ukuti: ‘Kaazwa, umupasi wamuzilo, wino Tata alatuma mwi zina lyane, wene ulamusambilizya vintu vyonsi.’ (Yoane 14:26) Fwandi Leza akapeela umupasi wakwe uwa muzilo kulikuti amaka yakwe akaomba uku yantu pakuti yuvwikisye vino yakuwelenga muli Baibo. Lelo Leza asipeela umupasi wakwe ku antu atamutaila, fwandi yene, Baibo ikaloleka ikome. Nupya umupasi wa muzilo ukalenga yayo amanyikisya vino Baibo ikalanda yalonda ukwavwa akulondesya ukuvwikisya.—Milimo 8: 26-35.

3. Antu yanguvwikisya malembelo yamwi aya muli Baibo pa nsita ilinge. Danieli yamunenyile ukulemba pa vintu ivilacitika uku nkoleelo. Mungeli wamunenyile ukuti: “We Danieli, kupika ulupapulo nu kwikapo icimanyililo ukufika uku nsita ya mpela ya nsi.” Pa myaka iingi, antu aingi yakawelenga ibuku lyakwe Danieli nomba yafilwa ukuvwikisya. Na Danieli umwineco kwene nawe atuvwikisye vimwi vino walembanga. Walanzile ukuti: “Inuvwa vino wene walanda, lelo ukwaula kuti niluke.” Umukuya kwa nsita antu yanguvwikisya ningo usesemo uno Danieli walemvile, lelo yanguvwikisya sile lino insita ino Leza wasoolola yafika. Umungeli walondolwile ningo ukuti: “We Danieli, ulinzile kupita, pa mulandu wakuti amazwi yaa yalinzile kusungwa inkama nu kufiswa mpaka uku mpela ya nsita.” Nga lyene aaweni aluvwikisya amazwi yayo? “Kusi nanti wenga muli yayo akacita vya ukakasi wino aliiluka, suka sile yayo akwata amano.” (Danieli 12:4, 8-10) Fwandi Leza asisokolola upiliulo wa mazwi yamwi lino insita ino wasoolola itali ifike.

Uzye kwatala kwayapo vimwi ivyalembwa muli Baibo vino na ya Nte Yakwe Yeova yatuvwikisye pa nsita imwi? Ee. Nomba lino insita yafisile ino Leza wasoolwile, yuvwikisye nupya yasenwike nu kutandika ukuomvyva vino yasambiliile. Yamanya ukuti yalinzile ukukolanya asambi yakwe Klistu, aasenwike muli vino yamanyile mpiti nu kutandika ukuomvya ivipya vino Yesu wayanenyile.—Milimo 1: 6, 7.

Limwi vivi vino kakazyana kano itulanda papela kelenganyanga kukafuma makumbi, u kukanamanya sile ningo ukwalenzile. Lelo, vino Baibo ikasambilizya i vyacindama sana kuli mwemwe. Amazwi aya muli Baibo yacindama sana nupya umuntu wensi alinzile awelenge nu kuvwikisya umwineco lino ali wenga akuwelenga. Fwandi mwaleenga uwazwilizyo pakuti mwauvwikisya vino mukuwelenga. Mulinzile ukulonda antu aicefya akawelenga nu kusambilila Baibo, aataila ukuti umupasi wa muzilo ungayazwa, nupya asininkizya ukuti insita yatifika ino Leza akulonda ukuti tuvwikisye sana vino Baibo ikalanda ukucila lyonsi. Cingazipa mukalande na ya Nte Yakwe Yeova zuwa nanti mukawelenge ivyeo vino iika pa webusaiti ya jw.org. Baibo yalaya ukuti: Wino ‘walenga ukwiluka . . . , alazana vino ukumanya Leza kwaya.’—Mapinda 2:3-5.